Ne ‵Kau Atu a Tino Isalaelu i Aso Mua ki Taua—Kaia e se ‵Kau Atu Tatou?
“SO SE tino telā e ita fitifiti ke tau atu ki Falani io me ko Egelani, e ‵tau o tamate katoa!” ne pakalaga atu se ofisa a te kau Nasi ki se potukau o Molimau a Ieova i te Taua i te Lua a te Lalolagi. E tiga eiloa ne faka‵tali mai a sotia o te SS mo olotou meatau, e seai eiloa se taina o tatou ne mataku. Ko tafaga te loto malosi tenā! E fakaasi mai i te tala tenei a te kilokiloga telā e maua ne Molimau a Ieova: E ita fitifiti tatou ke ‵kau atu ki taua a te lalolagi tenei. Faitalia te fakamatakutaku mai latou ki te tamate, e tumau tatou i te sē ‵kau ki se feitu i kinauga a te lalolagi tenei.
Kae e se ko tino katoa kolā e fai mai i a latou ne Kelisiano e lotoma‵lie ki ei. E tali‵tonu a tino e tokouke me e mafai kae e ‵tau o ‵pulu ne se Kelisiano tena fenua. Kāti e fai mai latou’, ‘A tino Isalaelu mua ko tino o te Atua kae ne ‵kau atu latou ki taua; kaia e se ‵tau ei mo Kelisiano o ‵kau atu i aso nei?’ Ka tali atu pefea ne koe? E mafai o fakamatala atu ne koe me i te tulaga o te kau Isalaelu mua e ‵kese ‵ki eiloa mo te tulaga o tino o te Atua i aso nei. Mafaufau ki mea e lima kolā e ‵kese ei.
1. A TINO KATOA O TE ATUA NE AOFIA I SE FENUA E TASI
I aso ko ‵teka, ne fakamaopoopo ne Ieova ana tino ki se fenua e tasi—ko te kau Isalaelu. Ne taku ne ia a te kau Isalaelu ki ana “tino fakapito mai tino katoa.” (Eso. 19:5) Ne tuku atu foki ne te Atua se laukele mautinoa mō latou. Tela la, i te taimi ne fakatonu atu te Atua ki te kau Isalaelu ke olo o taua atu ki nisi fenua, ne seki taua io me tamate ne latou olotou taina tapuaki. *
I aso nei, e o‵mai a tino tapuaki ‵tonu “mai i atufenua mo matakāiga mo tino mo ‵gana katoa.” (Faka. 7:9) Kafai e ‵kau atu a tino o te Atua ki taua, e mafai o taua—kae tamate—ne latou olotou taina tapuaki.
2. NE FAKATONU ATU A IEOVA KI TE KAU ISALAELU KE OLO O TAUA
I aso ko ‵teka, ne fakaiku aka ne Ieova a te taimi mo te pogai e manakogina ei ke olo atu a tino Isalaelu ki te taua. E pelā mo te fakatonu atu o te Atua ki te kau Isalaelu ke fakaoko atu tena fakamasinoga ki tino Kanana, kolā ne lauiloa i te lotou tapuakiga ki temoni, amioga fakatauavaga sē ‵tau, mo te ofoatuga o olotou tamaliki e pelā me ne taulaga. Ne fakatonu atu a Ieova ki te kau Isalaelu ke fakaseai atu a fakamalosiga ma‵sei mai te fenua telā ne tauto atu a ia ke tuku atu ki a latou. (Levi. 18:24, 25) Mai tua o te lotou ‵nofoatuga i te Fenua o te Folafolaga, ne talia ne te Atua i nisi taimi a taua ke ‵pulu ei a te kau Isalaelu mai i fili fakasaua. (2 Samu. 5:17-25) Kae e seai eiloa se taimi ne talia ne Ieova ke fakaiku aka ne te kau Isalaelu i a latou eiloa ke olo atu latou ki te taua. Kafai e fai latou penā, ne masani o matagā a mea ne iku mai i ei.—Nume. 14:41-45; 2 Nofo. 35:20-24.
I aso nei, e se talia ne Ieova a tino ke olo atu ki taua. E fakatau taua a fenua ke fakataunu i ei a manakoga o tino i lō manakoga o te Atua. Kāti e olo atu latou ki taua ke faka‵lasi aka olotou kogā laukele io me ke maua ne tupe io me ko pogai io me ko manatu fakapolitiki. Kae e a latou kolā e fai mai me e taua atu latou i te igoa o te Atua ke puipui te lotou tapuakiga io me ke tamate a fili o te Atua? Ka puipui ne Ieova ana tino tapuaki ‵tonu kae fakaseai atu ana fili i se taua i aso mai mua—ko te taua i Amaketo. (Faka. 16:14, 16) I te taua tenā, ka aofia i te kautau kātoa a te Atua se kautau faka-te-lagi, kae e se ko ana tino tapuaki i te lalolagi.—Faka. 19:11-15.
3. NE FAKA‵SAO NE TE KAU ISALAELU A LATOU KOLĀ NE FAKATUANAKI
E mata, e taua atu te Atua mō so se fenua i aso nei e pelā mo te auala ne taua atu ei a ia mō Isalaelu i Ieliko?
I aso ko ‵teka, ne fakaasi atu faeloa ne te kautau Isalaelu a te alofa fakamagalo ki a latou kolā e fakatuanaki ki te Atua kae tamate fua a latou kolā e fakamasino aka ne Ieova me e ‵tau o tamate. Mafaufau ki tala e lua konei. E tiga eiloa ne fakatonu atu a Ieova ke fakaseai katoatoa atu te fa‵kai o Ieliko, ne faka‵sao ne te kau Isalaelu a Lahapa mo tena kāiga ona ko tena fakatuanaki. (Iosu. 2:9-16; 6:16, 17) Fakamuli ifo, ne faka‵sao a te fa‵kai kātoa o Kipeona mai tua o te fakaasi atu ne te kau Kipeona a te āva ki te Atua.—Iosu. 9:3-9, 17-19.
I aso nei, e se faka‵sao ne fenua kolā e fakatau taua a tino kolā e fakatuanaki. Kae i nisi taimi, e ‵mate atu ei a tino ‵lei i taua i va o fenua.
4. NE FAKA‵LOGO A TE KAU ISALAELU KI TULAFONO A TE ATUA E UIGA KI TAUA
I aso ko ‵teka, ne manako a Ieova ke fai ne sotia Isalaelu a taua e ‵tusa mo ana fakatakitakiga. E pelā mo nisi taimi, ne fai atu a ia ki a latou ke taumafai “ke maua ei te filemu” mo se fa‵kai telā e ‵teke atu. (Teu. 20:10) Ne fakamoemoe foki a Ieova ke tausi faka‵lei ne sotia Isalaelu a te lotou koga ‵nofo ke ‵ma kae ke ‵ma foki latou i mea tau amioga. (Teu. 23:9-14) E tiga eiloa ne pukemālō sāle ne kautau o fenua i olotou tafa a fafine i koga ne fakatakavale ne latou, ne fakatapu ne Ieova a te kau Isalaelu ke fai penā. Ne seki mafai foki o a‵vaga latou ki se fafine ne puke fakapagota ke oko loa ki se masina mai tua o te fakatakavalega o te fa‵kai tenā.—Teu. 21:10-13.
I aso nei, e saina ne te ukega o fenua a feagaiga ke mafai o ‵kau atu ki taua e ‵tusa mo tulafono ne fakatoka i ei. E tiga eiloa ne fai a tulafono konei ke puipui ei a tino, se mea fakafanoanoa me ne masani o ofa sāle a tulafono konā.
5. NE TAUA ATU TE ATUA MŌ TENA FENUA
E mata, e faka‵sao ne taua i aso nei a latou kolā e fakamaoni e pelā mo te auala ne faka‵sao ei a Lahapa mo tena kāiga i te taua a Ieova ki Ieliko?
I aso ko ‵teka, ne taua atu a Ieova mō te kau Isalaelu, telā ne maua sāle ne latou a manumaloga i se auala fakavavega. E pelā me se mea e tasi, ne fesoasoani atu pefea a Ieova ki te kau Isalaelu ke fakatakavale ne latou te fa‵kai o Ieliko? E ‵tusa mo te fakatonuga a Ieova, “i te taimi eiloa ne lagona ei ne [te kau Isalaelu] a te ‵tagi o pu kae paka‵laga atu e pelā me ne tino i te taua, ko ‵pui eiloa o te fakai ko maofa ki lalo,” telā ne faigofie ei ki a latou ke fakatakavale te fa‵kai. (Iosu. 6:20) Kae ne manumalo pefea latou i te taua atu ki te kau Amoli? “Ne faka‵to ifo ne Ieova a vaiua fatu mai te lagi ki a latou . . . A te ‵tonuga loa, e tokouke atu a tino ne ‵mate i te vaiua fatu i lō te pelu a tino Isalaelu.”—Iosu. 10:6-11.
I aso nei, e se taua atu a Ieova mō so se fenua i te lalolagi nei. A tena Malo, fakatasi mo Iesu e pelā me ko te Tupu, “e sē se vaega o te lalolagi tenei.” (Ioa. 18:36) E ‵kese mai i ei, a Satani ko te tino e pule atu ki malo katoa o tino. E fakaata faka‵lei mai ana uiga ma‵sei i te matagā o mea kolā e iku mai i taua a te lalolagi.—Luka 4:5, 6; 1 Ioa. 5:19.
A KELISIANO ‵TONU NE TINO FAKA‵TUPU FILEMU
E pelā mo te mea ko oti ne lavea ne tatou, e ‵kese ‵ki ‵tou tulaga i aso nei mo te kau Isalaelu mua. Kae ko mea konei e ‵kese i ei, e se ko pogai fua e se ‵kau atu ei tatou ki taua. E isi aka foki. E pelā mo te mea ne ‵valo mai ne te Atua, me i aso fakaoti a latou kolā e akoako ne ia “ka se toe tauloto latou ki te faiga o taua,” mai te sē ‵kau atu ki ei. (Isa. 2:2-4) E se gata i ei, ne fai atu a Keliso me i ana soko “e se ne vaega o te lalolagi”; e se ‵kau eiloa latou ki se feitu i kinauga a te lalolagi.—Ioa. 15:19.
Ne fakamalosi atu foki a Keliso ki ana soko ke fai a mea kolā e sili atu. Ne fakatonu atu a ia ki a latou ke ‵kalo keatea mai i uiga kolā e iku atu ki te ita fakamoemoe, kaitaua, mo taua. (Mata. 5:21, 22) E sili atu i ei, e fakatonu atu a ia ki ana soko ke “fakatupu te filemu” kae a‵lofa ki olotou fili.—Mata. 5:9, 44.
Kae e a tatou taki tokotasi? E tonu, e se ma‵nako tatou ke ‵kau atu ki so se taua, kae e mata, e isi eiloa se fakailoga o te uiga kaitaua i ‵tou loto, telā e mafai o māfua mai i ei a taua io me ko mavae‵vaega i te fakapotopotoga? Ke na tumau tatou i te taumafai malosi ke fakaseai atu so se lagonaga penā mai i a tatou.—Iako. 4:1, 11.
I lō te ‵kau atu ki taua a fenua, e fakamalosi aka ne tatou a te filemu mo te fakatau a‵lofa. (Ioa. 13:34, 35) Ke na fakaiku aka ne tatou ke tumau i te sē ‵kau ki se feitu i te taimi e olioli ei tatou ki te aso ka fakaseai atu ei ne Ieova a taua katoa ki se-gata-mai.—Sala. 46:9.
^ I nisi taimi, ne fakatau taua a matakāiga o Isalaelu, faitalia me ne seki fiafia a Ieova ki taua konei. (1 Tupu 12:24) Kae i nisi taimi, ne talia ne ia a vaegā taua penā, ona ko te mea ne ‵teke atu ki a ia io me ne fai ne nisi matakāiga a agasala matagā.—Fama. 20:3-35; 2 Nofo. 13:3-18; 25:14-22; 28:1-8.
