A te fuaiupu gali tenei e faitau penei: “Kafai e lavea ne koe a faifaiga fakasaua e fai ki tino ma‵tiva ko fakaseaoga i ei a te fai mea tonu mo te amiotonu i tou kogā fenua, ke mo a ma poi koe i te mea tenā. Me i te ofisa maluga tenā ko kilokilogina ne se tino telā e maluga atu i a ia, kae e isi eiloa ne nisi tino kolā e ma‵luga atu i a latou.”—Fai. 5:8.

Mai te kilokiloga a te tagata, e fetaui ‵tonu eiloa te fuaiupu tenei mo tāgata kolā e isi ne olotou tulaga pule i te malo. Kae kafai e mafaufau faka‵lei ki ei, e fakaasi mai foki i ei se munatonu e uiga ki a Ieova, telā e fai pelā me se fakamafanafanaga kae se fakatalitonuga foki ki a tatou.

Failauga 5:8 e fakasino atu ki se pule telā e fakasaua atu ki tino ma‵tiva kae e se fai ne ia te fakamasinoga tonu ki a latou. E ‵tau o masaua ne te tino pule tenā me e isi se tino e kilokilo mai ki a ia telā e maluga io me maluga atu tena pulega i te malo i lō ia. E tonu, e isi ne tino kolā e ‵nofo i tulaga ma‵luga ‵ki. Se mea fakafanoanoa me i malo o tāgata, e fai ne takitaki pule penei a mea sē ‵tonu, kae e logo‵mae a tino i vaegā faifaiga penei.

Kae faitalia me foliga mai me ko seai se fakamoemoega ki mea konei, se fakamafanafanaga eiloa ke iloa atu me i a Ieova e ‘kilokilo mai ki ofisa ma‵luga’ i malo o tāgata. E mafai o fakamolemole tatou mō se fesoasoani ki te Atua kae ‵pei atu ‵tou amoga ki a ia. (Sala. 55:22; Fili. 4:6, 7) E iloa ne tatou me “i mata o Ieova e kilokilo faeloa ki te lalolagi kātoa ke fakaasi atu tena malosi ona ko latou kolā e tuku katoatoa atu olotou loto ki a ia.”—2 Nofo. 16:9.

Tela la, e fakamasaua mai ne te Failauga 5:8 ki a tatou a te tulaga tonu o tino i malo; e isi faeloa se tino telā e sili atu tena pule. E sili atu i ei, e fesoasoani mai te fuaiupu tenei ke mafaufau ‵loto tatou ki te manatu tonu me i a Ieova ko te ‵toe tino maluga eiloa, ao, ko te ‵Toe Tino Pule Maluga. Ko pule mai nei a ia e auala i tena Tama, ko Iesu Keliso, te Tupu o te Malo. A te Atua Malosi Katoatoa, telā e kilokilo ki tino katoa, e fai mea tonu kae fai mea ‵lei, kae e penā foki loa mo tena Tama.