Faitau te Kenese 37:​23-28; 39:17–23 ke tauloto mai te fakaakoakoga a Iosefa e uiga ki te kufaki i faifaiga sē fakamaoni.

Iloilo te tala kātoa. Kaia ne fai fakamasei ne nisi tino a Iosefa? (Kene. 37:​3-11; 39:​1, 6-10) E pefea te leva ne kufaki ei a Iosefa i faifaiga sē fakamaoni? (Kene. 37:2; 41:46) I te taimi tenā, ne a mea ne fai ne Ieova mō Iosefa, kae se a te mea ne seki fai ne Ia?—Kene. 39:​2, 21; w23.01 17 ¶13.

Keli malosi ifo. E se fai mai te Tusi Tapu me ne ‵pulu ne Iosefa a ia eiloa mai ‵losiga ‵se a te avaga a Potifala e uiga ki a ia. E mafai pefea o fesoasoani mai a tusi fai‵tau konei mai lalo ke mafau‵fau tatou ki te pogai ne filifili aka ei ne Iosefa ke nofo filemu kae se faipati a ia io me kaia e se ‵tau o fakamoe‵moe tatou ke fakaasi mai a fakamatalaga likiliki katoa? (Faata. 20:2; Ioa. 21:25; Galu. 21:37) Ne a uiga ne mafai o fesoasoani atu ki a Iosefa ke kufaki i faifaiga sē fakamaoni?—Mika 7:7; Luka 14:11; Iako. 1:​2, 3.

Ne a akoakoga? Fesili ifo ki a koe:

• ‘Ne a faifaiga sē fakamaoni e fakamoemoe au ke fepaki mo au ona ko au se soko o Iesu?’ (Luka 21:​12, 16, 17; Epe. 10:​33, 34)

• ‘Ne a aku mea e mafai nei o fai ke fakafesagai atu ki faifaiga sē fakamaoni mo te manuia?’ (Sala. 62:​7, 8; 105:​17-19; w19.07 2-7)