1. Se a te ‵kamiga ne tuku atu ne Iesu ki tāgata faiika e tokofa, kae ne ‵saga atu pefea latou ki te ‵kamiga tenā?

A SOKO ko Petelu, Anitelea, Iakopo mo Ioane ne tino fai pisinisi faiika. Mafaufau la ki te lotou ‵poi i te lagonaga ne latou te ‵kamiga a Iesu ki a latou, penei: “Tau‵tali mai i a au, kae ka fai ne au [koutou] ke fai mo tino faiika ki tino.” * Ne ‵saga atu pefea a tāgata konā ki te ‵kamiga? Fai mai te Tusi Tapu: “I konā loa, ne tiaki fakavave ne [latou] a tili kae tau‵tali atu i a ia.” (Mata. 4:18-22) Ka ‵fuli ne te fakaikuga tenā a olotou olaga ki te se-gata-mai. I lō te faiika ki ika, ka “faiika eiloa [latou] ki tino ola.” (Luka 5:10) I aso nei, e ‵kami foki ne Iesu a tino loto ‵lei kolā e fia‵fia ki te munatonu. (Mata. 28:19, 20) E mata, ko oti ne talia ne koe a te ‵kamiga a Iesu ke fai mo tino faiika ki tino?

2. Kaia e ‵tau ei o mafau‵fau faka‵lei tatou ki te fakaikuga ke fai mo tino faiika ki tino, kae se a te mea ka fesoasoani mai ke fai ne tatou te fakaikuga tenā?

² Kāti koe ko leva ne fai tau akoga faka-te-Tusi Tapu, kae fai a nisi ‵fuliga ki tou olaga. Nei, ko manakogina ke fai sau filifiliga me e manako koe ke fai mo fai se tino talai o te tala ‵lei io me ikai. Kafai koe seki toka o talia te ‵kamiga a Iesu, ke mo a ma loto vāivāi. A te fakatalave o koe ke fai tau fakaikuga, se fakaasiga me e iloa ne koe te tāua o te fakaikuga tenā. E tonu, e fai mai te Tusi Tapu me “i konā loa,” ne tiaki fakavave ne Petelu mo ana taugasoa a olotou tili faiika. E se fakauiga eiloa te mea tenei me ne seki  fai fakavave ne latou a te lotou fakaikuga tenā e aunoa mo te mafau‵fau muamua ki ei. Ko oti ne iloa kae talia ne latou a Iesu e pelā me ko te Mesia i masina e silia atu mo te ono ko ‵teka. (Ioa. 1:35-42) I se auala tai ‵pau, e mautinoa eiloa me ko oti ne tauloto koe ki mea e uke e uiga ki a Ieova mo Iesu, kae manako koe o gasolo ki mua i te feitu faka-te-agaga. Kae koi tuai o fai tau fakaikuga, e ‵tau o mafaufau faka‵lei koe e uiga ki ei. Ne a mea ne fesoasoani atu ki a Petelu, Anitelea mo nisi tino ke fai olotou fakaikuga?

3. Ne a uiga ka fakamalosi aka i ei a tou manakoga ke talia a te ‵kamiga a Iesu?

³ A soko muamua o Iesu ne fakamalosigina, ne iloa ne latou o fai faka‵lei te lotou galuega, loto ma‵losi kae ne akoakogina faka‵lei. E mautinoa eiloa me ne fesoasoani atu a uiga konei ke fai latou mo tino faiika ma‵goi ki tino. I te mataupu tenei, ka sau‵tala tatou ki te auala e mafai o ati aka ne koe a uiga konā, ke mafai o fai koe mo soko magoi o Keliso.

4. Se a te mea ne fakamalosi ne ia a Petelu ke fai pelā me se tagata faiika?

⁴ Ne kilo atu a Petelu ki te faiika e se pelā fua me se galuega ke ‵lago atu ki tena kāiga, kae e mautinoa eiloa me ne fiafia a ia ki te faiika. (Ioa. 21:3, 9-15) Ne tauloto foki a ia ke fiafia o fai pelā me se tino faiika ki tino. Kae mai te fesoasoani o Ieova, ne apo ‵ki a Petelu i te faiga o te galuega tenā.—Galu. 2:14, 41.

5. E ‵tusa mo pati i te Luka 5:8-11, kaia ne mataku i ei a Petelu, kae se a te mea e mafai o fesoasoani mai ke manumalo tatou i vaegā lagonaga penā?

⁵ E talai tatou ona ko te ‵tou a‵lofa ki a Ieova; tenā te pogai tāua e fai ei ne tatou a te galuega tenei. A te ‵tou a‵lofa ki a Ieova e mafai o fesoasoani mai ke manumalo tatou i so se lagonaga me i a tatou e se apo malosi. I  te ‵kamiga ne Iesu a Petelu ke fai mo tino faiika ki tino, ana muna, penei: “Sa mataku.” (Faitau te Luka 5:8-11.) Ne seki mataku a Petelu ki mea ka ‵tupu ki a ia māfai ko fai a ia pelā me se soko. Ne ofo a ia ki te uke o ika ne maua ne latou ona ko te vavega ne fai ne Iesu, kae ne mafaufau a Petelu me e se fetaui ‵lei a ia ke ga‵lue fakatasi mo Iesu. E pelā mo Petelu, kāti ka manavase eiloa koe e uiga ki mea e ‵tau o fai ne koe ke mafai o fai pelā me se soko o Keliso. Kafai e fai koe penā, ke fakamalosi aka tou alofa ki a Ieova, Iesu, mo ou tuakoi, kae ka fakamalosigina koe ke talia te ‵kamiga a Iesu ke fai mo tino faiika ki tino.—Mata. 22:37, 39; Ioa. 14:15.

6. Ne a nisi pogai e ma‵nako ei tatou o talai?

⁶ Mafaufau ki nisi pogai e fakamalosigina ei tatou ke talai. E ma‵nako tatou o faka‵logo ki te fakatonuga a Iesu: “Olo atu . . . o fai a tino i ei mo fai a soko.” (Mata. 28:19, 20) E talai foki tatou ona ko tino ko “pa‵ka kae tuku tiaki” kae ko ma‵nako malosi o tauloto ki te munatonu e uiga ki te Malo. (Mata. 9:36) E manako a Ieova ko vaegā tino katoa ke iloa ne latou te iloaga tonu e uiga ki te munatonu kae ke faka‵sao.—1 Timo. 2:4.

7. E fakaasi mai pefea i te Loma 10:13-15 a te tāua o te galuega talai?

⁷ Kafai e mafau‵fau tatou ki te auala e fesoasoani atu te ‵tou galuega talai ki te faka‵saoga o tino, ka ma‵nako eiloa tatou o talai. E se pelā mo te tagata faiika faipisinisi telā e ‵togi atu ana ika ki tua io me fakaaoga mo ‵kai ki ei tena kāiga, e “faiika” eiloa tatou ki tino, ko te mea ke faka‵sao a olotou ola.—Faitau te Loma 10:13-15; 1 Timo. 4:16.

8-9. Ne a mea e ‵tau o iloa ne se tagata faiika, kae kaia?

⁸ I aso o Iesu, ne ‵tau o iloa ne se tagata faiika Isalaelu a vaegā ika o te tai e mafai o maua ne ia. (Levi. 11:9-12) E ‵tau foki o iloa ne ia te koga e mafai o maua i ei a ika. A ika e masani o ‵nofo i te kogā tai telā e ‵lei ki a latou kae uke foki a mea‵kai i ei. E mata, e tāua ki te tagata faiika a te taimi e fano ei a ia o faiika? E uiga ki te taimi ‵lei ke faiika, mafaufau ki pati a se Molimau mai se fenua o te Pasefika i te taimi ne ‵kami ne ia se misionale ke olo lāua o faiika. Ne fai atu te misionale, “Ka fetaui tāua i te iva i te taeao ma taeao.” Muna te taina, “Koe se iloa ne koe. Tāua e olo i te taimi tonu o faiika, kae e se ko te taimi telā e ‵lei ki a tāua.”

⁹ E penā foki i te senitenali muamua, ne olo atu a tino faiika ki tino ki koga kolā e mafai o maua ne latou i ei a “ika” fakatusa, mo te taimi tonu telā e mafai o maua ne latou i ei a tino. E pelā me se fakaakoakoga, ne talai atu a soko o Iesu i te faletapu mo sunako, mai fale ki fale, mo te maketi. (Galu. 5:42; 17:17; 18:4) E ‵tau foki o masani ‵lei tatou ki faifaiga a tino kolā e ‵nofo i ‵tou koga talai. E ‵tau o fulifuli a ‵tou taimi talai ko te mea ke mafai o maua ne tatou a tino.—1 Koli. 9:19-23.

10. Ne a mea faigaluega e tuku mai ne te fakapotopotoga saukātoa a Ieova?

¹⁰ E manakogina ne te tagata faiika a mea faigaluega ‵tonu kae e ‵tau o iloa ne ia o fakaaoga. E penā foki tatou, e ‵tau o toka ‵lei ‵tou mea faigaluega mō te galuega talai. Kae e manakogina ke iloa ne tatou o fakaaoga a mea faigaluega konā. Ne tuku atu ne Iesu ki ana soko a fakatonuga ma‵nino ki te auala ke faiika ki tino. Ne fakailoa atu ne ia ki a latou a mea e ‵tau o ave ne latou, koga ke talai i ei, mo olotou pati e ‵tau o fai. (Mata. 10:5-7; Luka 10:1-11) I aso nei, e tuku mai ne te fakapotopotoga saukātoa a Ieova se Pusa o Mea Faigaluega mō Fai Akoakoga, e aofia ei a mea faigaluega ma‵goi. * Kae e akoakogina tatou ke iloa o fakaaoga a mea faigaluega konā. E fesoasoani mai te akoakoga tenā ke maua ne tatou te loto talitonu mo te atamai ke apo i te faiga o te ‵tou galuega.—2 Timo. 2:15.

11. Kaia e ‵tau i ei o loto ma‵losi a tino faiika ki tino?

¹¹ A tino faipisinisi faiika e ‵tau o loto ma‵losi. E fe‵paki latou i nisi taimi mo fakalavelave ‵tupu fakafuasei i te tai. E masani o faiika po i taimi kolā e mafai o fakapoi mai i ei se kaumatagi. E penā foki a tino faiika ki tino, e ‵tau foki o loto ma‵losi latou. Kafai ko kamata tatou o talai kae fai atu ki nisi tino i a tatou ne Molimau a Ieova, e mafai o fe‵paki tatou mo “kaumatagi” fakatusa, pelā mo ‵tekemaiga i kāiga, fakatauemuga mai taugasoa, io me e mafai o se fia faka‵logo mai a nisi tino ki te ‵tou fekau. Kae e se ‵poi tatou i te feitu tenei. Ne fakailoa mai ne Iesu me ka uga atu ne ia ana soko ke talai atu ki tino kolā ka ‵teke atu ki a latou.—Mata. 10:16.

12. E ‵tusa mo pati i te Iosua 1:7-9, ne a mea e fesoasoani mai ke ati aka ne tatou te loto malosi?

¹² E mafai pefea o ati aka ne koe te loto malosi? Muamua la, ke loto talitonu me ka takitaki faeloa ne Iesu a te galuega tenei mai te lagi. (Ioa. 16:33; Faka. 14:14-16) E se gata i ei, fakamalosi aka tou fakatuanaki ki te tautoga a Ieova me ka tausi mai a ia ki a koe. (Mata. 6:32-34) Kafai e malosi ‵ki tou fakatuanaki, ka loto malosi foki koe. Ne fakaasi mai ne Petelu mo ana taugasoa te lasi o te lotou fakatuanaki i te taimi ne tiakina ei ne latou a olotou pisinisi faiika ke tau‵tali atu i a Iesu. E penā foki koe, e fakaasi atu ne koe te lasi o tou fakatuanaki, māfai ko fakailoa atu ne koe ki ou taugasoa mo kāiga me ko kamata koe o suke‵suke mo Molimau a Ieova ki te Tusi Tapu kae kau ki  olotou fakatasiga! E mautinoa eiloa me ko oti ne fai ne koe a ‵fuliga tāua ki au amioga mo au faifaiga, ko te mea ke ola koe e ‵tusa mo tulaga amio‵tonu o Ieova. E manakogina eiloa te fakatuanaki mo te loto malosi ke fai penā. Kafai e tumau koe i te atiakaga o te loto malosi, e mafai loa o loto talitonu koe me i a “Ieova tou Atua e fakatasi faeloa mo koe i so se koga e fano koe i ei.”—Faitau te Iosua 1:7-9.

13. E mafai pefea o fesoasoani atu a te mafaufau ‵loto mo te ‵talo ke ati aka ne koe te loto malosi?

¹³ Se a te suā auala e mafai o ati aka ne koe te loto malosi? ‵Talo ke maua te loto malosi mo te loto toa. (Galu. 4:29, 31) Ka tali mai ne Ieova au ‵talo kae ka se tuku tiaki ne ia koe. Ka toka faeloa a ia o fesoasoani atu ki a koe. E se gata i ei, e mafai o mafaufau ‵loto koe ki te auala ne faka‵sao ne Ieova a nisi tino i aso ko ‵teka. Mafaufau foki la ki te auala ne fesoasoani atu a ia ke manumalo koe i fakalavelave faiga‵ta kae tuku atu ne ia te malosi ke fai a ‵fuliga i tou olaga. E seai se fakalotolotolua, me i te Tino telā ne ‵taki ne ia ana tino i loto i te Tai Kula e mafai o fesoasoani atu ki a koe ke fai mo soko o Keliso. (Eso. 14:13) Tela la, ke fakatumau te vaegā loto talitonu e pelā mo te faisalamo telā ne fai mai: “A Ieova e kau i toku feitu; ka se mataku eiloa au. Ne a mea e mafai ne tino o fai mai ki a au?”—Sala. 118:6.

14. Ne a mea e tauloto ne koe mai tala o Masae mo Tomoyo?

¹⁴ A te suā auala ke ati aka te loto malosi, ko te tauloto ki te auala ne fesoasoani atu a Ieova ki tino kolā e mata ‵mā, kae ne tauloto ke maua ne latou te loto toa. Mafaufau ki te tala o te tuagane e igoa ki a Masae. Ne mā a ia kae mafaufau me e se mafai o kau a ia ki te galuega talai. Ne mafaufau tou fafine me i te faipati ki tino e se masani mo ia e faigata ‵ki, e pelā loa me taumafai a ia o kake ki luga i ‵pui ma‵luga ‵ki, kae ne mafaufau a ia me ka se mafai lele o fai ne ia te mea tenā. Tela la, ne taumafai malosi tou fafine o faka‵poko tena alofa ki te Atua mo ana tuakoi. Ne mafaufau faka‵lei a ia ki te tāua o te taimi ko ola i ei tatou, kae ne ‵talo atu a ia mō se fesoasoani ke fakamalosi aka tena manakoga ke talai. Ne manumalo a ia i te mataku kae ne tavini foki a ia e pelā me se paenia tumau. Ao, e mafai o fesoasoani atu a Ieova ki tino talai ‵fou ke “loto ma‵losi.” Mafaufau la ki te tala o te tuagane e igoa ki a Tomoyo. I te taimi ne kamata o talai atu a ia mai fale ki fale, ne pakalaga atu te tino i te fale muamua ki a ia: “Au se fia faipati ki Molimau a Ieova!” kae ne ‵pono ‵kini mai ne ia te mataloa. Ne loto malosi a Tomoyo o fai atu ki tena ‵pea: “Lagona ne koe? Au seki kamata o faipati, kae ko iloa ne ia i a au se Molimau a Ieova. Au e fiafia ‵ki!” Nei la, ko tavini atu a Tomoyo e pelā me se paenia tumau.

15. Se a te loto pulea, kae kaia e tāua i ei ki Kelisiano?

¹⁵ A tino faiika manuia e loto pulea. Ne masani o fakamatala mai a te loto pulea e pelā me ko “te atamai ke fai ne koe a mea kolā e ‵tau o fai.” E ‵tau o maua ne tino faipisinisi faiika a te loto pulea ke ala vave latou, kae taumafai o fakaoti faka‵lei olotou galuega, kae ke kufaki faitalia te ma‵sei o tau o aso. E manakogina foki ne tatou a te loto pulea, māfai e kufaki kae fakaoti faka‵lei ne tatou a te ‵tou galuega.—Mata. 10:22.

16. E mafai pefea o ati aka ne tatou a te loto pulea?

¹⁶ A tatou ne seki fa‵nau mai mo te loto pulea. E pelā mo te masani, e fia‵fia tatou o fai a mea i te ‵toe auala faigofie. Kae i nisi taimi, e se faigofie foki ke fai ne tatou a toe mea tāua. E manakogina i ei a te loto pulea. Tela la, e ma‵nako tatou ki se fesoasoani ke akoako a tatou eiloa ke fai a mea kolā e faigata ke fai ne tatou. Kae e tuku mai eiloa ne Ieova a te fesoasoani tenā e auala i tena agaga tapu.—Kala. 5:22, 23.

17. E pelā mo te mea e fakamau i te 1 Kolinito 9:25-27, ne a pati a te apositolo ko Paulo e uiga ki mea ne ‵tau o fai ne ia ke ati aka te loto pulea?

 ¹⁷ Ne loto pulea a te apositolo ko Paulo. Kae ne fai ‵tonu mai a ia me ne ‵tau o “‵kini” ne ia tena foitino ko te mea ke fai ne ia a te mea tonu. (Faitau te 1 Kolinito 9:25-27.) Ne fakamalosi ne ia a nisi tino ke maua te loto pulea kae ke fai a mea katoa “ke fanofano ‵lei mai te faiga o fakatokaga ‵lei.” (1 Koli. 14:40) E ‵tau o ati aka ne tatou a te loto pulea ke fakatumau se polokalame ‵lei faka-te-agaga, telā e aofia i ei a te ‵kau atu faeloa ki te galuega faiika fakatusa tenei.—Galu. 2:46.

18. Ne a mea e ‵tau o fai ne tatou ke kilo mai a Ieova me e manuia ‵tou galuega?

¹⁸ A te tagata faiika e mafai fua o manuia māfai e uke ana ika e maua. Kae e ‵kese eiloa te galuega talai. A te manuia o te ‵tou galuega talai e se fakavae ki te uke o tino e fesoasoani tatou ki ei ke fai mo Molimau a Ieova. (Luka 8:11-15) Kafai e tumau tatou i te kufaki i te talaiatuga o te tala ‵lei kae akoako a nisi tino, ka kilo mai eiloa a Ieova ki a tatou e pelā me ne tino manuia. Kaia? Me ne faka‵logo tatou ki a ia mo tena Tama.—Male. 13:10; Galu. 5:28, 29.

19-20. Se a te pogai tāua e ‵tau ei mo tatou o talai atu i te taimi nei?

¹⁹ I nisi fenua, e talia fua a tino faiika ke mafai o faiika i nāi masina. I vaegā fenua penā, e mafaufau se tagata faiika me e manakogina fakavave ke faiika koi tuai o oko ki taimi kolā ko se uke i ei a ika. E pelā me ne tino faiika ki tino, e isi se suā pogai e fakamalosi mai ei ke talai: Ko pili ‵ki mai te gataga o te olaga tenei! Ko toetoe foki te taimi koi ‵toe ke fai te galuega faka‵sao ola tenei. Sa fakatalave io me faka‵tali ki te taimi ko ‵lei katoatoa i ei a mea katoa, ko fai ei ne koe te galuega tāua tenei.—Fai. 11:4.

²⁰ Ke na gasuesue nei o fakamalosi aka a tou manakoga, faka‵poko a tou iloa e uiga ki te Tusi Tapu, kae ati aka te loto malosi mo te loto pulea. Kau atu ki te valu miliona tupu o tino faiika ki tino, kae ka maua ne koe a te fiafia mai i a Ieova. (Nee. 8:10) Ke na fakaiku aka ke kau katoatoa atu koe ki te galuega tenei ke oko ki te taimi ko fai mai ei a Ieova me ko gata. Ka faipati loa a te suā mataupu ki auala e tolu e mafai ei ne tatou o fakamalosi aka a ‵tou fakaikuga ke tumau i te talai atu a te Malo e pelā me ne tino faiika ki tino.