1. Se a te tauliaga e maua ne tatou?

SE TAULIAGA gali eiloa ke aofia tatou i te fakapotopotoga a Ieova! E ‵nofo tatou i se palataiso faka-te-agaga telā e ‵fonu i tino filemu kae fia‵fia. Se a tou tulaga i te fakapotopotoga?

2. Se a te fakatusaga ne fakaaoga ne Paulo i nisi tusi fakaosofia a ia?

² E uke a mea e mafai o tauloto ne tatou i te mataupu tenei mai te fakatusaga ne fakaaoga sāle ne te apositolo ko Paulo i ana tusi fakaosofia. I ana tusi takitasi konei, ne fakatusa ne Paulo a te fakapotopotoga ki te foitino o se tino. Ne fakatusa foki ne ia a tino taki tokotasi i se fakapotopotoga ki vaega o te foitino.—Loma 12:4-8; 1 Koli. 12:12-27; Efe. 4:16.

3. Ne a akoakoga e tolu ka sau‵tala tatou ki ei i te mataupu tenei?

³ I te mataupu tenei, ka fai‵pati tatou ki akoakoga tāua e tolu kolā e mafai o tauloto ne tatou mai te fakatusaga a Paulo. Muamua la, ka iloa ne tatou me e isi se tulaga o tatou taki tokotasi i loto * i te fakapotopotoga a Ieova. Te lua, ka sau‵tala tatou ki mea e ‵tau o fai māfai e faigata ke lavea ne tatou a ‵tou tulaga i te fakapotopotoga. Kae ko te tolu, ka sau‵tala tatou ki pogai e ‵tau ei o fakalave‵lave tatou i te faiga o ‵tou tiute i loto i te fakapotopotoga a te Atua.

4. Se a te mea e akoako mai i te Loma 12:4, 5 ki a tatou?

⁴ A te akoakoga muamua e tauloto ne tatou mai te fakatusaga a Paulo me e isi se tulaga o tino taki tokotasi i te kāiga  o Ieova. E kamata ne Paulo tena fakatusaga mai te fai atu: “E pelā eiloa mo te uke o vaega kese‵kese i loto i te foitino e tasi, kae e se tasi fua te galuega e fai ne vaega katoa konei, e tiga eiloa e tokouke tatou kae e tasi fua te foitino i te ‵kau fakatasi mo Keliso, kae ko tatou taki tokotasi e fakalagolago te suā tino ki te suā tino.” (Loma 12:4, 5) Se a te mea e fakauiga a Paulo ki ei? E kese‵kese a tiute o tatou taki tokotasi i te fakapotopotoga, kae ko tatou taki tokotasi e tāua eiloa.

5. Ne a “meaalofa” ne tuku ne Ieova ki te fakapotopotoga?

⁵ Kafai e mafaufau koe ki tino kolā e isi ne olotou tulaga i te fakapotopotoga, kāti ka mafaufau koe ki a latou kolā e fai ne latou te takitakiga. (1 Tesa. 5:12; Epe. 13:17) E tonu, me e auala i a Keliso, ko oti ne tuku ne Ieova ki Tena fakapotopotoga a “tāgata e pelā me ne meaalofa.” (Efe. 4:8) E aofia i tāgata kolā e fai “pelā me ne meaalofa” ko tino o te Potukau Pule, tino fesoasoani o te Potukau Pule, Komiti o Ofisa Lagolago, ovasia o te seketi, tino fakatonutonu i akoakoga ki te Tusi Tapu, toeaina o te fakapotopotoga, mo tavini fesoasoani. A taina katoa konei ne ‵tofi ne te agaga tapu ke tausi atu ki mamoe pele a Ieova mo manakoga o te fakapotopotoga.—1 Pe. 5:2, 3.

6. E ‵tusa mo te 1 Tesalonia 2:6-8, ne a mea e taumafai a taina kolā ne ‵tofi ne te agaga o fai?

⁶ Ne ‵tofi ne te agaga tapu a taina ke fai ne latou a tiute kese‵kese e uke. E pelā loa mo vaega kese‵kese o te foitino, pelā mo lima mo vae, e ga‵lue fakatasi ke maua ne te foitino a mea aoga, e ga‵lue malosi foki a taina kolā ne ‵tofi ne te agaga tapu mō te ‵lei o te fakapotopotoga kātoa. E se taumafai latou ke maua ne latou a tavaega. Kae e taumafai latou o ati aka kae fakamalosi olotou taina mo tuagane. (Faitau te 1 Tesalonia 2:6-8.) Fafetai ki a Ieova mo te tukumaiga o tāgata uiga kaima‵lie kae ma‵losi faka-te-agaga!

7. Ne a fakamanuiaga e maua ne tino e tokouke kolā e ga‵lue i te taviniga tumau?

⁷ Ko oti ne ‵tofi a nisi tino i te fakapotopotoga ke tavini atu pelā me ne misionale, paenia fakapito, io me ne paenia tumau. E tonu, e tokouke a taina mo tuagane i te lalolagi kātoa ko oti ne fai ne latou te galuega talai mo te faiga o soko e pelā me ko te lotou galuega tumau. Mai te faiga penā, ko oti ne fesoasoani atu a latou ki tino e tokouke ke fai mo soko o Keliso Iesu. Faitalia te sē uke o kope faka-te-foitino o tino talai tumau konei, kae ne maua ne latou se olaga e ‵fonu i fakamanuiaga mai i a Ieova. (Male. 10:29, 30) E a‵lofa tatou ki taina mo tuagane konei, kae loto fakafetai tatou me fai latou mo vaega o te fakapotopotoga!

8. Kaia e tāua ei ki a Ieova a tino talai katoa o te tala ‵lei?

⁸ E mata, a taina tofia pelā foki mo latou kolā i te taviniga tumau, ko latou fua e isi ne olotou tulaga i te fakapotopotoga? Ikai! A tino talai katoa o te tala ‵lei e tāua ki te Atua mo te fakapotopotoga. (Loma 10:15; 1 Koli. 3:6-9) E fai penā, me tasi o mea tāua ‵ki e kausaki ki ei te fakapotopotoga ko te faiga o soko o te ‵tou Aliki ko Iesu Keliso. (Mata. 28:19, 20; 1 Timo. 2:4) A tino katoa kolā e ‵kau ki te fakapotopotoga, tino papatiso mo tino talai seki papatiso, e taumafai o fakamuamua ne latou te faiga o te galuega tenei.—Mata. 24:14.

9. Kaia e fakatāua ei ne tatou a ‵tou tuagane Kelisiano?

⁹ E tuku atu ne Ieova ki tuagane Kelisiano se tulaga fakaaloalo i te fakapotopotoga. E fakatāua ne ia a fāfine a‵vaga, mātua, fāfine ko ‵mate olotou avaga, mo tuagane taka kolā e tavini fakamaoni atu ki a ia. E faipati faeloa te Tusi Tapu ki fāfine e tokouke kolā ne fakafiafia ne latou te Atua. E fakamālō eiloa ki a latou mō te faiga e pelā me ne fakaakoakoga ‵lei o te poto, te fakatuanaki, te loto finafinau, te loto malosi, te kaimalie, mo te  faiga o galuega ‵lei. (Luka 8:2, 3; Galu. 16:14, 15; Loma 16:3, 6; Fili. 4:3; Epe. 11:11, 31, 35) E fakafetai eiloa tatou ki a Ieova, me e maua ne tatou i ‵tou fakapotopotoga a fāfine Kelisiano kolā e maua foki ne latou a uiga ‵gali konei!

10. Kaia e fakatāua ei ne tatou a ‵tou tino ma‵tua?

¹⁰ Se fakamanuiaga foki eiloa ki a tatou ke isi ne tino ma‵tua i te fakapotopotoga. E isi ne taina mo tuagane ma‵tua i nisi fakapotopotoga ne tumau i te tavini fakamaoni atu ki a Ieova i olotou olaga kātoa. A nisi tino ma‵tua kāti ne fatoa tauloto fua latou ki te munatonu fakamuli nei. Kae e tokouke a tino ma‵tua e mafai o fakamasaki‵saki ona ko te tulaga matua. E fai ne te tulaga tenā ke se uke olotou mea e mafai o fai i te fakapotopotoga mo te galuega talai. Kae e fai ne tino ma‵tua konei a so se mea e mafai ne latou o fai i te galuega talai, kae fakaaoga te malosi e maua ne latou ke fakamalosi kae akoako atu a nisi tino! E maua eiloa ne tatou a mea aoga mai te lotou ata‵mai. E tauleka‵leka eiloa latou i te kilokiloga a Ieova pelā foki mo tatou.—Faata. 16:31.

11-12. Ne fakamalosi atu pefea ki a koe a talavou i te fakapotopotoga?

¹¹ Mafaufau foki la ki ‵tou talavou. E mafai o fe‵paki latou mo tulaga faiga‵ta i te taimi e ‵tupu aka ei latou i te lalolagi nei telā e pule ne Satani te Tiapolo mo ana mafaufauga ma‵sei. (1 Ioa. 5:19) Kae e fakamalosi mai eiloa ki a tatou ke lavea atu a ‵tou talavou e fai olotou tali i fakatasiga, ‵kau atu ki te galuega talai, kae ‵pulu ne latou olotou talitonuga mo te loto ma‵losi. Ao, e tāua eiloa te otou tulaga, e talavou, i loto i te fakapotopotoga a Ieova!—Sala. 8:2.

¹² A nisi taina mo tuagane o tatou, e tai faigata loa ke tali‵tonu me i a latou ne vaega tāua o te fakapotopotoga. Se a te mea e mafai o fesoasoani mai ke tali‵tonu tatou taki tokotasi me e isi se ‵tou tulaga i te fakapotopotoga? Ke onoono tatou.

13-14. Kaia e mafai ei o mafau‵fau a nisi tino me e se tāua latou i loto i te fakapotopotoga?

¹³ Onoono ki te lua o akoakoga e mafai o tauloto ne tatou mai te fakatusaga a Paulo. E  fakasino atu a ia ki se fakalavelave telā e fepaki mo tino e tokouke i aso nei; e faigata o tali‵tonu latou me i a latou e tāua i loto i te fakapotopotoga. Ne tusi mai a Paulo: “Kafai e fai mai te vae, ‘Au e sē se vaega o te foitino i a au e sē se lima,’ e se fakauiga i ei i a ia e sē se vaega o te foitino. Kae kafai e fai mai te taliga, ‘Au e sē se vaega o te foitino i a au e sē se mata,’ e se fakauiga i ei i a ia e sē se vaega o te foitino.” (1 Koli. 12:15, 16) Se a te manatu ne akoako mai ne Paulo?

¹⁴ Kafai e fakatusatusa ne koe a koe eiloa ki nisi tino i te fakapotopotoga, ka faigata o lavea ne koe te tāua o koe i loto i te fakapotopotoga. E isi ne tino i te fakapotopotoga kāti e apo i te akoako, te fakatokaga o mea, io me i te fakamalosiga o nisi tino. Kāti e mafaufau koe me e se mafai o apo koe e pelā mo latou. E fakaasi mai i ei i a koe e loto maulalo kae agamalu. (Fili. 2:3) Kae ‵tau mo koe o fakaeteete. Kafai e fakatusatusa faeloa ne koe a koe mo tino kolā e apo malosi, ka fai fua i ei ke loto vāivāi koe. E pelā mo pati a Paulo, ka mafai o mafaufau ifo koe me i a koe e se tāua ki te fakapotopotoga. Se a te mea ka fesoasoani atu ki a koe ke ‵teke atu ki mafaufauga penā?

15. E ‵tusa mo te 1 Kolinito 12:4-11, se a te mea e ‵tau o iloa ne tatou e uiga ki so se meaalofa e maua ne tatou?

¹⁵ Mafaufau ki te manatu tenei: Ne tuku ne Ieova ki nisi Kelisiano i te senitenali muamua a meaalofa fakavavega o te agaga tapu, kae e se ko Kelisiano katoa ne maua ne latou a meaalofa eiloa konā. (Faitau te 1 Kolinito 12:4-11.) Ne tuku ne Ieova ki a latou a meaalofa mo atamai kese‵kese, kae e tāua eiloa a Kelisiano taki tokotasi. I aso nei, ko se maua ne tatou te meaalofa o te agaga tapu. Kae e ‵pau eiloa te fakatakitakiga i ei. Kāti e se ‵pau katoa a ‵tou taleni, kae ko tatou katoa e tāua ki a Ieova.

16. Ne a pati fakatonutonu a te apositolo ko Paulo e ‵tau o fakagalue ne tatou?

¹⁶ I lō te fakatusatusa ne tatou a tatou eiloa mo nisi Kelisiano, e ‵tau o fakagalue ne tatou a pati fakaosofia a te apositolo ko Paulo: “Ke iloilo ifo a tino taki tokotasi ki ana galuega eiloa, kae ka isi se pogai ke fiafia ei a ia e uiga ki a ia eiloa, kae ke mo a ma fakatautau ki se isi tino.”—Kala. 6:4.

17. Ne a mea aoga ka maua ne tatou māfai e tau‵tali tatou ki pati fakatonutonu a Paulo?

 ¹⁷ Kafai e tau‵tali tatou ki pati fakatonutonu fakaosofia a Paulo kae iloilo faka‵lei ‵tou faifaiga, ka mafai o lavea ne tatou me isi eiloa ne ‵tou taleni tu ‵kese. E pelā me se fakaakoakoga, kāti e se apo se toeaina i te akoako mai luga i te tulaga, kae kāti e apo a ia i te galuega ko te faiga o soko. Io me kāti e se apo a ia i te fakatokaga o mea e pelā mo nisi toeaina i tena fakapotopotoga, kae kāti e iloa a ia pelā me se tausi mamoe alofa telā e se ma‵taku a tino talai ma olo ki a ia ke maua ne manatu fesoasoani mai te Tusi Tapu. Io me kāti e lasi te uiga talimalo i a ia. (Epe. 13:2, 16) Kafai e lavea faka‵lei ne tatou a mea kolā e apo tatou i ei mo ‵tou taleni, ka mafai eiloa o ‵lei ‵tou lagonaga me ko mafai o isi se ‵tou tusaga e fai i loto i te fakapotopotoga. Kae ka se loto ma‵sei foki tatou ki ‵tou taina kolā e isi ne olotou taleni kolā e ‵kese mo ‵tou taleni.

18. E fai pefea tatou mo fai ne faiakoga apo?

¹⁸ Faitalia me se a ‵tou tulaga i te fakapotopotoga, e ‵tau mo tatou katoa o ma‵nako o ga‵lue ke momea aka te ‵lei o ‵tou taviniga kae ke atamai malosi. Ke gasolo o apo tatou, e akoako ne Ieova tatou e auala i tena fakapotopotoga. E pelā mo ‵tou fakatasiga i loto i te vaiaso, e maua ne tatou a fakatonutonuga ki te auala ke gasolo o magoi te faiga o ‵tou galuega talai. E mata, e fakaaoga faka‵lei ne koe a akoakoga konā?

19. E mafai pefea o taunu te fakamoemoega ke kau atu ki te Akoga mō Tino Talai o te Malo?

¹⁹ A te suā akoakoga gali foki ko te Akoga mō Tino Talai o te Malo. E ‵tala te akoga tenei ki taina mo tuagane i te taviniga tumau kae nofo olotou tausaga i te va o te 23 mo te 65. Kāti e mafaufau koe me e se mafai o kau atu koe ki se akoga penā. Kae i lō te faiga o se fakasologa o pogai e se mafai o kau atu koe ki ei, fai se fakasologa o pogai e manako ei koe ke kau atu ki ei. Ko fai ei sau palani telā ka fesoasoani atu ki a koe ke toka o kau ki ei. Mai te fesoasoani o Ieova fakatasi mo galuega e fai ne koe, e mafai eiloa o taunu a te mea telā ne mafaufau koe me e se mafai o tupu.

20. Ne a mea e mafai o tauloto ne tatou mai te Loma 12:6-8?

²⁰ A te tolu o pogai e mafai o tauloto ne tatou mai i a Paulo e maua i te Loma 12:6-8. (Faitau.) Ne toe fai mai ne Paulo i konei me e kese‵kese a taleni a tino i te fakapotopotoga. Kae ko faka‵mafa mai ne ia i konei me e ‵tau o fakaaoga ne tatou so se taleni e maua ne tatou ke ati aka kae fakamalosi te fakapotopotoga.

21-22. Se a te akoakoga e tauloto ne tatou mai i a Robert mo Felice?

²¹ Mafaufau ki te tala o te taina ko Robert. Mai tua o tena taviniga i se isi fenua, ne ‵tofi a ia ke fanatu o galue i te Peteli i tena fenua tonu. E tiga loa a fakamaoniga ne fai atu ki a ia me i tena tofiga fou tenei e se fakauiga i ei me isi se mea ‵se ne fai ne ia, ne fai mai tou tagata: “A te kilokiloga sē ‵lei ne nofo mo au ki a au eiloa—me seki mafai o fai faka‵lei taku taviniga—ne nofo mo au i loto i se fia masina. E isi ne taimi ne manako au o tiaki taku taviniga i te Peteli.” Ne toe maua pefea ne ia te fiafia? Ne fakamasaua atu ne se toeaina ki a ia me i a Ieova e akoako ne ia tatou i ‵tou tofiga mua ko te mea ke mafai o aoga tatou ki ‵tou tofiga ‵fou. Ne iloa ne Robert me ko se ‵tau o toe kilo a ia ki aso mua kae ke saga a ia o fai a mea e mafai ne ia o fai i te taimi nei.

²² Ne fepaki te taina ko Felice Episcopo mo se fakalavelave tai ‵pau. I te otiga o te pukegā pepa a lāua mo tena avaga i Kiliata i te 1956 ne tavini a ia pelā me se ovasia o te seketi i Bolivia. I te 1964 ne isi ei se lā tamaliki. Muna a Felice: “Ne faigata ‵ki ki a māua ke  tiakina te mā taviniga telā e pele ki a māua. E fai ‵tonu atu au me e tasi te tausaga ne nofo ei au mo te loto mafatia. Kae mai te alofa o Ieova, ne ‵fuli taku kilokiloga kae saga atu ki taku galuega fou e pelā me se mātua.” E mata, e tai ‵pau ou lagonaga mo Robert io me ko Felice? E mata, e loto vāivāi koe ona ko se maua ne koe a tauliaga kolā ne maua ne koe i aso mua? Kafai e penā loa, ka fiafia atu koe māfai e ‵fuli tau kilokiloga kae saga tonu ki mea e mafai ne koe o fai i te taimi nei ke tavini atu ki a Ieova mo ou taina. Ke fakalavelave faeloa, ke fakaaoga ou taleni mo tou atamai ke fesoasoani atu ki nisi tino, kae ka fiafia koe i te taimi e ati aka ne koe te fakapotopotoga.

23. Se a te mea e ‵tau o fakaaoga ‵tou taimi o fai, kae se a te mea ka sau‵tala ki ei i te suā mataupu?

²³ A tatou taki tokotasi e tāua ki a Ieova. E manako a ia ke fai tatou mo vaega o tena kāiga. Kafai e fakaaoga ‵tou taimi ke mafaufau ‵loto ki mea e mafai o fai ne tatou ke ati aka a ‵tou taina mo tuagane kae ga‵lue malosi o fakataunu ‵tou tiute, ka galo atu eiloa te lagonaga i a tatou me i a tatou e se ne vaega o te fakapotopotoga! Kae e pefea la te ‵tou kilokiloga ki nisi tino i te fakapotopotoga? E fakaasi atu pefea ne tatou te ‵tou loto fakafetai ki a latou? I te suā mataupu ka sau‵tala tatou ki te mataupu tāua tenei.