Muna a Rosie, “Ona ko te mafaufau faeloa ki nisi mea e manavase ki ei, ko fai ei ke ‵mafa faeloa toku mafaufau kae ke fakaataata foki i toku mafaufau a mea ma‵sei kolā e mafai o iku mai i ei.” Ne a tusi fai‵tau mai te Tusi Tapu ne fesoasoani ki ei? E tasi mai ei ko te Mataio 6:34: “Ke mo a ma manava‵se ki te aso ma taeao, me e manavase eiloa te aso ma taeao ki ana mea. E tofu eiloa te aso mo ana fakalavelave.” Ne fai mai a Rosie me ne fesoasoani atu a pati a Iesu konā ke se manavase a ia ki mea e mafai o ‵tupu i te aso ma taeao. Ne fakaopoopo mai a ia, “Oku fakalavelave ko lava eiloa, i tafa o te manavase ki nisi mea kolā e seki ‵tupu io me ka se ‵tupu eiloa.”

Ne iloa foki ne Yasmine me ko kamata o pule a ia ne te manavase. “E mafai au o tagi mō ne aso e lua i te vaiaso, kae e se mafai o moe i nisi po. Ne oko mai ki a au te lagonaga me i a au ko kai ola eiloa ne oku mafaufauga sē ‵lei.” Ne a tusi fai‵tau ne fesoasoani ki a ia? Ne fakasino atu tou fafine ki te 1 Petelu 5:7: ‘‵Pei atu otou manava‵sega katoa ki luga i te Atua, me e atafai a ia ki a koutou.’ Muna a Yasmine: “I te gasologa o taimi, ne ‵talo faeloa au ki a Ieova, kae ne tali mai a ia ki aku ‵talo. Ne fai eiloa pelā me ne amo kea‵tea se amoga ‵mafa mai oku tuauma. Koi isi eiloa ne mafaufauga sē ‵lei e maua ne au i nisi taimi, kae nei la, ko iloa ne au o fakafesagai atu ki ei.”

Ne fai mai se tamafine ko Isabella tena igoa, penei: “I taku faka‵tau a te fai tukutuku se mea telā e ‵solo i loto i te kāiga me maua foki ne toku tamana te amioga tenā. E se fai sāle ne au a mea kolā e tāua ko te mea fua ke fai ne au a mea sē aoga—ke takatokato io me onoono i te TV. A te mea tenā se faifaiga masani sē ‵lei me fai ei ke manavase malosi se tino kae ke se fai faka‵lei tena galuega.” A te mafaufau ‵loto ki te fakatakitakiga i te 2 Timoteo 2:15, ne fesoasoani eiloa ki a ia, e fai mai penei: “Fakaoti ou mafi ke tuku atu koe e pelā me se tino ko talia ne te Atua, se tino galue e aunoa mo te mā i so se mea.” Muna a Isabella, “E se manako au ko Ieova ke mā i aku galuega ona fua ko te fai tukutuku ne au.” Ko gasolo eiloa o ‵lei tou fafine i te feitu tenei.

I se auala tai ‵pau, ne fai mai a Kelsey: “E tuku faeloa ne au aku mea akoga o fai i te ‵toe taimi. E mafai au o tagi, sē moe kae manavase. E se ‵lei te mea tenā ki a au.” Ne maua ne Kelsey se fesoasoani i te Faataoto 13:16: “A te tino atamai e gasuesue e ‵tusa mo te iloaga, kae ko te tino valea e fakaasi faka‵sau atu tena valea.” Ne fakamatala mai ne tou fafine ana mea ne tauloto mai te tusi faitau tenei: “Se mea poto ke gasuesue koe o fai au palani mō aso mai mua. E isi se tusi e tausi ne au i taku taipola e fakamau i ei a galuega kolā e ‵tau o fai ne au, kae e fesoasoani mai te mea tenei ke fai faka‵lei aku fakatokaga, kae ke mo a e tuku a mea ki te ‵toe taimi.”

“Ne tiaki ne taku avaga au fakatasi mo tama‵liki e tokofa,” ko pati a Kirsten. Se a te fakatakitakiga mai te Tusi Tapu ne fesoasoani ki a ia? Faataoto 17:17 e faitau penei: “A te taugasoa tonu e fakaasi atu ne ia te alofa i taimi katoa, kae fai pelā me se taina ne fanau mai mō taimi o te puapuaga.” Ne ‵sala a Kirsten ki se fesoasoani mai nisi tino kolā e tavini fakatasi mo ia ki a Ieova. Ne a ana mea ne maua? “Ne fesoasoani mai oku taugasoa ki a au i auala e uke! Ne tuku ne nisi tino a meakai mo pulalakau i te mataloa o toku fale. E tolu taimi ne fesoasoani mai ei ki a au mo aku tama‵liki se potukau o tino ke ave motou kope mai te fale e tasi ki te suā fale. Ne fesoasoani mai se tino e tokotasi ke ‵sala ne ia saku galuega. Ne toka faeloa oku taugasoa o fesoasoani ki a au.”

E penā foki a Delphine, telā ne taku muamua mai, ne oko foki ki a ia a lagonaga sē sologa. Mai tua o te ‵galoatuga o ana mea, ne fai mai a ia: “Ne oko mai ki a au te lagonaga me tu atu au mai tua o te sitoa o te ola kae kilo atu ki tino katoa. Ne malosi ‵ki te lagonaga sē sologa i a au.” E tasi te tusi faitau ne fesoasoani atu ki tou fafine ko te Salamo 68:6: “E tuku atu ne te Atua ki a latou kolā e ‵nofo taki tokotasi se fale ke nofo i ei.” Ne fai mai tou fafine: “E iloa ne au me e se fakauiga fua te fuaiupu tenei ki se fale tonu i te taimi nei. Kae ne malamalama au me e tuku mai ne te Atua se fale faka-te-agaga, se koga telā e maua i ei te tokagamalie tonu mo ne va fakataugasoa ‵tonu mo lagonaga atafai mo nisi tino kolā e a‵lofa ki a Ieova. Kae e iloa ne au me e se mafai o fakapilipili atu au ki nisi tino seiloga ke mua au o fakapilipili atu ki a Ieova. Tela la, ne aoga eiloa te Salamo 37:4 i te feitu tenā: ‘‵Sala ke maua te fiafiaga sili i a Ieova, kae ka tuku atu ne ia a manakoga o tou loto.’”

Ne fakaoti mai ana pati penei: “Ne iloa aka ne au me manakogina ke fakapilipili malosi atu au ki a Ieova. Ko ia te ‵toe tino ‵lei o tino ‵lei katoa. Oti aka, tusi ei ne au ki lalo a mea kolā e mafai o fai fakatasi ne au mo nisi tino, ko te mea ke ati aka se va fakataugasoa ‵lei mo latou telā e fakavae ki mea tāua i te feitu faka-te-agaga. Ne tauloto au ke kilo atu ki mea ‵lei e fai ne nisi tino kae ke fai a faifaiga ‵lei ki a latou e ‵tusa eiloa me kilo fua au ki mea ‵lei konā.”

E tonu, e se ‵lei katoatoa a taugasoa kolā e tavini atu ki te Atua. E fakafesagai atu a Molimau a Ieova mo fakalavelave e pelā eiloa mo tino katoa. Kae e fakamalosi aka ne akoakoga mai te Tusi Tapu a tino ke fesoasoani atu ki nisi tino māfai e mafai. Se mea poto eiloa ke fai taugasoa mo tino penā. Kae e mata, e mafai o fesoasoani mai a fakatakitakiga mai te Tusi Tapu ki fakalavelave kolā e se mafai o faka‵lei aka i aso nei, e pelā mo se masaki malosi mo te loto mafatia?