1. E aoga pefea ki a tatou a te mafaufau ‵loto ki te tautoga a Ieova e uiga ki te ola se-gata-mai?

 NE TAUTO mai a Ieova me ka maua ne tino kolā e faka‵logo ki a ia a te “ola se-gata-mai.” (Loma 6:23) Kafai e mafaufau ‵loto tatou ki te tautoga ne tuku mai ne Ieova, e mautinoa eiloa me ka gasolo aka o lasi te ‵tou a‵lofa ki a ia. Mafaufau la: E alofa malosi te ‵tou Tamana i te lagi ki a tatou, tela la, e se mafai o ‵vae kea‵tea tatou mai i a ia.

2. E fesoasoani mai pefea ki a tatou a te tautoga e uiga ki te ola se-gata-mai?

² A te tautoga a te Atua ki te ola se-gata-mai e fesoasoani mai ke kufaki tatou i fakalavelave kolā e fe‵paki nei mo tatou. Faitalia foki loa a te fakamatakutaku mai o ‵tou fili ke tamate tatou, e se mafai eiloa ne tatou o gutugutulua. Kaia? A te pogai e tasi, e iloa ne tatou me kafai e ‵mate tatou ona ko te fakamaoni ki a Ieova, ka toe faka‵tu mai ne ia tatou mai te mate mo te fakamoemoega ke se ‵toe ‵mate. (Ioa. 5:28, 29; 1 Koli. 15:55-58; Epe. 2:15) Kaia e mautinoa i a tatou me e mafai o ola tatou ki te se-gata-mai? Mafaufau ki pogai konei.

3. Kaia e mautinoa i a tatou me e mafai ne Ieova o tausi tatou ke ola ki te se-gata-mai? (Salamo 102:12, 24, 27)

³ A Ieova ko te Pogai o te ola kae e ola a ia ki te se-gata-mai, tela la, e iloa ne tatou me e mafai ne ia o fai tatou ke tumau i te ola ki te se-gata-mai. (Sala. 36:9) Onoono ki nāi fuaiupu mai te Tusi Tapu kolā e fakamaoni mai me i a Ieova ne ola mai loa kae ka ola faeloa. E fai mai te Salamo 90:2 me i a Ieova ne ola “mai te se-gata-mai ki te se-gata-mai.” E tai ‵pau foki te manatu ne fakaasi mai i te Salamo 102. (Faitau te Salamo 102:12, 24, 27.) Kae ne tusi mai te pelofeta ko Sapakuka e uiga ki te ‵tou Tamana  faka-te-lagi: “E a, a koe e seki ola mai i te se-gata-mai, e Ieova? Toku Atua, toku Atua Tapu, a koe e se mate.”—Sapa. 1:12.

4. E mata, e ‵tau o manava‵se tatou māfai e se malamalama i te manatu me e ola faeloa a Ieova? Fakamatala mai.

⁴ E mata, e faigata ki a koe ke malamalama me i a Ieova e ola “ki te se-gata-mai”? (Isa. 40:28) E tokouke a tino e faigata ke malamalama i te manatu tenā. Ne fai mai a Eliu e uiga ki te Atua: “A te aofaki o ana tausaga e se mafai o malamalama tatou i ei.” (Iopu 36:26) Kae e se fakauiga i ei me kafai e se malamalama tatou i se mea, ko tena uiga e se tonu. E pelā mo te sē malamalama ‵lei tatou i te auala e galue ei te mainaga, e mata, e fakauiga i ei me e seai se mainaga? Ikai! I se auala tai ‵pau, e se mafai o malamalama katoatoa tatou me e tumau pefea a Ieova i te ola kae ka ola faeloa a ia. Kae e se fakauiga i ei me e se ola te Atua ki te se-gata-mai. E se fakatapulagina te Atua ki mea e mafai io me e se mafai ne tatou o fai. (Loma 11:33-36) Ne ola foki a ia kae seki ai ei ne mea o te Iunivesi—e aofia i ei a mea fakamaina pelā mo te la mo fetū. E tali‵tonu tatou i a Ieova ko “te Atua telā ne faite ne ia te lalolagi e auala i tena ‵mana.” E tonu, ne ola a ia mai mua o “fola ne ia te lagi.” (Iele. 51:15; Galu 17:24) Se a te suā pogai e tali‵tonu tatou me mafai o ola tatou ki te se-gata-mai?

5. Se a te fakamoemoega ne maua ne te tauavaga muamua?

⁵ A mea ola katoa i te lalolagi kolā ne faite ne Ieova e olo katoa o ‵mate, kae e se ko tino. Ne tuku ne ia te fakamoemoega tu ‵kese ki tino ke se mafai o ‵mate. Kae tiga i ei ne fai atu a Ieova ki a Atamu: “Kae e pelā mo te lakau telā e iloa ei a te mea ‵lei mo te mea masei, e se ‵tau mo koe o kai ki ei, me i te aso telā e kai koe ki ei, a koe ka mate eiloa.” (Kene. 2:17) Ne mafai eiloa o se ‵mate a Atamu mo Eva moi fai ne faka‵logo ki a Ieova. E mafai o fakaiku aka ne tatou me ne mafai o talia ne Ieova ke ‵kai fakamuli lāua ki te “lakau o te ola.” Ne mafai o fai te mea tenei e pelā me se fakamaoniga mai te Atua me i a lāua ka “ola ki te se-gata-mai.” b—Kene. 3:22.

6-7. (a) Ne a nisi mea e fakaasi mai me i tino e seki faite ke ‵mate? (e) Ne a mea ‵gali e manako malosi koe o kausaki ki ei? (Onoono ki ata.)

⁶ Se mea fakaofoofogia me ne iloa aka ne nisi saienitisi me e mafai ne ‵tou faiai o tausi a fakamatalaga kolā e uke atu i lō fakamatalaga e maua i te taimi tenei e ola tatou i ei. I te 2010, ne fai mai se mataupu i te tusi ko te Scientific American Mind me i te malosi o ‵tou mafaufau ke tausi ne ia fakamatalaga e fakatautau ki se 2.5 miliona gigabytes, kae e ‵pau mo se TV telā e pei kae ‵kopi ki ei a mea i se tolu miliona itula  te leva (telā ko te 300 tupu tausaga). Kae kāti e uke atu a mea e mafai o tausi ne ‵tou mafaufau i lō te aofaki fakatautau tenā. Tela la, e fakaasi mai ei me ne faite ne Ieova a ‵tou faiai ke mafai o tausi fakamatalaga e uke atu i lō fakamatalaga e maua ne tatou i loto fua i te 70 io me ko te 80 tausaga.—Sala. 90:10.

⁷ Ne tuku mai foki ne Ieova ki loto i a tatou a te manakoga ke fia ola ki te se-gata-mai. Ne fai mai te Tusi Tapu e uiga ki tino me “ne tuku atu ne [te Atua] a te se-gata-mai ki olotou loto.” (Fai. 3:11) Tenā te pogai e tasi e ‵kilo atu tatou ki te mate e pelā me se fili. (1 Koli. 15:26) Kafai ko ma‵saki malosi tatou, e mata ka talia fua ne tatou te tulaga tenā kae fakatalitali atu ki te taimi e ‵mate ei tatou? Ikai. E masani sāle o olo tatou ki te tokita ke mafai o maua ne vailakau ke faka‵lei te masaki. E fai ne tatou a mea katoa e ‵tau o fai ke se ‵mate tatou. Kae kafai e mate se tino pele o tatou faitalia me koi foliki io me ko matua, e a e se logo‵mae kae mafatia tatou mō se taimi leva? (Ioa. 11:32, 33) Tela la, ne tuku mai ne te ‵tou Mafuaga alofa a te manakoga mo te malosi ke tumau i te ola ona ko tena fuafuaga ke ola a tino ki te se-gata-mai. Kae e isi aka foki ne nisi pogai e tali‵tonu ei tatou me e mafai o ola tatou ki te se-gata-mai. Ke onoono nei tatou ki nisi faifaiga a Ieova i aso mua mo aso nei kolā e fakamaoni mai ei me ne seki ‵fuli eiloa tena fuafuaga i te kamataga.

8. Se a te mea e akoako mai i te Isaia 55:11 e uiga ki te fuafuaga a Ieova mō tatou?

⁸ E tiga eiloa ne agasala a Atamu mo Eva kae ne aumai ne lāua te mate ki lā tama‵liki, ne seki ‵fuli eiloa te mafaufau o Ieova e uiga ki tena fuafuaga. (Faitau te Isaia 55:11.) Koi tumau eiloa tena fuafuaga ke ola a tino fakamaoni ki te se-gata-mai. E fakamaoni ne tatou te mea  tenā māfai e mafau‵fau tatou ki pati mo mea ne fai ne Ieova ke fakataunu i ei tena fuafuaga.

9. Se a te mea ko oti ne tauto mai ne te Atua? (Tanielu 12:2, 13)

⁹ Ne tauto mai a Ieova me ka faka‵tu ne ia tino ‵mate kae ka tuku atu ne ia te avanoaga ke ola latou ki te se-gata-mai. (Galu. 24:15; Tito 1:1, 2) Ne mautinoa i te tagata fakamaoni ko Iopu i a Ieova e manako malosi ke faka‵tu aka a tino kolā ne ‵mate. (Iopu 14:14, 15) Ne iloa ne te pelofeta ko Tanielu me e isi se fakamoemoega mō tino ke toe faka‵tu aka mai te mate kae ke mafai o ola ki te se-gata-mai. (Sala. 37:29; faitau te Tanielu 12:2, 13.) Ne iloa foki ne tino Iutaia i aso o Iesu me e mafai ne Ieova o tuku atu ki ana tavini fakamaoni a te “ola se-gata-mai.” (Luka 10:25; 18:18) E uke a taimi ne faipati a Iesu ki te tautoga tenei, kae ne fakatu aka eiloa a ia ne tena Tamana mai te mate.—Mata. 19:29; 22:31, 32; Luka 18:30; Ioa. 11:25.

10. Ne a mea e fakamaoni mai ne toe‵tuga kolā ne fai i aso mua? (Onoono ki te ata.)

¹⁰ A Ieova ko te Tino telā ne tuku mai ne ia te Ola, kae e isi sena malosi ke toe faka‵foki mai a tino ki te ola. Ne tuku atu ne ia te malosi ki te pelofeta ko Elia ke fakatu aka a te tama tagata a te fafine Salefata telā ko mate tena avaga. (1 Tupu 17:21-23) Fakamuli ifo, mai te fesoasoani o te Atua, ne toe fakafoki atu ne Elisaia te ola o te tamaliki tagata a te fafine Sunema. (2 Tupu 4:18-20, 34-37) A toe‵tuga konā mo nisi toe‵tuga e fakamaoni mai ei me e isi se malosi o Ieova ke toe faka‵foki mai a tino ki te ola. Ne fakatalitonu mai ne Iesu me ne tuku atu ne tena Tamana te malosi tenā i te taimi ne nofo ei a ia i te lalolagi. (Ioa. 11:23-25, 43, 44) Nei la, ko nofo a Iesu i te lagi kae ko oti ne tuku atu ki a ia “a te pule i mea katoa i te lagi mo te lalolagi.” Tela la, ko mafai ne ia o fakataunu te tautoga ko “tino katoa kolā e i loto i tanuga” ke faka‵tu mai ki te ola mo te fakamoemoega ke ola ki te se-gata-mai.—Mata. 28:18; Ioa. 5:25-29.

11. Ne fai pefea ne te togiola ke mafai ne tatou o ola ki te se-gata-mai?

¹¹ Kaia ne talia ne Ieova ke mate tena Tama fagasele i se mate fakalogo‵mae? Ne fai mai ne Iesu a te pogai i ana pati konei: “Ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino telā e fakaasi atu faeloa te fakatuanaki ki a ia kae ke maua ne ia te ola se-gata-mai.” (Ioa. 3:16) Ne fai ne te Atua ke mafai o maua ne tatou te ola se-gata-mai, i te tukumaiga o tena Tama e pelā me se togiola ke fakamagalo ‵tou agasala. (Mata. 20:28) Ne fakatoetoe mai ne Paulo te vaega tāua o te fuafuaga a te Atua i ana pati konei: “Ona ko te mate ne oko mai e auala i se tagata e tokotasi, ne oko mai foki a te toe‵tuga o tino ‵mate e auala i se tagata e tokotasi. Me e pelā eiloa mo te ‵mate o tino katoa i a Atamu, e penā foki te ‵toe fakaola mai o tino katoa e auala i te Keliso.”—1 Koli. 15:21, 22.

12. E fesoasoani mai pefea te Malo ke fakataunu te fuafuaga a te Atua mō tatou?

¹² Ne akoako ne Iesu ana soko ke ‵talo mō te Malo o te Atua ke oko mai kae ke fakataunu te loto o te Atua i te lalolagi. (Mata. 6:9, 10) Se vaega e tasi o te fuafuaga a te Atua, ko tino ke ola ki te se-gata-mai i te lalolagi. Ke fakataunu te mea tenā, ko oti ne fili ne Ieova tena Tama e pelā me ko te Tupu o te Malo faka-Mesia. Ko oti ne kamata o fakamaopoopo mai ne te Atua a tino e toko 144,000 mai te lalolagi, ke ga‵lue fakatasi mo Iesu ki te fakataunuga o te loto o te Atua.—Faka. 5:9, 10.

13. Ne a mea e fai ne Ieova i te taimi nei, kae ne a mea e ‵tau o fai ne tatou?

¹³ Ko oti ne fakamaopoopo mai ne Ieova “se vaitino tokouke” kae akoako ne ia ke ola mai lalo i te pulega a tena Malo. (Faka. 7:9, 10; Iako. 2:8) E taumafai malosi te potukau tenei o ave  kea‵tea a te takalialia i va o fenua mo matakāiga faitalia me e ola tatou i te vaitaimi tenei e mavae‵vae a tino ona ko te ma‵taku mo taua. I se auala fakatusa, ko oti ne ‵tuki ne latou olotou pelu ke fai mo mea fakamālū laukele. (Mika 4:3) I lō te ‵kau atu ki taua kolā e iku atu ki te ‵mate o tino e tokouke, e fesoasoani latou ke maua ne tino “te ola tonu” mai te akoako o latou e uiga ki te Atua tonu mo ana fuafuaga. (1 Timo. 6:19) E mafai o ‵teke atu olotou kāiga io me pokotia latou i mea tau tupe ona ko te lotou ‵lago atu ki te Malo o te Atua, kae fakamautinoa ne Ieova me e maua eiloa ne latou a mea e manakogina. (Mata. 6:25, 30-33; Luka 18:29, 30) E fakamaoni mai ne fakamatalaga ‵tonu konā me i te Malo o te Atua se mea tonu kae ka fakataunu faeloa ne ia te fuafuaga a Ieova

14-15. Ka fakataunu pefea te tautoga a te Atua ke fakaseai atu te mate ki te se-gata-mai?

¹⁴ Ko fai nei a Iesu e pelā me ko te Tupu i te Malo o te Atua i te lagi kae ka fakataunu ne ia a folafolaga katoa a Ieova. (2 Koli. 1:20) Talu mai i te 1914 ko oti ne manumalo a Iesu i ana fili. (Sala. 110:1, 2) Ko pili fua nei o fakaoti katoatoa ne ia mo ana tupu lagolago a te lotou taua kae ka fakaseai atu a tino ma‵sei.—Faka. 6:2.

¹⁵ I te taimi o te Pulega a Iesu i te Afe Tausaga, ka toe faka‵tu aka a tino ‵mate kae ka fai  ei a tino faka‵logo ke gasolo atu ki se tulaga ‵lei katoatoa. Mai tua o te ‵toe tofotofoga, a tino kolā ne fakamasino ne Ieova me e amio‵tonu “ka fai mō latou te lalolagi, kae ka ‵nofo latou i ei ki te se-gata-mai.” (Sala. 37:10, 11, 29) Se mea fakafiafia me i “te ‵toe fili” ka “fakaseai atu ko te mate.”—1 Koli. 15:26.

16. Se a te ‵toe pogai tāua e ma‵nako tatou ke tavini atu ki a Ieova?

¹⁶ Ko oti ne lavea ne tatou i te mataupu tenei me e fakavae ‵tou fakamoemoega ke ola ki te se-gata-mai ki te Muna a te Atua. E fesoasoani mai te fakamoemoega tenā ke tumau tatou i te fakamaoni i aso fakaoti kae faiga‵ta konei. Kae ke fakafiafia a Ieova, e uke atu a mea e manakogina ke fakamalosi aka tatou i lō te ma‵nako fua ke tumau tatou i te ola. A te ‵toe pogai tāua e tumau tatou i te fakamaoni ki a Ieova mo Iesu ko te lasi o te ‵tou a‵lofa ki a lāua. (2 Koli. 5:14, 15) E fakamalosi aka ne te alofa tenā ke fakaakoako tatou ki a lāua kae ke fakaasi atu ki nisi tino a te fakamoemoega ko maua ne tatou. (Loma 10:13-15) I te taimi e tauloto tatou ki te uiga kaimalie kae ke se mafaufau fua ki a tatou eiloa, ka fai tatou pelā mo tino kolā e manako a Ieova ke fai mo ana taugasoa ki te se-gata-mai.—Epe. 13:16.

17. Se a te tiute totino e ‵tau o fai ne tatou? (Mataio 7:13, 14)

¹⁷ E mata, ka aofia tatou i tino kolā ka ola ki te se-gata-mai? Ko oti ne ‵tala mai ne Ieova te mataloa ke mafai ne tatou o fai penā. Nei la, ko tuku mai loa ki a tatou a te filifiliga ke tumau i te auala telā e tau atu ki te ola. (Faitau te Mataio 7:13, 14.) Ka pefea te olaga māfai e ola tatou ki te se-gata-mai? Ka sau‵tala tatou ki te tali o te fesili tenā i te suā mataupu.