1-2. (a) Ne aoga pefea a te fekau telā ne fakamau i te Isaia 41:10 ki te tuagane ko Yoshiko? (e) E aoga ki a ai te fekau ne fakamau ne Ieova i te Isaia 41:10?

NE MAUA ne se tuagane Kelisiano e igoa ki a Yoshiko se tala fakafanoanoa. Ne fai atu tena tokita me ko ‵toe fia fua masina e ola ei a ia. Ne saga atu pefea tou fafine ki ei? Ne masaua ne Yoshiko se fuaiupu gali i te Tusi Tapu i te Isaia 41:10. (Faitau.) Kae ne fai atu ne ia mo te kufaki ki tena tokita i a ia e se mataku, me ne puke atu loa a Ieova ki tena lima. * Ne fesoasoani atu a te fekau fakamafanafana i te fuaiupu tenā ki te ‵tou tuagane pele ke talitonu katoatoa ki a Ieova. E mafai foki o fesoasoani mai a te fuaiupu tenā ke tumau tatou i te kufaki māfai e fakafesagai atu ki nisi mea faiga‵ta. Ke malamalama i te auala e mafai ei o fai penā, ke onoono muamua tatou ki te pogai ne tuku atu ei ne te Atua te fekau tenā ki a Isaia.

² Muamua la, ne fakatonu atu a Ieova ki a Isaia ke fakamau ki lalo a pati konā ke fakamafanafana atu ki tino Iutaia kolā ko pili o ave fakapagota ki Papelonia. Kae ne manako eiloa a Ieova ke fakamau te fekau tenā e se mō te ‵lei fua o tino Iutaia kolā ne ave fakapagota kae penā foki ana tino katoa talu mai te taimi tenā. (Isa. 40:8; Loma 15:4) I aso nei, ko ola tatou i “toe taimi faiga‵ta,” kae ko sili atu nei te manakogina ne tatou a te fakamalosiga telā e maua i te tusi o Isaia.—2 Timo. 3:1.

3. (a) Ne a tautoga e maua i te Isaia 41:10, te tusi siki fakavae mō te tausaga 2019? (e) Kaia e manakogina ei ne tatou a tautoga konei?

³ I te mataupu tenei, ka sau‵tala eiloa tatou ki tautoga e tolu a Ieova kolā e fakamalosi aka i ei te fakatuanaki kae ne fakamau i te Isaia 41:10: (1) Ka fakatasi mai a Ieova ki a tatou, (2) a ia  ko te ‵tou Atua, kae ko te (3) ka fesoasoani mai a ia ki a tatou. E ma‵nako malosi tatou ki fakatalitonuga * konei, me e pelā mo Yoshiko, e fe‵paki foki tatou mo mea faiga‵ta. E ‵tau foki o fakafesagai atu tatou ki fakamalosiga ma‵sei mai te lalolagi. A nisi o tatou koi kufaki eiloa i fakasauaga mai malo kolā e pule fakamasei atu ki tino. Ke na sau‵tala nei tatou ki fakatalitonuga takitasi konei.

4. (a) Se a te fakatalitonuga muamua telā ka sau‵tala tatou ki ei? (Ke onoono foki ki te fakamatalaga mai lalo.) (e) I auala fea e fakaasi mai ei ne Ieova ana lagonaga ‵tonu kae atafai ki a tatou? (i) E aoga pefea ki a koe a te auala e fakaasi mai ei ne te Atua ana lagonaga ‵tonu mo te atafai?

⁴ Muamua la, e fakatalitonu mai ne Ieova i ana pati ki a tatou: “Sa mataku, me i a au e fakatasi atu ki a koe.” * E fakaasi mai ne Ieova me e fakatasi mai a ia ki a tatou mai te saga tonu mai mo te atafai. Mafaufau la ki te auala e fakaasi mai ne ia ana lagonaga ‵tonu kae atafai mō tatou. “A koe ne fai pelā me se mea tāua i taku kilokiloga,” ko pati a Ieova. “A koe ne fakaaloalogina, kae ne alofa au ki a koe.” (Isa. 43:4) E seai se malosi i te iunivesi e mafai o taofi ne ia te alofa o Ieova mō latou kolā e tavini atu ki a ia; e se mafai o ave kea‵tea a tena fakamaoni ki a tatou. (Isa. 54:10) E maua ne tatou te loto toa ona ko tena alofa mo tena vā fakataugasoa mo tatou. Ka puipui ne ia tatou i aso nei, e pelā eiloa mo te puipuiga ne ia a tena taugasoa ko Apelamo (Apelaamo). Ne fai atu a Ieova ki a ia: “Sa mataku. Au se talita ki a koe.”—Kene. 15:1.

5-6. (a) E iloa pefea ne tatou me e manako a Ieova o fesoasoani mai ki ‵tou fakalavelave? (e) Se a te akoakoga e mafai o tauloto ne tatou mai te tala o Yoshiko?

⁵ E iloa ne tatou me e fiafia eiloa a Ieova o fesoasoani mai ki a tatou i ‵tou fakalavelave faiga‵ta me e tauto mai a ia ki ana tino: “Kafai e fanatu koe i loto i vai, ka fakatasi atu au ki a koe, kae i loto i vaitafe, ka se lofia eiloa koe. Kafai e sasale atu koe i loto i te afi, a koe ka se ‵paku, io me ‵ka koe i ulaga o te afi.” (Isa. 43:2) Ne a uiga o pati konei?

⁶ E se tauto mai a Ieova ke ave kea‵tea ne ia a fakalavelave kolā e fai ei ke faigata te olaga, kae ka sē talia ne ia ke lofia tatou ne “vaitafe”  o fakalavelave io me fakamasei tatou ne “te afi” o mea faiga‵ta e uke. E fakatalitonu mai a ia me ka fakatasi mai ki a tatou, fesoasoani mai ke ‘ulu atu i loto’ i mea faiga‵ta konā. Ne a mea ka fai ne Ieova? Ka fesoasoani mai o fakafeoloolo aka ‵tou ma‵taku ko te mea ke mafai o fakatumau a ‵tou fakamaoni ki a ia, faitalia me e fakafesagai atu foki tatou ki te mate. (Isa. 41:13) Ne fakamaoni aka ne Yoshiko, telā ne taku mai muamua a te ‵tonu o te mea tenā. Ne fai mai tena tama fafine: “Ne ofo matou i te sē manavase o mami. Ne lavea tonu ne matou me ne tuku atu eiloa ne Ieova ki a ia a te filemu o te loto. Ke oko atu ki te aso ne mate ei a ia, ne faipati atu eiloa a mami ki nēsi mo tino ma‵saki e uiga ki a Ieova mo ana folafolaga.” Se a te mea e tauloto ne tatou mai te tala o Yoshiko? Kafai e tali‵tonu tatou ki te tautoga a te Atua tenei, “Au e fakatasi atu ki a koe,” ka loto ‵toa kae ma‵losi foki tatou i te taimi e kufaki ei tatou i mea faiga‵ta.

7-8. (a) Se a te lua o fakatalitonuga ka sau‵tala tatou ki ei, kae se a te mea e fakauiga ki ei? (e) Kaia ne fai atu ei a Ieova ki tino Iutaia kolā ne ‵nofo fakapagota: “Sa manava‵se”? (i) Ne a pati i te Isaia 46:3, 4 kolā ne fakafilemu i ei a loto o tino o te Atua?

⁷ Mafaufau ki te lua o fakatalitonuga telā ne tusi i te Isaia: “Sa manavase, me i a au ko tou Atua.” Se a te uiga o te fakamatalaga tenei e uiga ki te manavase? I te fuaiupu tenei, a te pati Epelu tenei “manavase” e faka‵mafa mai i ei te manatu ke “kilo faeloa ki ou tua me sē iloa ne koe te mea fakamataku tenā e vau” io me “polepole e pelā me se tino telā e tu atu i se tulaga fakamataku.”

⁸ Kaia ne fai atu a Ieova ki te kau Iutaia kolā ka ave fakapagota ki Papelonia ke mo a ma “manava‵se”? Me ne iloa ne ia me i tino Papelonia ka ma‵taku eiloa. Se a te mea ka fakamāfua ne ia te ma‵taku o latou? I te fakaotiga o te 70 tausaga o te ‵nofo fakapagota o tino Iutaia i Papelonia, ka fakamaseigina a Papelonia ne te kautau malosi a Metai mo Pelesia. Ka fakaaoga ne Ieova a te kautau tenei ke fakasaoloto ei ana tino mai te ‵nofo fakapagota i Papelonia. (Isa. 41:2-4) I te taimi ne iloa i ei ne tino Papelonia mo tino mai nisi fenua kolā ne ola i te taimi tenā me ko pili o oko atu a olotou fili, ne taumafai o fakatumau te lotou loto ‵toa mai te fai atu: “Fakamalosi.” Ne faite foki ne latou a atua faite, mo te fakamoemoega me ka puipui latou ne atua konā. (Isa. 41:5-7) Kae i te suā feitu, ne tuku atu ne Ieova te filemu ki loto o tino Iutaia kolā ne ave fakapagota mai te fai atu ki a latou: “Koe e Isalaelu, [e se pelā mo ou tuakoi] ko taku tavini . . . Sa manavase, me i a au ko tou Atua.” (Isa. 41:8-10) Masaua la me ne fai atu a Ieova: “Au ko tou Atua.” Mai pati konā, ne toe fakatalitonu atu ne Ieova ki ana tino tapuaki fakamaoni me ne seki puli latou i a ia—koi fai eiloa a ia mo olotou Atua, kae fai latou mo ana tino. Ne fai atu a ia ki a latou: “Ka sau ne au koe . . . Kae fakasao koe.” E mautinoa eiloa me ne fakamafanafana kae fakamalosi atu a pati konā ki tino Iutaia kolā ne ‵nofo fakapagota.—Faitau te Isaia 46:3, 4.

9-10. Kaia e se ‵tau ei mo tatou o ma‵taku? Taku mai se tala fakatusa.

⁹ Ko sili atu nei te manava‵se o tino i ‵tou tafa ki tulaga ma‵sei o te lalolagi i aso nei i lō aso mua. E tonu, e pokotia foki tatou i fakalavelave konā. Kae e seai se pogai e ‵tau ei o ma‵taku tatou. E fai mai a Ieova: “Au ko tou Atua.” Kaia e fai ei a te fakamatalaga tenā e pelā me se pogai ‵lei ke sē ma‵taku tatou?

¹⁰ Mafaufau ki te fakatusa tenei: E tokolua a pasese, ko Timi mo Peni, e olo atu i luga i se vakalele telā e galulu ona ko te malosi o te matagi. I te taimi e gasuesue malosi ei te vakalele, kae faipati mai mo se leo maluga i mea fakalogo‵logo: “Faka‵mau otou fusi ke ‵mau. Ka tai gasuesue eiloa te vakalele mō se vaitaimi.” E mataku malosi a Timi. Kae toe  fai mai te pailate, penei: “Sa manavase. Ko te pailate loa tenei e faipati atu.” I te tulaga tenā, e lūlū te ulu o Timi, kae fai atu, “Se a te vaegā fakatalitonuga tenā?” Kae e lavea ne ia me i a Peni e se manavase eiloa. Fesili atu ei a Timi ki tou tagata: “Kaia koe se mataku ei?” E fakamisikata atu a Peni ki ei kae fai atu: “Me e iloa ‵lei ne au te pailate tenei. A ia ko toku tamana!” Tenā fai atu ei a Peni: “Ke fai atu ne au a mea e uiga ki toku tamana. E talitonu au me kafai e iloa ne koe a ia mo tena poto, ka sē mataku eiloa koe.”

11. Ne a akoakoga e mafai o tauloto ne tatou mai te tala fakatusa e uiga ki pasese e tokolua?

¹¹ Ne a akoakoga e mafai o tauloto ne tatou mai te tala fakatusa tenei? E pelā mo Peni, e se ma‵taku tatou me e iloa faka‵lei ne tatou a te ‵tou Tamana faka-te-lagi, ko Ieova. E iloa ne tatou me ka takitaki faka‵lei ne ia tatou i loto i fakalavelave kolā e fai pelā me se matagi malosi i aso fakaoti o te olaga tenei. (Isa. 35:4) E tali‵tonu tatou ki a Ieova, tela la, e mafai o tumau tatou i te sē ma‵taku faitalia me i te ‵toega o te lalolagi nei ko oko loa i te ma‵taku. (Isa. 30:15) E fai foki tatou pelā mo Peni i te taimi e fakailoa atu ne tatou ki ‵tou tuakoi a pogai e ‵tau ei o tali‵tonu ki te Atua. Ko mafai foki ei o tali‵tonu latou me faitalia eiloa me ne a fakalavelave e fe‵paki mo latou, ka ‵lago atu eiloa a Ieova ki a latou.

12. (a) Se a te tolu o fakatalitonuga ka sau‵tala tatou ki ei? (e) Se a te mea fakauiga ki ei a te “lima” o Ieova?

¹² Onoono aka ki te tolu o fakatalitonuga telā ne fakamau ne Isaia: “Ka fakamalosi ne au a koe, ao, ka fesoasoani atu au ki a koe.” Ko oti ne fakamatala mai ne Isaia a te auala e fakamalosi ne Ieova ana tino, i ana pati: “A te Aliki Sili ko Ieova ka vau mo te malosi, kae ko tena lima ka pule mō ia.” (Isa. 40:10) E fakaaoga faeloa i te Tusi Tapu a te pati “lima” i se auala fakatusa ke fakasino atu ki te malosi. Tela la, a te uiga o te “lima” o  Ieova telā ka “pule” mai, e fakamasaua mai ki a tatou me i a Ieova ko te Tupu malosi. Ne fakaaoga ne ia tena malosi telā e se mafai o fakatakavalegina ke ‵lago kae ‵pulu ne ia ana tavini i aso mua, kae e tumau eiloa a ia i te fakamalosi kae puipui a latou kolā e tali‵tonu ki a ia i aso nei.—Teu. 1:30, 31; Isa. 43:10, fml.

13. (a) Ko te taimi fea e tausi ei ne Ieova tena tautoga ke fakamalosi tatou? (e) Se a te tautoga e tuku mai ne ia ki a tatou te malosi mo te loto talitonu?

¹³ I te taimi eiloa e fakasaua tatou ne ‵tou fili, e tausi ne Ieova tena tautoga tenei: “Ka fakamalosi ne au a koe.” I nisi koga o te lalolagi i aso nei, e taumafai malosi eiloa ‵tou fili ke taofi te galuega talai io me fakatapu ‵tou fakapotopotoga. E tiga te feitu tenā, e se manava‵se malosi tatou e uiga ki osomaiga konā. E fakatalitonu mai a Ieova ki a tatou me ka tuku mai ne ia te malosi mo te loto talitonu. E tauto mai a ia: “E seai se meatau ne faite ke ‵teke atu ki a koe ka manuia.” (Isa. 54:17) E fakamasaua mai ne te fakamatalaga tenā a manatu tāua e tolu.

14. Kaia e se ‵poi ei tatou me ka taua mai a fili o te Atua ki a tatou?

¹⁴ Muamua la, e pelā me ne soko o Keliso, e fakamoe‵moe tatou me ka takalia‵lia mai a tino. (Mata. 10:22) Ne ‵valo mai a Iesu me ka fakasauagina eiloa ana soko i aso fakaoti konei. (Mata. 24:9; Ioa. 15:20) Te lua, e fakailoa mai te valoaga a Isaia me ka takalia‵lia malosi mai ‵tou fili ki a tatou; ka fakaaoga ne latou a meatau kese‵kese ke taua mai ki a tatou. E aofia i meatau konā a uiga fakaloiloi, te loi matagā, mo fakasauaga ma‵sei. (Mata. 5:11) E se taofi ne Ieova a ‵tou fili mai te fakaaogaga ne latou a meatau ke taua mai ki a tatou. (Efe. 6:12; Faka. 12:17) Kae e se ‵tau eiloa mo tatou o ma‵taku. Kaia?

15-16. (a) Se a te manatu tāua i te tolu telā e ‵tau o masaua ne tatou, kae e ‵lago mai pefea te Isaia 25:4 ki te mea tenei? (e) E fakamatala mai pefea ne te Isaia 41:11, 12 a te ikuga o latou kolā e taua mai ki a tatou?

¹⁵ Mafaufau ki te tolu o manatu tāua telā e ‵tau o masaua ne tatou. Ne fai mai a Ieova me e “seai se meatau” e fakaaoga ke ‵teke mai ki a tatou “ka manuia.” E pelā mo te ‵pui telā e puipui ne ia tatou mai te malosi o te vaiua ‵to  ‵lotu, e puipui foki ne Ieova tatou mai te “kaitaua o tino pule fakasaua.” (Faitau te Isaia 25:4, 5.) Ka sē mafai lele eiloa o manuia ‵tou fili i te taumafaiga o fakapa‵kia tatou.—Isa. 65:17.

¹⁶ E fakamalosi foki ne Ieova a ‵tou tali‵tonu ki a ia mai te fakamatala likiliki mai ki a tatou a te ikuga o latou katoa kolā e “kaitaua” ki a tatou. (Faitau te Isaia 41:11, 12.) Faitalia eiloa me pefea a taumafaiga a ‵tou fili ke taua mai ki a tatou io me pefea te malosi o te taua, e ‵pau eiloa te ikuga: A fili katoa o tino o te Atua “ka se aoga kae ‵mate atu.”

17-18. (a) E mafai pefea o ‵poko ‵tou loto tali‵tonu ki te Atua mai te fai‵tau ki te Tusi Tapu? Taku mai se fakaakoakoga. (e) E mafai pefea o fesoasoani mai a te mafaufau ‵loto ki te tusi siki fakavae telā ko oti ne filifili aka mō te tausaga 2019?

¹⁷ A te auala ke ‵poko ‵tou loto tali‵tonu ki a Ieova ko te iloa faka‵lei ne tatou a ia. Kae ko te auala fua e tasi e mafai o iloa faka‵lei ne tatou te Atua, ko te fai‵tau faka‵lei ki te Tusi Tapu kae mafaufau ‵loto ki mea e fai‵tau ne tatou. E aofia i te Tusi Tapu a tala fakatuagagina ki te auala ne puipui ei ne Ieova ana tino i aso mua. E tuku mai ne tala konā te loto talitonu me ka tausi mai a ia ki a tatou i te taimi nei.

¹⁸ Ke fakaataata aka ne koe i tou mafaufau a te auala ne fakamatala mai ne Isaia a te puipuiga a Ieova ki a tatou. E fakasino atu a ia ki a Ieova e pelā me se tausi mamoe kae ko tavini a te Atua e pelā me ne tamā mamoe. E fai mai a Isaia e uiga ki a Ieova: “Ka fakamaopoopo mai ne ia a mamoe ki tena lima, kae ka sau aka ne ia latou i ana fatafata.” (Isa. 40:11) Kafai e lagona ne tatou a lima ma‵losi o Ieova e ‵pulu ne ia tatou, ka maua eiloa ne tatou se puipuiga mo te filemu. Ke fesoasoani mai ke fakatumau ‵tou filemu faitalia a fakalavelave e fe‵paki mo tatou, ne filifili aka ne te tavini fakamaoni kae poto a te Isaia 41:10 e pelā me ko te tusi siki fakavae o te tausaga 2019, “Sa manavase, me i a au ko tou Atua.” Mafaufau ‵loto ki pati fakatalitonu konā. Ka fakamalosi ne ia koe i te taimi e fakafesagai atu koe ki mea faiga‵ta kolā e ‵moe mai i ou mua.