1. Se a te mea ne tuku ne Ieova ki ana tavini fakamaoni taki tokotasi?

KO OTI ne tuku atu ne Ieova mo te alofa ki ana tavini fakamaoni taki tokotasi se tulaga o latou i loto i tena fakapotopotoga. E tiga loa e kese‵kese ‵tou tiute, e tāua a tatou katoa kae ma‵nako tatou ki te fesoasoani o ‵tou taina. E fesoasoani mai te apositolo ko Paulo ke iloa ne tatou te akoakoga tāua tenei. E pefea la?

2. E ‵tusa mo te Efeso 4:16, kaia e ‵tau ei o fakatāua ne tatou a nisi tino kae ga‵lue fakatasi mo latou?

² E pelā mo te tusi fakavae o te mataupu tenei, ne faka‵mafa mai ne Paulo me e seai se tino i a tatou e mafai o kilo atu ki te suā tavini a Ieova kae fai atu “Au e se manako ki a koe.” (1 Koli. 12:21) Ko te mea ke maua te filemu i te fakapotopotoga, e ‵tau o fakatāua ne tatou a nisi tino kae ga‵lue fakatasi. (Faitau te Efeso 4:16.) Kafai e ga‵lue tatou mo te ‵kau fakatasi, ka malosi te fakapotopotoga kae lasi te alofa i ei.

3. Ne a mea ka sau‵tala tatou ki ei i te mataupu tenei?

³ Ne a nisi auala e mafai o fakaasi atu ei ne tatou te āva ki nisi Kelisiano i te fakapotopotoga? I te mataupu tenei, ka sau‵tala tatou ki te auala ke fakaasi atu ne toeaina a te āva ki nisi toeaina. Oti, ko sau‵tala ei ki te auala ke fakatāua ne tatou a taina mo tuagane kolā e seki a‵vaga. Fakamuli loa, ko sau‵tala ei tatou ki te auala ke fakaasi atu te loto fakafetai ki tino kolā e se fai‵pati faka‵lei ki ‵tou ‵gana.

4. Ne a pati fakatonutonu a Paulo i te Loma 12:10 e ‵tau o tau‵tali ki ei a toeaina?

⁴ A toeaina katoa ne ‵tofi ne te agaga tapu o Ieova. Kae e kese‵kese a taleni mo atamai o tino taki tokotasi. (1 Koli. 12:17, 18) A nisi kāti ne fatoa ‵tofi fua kae seki lasi te lotou atamai. Nisi tino ko se uke olotou mea e mafai o fai ona ko te tulaga matua io me ko masaki. Kae e seai se toeaina e ‵tau o kilo atu ki te suā toeaina kae fai atu, “Au e se manako ki a koe.” I lō te fai penā, e ‵tau mo toeaina taki tokotasi o tau‵tali ki pati fakatonutonu a Paulo kolā ne tusi i te Loma 12:10.—Faitau.

5. E fakaasi atu pefea ne toeaina me āva latou ki nisi toeaina, kae kaia e tāua ei ke fai latou penā?

⁵ E fakaasi atu ne toeaina me āva latou ki nisi taina toeaina mai te fakatau fakalogo‵logo faka‵lei ki a latou. E tāua te mea tenei i te taimi ko maopoopo ei latou o fai‵pati ki se mataupu tāua. Kaia? Mafaufau ki pati i The Watchtower i a Oketopa 1, 1988: “E iloa ne toeaina me e fakatonutonu ne Keliso, e auala i te agaga tapu, a te mafaufau o so se toeaina i te potukau o toeaina ke tuku mai ne ia se fakatakitakiga mai te Tusi Tapu telā e aoga ki te tulaga e fai‵pati latou ki ei io me ki te faiga o se fakaikuga tāua. (Galu. 15:6-15) E fesoasoani atu a te agaga ki toeaina katoa kae e se ki se toeaina fua e tokotasi.”

6. E mafai pefea o ga‵lue a toeaina mo te ‵kau fakatasi, kae ka aoga pefea a te faiga tenā ki te fakapotopotoga?

⁶ A te toeaina telā e āva ki nisi toeaina e se taumafai ke faipati muamua faeloa a ia i taimi o fono a toeaina. E se ‵tau mo ia o fai ke faipati faeloa a ia, kae e se ‵tau mo ia o mafaufau me i ana manatu e ‵tonu faeloa. E ‵tau fua mo ia o fakaasi atu tena kilokiloga i te loto maulalo mo te agamalu. E fakalogologo faka‵lei a ia ki manatu mai nisi tino. Kae sili atu i te tāua, e toka a ia o fakaasi atu a fakatakitakiga mai te Tusi Tapu kae fakalogologo ki pati fakatonutonu mai “te tavini fakamaoni kae poto.” (Mata. 24:45-47) I te taimi e fai‵pati ei a toeaina i se auala alofa kae āva ki olotou mataupu, ka ‵kau fakatasi eiloa te agaga tapu o te Atua ki a latou, kae  takitaki latou ke fai a fakaikuga kolā ka fakamalosi atu ei ki te fakapotopotoga.—Iako. 3:17, 18.

7. Se a te kilokiloga a Iesu ki te nofo taka?

⁷ E aofia i te fakapotopotoga i aso nei a tauavaga mo kāiga kese‵kese. Kae e aofia foki i ei a taina mo tuagane kolā e seki a‵vaga. Se a te kilokiloga e ‵tau o maua ne tatou ki a latou kolā koi ‵nofo taka? Mafaufau ki te kilokiloga a Iesu ki te nofo taka. Ne seki avaga a Iesu i te taimi ne fai ei tena galuega talai i te lalolagi. Ne nofo taka a ia kae ne fakaaoga ana taimi ke saga tonu ki tena galuega. Ne seki akoako mai a Iesu me e ‵tau eiloa o a‵vaga a tino io me ‵nofo taka latou. Kae ne fai mai a ia me e isi ne Kelisiano ka filifili aka ne latou ke mo a eiloa ma a‵vaga. (Mata. 19:11, 12) Ne āva a Iesu ki tino kolā e seki a‵vaga. Ne seki kilo atu a ia ki a latou kolā e ‵nofo taka me e se tāua io me isi se mea e galo i a latou.

8. E ‵tusa mo te 1 Kolinito 7:7-9, se a te mea ne fakamalosi atu a Paulo ke mafau‵fau ki ei a Kelisiano?

⁸ E pelā mo Iesu, ne fai foki ne Paulo tena galuega e pelā me se tino taka. Ne seki akoako mai eiloa a Paulo me se mea masei ke avaga se Kelisiano. Ne iloa ne ia me i te mea tenei se filifiliga totino eiloa a te tino. Kae ko Paulo ne fakamalosi atu ki Kelisiano ke mafau‵fau me e mata e mafai o tavini latou ki a Ieova e pelā me ne tino taka. (Faitau te 1 Kolinito 7:7-9.) Ne seki kilo fatauva a Paulo ki Kelisiano taka. E tonu, ne filifili ne ia a te talavou ko Timoteo, se taina taka, ke fai ne ia a nisi tiute tāua. * (Fili. 2:19-22) Tela la, e mautinoa eiloa, me se mea sē tonu ke mafaufau ifo me e fetaui ‵lei io me e se fetaui ‵lei se taina ona fua i a ia ko oti ne avaga io me seki avaga.—1 Koli. 7:32-35, 38.

9. Ne a ‵tou pati e mafai o fai atu e uiga ki te avaga mo te nofo taka?

⁹ E seki akoako mai foki a Iesu io me ko Paulo me i Kelisiano e ‵tau eiloa o a‵vaga io me ‵tau mo latou o ‵nofo taka. Ne a la ‵tou pati e mafai o fai atu e uiga ki te avaga mo te nofo taka? E gali te tali i The Watchtower i a Oketopa 1, 2012, e fai mai: “E tonu, a tulaga konei [te avaga mo te nofo taka] e mafai o taku pelā me ne meaalofa mai te Atua. . . . E se kilo atu a Ieova ki te [nofo taka] e pelā me se mea fakamasiasi io me fakafanoanoa.” Ka masaua ne tatou te mea tenei, ka fai ei ke āva tatou ki te tulaga o taina mo tuagane taka i te fakapotopotoga.

10. E fakaasi atu pefea ne tatou te āva ki ‵tou taina mo tuagane ‵nofo taka?

 ¹⁰ E fakaasi atu pefea ne tatou a te āva ki lagonaga mo fakanofonofoga o ‵tou taina mo tuagane taka? Se mea ‵lei ke masaua faeloa ne tatou me i nisi Kelisiano taka ko oti ne fakaiku ne latou ke mo a ma a‵vaga latou. A nisi Kelisiano taka e fia a‵vaga, kae e seai se tino tonu ke maua ne latou. Kae ko nisi tino ko oti ne ‵galo atu olotou avaga pele i te mate. I tulaga konā, e mata, se mea ‵tau ke fesili atu a tino i te fakapotopotoga ki se Kelisiano taka me kaia a ia e seki avaga loa io me fai atu ke ‵sala ne koe se avaga ma ia? E tonu, ka mafai o ‵sala a nisi Kelisiano taka ki se fesoasoani mai i a tatou. Kae kafai e se ma‵nako latou ki se fesoasoani, e mata, ka pefea olotou lagonaga māfai e fai atu koe ke ‵sala ne koe se avaga ma ia? (1 Tesa. 4:11; 1 Timo. 5:13) Ke onoono tatou ki pati ne fai mai ne nisi taina mo tuagane fakamaoni kolā e ‵nofo taka.

11-12. I auala fea e mafai ei o fakavāivāi atu tatou ki a latou kolā koi ‵nofo taka?

¹¹ Ne iloa ne se ovasia o te seketi e tokotasi telā e galue malosi i tena taviniga me e uke ‵ki a feitu aoga o te nofo taka. Kae fai mai a ia me se mea fakavāivāi eiloa ki a ia māfai e fesili atu a nisi taina mo tuagane ma‵losi faka-te-agaga ki a ia penei: “Kaia koe e se avaga?” Ne fai mai se taina taka telā e galue i se ofisa lagolago penei: “Nisi taimi e fai ne taina mo tuagane ke maua ne au se lagonaga me i tino ‵nofo taka e fakaa‵lofa. E fai ei ke foliga mai me i te nofo taka se fakalavelave kae e sē se meaalofa.”

¹² Ne fai mai se tuagane telā e tavini i te Peteli: “Nisi tino talai e mafau‵fau me i tino taka katoa e ‵sala ki se avaga io me i tino taka katoa e ‵kilo atu ki so se maopoopoga fakafiafia me se avanoaga tenā ke ‵sala aka se avaga. I se taimi e tasi ne faimalaga ei au ki te koga e fai ei taku taviniga i se fakai ‵mao, ne oko atu au i te po e fai ei te fakatasiga. Ne fai mai te tuagane telā e nofo au i ei me e isi ne taina i te fakapotopotoga kolā e tai kautama mo au. Ne fai ‵tonu mai a ia me i a ia e se taumafai o ‵sala se avaga ma aku. Kae i te mā okoga ki te Fale Tapuaki, ne ave ne ia au ke fakatalofa ki taina e tokolua konei. Ko oko loa i te fakamā o te mea tenā ki a matou tokotolu.”

13. Ne a mea ne fakamalosi atu ki se tuagane taka e tokotasi?

¹³ Ne fai mai foki se suā tuagane taka telā e tavini i te Peteli: “E iloa ne au a paenia ma‵tua kolā e seki a‵vaga kae paleni i olotou mea e fai, e ‵saga tonu ki te lotou taviniga, e toka o fesoasoani, e fia‵fia, kae aoga malosi latou ki te fakapotopotoga. E maua ne latou se kilokiloga paleni ki te nofo taka, e seai se lagonaga fia maluga i a latou me i a latou e ‵nofo taka io me maua se kilokiloga fakaalofa ki a latou eiloa me seai ne olotou avaga io me ne kāiga.” Te fakapotopotoga e gali māfai e fakatau āva kae fakatau fakatāua ne te suā tino a te suā tino. E se mafai o maua ne koe a lagonaga fakaalofa io me loto masei, e se amanaiagina io me fakamaluga ne nisi tino a koe. E iloa ne koe me a‵lofa ou taina mo tuagane ki a koe.

14. E fakaasi atu pefea me āva tatou ki tino taka?

¹⁴ Ka loto fia‵fia eiloa a ‵tou taina mo tuagane taka māfai e fakatāua ne tatou a latou ona ko olotou uiga ‵gali kae ke se ‵kilo fakaa‵lofa tatou ki a latou ona ko latou e seki a‵vaga. I lō te ‵kilo fakaa‵lofa atu ki a latou, se mea gali ke fakaasi atu ‵tou loto fakafetai ki a latou ona ko te lotou fakamaoni. Mai te fai penā, ka se mafai eiloa o mafau‵fau a ‵tou taina mo tuagane taka me i a tatou ko fai atu ki a latou: “Au e se manako ki a koe.” (1 Koli. 12:21) Ka iloa ne latou me āva tatou ki a latou kae fakatāua ne tatou te lotou tulaga i te fakapotopotoga.

15. Ne a fakama‵fuliga ko oti ne fai ne nisi tino ke mafai o fakalauefa atu te lotou galuega talai?

¹⁵ I tausaga fakamuli nei, e tokouke a tino talai e fakamoe‵moe ke tauloto ki se isi ‵gana ke mafai o fakalauefa atu te lotou galuega talai. Ke fai penā e manakogina a fakama‵fuliga e uke. Ko oti ne tiaki ne taina mo tuagane konei a te fakapotopotoga telā e fai‵pati ki te lotou ‵gana totino, ko te mea ke mafai o tavini latou i se fakapotopotoga telā e fai‵pati ki se isi ‵gana telā e manakogina malosi i ei a tino talai o te Malo. (Galu. 16:9) A te mea tenei se fakaikuga totino e fai ne Kelisiano konei ko te mea ke fakalauefa atu te lotou taviniga ki a Ieova. E tiga loa e manakogina a tausaga e uke ke fai‵pati faka‵lei ki te ‵gana fou tenā, kae lasi ‵ki te lotou fesoasoani ki te fakapotopotoga. A uiga ‵lei mo tala ‵gali o latou e fakamalosi i ei te fakapotopotoga. E fakatāua eiloa ne tatou a taina mo tuagane loto fia‵fia konei!

16. Ne a mea e fakavae ki ei a te iloiloga a toeaina ki te fai o se taina mo fai se toeaina io me se tavini fesoasoani?

¹⁶ E se mafai o taofi aka ne te potukau o toeaina se taina mai te fai pelā me se toeaina io me se tavini fesoasoani ona fua me e seki ‵lei tena faipati i te ‵gana e fai‵pati ki ei te fakapotopotoga. Ka iloilo ne toeaina se taina e ‵tusa loa mo manakoga i te Tusi Tapu mō toeaina mo tavini fesoasoani kae e se ona ko te ‵lei o tena faipati i te ‵gana a te fakapotopotoga.—1 Timo. 3:1-10, 12, 13; Tito 1:5-9.

17. Ne a fesili e ‵tau o mafau‵fau ki ei a kāiga māfai ko olo atu o ‵nofo i se isi fenua?

¹⁷ E isi ne kāiga Kelisiano ko oti ne olo o ‵nofo i nisi fenua ona ko te sē ‵lei o tulaga i olotou fenua io me ke ‵sala galuega. Ona ko tulaga konā, kāti ka tauloto olotou tama‵liki ki te ‵gana o te fenua fou tenā. E ‵tau foki mo mātua o tauloto ki te ‵gana tenā ko te mea ke mafai o maua ne olotou galuega. Kae pefea la māfai e isi se potukau io me se fakapotopotoga i te lotou ‵gana totino i te fenua tenā? Se a te fakapotopotoga e ‵tau o ‵kau ki ei te kāiga? E mata, ko te fakapotopotoga i te ‵gana e fai‵pati ki ei te fenua tenā io me ko te fakapotopotoga telā e fai‵pati ki te ‵gana totino a te kāiga?

18. E ‵tusa mo te Kalatia 6:5, e fakaasi atu pefea ne tatou te āva ki te fakaikuga e fai ne se ulu o te kāiga?

¹⁸ E ‵tau mo te ulu o te kāiga o fakaiku aka me ko te fakapotopotoga fea ka ‵kau ki ei tena kāiga. Ona ko te mea tenei se mea totino eiloa, e ‵tau o mafaufau a ia ki te ‵toe mea ‵lei mō tena kāiga. (Faitau te Kalatia 6:5.) E ‵tau mo tatou o āva ki te fakaikuga e fai ne te ulu o te kāiga. E ‵tau o talia ne tatou a te mea telā e fakaiku aka ne ia, kae talimalo a tena kāiga e pelā me ne tino tāua ki loto i ‵tou fakapotopotoga.—Loma 15:7.

19. Ne a mea e ‵tau o mafau‵fau faka‵lei ki ei a ulu o kāiga?

¹⁹ I nisi taimi, e ‵kau atu a nisi kāiga ki se fakapotopotoga telā e fai‵pati ki te ‵gana totino  a mātua, kae ko tama‵liki e se fai‵pati faka‵lei ki te ‵gana tenā. Kafai a te fakapotopotoga tenā e tu i se koga telā a tino e fai‵pati loa ki te ‵gana o te fenua, kāti ka faigata ki tama‵liki ke malamalama i mea e fai i fakatasiga kae ka se ga‵solo foki ki mua i te feitu faka-te-agaga. Kaia? Me i tama‵liki kāti e a‵koga i se akoga telā e fakaaoga ei te ‵gana o te fenua kae e se ko te ‵gana a olotou mātua. I tulaga penei, e ‵tau mo ulu o kāiga o mafau‵fau faka‵lei fakatasi mo te faiga o ‵talo ke iloa ne latou te lotou mea e ‵tau o fai ke fesoasoani ki tama‵liki ke fakapili‵pili atu ki a Ieova mo ana tino. E mafai o akoako ne lāua a tama‵liki ke fai‵pati kae malamalama i te lā ‵gana, io me ‵tau o ‵kau atu latou ki se fakapotopotoga telā e fakaaoga te ‵gana telā e malamalama faka‵lei i ei a lā tama‵liki. Faitalia me se a te fakaikuga e fai ne te ulu o te kāiga, e ‵tau mo te fakapotopotoga telā ka ‵kau latou ki ei o fakaasi atu te āva ki te kāiga kae fakatāua ne latou.

20. E fakaasi atu pefea ne tatou me āva tatou ki ‵tou taina mo tuagane kolā e tauloto ki se ‵gana fou?

²⁰ Mai pogai katoa konei ne sau‵tala tatou ki ei, ka isi faeloa ne taina mo tuagane i fakapotopotoga e uke, e taumafai malosi o tauloto ki se ‵gana fou. Kāti ka faigata ke fakaasi mai olotou mafaufauga. Kae kafai e se ‵kilo tatou ki te auala e fai‵pati ei latou i te ‵gana fou, ka lavea ne tatou te lotou a‵lofa ki a Ieova mo te lotou manakoga ke tavini atu ki a ia. Kafai e lavea ne tatou a uiga ‵gali konei i a latou, ka fakatāua kae āva malosi tatou ki taina mo tuagane konei. Ka se mafai o fai atu tatou “Au e se manako ki a koe” ona fua ko te mea e se iloa ne latou o fai‵pati faka‵lei ki tau ‵gana.

21-22. Se a te tauliaga gali e maua ne tatou?

²¹ Ko oti ne tuku mai ne Ieova se tauliaga gali ki a tatou ke isi se tulaga o tatou i tena fakapotopotoga. Faitalia me ko koe se tagata io me se fafine, e nofo taka io me ko oti ne avaga, koi foliki io me ko matua ‵ki io me fai‵pati ki se isi ‵gana io me fai‵pati malie fua ki ei, e tāua eiloa tatou ki a Ieova mo nisi tino.—Loma 12:4, 5; Kolose 3:10, 11.

²² Ke tumau eiloa tatou i te fakagalue aka a akoakoga ‵gali ne tauloto ne tatou mai te fakatusaga a Paulo e uiga ki te foitino o te tino. I te auala tenā, ka iloa ei ne tatou o fakatāua a ‵tou tulaga mo tulaga o nisi tino i loto i te fakapotopotoga a Ieova.