1. Ne a mea ne ‵tau o fai ne se tino ke mafai o fanatu ki te tupu o Pelesia?

MAFAUFAU me e ola koe i se 2,500 tausaga ko ‵teka i Pelesia. E manako koe o faipati atu ki te tupu o te fenua e uiga ki se fakalavelave, telā ne faimalaga atu ei koe ki te fakai o te ‵tupu ko Susana. Ka se mafaufau eiloa koe ke fakapilipili atu ki te tupu e aunoa mo se taliaga mai i a ia. A te faiga tenā e mafai eiloa o fai ei ke tu atu tou ola i se tulaga fakamataku!—Eseta 4:11.

2. E pefea ‵tou lagonaga e uiga ki te fakapili‵pili atu ki a Ieova?

² Ko oko eiloa i te ‵tou loto fakafetai me i a Ieova e se pelā mo te tupu o Pelesia! A Ieova e maluga atu fakafia i so se tino pule, kae e tali fiafia ne ia so se tino i so se taimi. E manako a ia ke mo a tatou e ma‵taku ma fakapili‵pili atu ki a ia. E pelā me se fakaakoakoga, e tiga eiloa e maua ne Ieova a tofi ma‵luga e pelā mo te Mafuaga Sili, te Atua Malosi Katoatoa, mo te Aliki Tafasili i te Maluga, ne ‵kami ne ia tatou ke ka‵laga atu ki a ia kae ke fakaaoga a te tugapati masani ko te “Tamana.” (Mata. 6:9) E fakaotia loto ke iloa atu me e manako a Ieova ke fakapili‵pili atu tatou ki a ia!

3. Kaia e mafai ei o ka‵laga atu tatou ki a Ieova te “Tamana,” kae ne a mea ka sau‵tala tatou ki ei i te mataupu tenei?

³ Se mea ‵tau eiloa ke ka‵laga atu tatou ki a Ieova te “Tamana”—a ia ko te Pogai o te ola. (Sala. 36:9) Ona i a ia ko te ‵tou Tamana, se tiute o tatou ke faka‵logo ki a ia. Kafai e fai ne tatou a mea e fakatonu mai ne ia ke fai ne tatou, ka maua ne tatou a fakamanuiaga ‵gali e uke. (Epe. 12:9) E aofia i fakamanuiaga konā a te ola se-gata-mai, faitalia me i te lagi io me ko te lalolagi. E maua foki ne tatou a mea aoga i te taimi nei. Ka fakamatala mai i te mataupu tenei a te auala e fai ei a Ieova e pelā me se Tamana alofa i te taimi nei mo te pogai e mafai ei o tali‵tonu tatou me ka se tuku tiaki ne ia tatou i aso mai mua. Kae muamua  la, ke na sau‵tala nei tatou ki te pogai e mafai o tali‵tonu tatou me i te ‵tou Tamana faka-te-lagi e alofa malosi mai kae atafai mai ki a tatou.

4. Kaia e faigata ki nisi tino ke ‵kilo atu ki a Ieova e pelā me ko te lotou Tamana?

⁴ E mata, e faigata ki a koe ke mafaufau ki te Atua e pelā me ko tou Tamana? Nisi e mafau‵fau i a Ieova ko tō maluga kae tāua māfai ko faka‵pau ki a latou. E fakalotolotolua latou ki te atafai o te Atua Malosi Katoatoa ki a latou taki tokotasi. Kae e se manako eiloa te ‵tou Tamana alofa ke mafau‵fau tatou penā. Ne tuku mai ne ia ki a tatou a te ola kae manako ke maua ne tatou se fesokotakiga ‵lei mo ia. I te iloaga ne ia te munatonu tenei, ne fakamatala atu ne te apositolo ko Paulo ki ana tino fakalogo‵logo i Atenai me i a Ieova “e se ‵mao mai i a tatou taki tokotasi.” (Galu. 17:24-29) A te Atua e manako ko tatou taki tokotasi ke olo atu ki a ia e pelā loa mo se tamaliki e masani o faipati atu ki tena tamana telā e alofa kae e atafai.

5. Ne a mea e tauloto ne tatou mai te tala a se tuagane Kelisiano e tokotasi?

⁵ Kāti e faigata ki nisi tino ke ‵kilo atu ki a Ieova e pelā me ko te lotou Tamana, me ne seki alofagina latou ne olotou tamana. Mafaufau aka la ki fakamatalaga a se tuagane Kelisiano e tokotasi. “A toku tamana se tagata sauā,” ne fai mai tou fafine. “I taku kamataga o sukesuke ki te Tusi Tapu, ne faigata ki a au ke fakapilipili atu ki se Tamana faka-te-lagi. Kae i te taimi ne kamata o iloa ne au a Ieova, ne ‵fuli ei a mea katoa.” E mata, e tai penā foki ou lagonaga? Kafai e penā loa, ke loto talitonu me ka mafai o kilo atu koe ki a Ieova e pelā me ko te ‵toe Tamana ‵lei.

6. E ‵tusa mo te Mataio 11:27, se a te auala e tasi ne fesoasoani mai ei a Ieova ke ‵kilo atu ki a ia pelā me ko te ‵tou Tamana alofa?

⁶ A te auala e tasi ne fesoasoani mai a Ieova ke ‵kilo atu tatou ki a ia e pelā me se Tamana alofa ko te fakamauga o pati mo mea ne fai ne Iesu ki loto i te Tusi Tapu. (Faitau te Mataio 11:27.) Ne fakaasi mai ne Iesu i se auala ‵lei katoatoa a uiga o tena Tamana, telā ne mafai o fai mai a ia, penei: “So se tino e kilo mai ki a au ko kilo foki ki te Tamana.” (Ioa. 14:9) Ne faipati faeloa a Iesu e uiga ki te tiute o Ieova e pelā me se Tamana. I Tusi Evagelia e Fa, ne fakaaoga ne Iesu te pati “Tamana” faka-165 taimi ke fakasino atu ki a Ieova. Kaia ne faipati malosi a Iesu e uiga ki a Ieova? Te pogai e tasi, ko te ke mea tali‵tonu a tino me i a Ieova se Tamana alofa.—Ioa. 17:25, 26.

7. Ne a mea e tauloto ne tatou e uiga ki a Ieova mai i ana faifaiga ki tena Tama?

⁷ Mafaufau ki mea e tauloto ne tatou e uiga ki a Ieova mai ana faifaiga ki tena Tama, ko Iesu. Ne lagona faeloa ne Ieova a ‵talo a Iesu. Ne seki lagona fua ne ia a ‵talo a Iesu kae ne tali foki ne ia. (Ioa. 11:41, 42) Faitalia me ne a mea faiga‵ta ne fe‵paki mo Iesu, ne fakamaoni ne ia a te alofa mo te fesoasoani o tena Tamana ki a ia.—Luka 22:42, 43.

8. I auala fea ne tausi ei ne Ieova a Iesu?

⁸ Ne iloa ne Iesu me i tena Tamana ko te Pogai o tena ola i te taimi ne fai mai a ia, penei: “Kae ola foki au ona ko te Tamana.” (Ioa. 6:57) Ne talitonu katoatoa a Iesu ki tena Tamana, kae ne tausi ne Ieova a ia i te feitu faka-te-foitino. Kae sili atu i te tāua, ne tausi atu a Ieova ki manakoga faka-te-agaga o Iesu.—Mata. 4:4.

9. Ne fakatalitonu atu pefea ne Ieova ki a Iesu i a ia se Tamana alofa kae atafai?

⁹ E pelā me se Tamana alofa, ne manako a Ieova ke iloa ne Iesu a tena ‵lago atu ki a ia. (Mata. 26:53; Ioa. 8:16) E tiga eiloa ne seki puipui ne Ieova a Iesu mai ana logo‵maega katoa, ne fesoasoani atu a Ia ke kufaki a Iesu i mea faiga‵ta. Ne loto talitonu a Iesu me i logo‵maega kolā ka fe‵paki mo ia ka sē tumau. (Epe. 12:2) Ne fakatalitonu atu ne Ieova tena atafai ki a Iesu mai te fakalogologo ki a ia, tausi atu ki ei, akoako kae fesoasoani atu ki a ia. (Ioa. 5:20; 8:28) Ke na onoono nei tatou  ki te auala e atafai mai ei a te ‵tou Tamana faka-te-lagi ki a tatou i auala tai ‵pau.

10. E ‵tusa mo te Salamo 66:19, 20, e fakaasi mai pefea ne Ieova a tena alofa ki a tatou?

¹⁰ A Ieova e fakalogologo mai ki ‵tou ‵talo. (Faitau te Salamo 66:19, 20.) E se manako a ia ke fakatapula ‵tou ‵talo e fai atu ki a ia; e fakamalosi ne ia tatou ke ‵talo faeloa. (1 Tesa. 5:17) E mafai o ‵talo atu tatou ki te Atua mo te āva, faitalia te koga e ‵nofo i ei tatou. E se tō fakalavelave a ia ke fakalogologo mai ki a tatou; e avanoa faeloa a ia kae saga tonu mai. Kafai e iloa ne tatou me e fakalogologo mai a Ieova ki ‵tou ‵talo, ka ‵pili malosi atu tatou ki a ia. “Au e alofa ki a Ieova,” ne fai mai te faisalamo, “me e lagona ne ia toku leo.”—Sala. 116:1.

11. I te auala fea e tali mai ne Ieova a ‵tou ‵talo?

¹¹ A te ‵tou Tamana e se fakalogologo fua ki ‵tou ‵talo kae e tali foki ne ia. E fakatalitonu mai te apositolo ko Ioane ki a tatou, penei: “Me ko so se mea e fakatagi atu tatou ki ei e ‵tusa mo tena loto [te Atua], e lagona eiloa ne ia tatou.” (1 Ioa. 5:14, 15) E tonu, e mafai o se tali mai ne Ieova ‵tou ‵talo i te auala e fakamoe‵moe tatou ki ei. E iloa ne ia te ‵toe mea ‵lei mō tatou, tela la, i nisi taimi a tena tali ko te ikai io me e manako a ia ke faka‵tali tatou.—2 Koli. 12:7-9.

12-13. I auala fea e tausi mai ei te ‵tou Tamana faka-te-lagi ki a tatou?

¹² A Ieova e tausi ne ia tatou. E fai ne ia a mea kolā e manakogina ke fai ne tamana katoa. (1 Timo. 5:8) E tausi atu a ia ki manakoga faka-te-foitino o ana tama‵liki. E se manako a ia ko tatou ke manava‵se ki mea‵kai, gatu, io me se fale. (Mata. 6:32, 33; 7:11) E pelā me se tamana alofa, ko oti ne fai ne Ieova se fakatokaga ke fakama‵lie aka ei ‵tou manakoga i aso mai mua.

¹³ Kae sili atu i te tāua, e tausi ne Ieova tatou i te feitu faka-te-agaga. E auala i tena Muna, ne fakaasi mai ne ia te munatonu e uiga ki a ia, tena fuafuaga, te pogai o te ola, mo te olaga i aso mai mua. Ne fakaasi mai ne ia tena atafai i te taimi muamua ne tauloto ei tatou ki te munatonu, mai te fakaaoga ne ia ‵tou mātua io me se faiakoga aka ke fesoasoani mai ke iloa ne tatou a mea e uiga ki a ia. Kae e maua faeloa ne tatou a te fesoasoani atafai tenā mai ‵tou toeaina i te fakapotopotoga mo nisi taina mo tuagane ma‵tua faka-te-agaga. E se gata i ei, e fakatonutonu ne Ieova tatou e auala i fakatasiga a te fakapotopotoga, te koga e ‵kau fakatasi i ei tatou mo ‵tou taina mo tuagane faka-te-agaga. I auala konei mo nisi auala aka, e fakaasi mai eiloa ne Ieova a tena saga tonu mai e pelā me se tamana ki a tatou katoa.—Sala. 32:8.

14. Kaia e akoako ei ne Ieova tatou, kae i te auala fea e fai i ei ne ia te mea tenā?

¹⁴ A Ieova e akoako ne ia tatou. E se pelā mo Iesu, a tatou e se ‵lei katoatoa. Tela la, e pelā me se vaega o ‵tou akoakoga, e polopoloki ne te ‵tou Tamana alofa a tatou i te taimi tonu. E fakamasaua mai tena Muna ki a tatou penei: “Latou kolā e alofa ki ei a Ieova e polopoloki ne ia.” (Epe. 12:6, 7) E polopoloki ne Ieova tatou i auala e uke. E pelā me se mea e tasi, e mafai o fakatonutonu tatou e auala i se mea e faitau ne tatou i tena Muna io me i ‵tou fakatasiga. Io me se fesoasoani e maua mai toeaina. Faitalia te auala e polopoloki ei tatou ne Ieova, e fai faeloa ne ia te mea tenā ona ko tena alofa mō tatou.—Iele. 30:11.

15. I auala fea e puipui ei ne Ieova tatou?

¹⁵ A Ieova e fesoasoani mai ke kufaki tatou i mea faiga‵ta. E pelā loa me se tamana atafai telā e fesoasoani atu ki ana tama‵liki i taimi faiga‵ta, e fakamalosi faeloa tatou ne te ‵tou Tamana faka-te-lagi i taimi o fakalavelave. E fakaaoga ne ia tena agaga tapu ke puipui ei tatou mai mea fakama‵taku i te feitu faka-te-agaga. (Luka 11:13) E puipui foki ne Ieova tatou i mea tau lagonaga. E pelā me se fakaakoakoga, e tuku mai ne ia se fakamoemoega  fakaofoofogia. A te fakamoemoega tenā mō aso mai mua e fesoasoani mai ke kufaki tatou i mea faiga‵ta. Mafaufau ki te mea tenei: Faitalia a mea ma‵sei e ‵tupu ki a tatou, ka faka‵lei katoatoa ne ia a ‵tou logo‵maega katoa. Faitalia me ne a fakalavelave e fe‵paki mo tatou, a mea konei e se tumau, kae ko fakamanuiaga e tuku mai ne Ieova ka tumau ki te se-gata-mai.—2 Koli. 4:16-18.

16. Se a te mea ne tupu i te taimi ne sē fakalogo ei a Atamu ki tena Tamana alofa?

¹⁶ E lavea ne tatou a fakamaoniga o te alofa o Ieova mō tatou, i te auala ne saga atu ei a ia ki fakalavelave kolā ne ‵sae aka muamua i tena kaukāiga i te lalolagi. I te taimi ne sē fakalogo ei a Atamu ki tena Tamana faka-te-lagi, ne galo atu ei tena tulaga i te kāiga fia‵fia o Ieova, ko lāua fakatasi mo lā fanau. (Loma 5:12; 7:14) Kae ne gasuesue eiloa a Ieova o fesoasoani ki fanau a Atamu.

17. Mai tua o te ‵tekeatuga a Atamu, se a te mea ne gasue fakavave a Ieova o fai?

¹⁷ Ne fakasala ne Ieova a Atamu, kae ne seki tuku tiaki fua ne ia a fanau a Atamu e aunoa mo se fakamoemoega. Ne folafola fakavave mai ne ia me ka toe faka‵foki atu ne ia a tino faka‵logo ki tena kaukāiga. (Kene. 3:15; Loma 8:20, 21) Ne fakatoka ne Ieova a te mea tenei e auala i te taulaga togiola a tena Tama pele, ko Iesu. Mai te tukumaiga o tena Tama, ne fakamaoni mai ei ne Ieova a tena alofa sili mō tatou.—Ioa. 3:16.

18. Kaia e mafai ei o tali‵tonu tatou me e manako a Ieova ke fai tatou mo ana tama‵liki, faitalia loa me ne tiakina ne tatou a ia?

¹⁸ E tiga loa tatou e se ‵lei katoatoa, e manako a Ieova ko tatou ke aofia i tena kaukāiga, kae e seki kilo lele mai a ia ki a tatou e pelā me se amoga ‵mafa ki a ia. E mafai o fakafanoanoa ne tatou a ia io me tapea‵pea kea‵tea mō se vaitaimi, kae e se ‵fiu eiloa a Ieova i a tatou. Ne fakaasi mai ne Iesu a te ‵poko o te atafai o Ieova pelā me se tamana i te tala o te  tamaliki fakamāumāu mea. (Luka 15:11-32) Ne seki galo atu a te fakamoemoega o te tamana i te tala fakatusa ke toe fetaui a ia mo tena tama. I te taimi ne toe foki atu ei tena tama ki te fale, ne tali fiafia ne ia a tou tagata. Kafai ne tiakina ne tatou a Ieova kae sala‵mo tonu, e tali‵tonu eiloa tatou me e toka eiloa te ‵tou Tamana alofa o fakamagalo kae tali fiafia ne ia tatou māfai ko toe ‵foki atu ki a ia.

19. Ka faka‵lei pefea ne Ieova a fakamaseiga ne fai ne Atamu?

¹⁹ Ka faka‵lei ne te ‵tou Tamana a fakamaseiga katoa ne fai ne Atamu. Mai tua o te ‵tekeatuga a Atamu, ne fakaiku aka ne Ieova ke puke ne ia se toko 144,000 tino mai te lalolagi kolā ka tavini pelā me ne tupu mo faitaulaga i te lagi fakatasi mo tena Tama. Ka fesoasoani eiloa a Iesu mo ana pule lagolago ki tino faka‵logo ke fai pelā me ne tino ‵lei katoatoa i te lalolagi fou. Kafai ko manumalo latou mai tua o te ‵toe tofotofoga o te fakalogo, ka tuku atu ei ne te Atua ki a latou a te ola se-gata-mai. I te taimi tenā, ka lotomalie eiloa te ‵tou Tamana ke lavea atu ne ia te lalolagi kātoa ko ‵fonu i ana tama tāgata mo tama fāfine kolā ko ‵lei katoatoa. Se taimi gali ‵ki a te taimi tenā!

20. I auala fea ne fakaasi mai ei ne Ieova me e alofa malosi mai a ia, kae se a te mea ka sau‵tala tatou ki ei i te suā mataupu?

²⁰ Ne fakaasi mai ne Ieova me i a ia e alofa malosi mai ki a tatou. A iako te ‵toe Tamana ‵lei eiloa. E lagona ne ia ‵tou ‵talo kae tausi mai ne ia ‵tou manakoga, i te feitu faka-te-foitino mo te feitu faka-te-agaga. E akoako kae fesoasoani mai a ia ki a tatou. Kae e isi foki ne fakamanuiaga ‵gali ko oti ne fakatoka ne ia mō tatou. E fakamafanafana loto ke iloa atu me i te ‵tou Tamana e alofa kae atafai mai ki a tatou! Ka sau‵tala eiloa tatou i te suā mataupu ki auala e mafai ne tatou o fakaasi atu te loto fakafetai e pelā me ne ana tama‵liki, ki tena alofa.