A Delphine, telā ne fakamatala atu i te kamataga o te mataupu tenei, ne mafaufau me i te manavase malosi e fai ei ke inu malosi a ia ki meainu ma‵losi. E se fakatapu ne te Tusi Tapu a te inu ki meainu ma‵losi, kae e fai mai: “Ke mo a ma aofia koe i a latou kolā e inu malosi ki uaina.” (Faataoto 23:20) A te fakaaogaga ‵se o meainu ma‵losi e iku atu ki masaki fakama‵taku, ki te māvae mo te ‵talaga o avaga, mo te ‵mate fakapoi o te fia miliona o tino i tausaga takitasi. E mafai o ‵kalo kea‵tea a tino mai fakalavelave konei, māfai e tau‵tali atu latou ki pati polopoloki kae ‵poto mai te Tusi Tapu.

Ne fai penā a Delphine. Ne fai mai a ia penei: “Ne iloa atu ne au me ne seki faka‵lei ne meainu malosi a oku fakalavelave. Ne fakagalue ne au a te poto mai te Filipi 4:6, 7, telā e fai mai: “Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua.” I po katoa, e uke a mea e mafaufau kae manavase au ki ei, ne ‵talo atu au ki a Ieova. Ne fakaasi katoa ne au ki ei oku lagonaga katoa, e aofia i ei a mea e kaitaua au ki ei, logo‵maega, loto vāivāi, kae akai ki ei ke fesoasoani mai ke maua ne au se lagonaga ‵lei. I taeao katoa, e fakamautinoa aka ne au ke taumafai ke se toe mafaufau au ki lagonaga konā. A te fakamasani ke ‵talo atu faeloa e fesoasoani ke maua se lagonaga ‵lei i lō te mafaufau kae manavase. Ne fakaiku aka ne au ke se toe fakaaoga ne au a meainu ma‵losi. Ona ko te tāua o te lagonaga filemu telā ne maua ne au, ko se toe manako ei ke galo atu i au a te lagonaga tenā.”

A amioga fakatauavaga sē ‵tau e iku atu ki fakalavelave mo te fanoanoa. Kae e mafai o fesoasoani mai a fakatakitakiga i te Tusi Tapu ke ‵kalo kea‵tea tatou mai fakalavelave kolā e mafai o iku atu ki te faiga o amioga fakatauavaga sē ‵tau—e pelā mo te tafao ki lagonaga o se tino mo te onoono ki ata ma‵sei. “E faigofie fua ke fakatagata fua ki so se tino,” ko pati a se tamataene e igoa ki a Samuel. “I nisi taimi e se fiafai au ki te tino tenā, kae e iloa ne au a te fafine tenā e fiafai mai ki au—ko fakamalosi aka ei ke tafao au ki ana lagonaga.” Ne iloa ne Samuel me ko taku a ia e pelā me se tino e tafao ki lagonaga o tino—faitalia me se fakauiga a ia penā—kae fakamuli ko fai loa pelā mo se mea masani. Kae ne masei ‵ki ana lagonaga. “E fakamataku ‵ki,” ko ana pati, “me ati aka ei a lagonaga kaima‵nako.”

Ne faitau ne Samuel se mataupu e uiga mō talavou i te fakatuatusi ko te jw.org. Kae ne mafauafau ki te tusi faitau i te Faataoto 20:11, telā e fai mai penei: “E lauiloa foki se tamaliki [io me, “tamaliki tagata,” fakamatalaga mai lalo] i ana faifaiga, faitalia me e ‵ma kae ‵tonu.” E fesoasoani atu pefea ki a ia? Ko iloa ei ne Samuel a te tafao ki lagonaga o se tino e sē se amioga ‵ma kae tonu. Ne fai mai ana pati: “E tauloto foki ne au me kafai se talavou e tafao ki lagonaga o se tino, e ati aka ne ia a uiga kolā ka fai ei a ia ke fai pelā me se tino avaga masei. Kae ne mafaufau au me ka pefea a lagonaga o taku avaga māfai e lavea ne ia au e tafao ki lagonaga o te suā fafine. Ko iloa ei ne au me i te uiga tenā se uiga fakamataku. E tonu a te mea tenei se uiga faigofie kae e sē se mea e ‵tau o fai ne se tino.” Ne ‵fuli a amioga a Samuel. A te ‵kalo kea‵tea mai te uiga ki te tafao ki lagonaga o se tino ne fesoasoani atu ke kalo kea‵tea a ia mai amioga fakatauavaga sē ‵tau.

Ne oko atu foki a Antonio ki se tulaga fakamataku ona amioga fakataua‵vaga sē ‵tau: Ne fiafia malosi a ia o onoono ki ata ma‵sei. E tiga eiloa ne avaga a ia ki se fafine telā ne alofa malosi a ia ki ei, ne tumau eiloa i te fai ne ia a amioga konā. Ne fai mai a ia me i te mafaufau ki te 1 Petelu 5:8 ne fesoasoani malosi eiloa ki a ia. E fai mai, penei: “Ke ‵poto kae matapulapula koutou! A te otou fili ko te Tiapolo e livaliva sāle e pelā me se leona fekai, o salasala ke folo ne ia se tino.” Ne fakamatala mai a Antonio: “A tatou ko sikomia eiloa i ata ma‵sei i te lalolagi tenei, kae ko ata konā e se mafai o matafi mai i toku mafaufau. Kae ne fesoasoani mai te fuaiupu tenā ke iloa ne au me ko oi te māfuaga o fakaosoosoga konei. E manakogina ke masaua ne au a ata ma‵sei konā e māfua mai te Tiapolo. Kae nei, ko iloa ne au me ko Ieova fua e mafai o fesoasoani mai ki au ‘ke ‵poto kae matapulapula foki’ ko te mea ke ‵kalo kea‵tea au mai i mafaufauga konā i toku mafaufau, toku loto, mo taku fakaipoipoga.” Ne maua ne Antonio a fesoasoani e manakogina ne ia, kae ko mafai ne ia o tumau i te ‵kalo kea‵tea mai te fakalavelave tenā. Tela la, ne maua ne ia te malosi ke mafai ei a ia o ‵kalo kea‵tea mai nisi fakalavelave kolā e fakamataku.

E manino ‵ei me i te Tusi Tapu se tusi e fesoasoani mai ke ‵kalo kea‵tea tatou mai nisi fakalavelave fakama‵taku. Kae e a fakalavelave kolā ko leva ne ‵tupu kae fai fealoa? Ke onoono aka tatou ki te auala e fesoasoani mai ei te Muna a te Atua ki te faka‵leiga o fakalavelave faiga‵ta konā.