1-2. Se a te togiola, kae kaia e manakogina ei ne tatou?

I TE taimi ne agasala ei a te tagata ‵lei katoatoa ko Atamu, ne galo i a ia te avanoaga ke ola ki te se-gata-mai, fakatasi mo ana tama‵liki katoa. Seai loa se fakamasakoga ne ‵tau o fai ne Atamu. Ne agasala a ia mo te iloa tonu. Kae e a ana tama‵liki? Ne seki aofia latou i te agasala ne fai ne Atamu. (Loma 5:12, 14) E mata, e isi se mea e mafai o fai ke faka‵sao latou mai te mate telā ne ‵tau fua o maua ne olotou mātua? Ao! I te otiga loa ne agasala a Atamu, ne fakaasi malielie mai ne Ieova te auala ke faka‵sao te fia miliona o tama‵liki a Atamu mai te agasala mo te mate. (Kene. 3:15) I tena taimi tonu, ne uga mai ne Ieova tena Tama mai te lagi ke “tuku atu foki tena ola e pelā me se togiola mō tino e tokouke.”—Male. 10:45; Ioa. 6:51.

² Se a te togiola? I te Tusi Tapu i te ‵gana Eleni, e fakasino atu a te togiola ki se ‵togi ne ‵togi ne Iesu ke fakafoki mai te mea telā ne galo atu i a Atamu. (1 Koli. 15:22) Kaia e ma‵nako ei tatou ki te togiola? Me e ‵tusa mo tulaga amio‵tonu o Ieova, ne manakogina i te Tulafono ke sui te ola ki te ola. (Eso. 21:23, 24) Ne galo atu i a Atamu te ola ‵lei katoatoa. Ke fai te loto o te Atua, ne tuku mai ne Iesu tena ola ‵le katoatoa e pelā me se taulaga. (Loma 5:17) I te auala tenei, ne fai a ia pelā me se “Tamana ki te Se-Gata-Mai” ki a latou kolā e fakaasi atu te lotou fakatuanaki ki te togiola.—Isa. 9:6; Loma 3:23, 24.

3. E ‵tusa mo te Ioane 14:31 mo te 15:13, kaia ne loto fiafia a Iesu o tuku mai tena ola ‵lei katoatoa pelā me se tagata?

³ Ne loto fiafia a Iesu o tuku atu tena ola e pelā me se taulaga ona ko te lasi o tena alofa ki tena Tamana i te lagi mo tatou. (Faitau te Ioane 14:31; 15:13.) Ona ko te alofa tenā, ne fakaiku aka ke tumau tena fakamaoni ki te fakaotiga kae fai te loto o tena Tamana. Ne fai a ia penā mai te tumau i te fakamaoni ke  oko loa ki tena mate. Ona ko te mea tenā, ka mafai ei o fakataunu a te fuafuaga muamua a Ieova ki tino mo te lalolagi. I te mataupu tenei, ka sau‵tala tatou ki te pogai ne talia ei ne te Atua ke logo‵mae malosi a Iesu a koi tuai o mate. Ka suke‵suke malie foki tatou ki te fakaakoakoga o te tino tusi Tusi Tapu telā ne lasi tena loto fakafetai ki te togiola. Kae i te fakaotiga, ka sau‵tala tatou ki te auala e mafai o fakaasi atu ne tatou te loto fakafetai ki te togiola penā foki ki te taulaga telā ne fakatoka ne Ieova mo Iesu mō tatou.

4. Fakamatala mai te auala ne mate ei a Iesu.

⁴ Mafaufau la ki mea ne ‵tupu i te ‵toe aso o Iesu i te lalolagi nei. E tiga loa ne mafai o fakamolemole a ia ki te fia o agelu ke puipui a ia, ne talia ne ia ke puke ne sotia Loma a ia, kae ‵kini fakamasei. (Mata. 26:52-54; Ioa. 18:3; 19:1) Ne fakaaoga ne latou se ‵kini telā e mafai o saelua ne ia ‵kano o tena foitino. Oti aka, tuku atu ne latou se pou ‵mafa ke amo i tena tua. Ne kamata o toso ne Iesu te pou ki te koga e tamate ei a ia, kae se leva kae ne fakatonu atu se sotia Loma ki se tagata e tu atu i konā ke amo ne ia. (Mata. 27:32) I te okoatuga a Iesu ki te koga ka mate ei a ia, ne ‵tuki ne sotia ana lima mo ana vae ki te pou. Ne ‵sali a toto i tena foitino mai koga kola ne ‵tuki ei a fao. Ne fanoa‵noa ana taugasoa kae tagi tena mātua, kae ko takitaki Iutaia ne fakatauemu atu ki a Iesu. (Luka 23:32-38; Ioa. 19:25) Ne logo‵mae a Iesu mō se fia itula. Ne ‵mae tena fatu mo ana māmā, kae ko se mānava faka‵lei. I tena toe mānavaga koi tuai o mate, ne fai atu ne Iesu tena toe ‵talo manumalo. Ne punou ifo tena ulu kae ne mate a ia. (Male. 15:37; Luka 23:46; Ioa. 10:17, 18; 19:30) Ne mate eiloa a ia i se auala fakalogo‵mae kae masiasi!

5. Se a te ‵toe mea telā ne faigata atu ki a Iesu i lō te auala ne tamate ei a ia?

⁵ Ki a Iesu, a te auala ne mate ei a ia e se ko te ‵toe vaega faigata ki a ia. Ne lasi atu tena loto mafatia i te ‵losiga telā ne fakavae ki ei tena fakasalaga. Ne fai a ‵losiga ‵se me i a ia se tino pati masei—se tino telā e se āva ki te Atua io me ko tena igoa. (Mata. 26:64-66) Ne fai ne te ‵losiga ‵se tenā ke mafatia malosi a Iesu, telā ne fakamoemoe a ia me ka sē talia ne tena Tamana ke fakamasiasi a ia i te auala tenei. (Mata. 26:38, 39, 42) Kaia ne talia ei ne Ieova ko tena Tama fagasele ke logo‵mae kae mate atu? Ka onoono nei tatou ki pogai e tolu.

6. Kaia ne ‵tau ei mo Iesu o mate i luga i se pou fakasaua?

⁶ Te mea muamua, ne ‵tau mo Iesu o ‵tuki ki te pou fakasaua ke fakasaoloto ei a tino Iutaia mai te malaia. (Kala. 3:10, 13) Ne ‵lago latou ke faka‵logo ki Tulafono a te Atua, kae ne seki mafai o tausi te lotou tautoga ne fai. Ona ko te mea tenā, ne fakaopoopo atu te malaia tenā ki te lotou fakasalaga e pelā me ko fanau a Atamu kolā e agasala. (Loma 5:12) I te Tulafono a te Atua ki tino Isalaelu, a te tagata telā e agasala e ‵tau mo ia o tamate. Ka oti, ko fakatautau ei tena foitino mate i se pou. * (Teu. 21:22, 23; 27:26) Tela la, mai te fakatautau o Iesu i se pou, ko mafai ei o saoloto te fenua o Isalaelu telā ne ‵teke atu ki a ia mai te malaia tenā kae maua ne latou a mea aoga mai tena taulaga.

7. Se a te lua o pogai ne talia ei ne te Atua ke logo‵mae tena Tama?

⁷ Mafaufau ki te lua o pogai ne talia ei ne te Atua ke logo‵mae tena Tama. Ne akoako ne ia a Iesu mō tena tulaga tāua e pelā me se Faitaulaga Sili i aso mai mua. Ne iloa ne Iesu te faigata ke fakalogo ki te Atua mai lalo i tofotofoga  faiga‵ta. Ne loto mafatia malosi a ia telā ne ‵talo atu ei a ia mō se fesoasaoani “fakatasi mo te ‵tagi malosi mo loimata.” E tonu, ona ko Iesu ne mafatia malosi, e malamalama a ia i ‵tou manakoga kae e “mafai . . . ne ia o fesoasoani mai” māfai tatou ko “tofotofogina.” E loto fakafetai eiloa tatou ki a Ieova mō te filifiliga ne ia se Faitaualaga Sili alofa fakamagalo telā e “amanaia ki ‵tou vāivāiga”!—Epe. 2:17, 18; 4:14-16; 5:7-10.

8. Se a te pogai i te tolu ne talia ei ne te Atua ke tofotofogina a Iesu?

⁸ Te tolu, ne talia ne Ieova ke logo‵mae malosi a Iesu, ko te mea ke tali aka ei te fesili tāua tenei: E mata, e mafai ne so se tino o tumau i te fakamaoni ki a Ieova faitalia a tofotofoga faiga‵ta? E fai mai a Satani ikai! E ‵losi mai a ia me i tino e tavini fua ki te Atua ona ko pogai kaima‵nako. Kae e talitonu a ia me e pelā mo te lotou tupuga ko Atamu—e se a‵lofa latou ki a Ieova. (Iopu 1:9-11; 2:4, 5) Ona ko te talitonu ki te fakamaoni o tena Tama, ne talia ne Ieova ke tofotofogina a Iesu ki te fakaotiga. Ne tumau eiloa a Iesu i te fakamaoni, kae ne fakamaoni atu ne ia i a Satani se tino loi.

9. Se a te fakaakoakoga ne tuku mai ne te apositolo ko Ioane?

⁹ Ne fakamalosigina eiloa a te fakatuanaki o Kelisiano e tokouke e auala i te akoakoga ki te togiola. Ne tumau eiloa latou i te talai atu faitalia ‵tekemaiga kae ne kufaki i tofotofoga katoa i olotou olaga kātoa. Mafaufau ki te fakaakoakoga a te apositolo ko Ioane. Ne talai atu ne ia mo te fakamaoni a te munatonu e uiga ki te Keliso mo te togiola, kāti i tausaga e silia atu mo te 60. I te taimi ko tai kātoa ei tena 100 tausaga, ne mafau‵fau te emupaea o Loma me i a ia e fakamataku, telā ne ‵pei ei ne latou a ia ki te falepuipui i te motu ko Patamo. Se a tena agasala? “Ne faipati atu au e uiga ki te Atua kae molimau atu e uiga ki a Iesu.” (Faka. 1:9) Ko oko eiloa i te tu ‵kese te fakaakoakoga o te fakatuanaki mo te kufaki o Ioane!

10. E fakaasi mai pefea i tusitusiga a Ioane a tena loto fakafetai ki te togiola?

¹⁰ Ne fakaasi mai ne Ioane te ‵poko o tena alofa ki a Iesu mo tena loto fakafetai ki te togiola i ana tusitusiga kolā ne fakaosofia. Ne faipati a ia ki te togiola io me ko mea aoga kolā e maua mai i te togiola i taimi e silia atu mo te 100. Pelā me se fakaakoakoga, ne tusi mai a Ioane: “Kafai e fai ne se tino se agasala, e isi se ‵tou tino fesoasoani telā e ‵nofo mo te Tamana, ko Iesu Keliso, te tino amiotonu.” (1 Ioa. 2:1, 2) E faka‵mafa mai foki i tusitusiga a Ioane a te tāua ke “molimau e uiga ki a Iesu.” (Faka. 19:10) E manino ‵lei, me ne fakaasi atu ne Ioane te ‵poko o tena loto fakafetai ki te togiola. E mafai pefea o fakaasi atu foki ne tatou te lasi o ‵tou loto fakafetai ki te togiola?

11. Se a te mea e mafai o fesoasoani mai ke ‵teke atu ne tatou se tofotofoga?

¹¹ ‵Teke atu te tofotofoga ke agasala. Kafai e fakaasi atu ‵tou loto fakafetai ki te togiola, ka sē talia ne tatou te mafaufauga tenei: ‘E se manakogina ke taumafai malosi au o ‵teke atu se tofotofoga. E mafai loa o fai ne au se mea ‵se, kae oti ko ‵sala atu ki se fakamagaloga.’ I lō te mafaufau penā, kafai ko tofotofogina tatou ke fai se mea ‵se, ka fai atu loa tatou: ‘Ikai! E mafai pefea o fai ne au se vaegā mea penā faitalia a mea ne fai ne Ieova mo Iesu mō au?’ E ‵tusa mo te mea tenā, e mafai o ‵talo atu tatou ki a Ieova mō te malosi, mai te fakamolemole atu ki a ia: ‘Sa takitakigina au ki se tofotofoga.’—Mata. 6:13.

12. E mafai pefea o fakagalue aka ne tatou a pati fakatonutonu i te 1 Ioane 3:16-18?

 ¹² A‵lofa ki ou taina mo tuagane. Kafai e fakaasi atu ne tatou te vaegā alofa tenā, ko fakaasi atu foki ne tatou te loto fakafetai mō te togiola. Kaia? Me seki tuku mai fua ne Iesu tena ola mō tatou kae mō ‵tou taina mo tuagane foki. Kafai ne loto fiafia a ia o mate mō latou, e manino ‵lei me e tāua foki latou i tena kilokiloga. (Faitau te 1 Ioane 3:16-18.) E fakaasi atu ne tatou te alofa ki ‵tou taina mo tuagane mai ‵tou faifaiga ki a latou. (Efe. 4:29, 31–5:2) Pelā me se fakaakoakoga, e fesoasoani atu tatou ki a latou māfai ko ma‵saki io me māfai e kufaki latou i fakalavelave kese‵kese, e aofia i ei a fakalavelave ‵tupu o te natula. Kae ne a mea e ‵tau o fai ne tatou māfai ko fai ne se taina io me se tuagane a mea kolā e fai ei tatou ke kaitāua?

13. Kaia e ‵tau ei mo tatou o loto fakamagalo?

¹³ E mata, e faigata ki a koe i nisi taimi o fakamagalo tou taina talitonu? (Levi. 19:18) Kafai e fai koe penā, ke tautali i te manatu fesoasoani tenei: “Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino. E pelā eiloa mo te fakamagaloga o koutou ne Ieova, e ‵tau foki mo koutou o fai penā.” (Kolose 3:13) I taimi katoa e fakamagalo ne tatou a ‵tou taina io me se tuagane, e fakamaoni atu ne tatou ki te ‵tou Tamana i te lagi me e loto fakafetai tatou ki te togiola. E mafai pefea o tumau te fakaasi atu ne tatou te ‵poko o ‵tou loto fakafetai ki te meaalofa tenei mai te Atua?

14. Se a te auala e tasi e mafai o fakaasi atu te ‵poko o ‵tou loto fakafetai mō te togiola?

¹⁴ Fakafetai atu ki a Ieova mō te togiola. “Au e mafaufau me e tāua ke fakasae ne au te togiola i aku ‵talo i aso katoa kae ke fakafetai atu faeloa ki a Ieova mō te meaalofa tenā,” ne fai mai se tuagane matua ko 83 ana tausaga e igoa ki a Joanna, telā e nofo i Initia. I au ‵talo totino, mafaufau ki mea ‵se mautinoa ne fai ne koe i te aso kae akai atu ki a Ieova mō se fakamagaloga. E tonu, kafai ne fai ne koe se agasala matagā, ka manako foki koe ki te fesoasoani o toeaina. Ka fakalogo‵logo latou ki a koe kae tuku atu a pati fakatonutonu a‵lofa mai te Muna a te Atua. Ka ‵talo fakatasi latou mo koe, o fakamolemole atu ki a Ieova ke tumau  o fakagalue ne ia te tāua o te taulaga a Iesu “ko te mea ke mafai o faka‵lei” koe i te feitu faka-te-agaga.”—Iako. 5:14-16.

15. Kaia e ‵tau o fakavanoa ‵tou taimi o fai‵tau kae mafaufau ‵loto ki te togiola?

¹⁵ Mafaufau ‵loto ki te togiola. “Kafai au e faitau e uiga ki logo‵maega o Iesu,” ko pati a te tuagane matua ko 73 ana tausaga, ko Rajamani, “au e tagi faeloa.” Kāti e logo‵mae foki koe ma mafaufau ki te auala ne logo‵mae ‵ki ei a te Tama a te Atua. Kae kafai e mafaufau ‵loto faeloa koe ki te taulaga a Iesu, ka gasolo foki o ‵poko tou alofa ki a ia mo tena Tamana. Ke fesoasoani atu ke mafaufau ‵loto koe ki te togiola, kaia e se taumafai ei koe o sukesuke ki te mataupu tenei?

16. E aoga pefea ki a tatou a te akoako atu o nisi tino e uiga ki te togiola? (Onoono ki te ata i te ‵kava.)

¹⁶ Akoako a nisi tino e uiga ki te togiola. I taimi takitasi e fai‵pati tatou ki nisi tino e uiga ki te togiola, e gasolo aka faeloa ki luga a te ‵tou loto fakafetai. E maua ne tatou a mea faigaluega ‵lei ke fakaaoga i te akoakoga o nisi tino ki te pogai ne ‵tau ei mo Iesu o mate mō tatou. E pelā me se fakaakoakoga, e mafai o fakaaoga ne tatou a te mataupu e 4 o te polosiua ko te Tala ‵Lei Mai te Atua! A te ulutala o te mataupu tenā ko te “Ko oi a Iesu Keliso?” Io me e mafai o fakasino atu tatou ki te mataupu e 5 o te tusi ko te Ne a Mea e Mafai o Tauloto ne Tatou Mai te Tusi Tapu? A te ulutala o te mataupu tenā ko te “Te Togiola—Te Meaalofa Sili a te Atua.” Kae i tausaga takitasi, e fakaasi atu ne tatou te ‵poko o te ‵tou loto fakafetai ki te togiola, mai te ‵kau atu ki te Fakamanatuga o te mate o Iesu kae ‵kami a tino ke ‵kau tasi mo tatou. A te mea tenā se tauliaga telā ne tuku mai ne Ieova ke akoako ne tatou a nisi tino e uiga ki tena Tama!

17. Kaia e fai ei te togiola pelā me ko te meaalofa sili a te Atua mō tino?

¹⁷ E seai se fakalotolotolua me isi se pogai ‵lei ke ati aka kae fakatumau ‵tou loto fakafetai mō te togiola. Ona ko te togiola, ko mafai o maua ne tatou se va fakataugasoa ‵pili mo Ieova faitalia me e se ‵lei katoatoa tatou. Ona ko te togiola, ka fakamasei katoatoa eiloa a galuega a te Tiapolo. (1 Ioa. 3:8) Ona ko te togiola, ka fakataunu eiloa a te fuafuaga a Ieova mō te lalolagi. Ka fai a te paneta kātoa mo fai se palataiso. A tino katoa kolā ka ‵kau fakatasi mo koe ka a‵lofa kae tavini atu ki a Ieova. Kae i aso takitasi, ka ‵sala atu tatou ki auala ke fakaasi atu ‵tou loto fakafetai ki te togiola—te meaalofa sili a te Atua mō tino!