I te taimi ne fakatonu atu a Ieova ki tino ke “faka‵fonu te lalolagi kae pule atu ki ei,” ne fakaasi atu ne ia me fakamuli loa, ka fai te lalolagi kātoa mo fai se palataiso. (Kene. 1:28) Koi tumau loa te fakatonuga tenā mō latou kolā ka fai mō latou te lalolagi. Ka se maua fakavave ne latou a te palataiso—i te fatoaga o Etena ko seai. Ka uke ‵ki a mea e ‵tau o fai ki te teuga o mea kolā ne fakamaseigina i te taimi nei. Ka fai eiloa mo fai se matugā galuega lasi ‵ki!

E fakamasaua mai i ei a te galuega telā ne ‵tau o fai ne te kau Isalaelu i te taimi ne ‵foki atu ei mai Papelonia. E seki ai se tino kai nofo i te lotou fenua mō se 70 tausaga. Kae ne ‵valo atu a Isaia me mai te fakamanuiaga a Ieova, ka toe mafai ne latou o fakafou. Ne fai mai te valoaga: “Ka fai ne ia te koga lavaki o tou fafine ke pelā mo Etena mo ana koga laugatasi ke pelā mo te fatoaga o Ieova.” (Isa. 51:3) Ne iku manuia eiloa a te kau Isalaelu i te feitu tenā. E penā foki loa a latou kolā ka fai mō latou te lalolagi, ka ‵nofo atu eiloa i ei mo te manuia ona ko te fakamanuiaga  a Ieova. Kae i te taimi nei, e mafai foki o fakaasi atu ne koe a tou manakoga ke aofia i ei.

A te auala e tasi ko te fai ne koe a te mea e mafai o fai ke fakatumau te ‵ma o tou fale mo tou tafafale. E mafai o fai ne koe te mea tenā faitalia a mea e fai ne ou tuakoi. E mafai o uke atu au mea e fai i te feitu tenā mai te fesoasoani atu ki te ‵fuluga o te Fale Tapuaki mo te Fale Fai Fono. Kafai e mafai, e mafai ne koe o tusi fakamolemole atu, ke fai mo fai se volenitia i galuega fesoasoani. Tenā, ko fakaasi atu ei ne koe me e toka koe o fesoasoani māfai e manakogina. Fesili ifo, ‘E mata, e fakaakoako au ki nisi atamai kolā e mafai o fakaaoga māfai ko fakamanuiagina au ke nofo i te lalolagi?’

Mai tua o te fakatuakaga o te tamaliki fafine a Iailo, ne fai atu a Iesu me e ‵tau o tuku atu ki te tamaliki ne meakai. (Male. 5:42, 43) Kāti e seai se galuega ‵mafa ke tausi atu ki te tamaliki tenā ko 12 ana tausaga. Kae mafaufau la ki mea kolā ka aofia i te taimi e fakataunu ei ne Iesu tena folafolaga me ka “lagona ei ne tino katoa kolā e i loto i tanuga a tena leo ko ulu mai ei ki tua.” (Ioa. 5:28, 29) E tiga eiloa e se tuku mai i te Tusi Tapu a fakamatalaga likiliki e uke, e mafai o fakaataata ne tatou me ka ma‵nako a tino kolā ka toe‵tu mai ke maua olotou mea‵kai, fale, mo gatu. Kae i te taimi nei, e mata e mafai o fakaasi atu tou manakoga ke toka o fesoasoani atu? Konei a nisi fesili ke mafau‵fau ki ei.

I te taimi e faka‵pula atu i te ovasia o te seketi ka āsi atu ki te otou fakapotopotoga, e mata, e ‵kami ne koe ke ‵kai koutou? Kafai ko ‵tofi aka a tavini i te taviniga tumau mai te Peteli ki te galuega talai io me ko fakagata ne te ovasia o te seketi tena galuega faimalaga, e mata, e mafai o fesoasoani atu koe i te ‵salaga o se fale? Kafai ko fai te fono lasi io me se fono fakapito i tou kogā koga, e mata, e mafai o galue fakavolenitia koe mai mua io me mai tua o te fono? Io me toka koe o talimalo a sui ki te fono

E ‵tusa mo te Galuega 24:15, e fakamoe‵moe tatou me ka toe‵tu mai a te fia piliona o tino. A te tokoukega o latou ko tino kolā ne seki maua te avanoaga ke iloa ne latou a Ieova. A te avanoaga tenā ka ‵tala atu ki a latou māfai ko toe‵tu mai. a A tavini fakamaoni kae atamai a te Atua ka ‵kau atu ki te galuega e pelā mo te akoako atu. (Isa. 11:9) A Charlotte, telā ne talai atu i Eulopa, Amelika ki Saute, mo Afelika, ko olioli eiloa ki ei. E fai mai tou fafine mo te fiafia: “E olioli au ki te taimi telā ka akoako ei ne tatou a tino māfai ko toe faka‵tu mai. Kafai e faitau au ki se tala o se tino telā ne ola i aso mua, e masani o mafaufau ifo au penei: ‘Moi ne iloa ne te tino tenei a Ieova, e mafai eiloa o tai ‵kese tena olaga.’ Ko oko eiloa i toku olioli malosi ke na fai atu ki tino kolā ka toe‵tu mai a mea ‵gali kolā e seki maua ne latou.”

Ke oko foki eiloa ki tavini fakamaoni a Ieova kolā ne ola mai mua o Iesu, ka uke ‵ki a mea e ‵tau o tauloto ne latou. Mafaufau ki te fiafia mo te tauliaga ke fakamatala atu ki a Tanielu a te fakataunuga o valoaga ne tusi ne ia, kae kolā e seki malamalama a ia i ei.(Tani. 12:8) Io me e a māfai e fesoasoani atu ki a Luta mo Naomi ke iloa ne lāua te auala ne fai ei te lotou kāiga mo fai se vaega o te gafa telā e tau atu ki te Mesia? Ko tafaga te fiafia ke ‵kau atu ki te polokalame ko te akoako atu i te lalolagi kātoa, e aunoa mo ne fakamalosiga sē ‵lei, mo fakalavelave mai te lalolagi masei i aso nei!

E fakaasi atu pefea ne tatou nei me e ma‵nako tatou ke toka o ‵kau atu ki te polokalame tenā? A te auala e tasi ko te taumafai ke momea aka te ‵lei o ‵tou atama i te akoako atu, mo te ‵kau atu faeloa ki te galuega talai i te lalolagi kātoa telā ko fai nei. (Mata. 24:14) Kafai foki loa ko se uke a mea e fai ne tatou i te taimi tenei ona ko te tulaga matua io me ko nisi fakanofonofoga, e mafai o fakaata atu i au taumafaiga a tou toka ke akoako atu a tino kolā ka toe‵tu mai.

Ao, a te fesili tāua, E mata, e olioli tonu koe ki te taimi ka fai ei mō koe a te lalolagi? E mata, e fiafia malosi koe ki te fakamoemoega ke ‵nofo i te lalolagi e pelā foki mo te faka‵nofoga mo te akoako atu o latou kolā ka toe‵tu mai? E mafai o fakaasi atu me ko toka koe mai te fakaaogaga o avanoaga i aso nei ke fai a galuega kolā e tai ‵pau mo galuega kolā ka fai ne koe i te taimi telā ko fai ei mō koe a te lalolagi!