1-2. E mafai pefea o tau‵tali tatou i kalafaga o Iesu? Fakamatala mai.

FAKAATAATA me olo koe mo se potukau o tino ki se motu. E olo atu koutou o sa‵sale i te tafatai. E isi se tino e takitaki ne ia koutou. I te taimi e sasale ei a ia i otou mua, e ‵tau ana laga io me ko ana kalafaga i te kauone. Kae se leva mea loa ko pouli, telā ko se lavea ne koe a te tino telā e takitaki ne ia koutou! I lō te manavase kae mataku me ko se lavea ne koe a ia, ka tautali fakapilipili loa koe fakatasi mo nisi tino i laga io me ko kalafaga o te tino tenā!

² E pelā me ne Kelisiano ‵tonu, e ola eiloa tatou i se lalolagi pouli kae masei. Kae se mea fakafiafia, me ne tuku mai ne Ieova se Takitaki ‵lei katoatoa ke tau‵tali fakapili‵pili tatou ki ei—ko tena Tama, ko Iesu Keliso. (1 Pe. 2:21) E fai mai se fakamatalaga e tasi i te Tusi Tapu, me e fakatusa ne Petelu a Iesu ki se tino e fakamatamata ne ia a tino. Ne tuku mai ne Iesu se fakaakoakoga ke tau‵tali fakapili‵pili atu tatou ki ana kalafaga. Ke sau‵tala nei tatou ki fesili konei e tolu: Se a te uiga ke tau‵tali i kalafaga o Iesu? Kaia e ‵tau ei o tau‵tali tatou i ana kalafaga? E mafai pefea o tau‵tali tatou i ana kalafaga?

3. Se a te uiga ke tau‵tali i kalafaga o se tino?

³ Se a te uiga ke tau‵tali i kalafaga o se tino? I te Tusi Tapu, a pati ko te “sasale” mo “vae” e fakauiga i nisi taimi ki te auala e ola ei se tino. (Kene. 6:9; Faata. 4:26) A te auala e ola ei se tino e mafai o fakatusa ki laga io me ko kalafaga o ia kolā e ‵tau māfai e sasale. Tela la, ke tautali fakapilipili atu ki kalafaga o se tino, e fakauiga loa ki te fakaakoako ki a ia.

4. Se a te uiga ke tau‵tali i kalafaga o Iesu?

 ⁴ Kae se a la te uiga ke tau‵tali i kalafaga o Iesu? E manino ‵lei me e fakauiga ki te tautali atu i tena fakaakoakoga. I ‵tou tusi siki fakavae, ne faipati eiloa te apositolo ko Petelu ki te fakaakoakoga ‵lei ne tuku mai ne Iesu ke kufaki i logo‵maega; kae e uke aka nisi auala e mafai o fakaakoako tatou ki a Iesu. (1 Pe. 2:18-25) E tonu, e auala i ana pati mo ana mea ne fai, ne tuku mai ei ne Iesu se fakaakoakoga ke tau‵tali tatou i ei.

5. E mata, e mafai ne tino sē ‵lei katoatoa o tau‵tali ki te fakaakoakoga ‵lei katoatoa a Iesu? Fakamatala mai.

⁵ E pelā me ne tino sē ‵lei katoatoa, e mata, e mafai o tau‵tali tatou ki te fakaakoakoga a Iesu? Ao e mafai. Masaua la me e fakamalosi mai a Petelu ko tatou ke “tau‵tali fakapili‵pili ki kalafaga [o Iesu]”—e se i te auala ‵lei katoatoa. Kafai e tau‵tali faka‵lei tatou i ana kalafaga, mai te faiga o te ‵toe mea e mafai e pelā me ne tino sē ‵lei katoatoa, ko faka‵logo tatou ki pati a te apositolo ko Ioane: “Sa‵sale faeloa e pelā mo [Iesu].”—1 Ioa. 2:6.

6-7. Kaia e fai atu ei tatou me i te tau‵tali i kalafaga o Iesua ka fai ei ke ‵pili malosi atu tatou ki a Ieova?

⁶ Kafai e tau‵tali tatou i kalafaga o Iesu, ka ‵pili malosi atu tatou ki a Ieova. Kaia e mafai o fai atu tatou penā? Muamua la, ne tuku mai ne Iesu se fakaakoakoga tu ‵kese, mai te ola i te auala telā e fakafiafia atu ki te Atua. (Ioa. 8:29) Tela la, kafai e tau‵tali tatou i kalafaga o Iesu, ka fakafiafia ne tatou a Ieova. Kae e mautinoa i a tatou me ka fakapilipili atu te ‵tou Tamana i te lagi ki a latou kolā e taumafai malosi o fai taugasoa mo ia.—Iako. 4:8.

⁷ Te lua, ne fakaakoako a Iesu ki tena Tamana i se auala ‵lei katoatoa. Tenā te pogai ne fai mai a Iesu, penei: “So se tino e kilo mai ki  a au ko kilo foki ki te Tamana.” (Ioa. 14:9) Kafai e fakaakoako tatou ki uiga mo faifaiga a Iesu ki tino—e pelā mo tena loto alofa ki se lepela, tena mafatia i se masaki matagā o se fafine e tokotasi, penā foki tena atafai ki tino fanoa‵noa—ko fakaakoako foki loa tatou ki a Ieova. (Male. 1:40, 41; 5:25-34; Ioa. 11:33-35) Ko te lasi o te fakaakoako o tatou ki a Ieova, ko te ‵pili foki o tatou ki a ia.

8. Fakamatala mai te pogai ka fesoasoani mai ei te tautali i kalafaga o Iesu ke “fakatakavale” ne tatou te lalolagi.

⁸ A te tau‵tali i kalafaga o Iesu e fesoasoani mai ke sē ‵saga atu ki te lalolagi masei tenei. I te ‵toe po o ia i te lalolagi nei, ne mafai o fai atu a Iesu penei: “Ko oti ne fakatakavale ne au te lalolagi.” (Ioa. 16:33) Ne fakauiga loa a ia me ne seki talia ne ia a mafaufauga, fakamoemoega mo faifaiga a tino o te lalolagi. Ne seki puli i a Iesu te pogai ne uga mai ei a ia ki te lalolagi—ke faka‵malu a Ieova. Kae e a tatou? I te lalolagi tenei, e uke a mea kolā e mafai o fakalavelave mai ki a tatou. Kae kafai e ‵saga tonu tatou o fai te loto o Ieova, e pelā mo Iesu, ka “fakatakavale” foki ne tatou a te lalolagi.—1 Ioa. 5:5.

9. Se a te mea e ‵tau o fai ne tatou ke tumau i te auala ki te ola se-gata-mai?

⁹ A te tautali i kalafaga o Iesu e iku atu ki te ola se-gata-mai. I te taimi ne fakamolemole atu se tamataene maumea ki a Iesu e uiga ki mea e ‵tau o fai ne ia ke maua te ola se-gata-mai, ne tali atu a Iesu: “Vau . . . fai mo oku soko.” (Mata. 19:16-21) Ne fai atu a Iesu ki nisi tino Iutaia kolā ne seki tali‵tonu i a ia ko te Keliso: “Aku mamoe . . . e tau‵tali mai latou i a au. E tuku atu ne au ki a latou a te ola se-gata-mai.” (Ioa. 10:24-29) Ne fai atu a Iesu ki a Nikotemo, se sui o te Sanetulini telā ne fiafia o fakalogologo ki ana akoakoga me i tino kolā e “fakaasi atu faeloa te fakatuanaki ki a ia” ka “maua ne [latou] te ola se-gata-mai.” (Ioa. 3:16) E fakaasi atu ne tatou te fakatuanaki ki a Iesu mai te fakagalue ana akoakoga e auala i pati mo fakaakoakoga. Kafai e fai tatou penā, ka tumau eiloa tatou i te auala ki te ola se-gata-mai.—Mata. 7:14.

10. Ne a mea e aofia i te fai ke “iloa tonu” ne tatou a Iesu? (Ioane 17:3)

¹⁰ Koi tuai o tau‵tali fakapili‵pili atu tatou i kalafaga o Iesu, e ‵tau o iloa tonu ne tatou a ia. (Faitau te Ioane 17:3.) A te “iloa tonu” ne tatou a Iesu se faifaiga tumau. E ‵tau o fai ke iloa faka‵lei ne tatou a ia—mai te tauloto ki ana uiga, ana mafaufauga mo ana tulaga. Faitalia te leva o tatou i te munatonu, e ‵tau eiloa mo tatou o tumau i te taumafai ke “iloa tonu” ne tatou a Ieova mo tena Tama.

11. Ne a fakamatalaga e maua i Tusi Evagelia e fa?

¹¹ Ke fesoasoani mai ke iloa ne tatou tena Tama, ne alofa a Ieova ke fakaaofia a Tusi Evagelia  e fa i tena Muna, kolā e fakamatala mai ei a te olaga mo te galuega talai a Iesu. E fakamatala mai i tusi konā a pati a Iesu ne fai, mea ne fai ne ia, penā foki mo ana lagonaga. E fesoasoani mai a tusi e fa konei ke “mafaufau faka‵lei” tatou ki te fakaakoakoga a Iesu. (Epe. 12:3) E fakamatala i ei a kalafaga kolā ne fakaasi mai ne Iesu ke tau‵tali tatou i ei. Tela la, mai te sukesuke ki tala konā, e mafai o iloa faka‵lei ne tatou a Iesu. Kae ka tau‵tali fakapili‵pili atu tatou i ana kalafaga.

12. E mafai pefea o maua katoatoa ne tatou a mea aoga mai te suke‵suke ki Tusi Evagelia?

¹² Ke maua katoatoa a mea aoga mai Tusi Evagelia konei, e ‵tau o uke atu ‵tou mea e fai i lō te fai‵tau fua ki ei. E ‵tau o fakaaoga ‵tou taimi ke suke‵suke faka‵lei kae mafaufau ‵loto ki ei. (Fakatusa ki te Iosua 1:8, fakamatalaga mai lalo.) Ke sau‵tala nei tatou ki manatu fesoasoani e lua e mafai o fesoasoani mai ke mafaufau ‵loto tatou ki Tusi Evagelia kae fakagalue aka a mea e faitau ne tatou.

13. E momea aka pefea tou loto talitonu ki tala i Tusi Evagelia?

¹³ Muamua la, ke momea aka tou loto talitonu ki tala i Tusi Evagelia. Fakaaoga tou mafaufau ke lavea, fakalogo kae ke lagona ne koe a mea ‵tupu i te taimi tenā. Ke fesoasoani atu ke fai penā, fai au sukesukega ki mea faigaluega mō fai sukesukega kolā ne fakatoka mai ne te fakapotopotoga a Ieova. Sukesuke ki te mataupu kātoa—mea kolā ne ‵tupu mai mua io me mai tua o te tala telā e sukesuke koe ki ei. ‵Sala ki fakamatalaga e uiga ki tino mo koga kolā e ‵sae aka i te tala. Ke fakatusatusa ne koe a te tala tenā mo nisi tala i nisi Tusi Evagelia. I nisi taimi, e aofia ne se tino tusitala e tokotasi a fakamatalaga likiliki i lō te suā tino tusitala.

14-15. E mafai pefea o fakagalue aka ne tatou a tala i Tusi Evagelia i ‵tou olaga?

¹⁴ Te lua, ke fakagalue ne koe i tou olaga a tala i Tusi Evagelia. (Ioa. 13:17) Kafai ko oti ne sukesuke faka‵lei koe ki tala i Tusi Evagelia,  fesili ifo ki a koe eiloa: ‘E mata, e isi se akoakoga i te tala tenei e mafai o fakagalue ne au i toku olaga? E mafai pefea o fakaaoga ne au te tala tenei ke fesoasoani atu ki se tino?’ Taumafai o mafaufau ki se tino e iloa ne koe, kae fakailoa atu a mea ne tauloto ne koe i se auala alofa kae atamai.

¹⁵ Ke sau‵tala nei tatou ki se fakaakoakoga ki te auala e mafai o fakagalue ne tatou a manatu konei. Ka sau‵tala tatou ki te tala o te fafine mativa ko mate tena avaga telā ne lavea ne Iesu i te faletapu.

16. Fakamatala mai te mea ne tupu i te Maleko 12:41.

¹⁶ Fakaataata i a koe e nofo atu i te taimi tenā. (Faitau te Maleko 12:41.) Mafaufau ki te mea ne tupu. Ko Nisani 11, 33 T.A.—se vaiaso mai mua o mate a Iesu. Ne fakamāumāu ne Iesu te aso kātoa ke akoako atu i te faletapu. Ne ‵teke atu a takitaki lotu ki a ia. Mai mua malie, ne fakafesili ne nisi o latou a tena tulaga pule. Ne taumafai a nisi tino o fai atu ki a ia a fesili kolā e mafau‵fau latou me e se mafai o tali ne ia. (Male. 11:27-33; 12:13-34) Ne fanatu a Iesu ki te suā feitu o te faletapu. I konā—kāti i te koga telā e taku ki te Koga Ateatea o Fāfine—ne mafai o lavea ne ia te pokisi tupe i ‵pui o te faletapu. Ne sagasaga a ia ki lalo kae kamata o kilokilo atu ki tino e lafo olotou meaalofa ki pokisi tupe. Ne lavea ne ia a tino mau‵mea e tokouke e lafo atu olotou tupe. Kāti ne lagona faka‵lei ne ia te logoa o tupe a tino kolā e lafo atu ki pokisi tupe.

17. Fakamatala mai a mea ne fai ne te fafine mativa ko mate tena avaga i te Maleko 12:42.

¹⁷ Faitau te Maleko 12:42. Mai tua ifo malie, ne lavea ne Iseu se fafine. A ia se “fafine mativa ko mate tena avaga.” (Luka 21:2) Ne faigata ‵ki tena olaga; e mautinoa eiloa me se lava ana tupe ke maua a mea tāua e tausi ei tena ola. Kae ne fanatu tou fafine ki mua o pokisi tupe konā kae tuku atu a tupe fo‵liki e lua, telā kāti e se lagona i te ‵peiga ki loto i te pokisi tupe. Ne iloa ne Iesu ana tupe ne lafo atu—e lua lepoita, toe sene malalo loa i te taimi tenā. E se lava foki i tupe fo‵liki konā a te ‵togi o se manu eva e tasi, mai manu eva ‵togi mā‵ma mō ‵kai.

18. E ‵tusa mo te Maleko 12:43, 44, ne a pati a Iesu ki te meaalofa a te fafine ko mate tena avaga?

¹⁸ Faitau te Maleko 12:43, 44. Ne ofo malosi a Iesu i te fafine tenei ko mate tena avaga. Telā ne kalaga atu ei a ia ki ana soko, kae fakasino atu ki te fafine kae fai atu: “E uke atu a tupe ne lafo ne te fafine mativa tenei ko mate tena avaga i lō tupe a tino katoa.” Kae fakamatala atu ne ia: “Ne lafo ne latou katoa konā [maise loa tino mau‵mea] mai i olotou tupe silia, kae ko te fafine tenā ne lafo atu eiloa ne ia ana mea katoa kolā e ola ei a ia.” I te taimi ne tuku atu ne te fafine mativa ko mate tena avaga kae fakamaoni tenei ana toe tupe kolā e ola ei a ia i te aso tenā, ne tuku atu ne ia tena ola ki te tausiga a Ieova.—Sala. 26:3.

19. Se a te akoakoga tāua e mafai o tauloto ne tatou mai pati a Iesu e uiga ki te fafine mativa ko mate tena avaga?

¹⁹ Fakagalue te tala i tou olaga. Fesili ifo ki a koe, ‘Se a te akoakoga e mafai o tauloto ne au mai pati a Iesu e uiga ki te fafine mativa ko mate tena avaga?’ Mafaufau ki te fafine tenā. E mautinoa eiloa me ne manako a ia o tuku atu ana mea e uke atu ki a Ieova. Kae ne fai loa ne ia te ‵toe mea ‵lei; ne tuku atu ne ia ana toe mea ‵lei ki a Ieova. Kae ne iloa ne Iesu i tena meaalofa ne tāua i te kilokiloga a tena Tamana. A te mea tenei se akoakoga tāua mō tatou: E fiafia a Ieova māfai e tuku atu ‵tou toe mea ‵lei ki a ia—‵tou taviniga e fai mo te loto kātoa. (Mata. 22:37; Kolose 3:23) A Ieova e fiafia māfai e lavea ne ia tatou e fai ‵toe mea e  mafai! A te fakatakitakiga tenā e fakauiga ki te uke o taimi mo te malosi e mafai o tuku katoatoa atu ne tatou ki te ‵tou tapuakiga, e aofia ei te galuega talai mo fakatasiga.

20. E fakagalue pefea ne koe a te akoakoga mai te tala o te fafine ko mate tena avaga? Taku mai se fakaakoakoga.

²⁰ E mafai pefea o fakagalue ne koe a te akoakoga mai te tala e uiga ki te fafine ko mate tena avaga? Ke mafau‵fau ki tino taki tokotasi kolā e ‵tau o fakamasaua atu ne koe ki a latou, me e fiafia a Ieova ki mea kolā ne mafai ne latou o fai mō ia. Pelā me se fakaakoakoga, e mata, e iloa ne koe se tuagane matua telā ko fakamasakisaki kae sē malosi kae kāti e mafaufau i a ia ko se aoga me ko se uke ana mea e mafai o fai i te galuega talai? Io me e mafai o mafaufau koe ki se taina telā e maua ne ia se masaki fakalogo‵mae kae loto vāivāi me ko sē mafai o kau atu a ia ki fakatasiga i te Fale Tapuaki? Fesoasoani atu ki vaegā tino penā mai te fai atu o “pati ‵lei . . . kolā e ati aka ei a tino.” (Efe. 4:29) Fakaasi atu ki a latou a te akoakoga fakamalosi loto ne tauloto ne tatou mai te tala o te fafine mativa ko mate tena avaga. Au pati fakamalosi loto e mafai o fakatalitonu atu ki a latou me e fiafia a Ieova māfai e tuku atu ne tatou a toe mea ‵lei. (Faata. 15:23; 1 Tesa. 5:11) Kafai e fakamālō atu koe ki nisi tino mō te tuku atu o olotou toe mea ‵lei ki a Ieova—faitalia me pefea te foliki—ko tautali fakapilipili atu eiloa koe i kalafaga o Iesu.

21. Se a te fakaikuga e ‵tau o fai ne koe?

²¹ E loto fakafetai tatou me uke a fakamatalaga liki‵liki e maua ne tatou i Tusi Evagelia e uiga ki te olaga o Iesu, kolā e fesoasoani mai ke fakaakoako tatou ki a ia, ke tau‵tali fakapilipili atu i ana kalafaga! Kaia e se aofia ei i au sukesukega totino io me ko te Tapuakiga a Kāiga se polotieki telā e maua mai i Tusi Evagelia? Ke maua katoatoa ne tatou a mea aoga mai sukesukega penā, fakaataata i a koe e nofo atu i te taimi tenā kae fakagalue aka ne koe a mea konā i tou olaga. I tafa o te fakaakoako ki mea ne fai ne Iesu, e ‵tau o faka‵logo tatou ki ana pati ne fai. I te suā matupu, ka sau‵tala tatou ki mea e mafai ne tatou o tauloto mai toe pati a Iesu mai mua o mate.