1-2. (a) Se a te mea e lavea ne Ieova i te fia miliona kolā e maopoopo fakatasi mō te ‵Kaiga a te Aliki i te Afiafi? (Ke onoono ki te ata i te ‵kava.) (e) Se a te mea ka sau‵tala tatou ki ei i te mataupu tenei?

MAFAUFAU la ki te mea e lavea ne Ieova i te taimi e maopoopo katoa i ei a te fia miliona i te lalolagi kātoa mō te ‵Kaiga a te Aliki i te Afiafi. E se tāua ki a ia te lasi o te aofaki o tino; e fakatāua ne ia a tino taki tokotasi kolā e ‵kau mai. E pelā mo se mea e tasi, e lavea ne ia a latou kolā e fakamaoni o ‵kau mai ki i ei i tausaga katoa. Kāti e aofia i ei a tino taki tokotasi kolā e ‵kau mai faitalia a fakasauaga faiga‵ta e fe‵paki mo latou. Nisi tino e se au‵mai faeloa ki nisi fakatasiga, kae e ‵kilo atu latou ki te ‵kau ki te Fakamanatuga e pelā me se tiute tāua e ‵tau o fai ne latou. E lavea foki ne Ieova a latou kolā e ‵kau atu ki te Fakamanatuga mō te taimi muamua, kāti ona ko te fia ‵logo.

² E manino ‵lei, me e fiafia eiloa a Ieova ke kilo mai ki te tokouke o tino e ‵kau ki te Fakamanatuga. (Luka 22:19) Kae tiga te feitu tenā, e se tāua malosi ki a Ieova a te aofaki o tino kolā e ‵kau mai. E fiafia malosi eiloa a ia ki te pogai e ‵kau mai ei latou; e fakatāua ne Ieova te pogai e ‵kau mai ei a tino. I te mataupu tenei, ka sau‵tala eiloa tatou ki se fesili tāua: Kaia e ‵tau o ‵kau atu tatou ki te Fakamanatuga telā e fai fakatasi fua i te tausaga, penā foki mo fakatasiga i vaiaso kolā e fakatoka ne Ieova mō tino kolā e alofa a ia ki ei?

3-4. (a) Kaia e ‵kau e tatou ki fakatasiga? (e) Se a te uiga telā e fakamalosi ne ia tatou ke ‵kau atu ki fakatasiga? (i) E ‵tusa mo pati i te 1 Kolinito 11:23-26, kaia e se ‵tau ei mo tatou o ‵galo i te Fakamanatuga?

³ A te pogai tāua e ‵kau atu ei tatou ki fakatasiga a te fakapotopotoga me se vaega o ‵tou tapuakiga. E ‵kau atu foki tatou ki ei me e akoako tatou ne Ieova i fakatasiga. E ‵teke eiloa a tino  fakamata‵mata ki te manatu me e ‵tau o akoakogina latou ki so se mea. (3 Ioa. 9) E ‵kese mai i ei, e loto finafinau tatou ke akoako ne Ieova mo te fakapotopotoga telā e fakaaoga ne ia.—Isa. 30:20; Ioa. 6:45.

⁴ A te ‵tou ‵kau atu ki fakatasiga se fakaasiga o te loto maulalo—toka kae loto fia‵fia ke akoakogina tatou. I te po eiloa o te Fakamanatuga o te mate o Iesu, e se ‵kau atu fua tatou ki te fakatasiga tāua tenei me se tiute, kae ona ko te mea e loto maulalo tatou o faka‵logo ki te fakatonuga a Iesu: “Ke fai faeloa te mea tenei . . . mo fai se fakamasauaga ki a au.” (Faitau te 1 Kolinito 11:23-26.) E fakamalosi aka ne te fakatasiga tenā a te ‵tou fakamoemoega mō aso mai mua kae fakamasaua mai ki a tatou te lasi o te alofa o Ieova mō tatou. Kae e iloa ne Ieova me e manakogina ke fakamalosi faeloa tatou i taimi katoa kae e se i se tausaga fua e tasi. Tela la, e tuku mai ne ia a fakatasiga i vaiaso takitasi kae e fakamalosi mai a ia ke ‵kau tatou ki ei. E fakamalosi tatou ne te loto maulalo ke faka‵logo. E fakamāumāu ne tatou se fia itula i vaiaso katoa ke fakatoka kae ‵kau atu ki fakatasiga konā.

5. Kaia e ‵saga atu ei a tino loto maulalo ki te ‵kamiga a Ieova?

⁵ I tausaga takitasi, e talia ne tino loto maulalo e tokouke a te ‵kamiga a Ieova ke akoakogina latou ne ia. (Isa. 50:4) Ne fia‵fia latou i te ‵kauga ki te Fakamanatuga, kae kamata o ‵kau atu ki nisi fakatasiga. (Saka. 8:20-23) E fia‵fia fakatasi tatou ke akoako kae takitaki ne Ieova, “[‵tou] fesoasoani mo te [‵tou] tino fakasao.” (Sala. 40:17) E tonu, se a foki te suā mea e mafai o fakafiafia atu—io me sili atu i te tāua—i lō te talia o se ‵kamiga ke akoakogina ne Ieova mo Iesu, tena Tama telā e alofa malosi a ia ki ei?—Mata. 17:5; 18:20; 28:20.

6. Ne fesoasoani atu pefea a te loto maulalo ki se tagata e tokotasi ke kau atu ki te Fakamanatuga?

⁶ I tausaga takitasi, e taumafai tatou o ‵kami a tino e tokouke ke ‵kau mai ki te Fakamanatuga o te mate o Iesu. Ne maua ne tino loto maulalo e tokouke a mea aoga mai te taliaga o te ‵tou ‵kamiga. Mafaufau ki se fakaakoakoga. I nai tausaga ko ‵teka, ne maua ne se tagata se pepa ‵kami ki te Fakamanatuga, kae ne fai atu tou tagata ki te taina telā ne tuku atu ne ia me e se mafai a ia o kau atu. Kae e ui i ei, i te po eiloa o te Fakamanatuga, ne poi te taina ke lavea atu ne ia te tagata eiloa tenā i te Fale Tapuaki. Ko oko eiloa i te ofo o te tagata tenā i te uiga talimalo o tino, telā ne kamata ei o kau atu a ia ki fakatasiga i te vaiaso. E tonu, e tolu fua a taimi ne galo ei a ia i fakatasiga i te tausaga kātoa. Se a te mea ne fesoasoani atu ke fakaiku aka ke kau atu a ia ki fakatasiga katoa? Ne loto maulalo eiloa a ia o ‵fuli ana mafaufauga. Ne toe fai mai te taina telā ne ‵kami ne ia tou tagata, “A ia se tagata loto maulalo.” E mautinoa eiloa me ne ‵taki mai ne Ieova a te tagata tenei ke tapuaki atu ki a Ia, kae nei ko fai a ia mo fai se taina papatiso.—2 Samu. 22:28; Ioa. 6:44.

7. E mafai pefea o fesoasoani mai a mea kolā e tauloto ne tatou i fakatasiga mo mea e faitau ne tatou i te Tusi Tapu ke loto maulalo tatou?

⁷ A mea kolā e tauloto ne tatou i fakatasiga mo mea kolā e faitau ne tatou i te Tusi Tapu e mafai o fesoasoani mai ke loto maulalo tatou. I vaiaso mai mua o te Fakamanatuga, e fakasino atu faeloa ‵tou fakatasiga ki te fakaakoakoga a Iesu mo te loto maulalo ne fakaasi ne ia i te tukumaiga o tena ola e pelā me se togiola. Kae i nai aso mai mua o te Fakamanatuga, e fakamalosi tatou ke fai‵tau ki tala i te Tusi Tapu e uiga ki mea kolā ne ‵tupu ke oko atu ki te mate mo te toetuga o Iesu. A mea kolā e tauloto ne tatou i vaegā fakatasiga penā mo mea e fai‵tau ne tatou i tala o te Tusi Tapu e faka‵poko i ei ‵tou loto fakafetai mō te taulaga ne fai ne Iesu mō tatou. E fakamalosigina tatou ke fakaakoako ki tena uiga loto maulalo kae ke fai te loto o Ieova, e tiga eiloa a faigata ki a tatou.—Luka 22:41, 42.

8. Ne fakaasi mai pefea ne Iesu te loto toa?

⁸ E taumafai foki tatou o fakaakoako ki a Iesu i te fakaasiatuga o te loto toa. Mafaufau la ki te loto toa ne fakaasi ne ia i aso mai mua o tena mate. Ne iloa faka‵lei ne ia me ko pili o fakamasiasi a ia ne ana fili, ‵kini kae tamate. (Mata. 20:17-19) Kae ne toka eiloa a ia o fakafesagai atu ki te mate. I te okomaiga ki te taimi tenā, ne fai atu a ia ki ana apositolo kolā ne ‵nofo mo ia i Ketesemane: “‵Tu ki luga, ‵tou olo. Kiloke! A te tino ka fakatogafiti ne ia au ko pili mai.” (Mata. 26:36, 46) Kae i te taimi ne au‵mai ei se potukau o tāgata o puke a ia, ne tu atu a ia ki mua, fakaasi atu a ia ki a latou, kae fai atu ki sotia ke tuku atu ana soko ke olo. (Ioa. 18:3-8) Ko oko eiloa i te lasi o te loto toa ne fakaasi ne Iesu! I aso nei, e taumafai eiloa a Kelisiano fakaekegina mo nisi mamoe o fakaakoako ki a Iesu i te fakaasi atu o te loto toa. I te auala fea?

9. (a) Kaia e manakogina i ei ne tatou te loto toa ke ‵kau atu faeloa ki fakatasiga? (e) E mafai pefea o aoga a ‵tou fakaakoakoga ki te fakatuanaki o ‵tou taina kolā e falepuipuigina?

⁹ Ke ‵kau atu faeloa ki fakatasiga, e manakogina ke fakaasi atu ne tatou te loto toa i fakanofonofoga faiga‵ta. E ‵kau atu a nisi o ‵tou taina mo tuagane ki fakatasiga faitalia te logo‵mae i te fanoanoa, loto vāivāi, mo masaki. E loto ‵toa a nisi tino ke ‵kau atu ki fakatasiga faitalia a ‵tekemaiga mai kāiga io me ko tino pule o malo. Mafaufau la ki te auala e aoga ei a ‵tou fakaakoakoga ki taina kolā ne falepuipuigina ona ko te lotou fakatuanaki. (Epe. 13:3) I te taimi e lagona ei ne latou me e tumau eiloa tatou i te tavini atu ki a Ieova faitalia a mea faiga‵ta, e fakamalosigina latou ke fakatumau te lotou fakatuanaki, loto ‵toa mo te fakamaoni. Tenā te mea ne tupu ki te apositolo ko Paulo. I te taimi ne nofo ei a ia i te falepuipui i Loma, ne fiafia eiloa a ia i te taimi ne lagona ne ia me i ana taina ne fakamaoni eiloa o tavini atu ki te Atua. (Fili. 1:3-5, 12-14) Mai mua malie o ‵tala mai a ia ki tua, ne tusi atu ne Paulo tena tusi ki te kau Epelu. I te tusi tenā, ne fakamalosi ne ia a Kelisiano fakamaoni konā ke “fakatumau te [lotou] a‵lofa fakataina” kae ke mo a ma ‵galo i fakatasiga.—Epe. 10:24, 25; 13:1.

10-11. (a) Ko oi a tino e ‵tau o ‵kami ne tatou ki te Fakamanatuga? (e) Se a te pogai e ‵kami ei ne tatou a tino telā e fakaasi mai i te Efeso 1:7?

¹⁰ E fakaasi atu ne tatou te loto toa māfai e ‵kami ne tatou a kāiga, tino ga‵lue tasi mo tatou, mo tuakoi ki te Fakamanatuga. Kaia e ‵kami ei ne tatou a vaegā tino penā? E loto fakafetai tatou mō mea ne fai ne Ieova mo Iesu mō tatou ko ala ei o ma‵nako tatou o ‵kami mai a tino ki te Fakamanatuga. E ma‵nako tatou ke tauloto ne latou a te auala e mafai foki ne latou o maua a mea aoga mai te “alofa tauanoa” o Ieova e auala i te togiola.—Faitau te Efeso 1:7; Faka. 22:17.

¹¹ Kafai e fakaasi ne tatou te loto toa mai te maopoopo fakatasi, e fakaasi atu foki ne tatou te suā uiga tāua, te uiga telā ne fakaasi mai ne te Atua mo tena Tama i auala tu ‵kese.

12. (a) I auala fea e fakamalosi aka ne te ‵tou a‵lofa ki a Ieova mo Iesu ke ‵kau atu tatou ki fakatasiga? (e) Se a te fakamalosiga e maua ne tatou i te 2 Kolinito 5:14, 15 ke fakaakoako atu ei ki a Iesu?

¹² A te ‵tou a‵lofa ki a Ieova mo Iesu e fakamalosi ne ia tatou ke ‵kau atu ki fakatasiga. Kae ko mea kolā e tauloto ne tatou i fakatasiga e faka‵poko aka i ei te ‵tou a‵lofa ki a Ieova mo tena Tama. I fakatasiga, e fakamasaua mai faeloa i ei a mea ne fai ne lāua mō tatou. (Loma 5:8) Kae e fakamasaua mai eiloa ne te Fakamanatuga a te ‵poko o te lā a‵lofa mō tatou, e pelā foki ki a latou kolā e seki malamalama i te tāua o te togiola. Ona ko te mea ko ‵fonu i te loto fakafetai, e taumafai tatou o fakaakoako ki a Iesu mai te auala e ola ei tatou i aso takitasi. (Faitau te 2 Kolinito 5:14, 15.) E se gata i ei, e fakamalosi ‵tou loto ke ‵viki atu ki a Ieova mō te tukumaiga ne ia o te togiola. A te auala e tasi e mafai o ‵viki atu tatou ki a ia ko te faiga o ‵tou tali fakamalosi loto i fakatasiga.

13. I te auala fea e fakaasi atu ne tatou te ‵poko o ‵tou a‵lofa ki a Ieova mo tena Tama? Fakamatala mai.

¹³ E mafai ne tatou o fakaasi te ‵poko o te ‵tou a‵lofa ki a Ieova mo tena Tama mai te loto fia‵fia o talia a mea faiga‵ta. E ‵tau o talia faeloa ne tatou a mea faiga‵ta e uke ko te mea ke ‵kau atu tatou ki fakatasiga. E fai ne fakapotopotoga e uke se fakatasiga i te fakaotiga o aso ga‵lue, ko te taimi e fi‵ta ei te tokoukega. Kae e fai te suā fakatasiga i te fakaotiga o te vaiaso, ko te taimi telā e masani o malo‵lo i ei a tino. E mata, e iloa ne Ieova me e ‵kau atu tatou ki fakatasiga faitalia ‵tou fi‵ta? E mautinoa eiloa me e iloa ne ia! A te ‵tonuga loa, ko te uke o ‵tou taumafaiga e fai, ko te lasi foki o te loto fakafetai o Ieova mō te alofa telā e fakaasi atu ne tatou ki a ia.—Male. 12:41-44.

14. Ne tuku mai pefea ne Iesu se fakaakoakoga i te fakaasimaiga o te alofa sē fakapito?

¹⁴ Ne tuku mai ne Iesu se fakaakoakoga mō tatou i te fakaasimaiga o te alofa sē fakapito. Ne loto fiafia a ia o mate mō ana soko kae ola i aso takitasi i se auala telā e fakamuamua ne ia a manakoga o ana soko i lō ana manakoga. E pelā me se fakaakoakoga, ne fetaui a ia mo ana soko i te taimi foki loa telā ne fi‵ta a ia i te feitu faka-te-foitino mo mea tau lagonaga. (Luka 22:39-46) Kae ne saga atu a ia ki te mea telā e mafai o tuku atu ne ia ki nisi tino, kae e se ko te mea e mafai o maua ne ia mai i a latou. (Mata. 20:28) Kafai e malosi ‵ki eiloa ‵tou a‵lofa ki a Ieova mo ‵tou taina, ka fai ne tatou a mea katoa ke mafai o ‵kau atu ki te  ‵Kaiga a te Aliki i te Afiafi e penā foki mo nisi fakatasiga a te fakapotopotoga.

15. Ko oi a tino kolā e fia‵fia eiloa tatou o fesoasoani ki ei?

¹⁵ E aofia eiloa tatou i se kautaina e tasi o Kelisiano ‵tonu, kae e fia‵fia tatou o fakamāumāu a taimi e uke māfai e mafai ke ‵kami mai a tino ‵fou ke ‵kau mai ki a tatou. Kae e fia‵fia eiloa tatou ke fesoasoani atu ki a latou kolā e “kāiga tatou i te fakatuanaki” kae ko mate faka-te-agaga. (Kala. 6:10) E fakamaoni atu ‵tou a‵lofa ki a latou mai te fakamalosi latou ke ‵kau mai ki ‵tou fakatasiga, maise loa te Fakamanatuga. E pelā mo Ieova mo Iesu, e fia‵fia eiloa tatou māfai ko toe foki mai se tino ko mate faka-te-agaga ki a Ieova, te ‵tou Tamana mo te Tausi Mamoe alofa.—Mata. 18:14.

16. (a) E mafai pefea o fakamalosi ne tatou te suā tino ki te suā tino, kae ka aoga pefea a ‵tou fakatasiga ki a tatou? (e) I te taimi tenei o te tausaga, kaia e ‵lei ei ke masaua ne tatou a pati a Iesu i te Ioane 3:16?

¹⁶ I vaiaso mai mua, e ‵kami ne tatou a tino e tokouke māfai e mafai ke ‵kau mai ki te Fakamanatuga i te afiafi o te Aso Lima, Apelila 19, 2019. (Ke onoono ki te pokisi “ E Mata ka ‵Kami ne Koe Latou?”) I te suā tausaga, ke na fakamalosi ne tatou a te suā tino ki te suā tino ke ‵kau mai ki fakatasiga kolā e fakatoka ne Ieova mō tatou. Ona ko te pili mai o te gataga o te olaga tenei, e manakogina ne tatou a fakatasiga, me e fesoasoani mai ke loto maulalo tatou, loto ‵toa, kae ke a‵lofa. (1 Tesa. 5:8-11) Mai ‵tou loto kātoa, ke na fakaasi atu ne tatou a ‵tou lagonaga ‵tonu e uiga ki a Ieova mo tena Tama kolā ne a‵lofa malosi mai ki a tatou!—Faitau te Ioane 3:16.