1. Ne a pati a Tavita e uiga ki te loto maulalo o Ieova?

E MATA, e mafai eiloa o fai atu tatou i a Ieova e loto maulalo? Ao, e mafai. Ne fai mai a Tavita: “E tuku mai ne koe ki a au tau talita o te fakaolataga, kae ko tou loto maulalo e fai ne ia au ke takutakua.” (2 Samu. 22:36; Sala. 18:35) Kāti ne mafaufau a Tavita ki te aso ne fanatu ei te pelofeta ko Samuelu ki te fale o te tamana o Tavita o fakaeke te tino ka fai mo tupu fou o Isalaelu. A Tavita ko te tamaliki foliki o tama‵liki tāgata e tokovalu; kae ko ia te tino ne fili ne Ieova ke sui ne ia te Tupu ko Saulo.—1 Samu. 16:1, 10-13.

2. Ne a mea ka sau‵tala tatou ki ei i te mataupu tenei?

² Ka lotomalie eiloa a Tavita ki pati a se faisalamo ne fai e uiga ki a Ieova: “E punou ifo a ia o kilo ki te lagi mo te lalolagi, e fakatu aka ne ia te tino vāivāi mai te ‵pefu. E sau aka ne ia te tino mativa . . . ke saga‵saga fakatasi a ia mo tino tāua.” (Sala. 113:6-8) I te mataupu tenei, ka sau‵tala muamua tatou ki nisi akoakoga tāua e uiga ki te loto maulalo mai te onoono ki taimi kolā ne fakaasi mai ei ne Ieova te uiga tenei. Ko sau‵tala ei tatou ki mea e mafai o tauloto ne tatou mai te Tupu ko Saulo, te pelofeta ko Tanielu, mo Iesu ki te uiga tenei ko te loto maulalo.

3. Ne a faifaiga ko oti ne fai Ieova mō tatou, kae se a te mea e fakamaoni mai i ei?

³ Ne fakamaoni mai ne Ieova me i a ia e loto maulalo e auala i ana faifaiga ki tino tapuaki sē ‵lei katoatoa. E se gata fua i te talia ne ia a ‵tou tapuakiga kae e kilo mai foki a ia ki a tatou me ko ana taugasoa. (Sala. 25:14) Ne gasue muamua a Ieova o fakatoka tena Tama ke tuku mai pelā me se taulaga togiola mō ‵tou agasala  ko te mea ke mafai o maua ne tatou se va fakataugasoa pili mo ia. Ko oko loa i te lasi o te alofa fakamagalo mo te alofa atafai ne fakaasi mai ne ia ki a tatou!

4. Se a te mea ne tuku mai ne Ieova, kae kaia?

⁴ Mafaufau ki te suā fakaasiga o te loto maulalo o Ieova. E pelā me ko te Mafuaga, ne mafai fua ne Ieova o faite tatou e aunoa mo te atamai ke filifili aka te vaegā olaga e ma‵nako tatou ki ei. Kae e seki fai ne ia te mea tenā. Ne faite ne ia tatou ki ana foliga kae tuku mai te saolotoga ke mafai o fai ‵tou filifiliga. E manako a ia ko tatou, tino ma‵lalo, ke tavini atu ki a ia mo ‵tou loto kātoa ona ko ‵tou a‵lofa ki a ia kae ke iloa ne tatou a te aoga o te faka‵logo ki a ia. (Teu. 10:12; Isa. 48:17, 18) E loto fakafetai eiloa tatou ona ko te fakaasiga tenei o te loto maulalo o Ieova!

5. E akoako pefea ne Ieova a tatou ke loto maulalo? (Onoono ki te ata i te ‵kava.)

⁵ Ne akoako ne Ieova tatou ke loto maulalo e auala i ana faifaiga ki a tatou. A Ieova ko te ‵toe Tino poto eiloa i te iunivesi. Kae ui ei, e loto fiafia a ia o talia a manatu o nisi tino. E pelā me se fakaakoakoga, ne talia ne Ieova ke fesoasoani atu a tena Tama ki a ia i te faitega o mea katoa. (Faata. 8:27-30; Kolose 1:15, 16) Kae tiga loa a ia ko te Atua Malosi Katoatoa, e tuku atu ne ia a nisi tiute ke fai ne nisi tino. E pelā mo te mea tenei, ne fakasopo ne ia a Iesu ke fai mo Tupu o te Malo, kae ka tuku atu ne ia se tulaga pule ki te toko 144,000 tino kolā ka pule fakatasi mai mo Iesu. (Luka 12:32) E tonu, ne akoako ne Ieova a Iesu ke fai mo Tupu mo Faitaulaga Sili foki. (Epe. 5:8, 9) E akoako foki ne ia a tino kolā ka pule fakatasi mo Iesu, kae e se taumafai a ia o pule mālō atu ki te auala e fai ei te lotou galuega. E talitonu a ia me ka fai eiloa ne latou a te mea e loto a ia ki ei.—Faka. 5:10.

6-7. Ne a mea e tauloto ne tatou mai ‵tou Tamana faka-te-lagi e uiga ki te tukuatuga o galuega ke fai ne nisi tino?

⁶ Kafai a te ‵tou Tamana i te lagi—telā e se  manakogina ne ia se fesoasoani mai se tino—e tuku atu ne ia a tulaga pule ki nisi tino, e sili atu foki la te tāua ke fai tatou penā! E pelā mo te mea tenei, e mata, a koe se ulu o te kāiga io me se toeaina i te fakapotopotoga? Ke tautali i te fakaakoakoga a Ieova mai te tuku atu a galuega ke fai ne nisi tino kae ke mo a ma pule mālō atu koe ki te auala e fai ei ne latou a tiute konā. Kafai e fakaakoako koe ki a Ieova, ka mafai o oti faka‵lei au galuega kae ka akoako foki i ei ne koe a nisi tino ke fakamalosi aka te lotou loto talitonu. (Isa. 41:10) Ne a nisi mea e mafai o tauloto ne tino kolā e isi ne olotou tulaga pule, mai i a Ieova?

⁷ E fakaasi mai i te Tusi Tapu me e fiafia a Ieova ki manatu o ana tama faka-te-lagi ko agelu. (1 Tupu 22:19-22) Mātua, e fakaakoako pefea koutou ki a Ieova? Kafai e mafai, fesili atu ki au tama‵liki me ne a olotou manatu e uiga ki te faiga o se galuega telā e ‵tau o fai. Kafai e ‵lei, ke fai la a manatu o latou.

8. I auala fea ne kufaki ei a Ieova i a Apelaamo mo Sala?

⁸ E lavea atu foki a te loto maulalo o Ieova e auala i tena kufaki. E pelā mo Ieova, kafai e fakafesili ne nisi tino mo te āva a fakaikuga e fai ne ia, e kufaki eiloa a Ieova i ei. Ne fakalogologo a ia ki a Apelaamo i te taimi ne fakaasi atu ne Apelaamo a tena manavase ki tena fakaikuga ke fakaseai a Sotoma mo Komolo. (Kene. 18:22-33) Kae masaua la a mea ne fai ne Ieova ki te avaga a Apelaamo ko Sala. Ne seki ita io me kaitaua a ia i te taimi ne kata ei tou fafine i te faiatuga o tena tautoga me ka faitama tou fafine i te taimi ko matua ‵ki ei a ia. (Kene. 18:10-14) I lō te fai penā, ne āva eiloa a ia ki a Sala.

9. Se a te mea e mafai o tauloto ne mātua mo toeaina mai te fakaakoakoga a Ieova?

⁹ Mātua mo toeaina, ne a mea e mafai o tauloto ne koutou mai te fakaakoakoga a Ieova? Mafaufau ki te auala ka saga atu ei koe māfai ko fakafesiligina ne tino kolā e ‵nofo mai lalo i tau pulega, a fakaikuga e fai ne koe. E mata, te mea muamua ka fai ne koe ko te faka‵tonu aka olotou kilokiloga? Io me taumafai koe ke malamalama i te lotou manatu? Ka maua eiloa ne kāiga mo fakapotopotoga a mea aoga māfai e fakaakoako a tino kolā e isi ne olotou tulaga pule ki a Ieova. Ko oti ne sau‵tala tatou ki te auala ke fakaakoako ki te loto maulalo ne fakaasi mai ne Ieova. Nei la, ke onoono tatou me ne a mea e mafai o tauloto ne tatou e uiga ki te loto maulalo mai tala o tino i te Tusi Tapu.

10. E fakaaoga pefea ne Ieova a tala o nisi tino ke akoako ei tatou?

¹⁰ E pelā me ko ‵tou “Faiakoga Tafasili i te Maluga,” e tuku mai ne Ieova a fakaakoakoga i tena Muna ke akoako ei tatou. (Isa. 30:20, 21) Kafai e mafaufau ‵loto tatou ki tala i te Tusi Tapu e uiga ki tino kolā ne fakaasi ne latou a uiga o te Atua, e aofia ei te loto maulalo, e tauloto ne tatou a mea e uke mai ei. Ka uke foki a mea e tauloto ne tatou mai tino kolā ne seki fakaasi atu ne latou te uiga gali tenei.—Sala. 37:37; 1 Koli. 10:11.

11. Ne a mea e mafai o tauloto ne tatou mai te fakaakoakoga sē ‵lei a Saulo?

¹¹ Mafaufau ki te mea ne tupu ki te Tupu ko Saulo. Ne fai muamua a ia pelā me se tino loto maulalo. Ne iloa ne ia ana tapula kae ne seki talia ne ia ke tuku atu ki a ia a tiute e uke. (1 Samu. 9:21; 10:20-22) Kae fakamuli ifo ne fakamatamata a Saulo. Ne fakaasi mai ne ia te uiga masei tenei mai tua malie o tena fakasopoga mo fai te tupu. I se taimi e tasi, ne seki maua ne ia te kufaki i te taimi ne faka‵tali ei ki te pelofeta ko Samuelu. I lō te talitonu mo te loto maulalo ki a Ieova ke gasue o fai se mea mō ana tino, ne ofo ne Saulo se taulaga ‵sunu faitalia me e se ko ia te tino tonu e ‵tau o fai  ne ia te mea tenā. Ona ko te mea tenā, ne seki talia ne Ieova a Saulo kae tapale a ia mai tena tulaga tupu. (1 Samu. 13:8-14) Se mea poto eiloa ke mo a ma fakaakoako tatou ki te tala tenei kae ke ‵kalo keatea mai te uiga fakamatamata.

12. Ne fakaasi atu pefea ne Tanielu te loto maulalo?

¹² E ‵kese mo te fakaakoakoga sē ‵lei a Saulo, ke mafaufau ki te fakaakoakoga ‵lei a te pelofeta ko Tanielu. I tena olaga kātoa, ne tumau a Tanielu i te fai pelā me se tavini loto maulalo a te Atua telā ne ‵sala faeloa ki te takitakiga a Ieova. E pelā mo te taimi ne fakaaoga a ia ne Ieova ke fakamatala te moemiti o Nepukanesa, ne seki fai atu a ia me ne mafai o fai te mea tenā ona ko ia. Kae ne avatu ne ia mo te loto maulalo a vikiga mo tavaega katoa ki a Ieova. (Tani. 2:26-28) Se a te akoakoga mō tatou? Kafai e fia fakalogo‵logo a tino ki ‵tou lāuga io me kafai e ‵gali a tala o te ‵tou galuega talai, ke masaua o avatu a vikiga ki a Ieova. E ‵tau o iloa faka‵lei ne tatou me e se mafai o fai ne tatou a mea konei e aunoa mo te fesoasoani o Ieova. (Fili. 4:13) Kafai e maua ne tatou te kilokiloga tenei, ko fakaakoako eiloa tatou ki a Iesu. E pefea la?

13. Ne a mea e tauloto ne tatou e uiga ki te loto maulalo mai pati a Iesu i te Ioane 5:19, 30?

¹³ Faitalia me i a ia ko te Tama ‵lei katoatoa a te Atua, ne fakalagolago eiloa a Iesu ki a Ieova. (Faitau te Ioane 5:19, 30.) Ne seki taumafai a ia ke puke ne ia te tulaga pule mai tena Tamana faka-te-lagi. E fai mai te Filipi 2:6 me “ne seki mafaufau eiloa a [Iesu] o puke te tulaga tenā mai te fai atu me e ‵pau lāua mo te Atua.” E pelā me se Tama fakalogo, ne iloa ne Iesu tena tapula kae ne āva a ia ki te pulega a tena Tamana.

14. I te taimi ne fakamolemole atu ei ki a Iesu ke fai ne ia se mea telā e se oko tena pulega ki ei, ne saga atu pefea a ia?

¹⁴ Mafaufau ki te auala ne saga atu ei a Iesu i te taimi ne olo atu ei a Iakopo mo Ioane, fakatasi mo te lā mātua ki a ia, kae fakamolemole atu ki ne tauliaga mō lāua, se mea telā e se oko te pulega a Iesu ki ei. E aunoa mo te fakatalave, ne fai atu a Iesu me ko tena Tamana faka-te-lagi fua e mafai o fakaiku aka ne ia a tino kolā ka saga‵saga i te feitu fakaatamai mo te feitu fakamaui o Iesu i te Malo. (Mata. 20:20-23) Ne fakaasi atu ne Iesu me ne āva a ia ki ana tapula. Ne loto maulalo a ia. E se mafai o fai ne ia se mea telā e seki fakatonu atu ne Ieova ki a ia. (Ioa. 12:49) E tau‵tali pefea tatou ki te fakaakoakoga ‵lei a Iesu?

15-16. E fakagalue pefea ne tatou a pati fakatonutonu i te Tusi Tapu i te 1 Kolinito 4:6?

 ¹⁵ E fakaakoako tatou ki te loto maulalo o Iesu mai te fakagaluegaga o pati fakatonutonu kolā e maua i te 1 Kolinito 4:6. E fai mai i konā: “Ke mo a ma silia otou mea e fai i lō mea kolā ne tusi i te tusi.” Tela la, kafai e ‵sala mai se tino ki ne manatu fesoasoani mai i a koe, e se ma‵nako eiloa tatou o faimālō atu ‵tou manatu totino io me fai atu te mea muamua e oko mai ki ‵tou mafaufau. I lō te fai penā, e ‵tau o fakasino atu tatou ki pati fakatonutonu i te Tusi Tapu mo ‵tou tusi faka-te-Tusi Tapu. I te auala tenei e fakaasi atu ei me iloa ‵lei ne tatou a ‵tou tapula. E fakaasi atu i ei ne tatou mo te loto maulalo me i “tulafono amio‵tonu” a te Atua Malosi Katoatoa e ‵lei atu i lō ‵tou mea e iloa.—Faka. 15:3, 4.

¹⁶ I tafa o te fakaaloalo atu ki a Ieova, e maua ne tatou a nisi pogai ‵lei ke fakaasi atu te loto maulalo. Ka onoono nei tatou ki te auala e fai ei ne te loto maulalo ke maua ne tatou te fiafia kae ke maua se va fealofani mo nisi tino.

17. Kaia e fia‵fia ei a tino loto mau‵lalo?

¹⁷ Kafai tatou e loto maulalo, ka fia‵fia eiloa tatou. Kaia? Kafai e iloa ne tatou a ‵tou tapula, ka loto fakafetai kae fia‵fia eiloa tatou o talia so se fesoasoani e tuku mai ne nisi tino. Ke mafaufau ki te taimi ne faka‵lei ei ne Iesu a lepela e tokosefulu. E tokotasi fua i a latou ne foki o fakafetai ki a Iesu mō te faka‵leiga o tena masaki masei—se mea telā e se mafai eiloa o fai ne te tagata tenā i a ia eiloa. Ne loto maulalo te tagata tenei kae ne loto fakafetai ki te fesoasoani ne maua ne ia, avatu ei ne ia a vikiga ki te Atua.—Luka 17:11-19.

18. E fesoasoani mai pefea te loto maulalo ke maua ne tatou se va fealofani mo nisi tino? (Loma 12:10)

¹⁸ A tino loto mau‵lalo e masani o maua ne  latou a va fealofani mo nisi tino kae faigofie ke maua olotou taugasoa ‵pili. Kaia? E fia‵fia latou o fakaasi mai me isi ne uiga ‵lei o nisi tino kae loto tali‵tonu ki a latou. E fia‵fia eiloa a tino loto mau‵lalo māfai e manuia a nisi tino i olotou tofiga kae vave latou o fakamālō ki tino konā kae fakaaloalo ki a latou.—Faitau te Loma 12:10.

19. Ne a nisi pogai e ‵tau o ‵kalo kea‵tea tatou mai te uiga fakamatamata?

¹⁹ E ‵kese mai i ei, a tino fakamata‵mata e faigata o fakamālō atu ki nisi tino, kae ‵lei atu ki a latou ke tavae mai a tino ki a latou. Ka mafai o fakatusatusa ana mea e fai mo mea e fai ne nisi tino kae fakamalosi ne ia te uiga fakatau‵fai. I lō te akoako a nisi tino kae tuku atu ki a latou se tulaga pule, kāti ka fai atu latou, “Kafai e manako koe o fai ke ‵lei se galuega,”—i te auala telā e ma‵nako latou ki ei—“ko koe loa e ‵tau o fai ne koe te galuega tenā.” A te tino fakamatamata e masani o fakatāua a ia eiloa kae loto masei. (Kala. 5:26) A tino penei e se maua ne latou a va fakataugasoa tumau. Kafai e iloa ne tatou me ko isi se uiga fakamatamata i a tatou, e ‵tau o ‵talo malosi ke fesoasoani mai a Ieova ke ‘‵fuli ‵tou mafaufau’ ko te mea ke se ‵mau a aka o te uiga masei tenei i loto i a tatou.—Loma 12:2.

20. Kaia e ‵tau ei mo tatou o loto mau‵lalo?

²⁰ E fakafetai eiloa tatou ki te fakaakoakoga a Ieova! E lavea ne tatou tena loto maulalo i ana faifaiga ki ana tavini, kae e ma‵nako tatou o fakaakoako ki a ia. E se gata i ei, e ma‵nako tatou o fakaakoako ki tala ‵gali o tino loto maulalo i te Tusi Tapu kolā ne taulia ke sa‵sale fakatasi mo te Atua. Ke na avatu faeloa ne tatou ki a Ieova te fakaaloalo mo tavaega kolā e ‵tau o maua ne ia. (Faka. 4:11) Tenā ko mafai ei o fetaui ‵lei tatou ke sa‵sale fakatasi mo te ‵tou Tamana faka-te-lagi, telā e alofa ki tino loto mau‵lalo.