Ikai. Ne aoga kae ‵tonu foki a mea kolā ne tusi mai ne Tavita.

Mafaufau ki mea ne tusi ne ia i te fuaiupu tenā mo tusi siki tai ‵pau: “Ko usu ei ne au a pese o vikiga ki tou igoa ki te se-gata-mai i te taimi e ‵togi atu ei aku tautoga i aso takitasi.” “E tavae ne au koe, e Ieova te Atua, mo toku loto kātoa, kae ka faka‵malu ne au tou igoa ki te se-gata-mai.” “Ka ‵viki atu au ki tou igoa ki te se-gata-mai, se-gata-mai eiloa.”—Sala. 61:8; 86:12; 145:1, 2.

Ne seki fakalasi‵lasi ne Tavita ana pati mai i te mafaufau me ka se mafai o mate a ia. Ne iloa ne ia me ko oti ne fakatonu atu a Ieova me i te ikuga o te agasala a tino ko te mate, kae ne taku ‵tonu mai foki ne Tavita me i a ia se tino agasala. (Kene. 3:3, 17-19; Sala. 51:4, 5) Ne iloa ‵lei ne ia me ke oko foki loa ki tāgata fakamaoni e pelā mo Apelaamo, Isaako, mo Iakopo, ne ‵mate foki. Kae ne iloa foki ne Tavita me ka mate a ia. (Sala. 37:25; 39:4) Kae ko ana pati i te Salamo 61:8, ne fakaata mai i ei tena manakoga mo tena fakaikuga ke ‵viki atu ki te Atua ki te se-gata-mai i te taimi koi ola ei a ia.—2 Samu. 7:12.

I nisi tusitusiga a Tavita, ne fakasino atu a ia ki tena olaga i aso mua, e pelā mo mea e lavea ne tatou i pati fakatomua i te Salamo 18, 51, mo te 52. I te  Salamo 23, ne fakamatala mai ne Tavita a Ieova e pelā me se tausi mamoe telā e tuku atu ne ia a te takitakiga, fakamalosiga, mo te puipuiga. A Tavita se vaegā tausi mamoe penā. Kae ne manako a ia ke tavini atu ki te Atua ‘i aso katoa o tena olaga.’—Sala. 23:6.

Masaua foki la, me ne fakaosofia ne Ieova a Tavita ke tusi mai a pati konā. A mea ne tusi ne ia ne aofia i ei a valoaga e uiga ki mea ka ‵tupu i aso fakamuli. E pelā mo te Salamo 110, ne fakasino atu a Tavita ki se taimi telā ka “sagasaga” ei tena Aliki “i [te] feitu fakaatamai” o te Atua i te lagi kae ka tuku atu ki a ia a te malosi pule. Ne a ana mea ka fai? Ka pule atu ki fili o te Atua mo “te fakamasinoga o atufenua” i te lalolagi. A Tavita se tupuga o te Mesia, te tino telā ka pule mai i te lagi kae ka fai mo fai “te faitaulaga ki te se-gata-mai.” (Sala. 110:1-6) Ne fakamautinoa mai ne Iesu me i te valoaga i te Salamo 110 ne fakasino atu ki a ia kae ka fakataunu i aso mai mua.—Mata. 22:41-45.

Ao, ne fakaosofia a Tavita ke tusi mai e uiga ki ana taimi mo se taimi i aso mai mua, telā ka toetu mai a ia kae e mafai o toe ‵viki atu ki a Ieova ki te se-gata-mai. E fesoasoani mai te mea tenā ke kilo atu tatou ki te Salamo 37:10, 11, 29, e pelā me se fakamatalaga o fakanofonofoga kolā ne maua atu i Isalaelu mua, e pelā foki mo fakanofonofoga ka oko mai ki te lalolagi kātoa i aso mai mua, māfai ko fakataunu ne te Atua ana folafolaga.—Onoono ki te palakalafa 8 o te mataupu “Ka ‵Nofo Fakatasi Eiloa Tāua i te Palataiso” i te lōmiga tenei.

Tela la, e fakaasi mai i te Salamo 61:8 mo nisi fuaiupu tai ‵pau me ne manako a Tavita ke ‵viki atu ki a Ieova i Isalaelu mua ke oko ki te taimi ne mate ei a ia. Kae e fakaasi faka‵lei mai foki i ei a mea ka mafai ne Tavita o fai i aso mai mua māfai ko toe fakatu mai a ia ne Ieova ki te ola.