1. Mai mua malie o mate a Iesu, ne a ana pati ne fai atu ki te pagota i ana tafa? (Luka 23:39-43)

 I TE taimi ko pili ei o ‵mate, ne tigaina malosi a Iesu mo pagota tokolua i ana feitu. (Luka 23:32, 33) Ne fai atu ne pagota e tokolua konei a pati sē ‵lei ki a Iesu, tela la, ne lavea ‵lei atu me i a lāua e se ne soko o ia. (Mata. 27:44; Maleko 15:32) Kae tokotasi i a lāua ne ‵fuli tena loto. Ne fai atu a ia: “Iesu, masaua mai au māfai e oko koe ki tou Malo.” Ne tali atu a Iesu: “Au e fai ‵tonu atu ki a koe i te aso nei, ka ‵nofo fakatasi eiloa tāua i te Palataiso.” (Faitau te Luka 23:39-43.) E seai se mea e fakaasi mai me ne talia ne te pagota tenei a te fekau e uiga ki te “Malo o te lagi,” telā ne talai ne Iesu i te taimi ne fai ei tena taviniga. Ne seki fai mai foki a Iesu i te tagata tenā ka ulu atu ki te Malo. (Mata. 4:17) Ne faipati eiloa a Iesu ki se Palataiso i te lalolagi i aso mai mua. Kaia e fai atu ei tatou penā?

2. Ne a mea e fakaasi mai i te pagota ne salamō se tino Iutaia?

² A te pagota telā ne salamō kāti se tino Iutaia. Ne fai atu te pagota tenā ki te suā pagota: “E a, e se mataku koe ki te Atua, me ko fakasala foki koe e pelā mo ia?” (Luka 23:40) Ne tapuaki a tino Iutaia ki te Atua e tokotasi, kae ko tino mai nisi fenua ne tali‵tonu ki atua e uke. (Eso. 20:2, 3; 1 Koli. 8:5, 6) Moi fai a pagota konā ne tino mai nisi fenua, e fesili atu lāua penei, “E a, e se mataku koe ki atua?” E se gata i ei, ne seki uga mai a Iesu ki tino o fenua fakaa‵tea kae ne uga mai ki “mamoe o te fenua o Isalaelu kolā ko ‵galo.” (Mata. 15:24) Ne fakaasi atu ne te Atua ki tino Isalaelu me ka faka‵tu aka ne ia a tino ‵mate. Kāti ne iloa ne te pagota telā ne salamō a te mea tenei, e pelā mo ana pati e fakaasi mai ei me ne mafaufau a ia me ka fakatu aka ne Ieova a Iesu ke pule i te Malo o te Atua. Kāti ne fakamoemoe foki te tagata tenā ke fakatu aka a ia ne te Atua.

3. Se a te mea kāti ne mafaufau ki ei te pagota ne salamō i te taimi ne taku atu ei ne Iesu te Palataiso? Fakamatala mai. (Kenese 2:15)

 ³ E pelā me se tino Iutaia, ne ‵tau o iloa ne te pagota ne salamō a Atamu mo Eva mo te palataiso telā ne tuku atu ne Ieova ki a lāua. Tela la, ne ‵tau o iloa ne te pagota tenā i te Palataiso telā ne taku atu ne Iesu se fatoaga gali i te lalolagi nei.—Faitau te Kenese 2:15.

4. Se a te mea e ‵tau o mafau‵fau tatou ki ei mai i pati a Iesu ki se pagota e tokotasi?

⁴ A pati a Iesu ki te pagota e ‵tau o fai ei ke mafau‵fau tatou me ka pefea te olaga i te Palataiso. E mafai o tauloto ne tatou se mea e uiga ki te Palataiso mai te pulega filemu a te Tupu ko Solomona. Kae fakamoe‵moe tatou i a Iesu, te tino telā e sili atu i a Solomona ka ga‵lue fakatasi mo ana tupu lagolago ke ‵fuli te lalolagi ki se Palataiso gali. (Mata. 12:42) Tela la, e lavea ‵lei ne tatou te pogai e ‵tau ei mo “nisi mamoe” o fai a mea kolā ka mafai ei o ola latou ki te se-gata-mai i te Palataiso.—Ioa. 10:16.

5. Ne a mea e fakamoemoe koe ki ei i te olaga i te Palataiso?

⁵ Se a te mea ka mafaufau koe ki ei māfai e mafaufau ki te olaga i te Palataiso? Kāti e mafaufau koe ki se koga gali e tafao‵fao kae ma‵nava i ei a tino, e pelā mo te fatoaga o Etena. (Kene. 2:7-9) Kāti ka masaua ne koe te valoaga ne fakamau ne Mika me ka saga‵saga a tino “taki tokotasi [o te Atua] mai lalo i olotou vine mo olotou mati.” (Mika 4:3, 4) Kāti ka mafaufau foki koe ki pati i te Tusi Tapu me ka uke a mea‵kai. (Sala. 72:16; Isa. 65:21, 22) E mafai o fakaataata i tou mafaufau me e sagasaga atu koe i se taipola telā e ‵fonu i mea‵kai gali i se fatoaga. E mafai foki o fakaataata ne koe te ‵ma o te ea kae manogi gali ona ko lakau mo pulalakau. Kae kāti e lagona ne koe te kata‵kata o kāiga mo taugasoa—e aofia i ei a tino kolā ne toe faka‵tu mai—e sau‵tala fakatasi kae fia‵fia. A mea katoa konei e sē se moemiti. E mautinoa eiloa me i mea konei ka ‵tupu i te lalolagi. Kae e isi foki ne galuega fakamalosi e ‵tau foki o fai i te Palataiso.

6. Ne a mea ka fai ne tatou i te Palataiso? (Onoono ki te ata.)

⁶ Ne faite tatou ne Ieova ke mafai o fia‵fia i ‵tou galuega. (Fai. 2:24) Ka fakalave‵lave malosi tatou i te taimi o te Pulega a Iesu i te Afe Tausaga. A tino kolā ka ‵sao atu i te fakalavelave lasi, pelā foki mo te fia miliona kolā ka faka‵tu aka, ka manakogina ne latou a gatu, meakai, mo se koga mo ‵nofo. Tela la, ka uke ‵ki a galuega fakafiafia e fai ne tatou ko te mea ke mafai o fakataunu a manakoga penā. E pelā loa mo Atamu mo Eva kolā ne ‵tau o tausi kae galue te lā fale ko te lalolagi, ka maua foki ne tatou te tauliaga ke tausi kae galue te lalolagi ke fai mo fai se Palataiso. Mafaufau foki la ki te fiafia ka maua māfai e akoako te fia miliona o  tino ka faka‵tu aka kolā e se lasi te lotou mea e iloa e uiga ki a Ieova mo ana fuafuaga, kae ke fesoasoani foki ki tino fakamaoni kolā ne ola mai mua o Iesu ke tauloto ki mea e uke atu!

7. Se a te mea e mafai o tali‵tonu tatou ki ei kae kaia?

⁷ E mafai o tali‵tonu tatou me ka filemu, maumea, kae fakatoka faka‵lei foki te olaga i te Palataiso. Kaia? Me ko oti ne tuku mai ne Ieova se ata foliki o te olaga tenā mai lalo i te pulega a tena Tama. E mafai o lavea ne tatou te ata tenā i te pulega a te Tupu ko Solomona

8. Ne fakataunu pefea a pati i te Salamo 37:10, 11, 29 i te otiga ne tusi ne te tupu ko Tavita a pati konā? (Onoono ki te “Fesili Mai Tino Fai‵tau” i te lōmiga tenei.)

⁸ Ne fakaosofia a te Tupu ko Tavita ke tusi mai e uiga ki te olaga ka maua māfai ko pule mai se tupu poto kae fakamaoni i aso mai mua. (Faitau te Salamo 37:10, 11, 29.) E masani o faitau ne tatou te Salamo 37:11 ki nisi tino māfai e fai‵pati tatou ki te Palataiso i aso mai mua. Kae se mea ‵tau ke fai atu penā me ne siki mai foki ne Iesu a pati konā i tena Lāuga i luga i te Mauga, me ka isi se fakataunuga o pati konā i aso mai mua. (Mata. 5:5) Kae ne fakaasi mai foki i pati a Tavita a te vaegā olaga ka maua i aso o te Tupu ko Solomona. I te taimi ne pule a Solomona i Isalaelu, ne fia‵fia a tino o te Atua ona ko te lasi o te filemu mo te maumea i se fenua telā “e ‵tafe i ei a susu mo hani.” Ne fai mai te Atua: “Kafai e tumau koutou i te tau‵tali ki aku tulafono fakavae . . . , ka fai ne au ke filemu te fenua, kae ka ‵moe koutou e aunoa mo te ma‵taku ki se tino.” (Levi. 20:24; 26:3, 6) Ne fakataunu a folafolaga konā i te taimi o te pulega a Solomona. (1 Nofo. 22:9; 29:26-28) Kae ne isi foki se fakamoemoega me i tino ma‵sei “ka ‵galo atu.” (Sala. 37:10) Tela la, a pati i te Salamo 37:10, 11, 29 ne fakataunu i aso ko ‵teka kae ka fakataunu foki i aso mai mua.

9. Ne a pati a te tupu fafine o Seepa e uiga ki te pulega a te tupu ko Solomona?

⁹ Ne oko atu a tala ki te tupu fafine o Seepa i te fia‵fia o tino Isalaelu mai lalo i te pulega a Solomona ona ko te filemu mo te maumea. Ne malaga mai te tupu tenā mai se fenua ‵mao ki Ielusalema ke lavea ne ia te mea tenā ki ana  mata. (1 Tupu 10:1) Mai tua o te iloiloga ne ia te malo o Solomona ne fai mai tou fafine: “A mea ne logo au i ei e se ko te āfa foki o te tala. . . . E fia‵fia eiloa ou tāgata, kae e fia‵fia foki au tavini kolā e ‵tu faeloa i ou mua o fakalogo‵logo ki tou poto!” (1 Tupu 10:6-8) Kae ko fakanofonofoga mai lalo i te pulega a Solomona se ata foliki fua o mea kolā ka fai ne Ieova ki tino mai lalo i te pulega a Tena Tama ko Iesu.

10. I auala fea e maluga atu ei a Iesu ki a Solomona?

¹⁰ E maluga atu a Iesu ki a Solomona i mea katoa. A Solomona se tagata sē ‵lei katoatoa telā ne fai ne ia agasala matagā kae ne iku atu ei ki te maua ne tino o te Atua a fakalavelave. Kae ko Iesu se Pule ‵lei katoatoa telā e seai sena mea ‵se ne fai. (Luka 1:32; Epe. 4:14, 15) Ne manumalo a Iesu i tofotofoga faiga‵ta kolā ne fai atu ne Satani ki a ia. Ne fakamaoni mai ne Keliso me e se mafai ne ia o fai se agasala io me se mea telā ka logo‵mae ei a tino fakamaoni mai lalo i tena pulega. Ko ia eiloa te ‵toe tupu ‵lei o tatou.

11. Ko oi ka fesoasoani ki a Iesu i tena pulega?

¹¹ Ka ga‵lue fakatasi a Iesu mo ana tupu lagolago e toko 144,000 ke tausi atu ki tino kae ke fakataunu te fuafuaga a Ieova mō te lalolagi. (Faka. 14:1-3) Ne fe‵paki a latou konei mo tofotofoga mo logo‵maega e uke i te taimi ne ‵nofo i ei i te lalolagi, kae malamalama ‵lei latou i mea e fepaki mo tino i te lalolagi. Tela la, ne a mea ka fai ne tupu lagolago konei?

12. Se a te tiute ka tuku atu ne Ieova ki te toko 144,000?

¹² E sili fakafia atu a tiute ne tuku atu ki a Iesu mo ana tupu lagolago i lō mea ne tuku ki a Solomona. Ne tausi atu te tupu o Isalaelu ko Solomona ki te fia miliona o tino i se fenua fua e tasi. Kae ko latou kolā ka pule mai i te Malo o te Atua ka fesoasoani ki te tausiga o te fia piliona o tino i te lalolagi kātoa. Ko oko loa te fakaofoofogia kae gali te tauliaga ne tuku ne Ieova ki te toko 144,000!

13. Se a te tiute fakapito telā ka aofia i galuega e fai ne tupu lagolago o Iesu?

¹³ E pelā mo Iesu, a te toko 144,000 ka tavini atu e pelā me ne tupu mo faitaulaga. (Faka. 5:10) Mai lalo i te Tulafono Faka-Mose, ne maua ne faitaulaga te tiute tāua ke puipui a tino ke malosi i te feitu faka-te-foitino mo te feitu faka-te-agaga. A te tulafono “se ata fakatusa fua o mea ‵lei kolā ka oko mai,” tela la, se mea ‵lei ke fakaiku aka me i tupu lagolago a Iesu ka fesoasoani ki te tausiga o manakoga o tino o te Atua i te feitu faka-te-foitino mo te feitu faka-te-agaga. (Epe. 10:1) Mō te taimi nei, e se iloa ne tatou te auala e fesokotaki atu ei a tupu mo faitaulaga konei ki tino mai lalo i te pulega a te Malo kolā e ‵nofo i te lalolagi. Faitalia me se a te fakatokaga a Ieova, e tali‵tonu tatou me ka maua ne tino kolā ka ‵nofo i te lalolagi Palataiso a te takitakiga e ma‵nako latou ki ei.—Faka. 21:3, 4.

14. Se a te fesokotakiga e maua ne “nisi mamoe” mo taina o Keliso?

¹⁴ Ne fakasino atu a Iesu ki tino kolā ka pule fakatasi mo ia e pelā me ko te “lafu mamoe foliki.” (Luka 12:32) Ne faipati foki a ia ki se suā potukau telā ne taku ne ia ki “nisi mamoe.” Ka fai a potukau e lua konei e pelā me se lafu mamoe e tasi. (Ioa. 10:16) Ko oti ne kamata o ga‵lue fakatasi a potukau e lua konei, kae ka tumau faeloa te ga‵lue fakatasi i te taimi e fai ei te lalolagi e pelā me se Palataiso. Kae ko te “lafu mamoe foliki” ka ‵nofo i te lagi kae ko “nisi mamoe “ ka maua ne latou te fakamoemoega ke ola fia‵fia ki te se-gata-mai i te lalolagi. Kae e isi ne mea e ‵tau o fai ne “nisi mamoe” ke mafai ne latou o ola i te Palataiso.

15. (a) E ga‵lue fakatasi pefea a “nisi mamoe” mo taina o Keliso? (e) E mafai pefea o fakaakoako koe ki te mea ne fai ne te taina i te sitoa? (Onoono ki te ata.)

 ¹⁵ Ne mate te pagota ne salamō mai mua o fakamaoni atu ne ia tena loto fakafetai ki mea ne fai ne Keliso mō ia. E ‵kese mai ei, ne maua ne tatou kolā ko “nisi mamoe” a avanoaga e uke ke fakaasi atu a ‵tou lagonaga ki mea ne fai ne Iesu mō tatou. E pelā mo mea kolā e fai ne tatou ki ana taina fakaekegina, e fakaasi atu ei ne tatou a te ‵tou a‵lofa ki a ia. Ne fai mai a Iesu me ka fakamasino ne ia a mamoe mai mea ne fai ne latou ki ana taina. (Mata. 25:31-40) E mafai o ‵lago atu tatou ki taina o Keliso mai te fesoasoani atu mo te loto finafinau ki a latou i te faiga o te galuega talai mo te faiga o soko. (Mata. 28:18-20) Tenā te pogai e ma‵nako tatou o fakaaoga faka‵lei a fesoasoani e tuku mai ne latou mo fai a akoga faka-te-Tusi Tapu, e pelā mo te tusi ko te Ke Ola ki te Se-Gata-Mai! Kafai seki ai sau akoga faka-te-Tusi Tapu mo se tino i te taimi nei, kaia e se taumafai koe o ofo atu se akoga faka-te-Tusi Tapu ki tino e tokouke kolā e mafai ne koe o ofo atu ki ei?

16. Ne a mea e mafai o fai ne tatou i te taimi nei, ke mafai o ola tatou mai lalo i te pulega a te Malo o te Atua?

¹⁶ E se ‵tau o faka‵tali tatou ke ‵nofo i te Palataiso ko fatoa fai ei tatou e pelā mo te vaegā tino telā e manako a Ieova ke nofo i konā. E ‵tau o na ga‵lue tatou i te taimi nei ke fakamaoni tatou i ‵tou pati, faifaiga mo amioga. Kae ka mafai ei o fakamaoni tatou ki a Ieova, ‵tou avaga, mo ‵tou taina Kelisiano. A te faka‵logo ki tulaga o te Atua kae koi ola tatou i te olaga masei tenei, ka fai ei ke faigofie ke faka‵logo tatou ki ei i te Palataiso. E mafai foki o ati aka ne tatou a atamai mo uiga ke fakaasi atu ei me ko fakatokatoka tatou ki te olaga tenā. Onoono ki te mataupu “E Mata, ko Toka Koe ke ‘Fai mō Koe te Lalolagi’?” e maua i te lōmiga tenei.

17. E mata e ‵tau o loto vāi‵vai tatou ona ko ‵tou agasala i aso ko ‵teka? Fakamatala mai.

¹⁷ E ‵tau foki o fakagata ne tatou a lagonaga sē ‵lei ona ko mea ‵se kae matagā ne fai ne tatou i aso mua. Kae e se ‵tau foki o mafau‵fau tatou ki te taulaga togiola e pelā me se fakamasakoga ke “fai ne tatou te agasala mo te loto kātoa.” (Epe. 10:26-31) Kae e ‵tau o tali‵tonu  tatou me kafai ko oti ne sala‵mo tonu tatou ki ‵tou agasala matagā, ko oti ne ‵sala tatou ki te fesoasoani mai i a Ieova, kae ko oti foki ne ‵fuli ‵tou faifaiga, e mautinoa eiloa me ko oti ne fakamagalo katoatoa ne ia tatou. (Isa. 55:7; Galu. 3:19) Masaua a pati a Iesu ki Falesaio: “Au ne vau o kalaga ki tino agasala, kae e se ki tino amio‵tonu.” (Mata. 9:13) E malosi ‵ki te taulaga togiola ke fakamagalo ‵tou agasala katoa.

18. Ne a mea e manako koe ke sau‵tala ki ei mo te pagota telā ne ‵mate fakatasi mo Iesu?

¹⁸ E mafai o fakaataata ne koe a koe eiloa i te Palataiso e fai‵pati mo te pagota telā ne faipati ki a Iesu? E mautinoa eiloa me ka fakaasi atu ne koulua a te loto fakafetai ki te taulaga a Iesu. E mafai foki o fesili atu ki a ia e uiga ki mea ne ‵tupu mai mua malie o mate a Iesu kae ne pefea foki ana lagonaga i te taimi ne tali atu ei a Iesu ki tena fakamolemole. Kae kāti e mafai foki o fesili atu a ia ki a koe me ne pefea te olaga i aso fakaoti o te olaga masei a Satani. Se tauliaga gali ‵ki ke suke‵suke fakatasi ki te Muna a te Atua mo vaegā tino e pelā mo te tagata tenā!—Efe. 4:22-24.

19. Kaia e se mafai o ‵fiu tatou i te olaga i te Palataiso? (Onoono ki te ata i te ‵kava.)

¹⁹ E se mafai o fi‵ta tatou i te olaga i te Palataiso. E tokouke ‵ki a tino e fia fetaui tatou ki ei kae uke foki a galuega aoga e manakogina ke fai ne tatou. Kae sili i mea katoa, ka mafai o iloa ‵lei ne tatou a te ‵tou Tamana i te lagi kae fia‵fia ki mea e tuku mai ne ia ki a tatou. E se mafai o oti a mea ke tauloto ne tatou e uiga ki a ia, kae uke ‵ki foki a mea e ‵tau o tauloto ne tatou mai i ana mea ne faite. Te leva o te taimi e ola tatou i ei, ko te lasi foki o te ‵tou alofa ki te Atua. E fakafetai lasi tatou ki a Ieova mo Iesu ona ko te tukumaiga o te folafolaga ke mafai o ola tatou ki te se-gata-mai i te Palataiso!