1-2. Se a te sokoga o te Failauga 11:6 ki te galuega ko te talaiatuga o te tala ‵lei o te Malo?

I NISI fenua, e tokouke a tino e ma‵nako o tauloto ki mea e uke māfai e lagona ne latou te tala ‵lei. E tenā eiloa te mea e faka‵tali mai latou ki ei! I nisi fenua aka, a tino e se na loa ko fia‵fia ki te Atua io me ko te Tusi Tapu. E ‵saga atu pefea te tokoukega o tino ki te tala ‵lei i te koga e nofo koe i ei? Faitalia me ne a olotou kilokiloga, e manako eiloa a Ieova ke tumau tatou i te talai atu ke oko ki te taimi e fai mai ei a ia me ko gata te galuega.

² Kafai ko oko ki te taimi tonu o Ieova, ka fakagata eiloa ne ia te galuega talai, kae ka “oko mai ei te gataga.” (Mata. 24:14, 36) I te taimi nei, e mafai pefea o faka‵logo tatou ki pati ke “mo a eiloa ma mānava tou lima”? *—Faitau te Failauga 11:6.

3. Ne a mea ka sau‵tala tatou ki ei i te mataupu tenei?

³ Ne sau‵tala tatou i te mataupu mai mua ki mea e fa e ‵tau o fai ko te mea ke apo tatou i te fai mo “tino faiika ki tino.” (Mata. 4:19) I te mataupu tenei, ka sau‵tala tatou ki auala e tolu e mafai o fakamalosi aka ei ‵tou fakaikuga ke talai, faitalia me ne a mea faiga‵ta e fe‵paki mo tatou. Ka tauloto eiloa tatou ki te tāua ke (1) fakamuamua te galuega talai i ‵tou olaga, (2) kufaki, kae ko te (3) ke fakatumau te ma‵losi o ‵tou fakatuanaki.

4. Kaia e ‵tau ei o fakamuamua ne tatou te galuega telā ne tuku mai ne Ieova ke fai ne tatou?

⁴ Ne ‵valo mai ne Iesu a mea ka ‵tupu mo fakailoga kolā ka fakamailoga i ei a aso fakaoti, kae kolā e mafai o faka‵tuka i ei  ana soko mai te faiga o te galuega talai. Ne fakamalosi ne ia ana soko ke “tumau i te matapula‵pula.” (Mata. 24:42) I aso nei, e fe‵paki tatou mo faka‵tukaga kolā e tai ‵pau mo mea kolā ne taofi i ei a tino i aso o Noa mai te ‵saga tonu atu ki te fakailoaga ne folafola atu ne Noa. (Mata. 24:37-39; 2 Pe. 2:5) Tela la, e ma‵nako tatou o fakamuamua te galuega talai telā ne tuku mai ne Ieova ke fai ne tatou.

5. E fakamatala mai pefea i te Galuega 1:6-8 a te salalau atu o te galuega talai?

⁵ I aso nei, e manakogina ‵ki ke fakamuamua ne tatou te talaiga o te tala ‵lei o te Malo. Ne ‵valo mai a Iesu me i te galuega tenei ka tumau i te salalau atu ki koga katoa o te lalolagi mai tua o tena mate. (Ioa. 14:12) Mai tua o te mate o Iesu, nisi o ana soko ne toe ‵foki o faiika. Mai tua o tena toetuga, ne fai ne Iesu se vavega kae fesoasoani atu ki ana nisi soko ke maua ne latou a ika e uke. Ne fakaaoga ne ia te taimi tenā ke fakamaoni atu me i te lotou galuega ke fai mo tino faiika ki tino, e tāua fakafia atu i lō so se isi galuega. (Ioa. 21:15-17) Mai mua malie o fanaka a Iesu ki te lagi, ne fai atu a ia ki ana soko me i te galuega talai telā ne kamata ne ia, ka salalau atu ki toe koga ‵mao mai tua atu o Isalaelu. (Faitau te Galuega 1:6-8.) I tausaga fakamuli ifo, ne tuku atu ne Iesu se fakaasiga ki te apositolo ko Ioane ke fakaasi atu ki a ia a mea ka ‵tupu i te “aso o te Aliki.” * I tafa o nisi mea aka, ne lavea ne Ioane te mea fakaofoofogia tenei: Mai lalo i te takitakiga a se agelu, ne talai atu eiloa a te “tala ‵lei se-gata-mai” ki “atufenua mo matakāiga mo ‵gana mo tino katoa.” (Faka. 1:10; 14:6) E manino ‵lei, me ko te loto eiloa o Ieova ke aofia tatou i te galuega talai telā e fai i te lalolagi kātoa i aso nei, ke oko ki te taimi ko gata atu i ei.

6. E mafai pefea o fakamuamua ne tatou a te galuega talai?

⁶ E mafai eiloa o fakamuamua ne tatou te galuega talai, māfai e mafaufau ‵loto tatou ki  te lasi o te fesoasoani o Ieova ki a tatou. E pelā mo te tukumaiga ne ia o mea‵kai faka-te-agaga e uke e auala i tusi ‵lomi mo tusi kolā e maua ne tatou i te itaneti, polokalame fakalogo‵logo mo ata vitio, mo leo fakasalalau. Mafaufau aka la: I te ‵tou fakatuatusi i te itaneti, e maua ne tatou a fakamatalaga i ‵gana e silia atu mo te 1,000! (Mata. 24:45-47) I se lalolagi e mavae‵vae i mea fakapolitiki, mea fakalotu, mo fakalavelave i mea tau tupe, e silia atu mo te valu miliona o tavini a te Atua e ‵kau fakatasi e pelā me se kautaina i te lalolagi kātoa. E pelā me se fakaakoakoga, i te Aso Lima, Apelila po 19, 2019, ne ‵kau fakatasi a Molimau i te lalolagi kātoa ke sau‵tala ki te tusi siki mo te aso. I te afiafi tenā, ne maopoopo eiloa se vaitino e toko 20,919,041 ke fakamanatu a te Fakamanatuga o te mate o Iesu. E fakamalosigina eiloa tatou ke fakamuamua te galuega tenei o te Malo, māfai e mafaufau ‵loto ki te ‵tou tauliaga ke ‵kilo atu ki te vaega o te vavega tenei, kae ke aofia foki i ei i aso nei.

7. E fesoasoani mai pefea te fakaakoakoga a Iesu ke fakamuamua ne tatou te galuega talai?

⁷ A te suā auala e mafai o fakamuamua ne tatou te galuega talai, ko te tau‵tali i te fakaakoakoga a Iesu. Ne seki talia ne ia so se mea ke fakalavelave ei a ia mai te molimau atu e uiga ki te munatonu. (Ioa. 18:37) Ne seki tofotofogina a ia i te taimi ne ofo atu ne Satani ki a ia a “malo katoa o te lalolagi mo olotou ‵malu”, e pelā foki mo te taimi ne ma‵nako ei a nisi tino ke fai a ia mo tupu. (Mata. 4:8, 9; Ioa. 6:15) Ne seki fakamalosigina a ia ne te manakoga fia maumea i te feitu faka-te-foitino; io me mataku ona ko te uke o ‵tekemaiga. (Luka 9:58; Ioa. 8:59) Kafai e fe‵paki tatou mo tofotofoga o te ‵tou fakatuanaki, e mafai eiloa o ‵saga tonu atu tatou māfai e masaua ne tatou a pati fakatonutonu a te apositolo ko Paulo. Ne fakamalosi ne ia a Kelisiano ke tau‵tali i te fakaakoakoga a Iesu, ko te mea ke mo a ma “fi‵ta kae ‵fiu” a latou!—Epe. 12:3.

8. Se a te kufaki, kae kaia e tāua malosi ei i te taimi nei?

⁸ A tino kufaki e fakatali‵tali e aunoa mo te manava‵se ki te taimi e ma‵fuli i ei a fakanofonofoga. Faitalia me e olioli tatou ki te gataga o te fakanofonofoga masei tenei io me ko te fakataunuga o se manakoga telā ko leva ne ‵nofo fakatalitali tatou ki ei, e manakogina ke kufaki tatou. Ne olioli eiloa te pelofeta ko Sapakuka ki te gataga o tulaga fakasaua i Iuta. (Sapa. 1:2) Ne fakamoe‵moe a soko o Iesu me ka “sae fakavave” mai te Malo kae fakasaoloto latou mai pulega ‵teke a te kau Loma. (Luka 19:11) E olioli eiloa tatou ki te aso ka fakaseai atu ei ne te Malo o te Atua a mea ma‵sei katoa, kae aumai ne ia te lalolagi fou telā ka faka‵fonu ki tino amio‵tonu. (2 Pe. 3:13) Kae e ‵tau mo tatou o kufaki kae faka‵tali ki te taimi tonu o Ieova. Ke onoono nei tatou ki nisi auala e akoako ne Ieova tatou ke kufaki.

9. Ne a fakaakoakoga e fakaasi mai i ei a te kufaki o Ieova?

⁹ Ne tuku mai ne Ieova te fakaakoakoga ‵lei o te kufaki. Ne tuku atu ne ia ki a Noa a taimi e lava kae ‵toe ke faite te vaka kae ke tavini atu e pelā me “se tino talai o te amiotonu.” (2 Pe. 2:5; 1 Pe. 3:20) Ne fakalogologo atu a Ieova i te taimi ne fakafesili faeloa ne Apelaamo a Tena fakaikuga ke fakaseai atu a tino ma‵sei i fakai o Sotoma mo Komolo. (Kene. 18:20-33) I se fia senitenali, ne fakaasi atu ne Ieova te lasi o tena kufaki ki te fenua sē fakamaoni o Isalaelu. (Nee. 9:30, 31) I aso nei, e fakamaoni ne tatou te kufaki o Ieova, me koi fakaavanoa mai ne ia se taimi ki tino kolā e manako a ia ke fai mo ana taugasoa “ke sala‵mo.” (2 Pe. 3:9; Ioa. 6:44; 1 Timo. 2:3, 4) E tuku mai ne te fakaakoakoga a Ieova se pogai ‵lei ke kufaki tatou i te taimi e talai kae akoako atu ei tatou. E akoako foki ne ia tatou ke  kufaki e auala i se tala fakatusa i loto i tena Muna.

10. E pelā mo te mea ne fakamau i te Iakopo 5:7, 8, se a te akoakoga e tauloto ne tatou mai te tino ‵toki lakau?

¹⁰ Faitau te Iakopo 5:7, 8. A te fakaakoakoga o te tino ‵toki lakau e tuku mai i ei se akoakoga ke kufaki tatou. E tonu, nisi lakau e ola vave. Kae ko te ukega o lakau kaina, e tai leva loa te taimi ke ‵fua mai. I Isalaelu, e nofo ki se ono masina te leva o te taimi kae fatoa ‵fua mai a lakau kaina. E ‵toki ne te tino ‵toki lakau ana fuaga i te vaiua muamua loa o te tau e ta‵tela i ei a lau o lakau, kae tau a fuaga saito mai tua o te ‵toe vaiua o te tau mafanafana. (Male. 4:28) Tela la, ke ‵poto eiloa tatou o fakaakoako ki te kufaki o te tino ‵toki lakau. Kae e se faigofie a te mea tenei.

11. Ka fesoasoani mai pefea te kufaki ki te ‵tou galuega talai?

¹¹ E pelā mo te masani, e ma‵nako a tino sē ‵lei katoatoa ke iloa a ikuga o olotou taumafaiga. Kae kafai e ma‵nako tatou ke ola ‵lei ‵tou fatoaga kae ke ‵fua mai, e ‵tau o ‵saga faeloa tatou ki ei—te keliga, ‵tokiga, te velevelega, mo te fakasiusiuga. I se auala tai ‵pau, e manakogina foki a taumafaiga tumau i te galuega ko te faiga o soko. E manakogina a taimi e uke ke tapale kea‵tea ne tatou a te fakailoga tino i a latou kolā e akoako ne tatou. Ka fesoasoani mai te ‵tou kufaki ke ‵kalo kea‵tea tatou mai te loto vāivāi māfai e fe‵paki tatou mo mea faiga‵ta. Kafai e ‵saga tonu mai a nisi tino, e ‵tau eiloa mo tatou o tumau i te kufaki. E se faimalo ne tatou se akoga faka-te-Tusi Tapu ke maua ne ia te fakatuanaki. I nisi taimi, ne faigata o malamalama a soko o Iesu i te uiga o mea kolā ne akoako ne ia. (Ioa. 14:9) Ke masaua me i te ‵tou mea fua e fai ko te ‵toki kae fakasiusiu, kae ko te Atua eiloa e fakaola ne ia.—1 Koli. 3:6.

12. E mafai pefea o fakagalue ne tatou te kufaki māfai e talai atu ki kāiga sē tali‵tonu?

¹² Tasi o feitu e tai faigata ki a tatou, ko te kufaki māfai e talai atu ki ‵tou kāiga sē  tali‵tonu. E mafai o fesoasoani mai a te fakatakitakiga i te Failauga 3:1, 7. E fai mai: “E isi . . . se taimi ke nofo ‵mu mo te taimi ke faipati.” A ‵tou amioga ‵lei e mafai o fai pelā me se molimau sē lavea, kae e toka faeloa tatou ki so se avanoaga ke fai‵pati atu e uiga ki te munatonu. (1 Pe. 3:1, 2) E kufaki tatou i tino katoa—e aofia i ei a tino i ‵tou kāiga—māfai e talai kae akoako atu tatou mo te loto finafinau.

13-14. Ne a nisi fakaakoakoga o te kufaki e mafai o fakaakoako tatou ki ei?

¹³ E mafai o tauloto tatou ke kufaki mai fakaakoakoga a tavini fakamaoni i te Tusi Tapu e penā foki mo aso nei. Ne olioli eiloa a Sapakuka ke na oko mai te gataga ki tino amio ma‵sei, kae ne folafola atu a ia mo te loto talitonu, penei: “Ka tu faeloa au i toku tulaga i te koga leoleo.” (Sapa. 2:1) Ne fakaasi mai ne te apositolo ko Paulo mo tena loto kātoa a tena manakoga tonu ke “fakaoti” tena galuega talai. Kae ne kufaki faeloa a ia “ke tuku atu se molimau maea e uiga ki te tala ‵lei.”—Galu. 20:24.

¹⁴ Mafaufau ki te fakaakoakoga o se tauavaga kolā ne fatoa oti mai i Kiliata kae ne ‵tofi ke ga‵lue i se fenua telā e se tokouke a Molimau i ei, kae ko te tokoukega o tino i ei e se ne Kelisiano. Ne nāi tino fua ne ma‵nako o suke‵suke ki te Tusi Tapu. Kae, ko nisi taina kolā ne aofia tasi latou i Kiliata ne lafo mai ne latou a lipoti fakafiafia loto ki te uke o akoga faka-te-Tusi Tapu e fai ne latou. Faitalia te sē tokouke o tino fia‵fia i te lā koga talai, ne kufaki eiloa te tauavaga tenei kae tumau i te talai atu. Mai tua o se valu tausaga ne talai ei lāua i se koga talai telā e se fia‵fia malosi a tino, kae ne fia‵fia lāua i te fakaotiga ke ‵kilo atu ki se tokotasi o lā akoga faka-te-Tusi Tapu ne papatiso. Se a te akoakoga e tauloto ne tatou mai fakaakoakoga i aso mua mo aso nei? A tino fakamaoni konei ne seki ‵fiu vave io me mānava olotou lima, kae ne fakamanuia ne Ieova te lotou lotou kufaki. Tela la, ke na “fakaakoako [tatou] ki tino kolā ne maua ne latou a folafolaga e auala i te fakatuanaki mo te kufaki.”—Epe. 6:10-12.

15. Se a te auala e tasi e fakamalosi aka ei ne te fakatuanaki a te ‵tou fakaikuga ke talai?

¹⁵ E fakatuanaki tatou ki te fekau telā e talai ne tatou, tela la, e ma‵nako malosi tatou o fakailoa atu ki tino e tokouke. E tali‵tonu tatou ki folafolaga a te Atua i tena Muna. (Sala. 119:42; Isa. 40:8) Ko oti ne fakamaoni ne tatou a te fakataunuga o valoaga i te Tusi Tapu i ‵tou aso nei. Ko oti ne molimau ne tatou a te auala ne ‵fuli i ei a olaga o tino ki te ‵lei i te taimi ne fakagalue ne latou a pati fakatonutonu mai te Tusi Tapu. E fai ne fakamaoniga konei ke na sili atu ‵tou tali‵tonu me i te tala ‵lei o te Malo ko te fekau telā e ‵tau o lagona ne tino katoa.

16. E ‵tusa mo te Salamo 46:1-3, e fakamalosi aka pefea ne te fakatuanaki ki a Ieova mo Iesu a te ‵tou fakaikuga ke talai?

¹⁶ E fakatuanaki foki tatou ki a Ieova, te Tino telā ne aumai ne ia te fekau telā e talai ne tatou, e pelā foki mo Iesu, telā ne fakasopo ne ia ke fai mo Tupu o te Malo. (Ioa. 14:1) Faitalia me ne a mea e ‵tupu ki a tatou, ka fai faeloa a Ieova e pelā me ko te ‵tou ‵lafiga mo te ‵tou malosi. (Faitau te Salamo 46:1-3.) E se gata i ei, e tali‵tonu tatou me e takitaki ne Iesu mai te lagi a te faiga o te galuega talai, mai te fakaaoga ne ia te malosi mo te tulaga pule telā ne tuku atu ne Ieova ki a ia.—Mata. 28:18-20.

17. Taku mai se fakaakoakoga ki te pogai e ‵tau ei mo tatou o tumau i te talai.

¹⁷ A te fakatuanaki e fakamalosi ne ia ‵tou loto tali‵tonu me ka fakamanuia ne Ieova a ‵tou taumafaiga, i nisi taimi, i auala kolā e seki fakamoe‵moe tatou ki ei. (Fai. 11:6) E pelā me se fakaakoakoga, i aso katoa, e lau i  afe o tino e lavea ne latou a ‵tou taipola mo kā tusi. E mata, e magoi te vaegā talaiga tenei? Ao! I te lōmiga o te ‵Tou Galuega Talai i a Novema 2014, ne lipoti mai me e isi se talavou akoga i te iunivesiti ne manako o tusi sena tala e uiga ki Molimau a Ieova. Ne seki mafai o maua ne ia se Fale Tapuaki, kae ne maua ne ia a ‵tou kā tusi i te līsi o te akoga, kae ne maua ne ia a fakamatalaga mō fai tena tala. Fakamuli loa, ne papatiso a ia e e pelā me se Molimau a Ieova kae ko tavini atu nei e pelā me se paenia tumau. E fakamalosi mai a vaegā tala penā ke tumau tatou i te talai atu, me e fakaasi mai i ei me koi isi loa ne tino koi ‵tau o maua kae lagona ne latou a te fekau o te Malo.

18. Kaia e mautinoa ei i a tatou me i te talaiatuga o te Malo ka palele atu i te taimi e loto ki ei a Ieova?

¹⁸ E mautinoa i a tatou me ka gata atu eiloa te galuega talai o te Malo i te taimi tonu. Mafaufau ki mea ne ‵tupu i aso o Noa. Ne fakamaoni mai ne Ieova i a ia se tino telā e fakamaoni ki te taimi. I se 120 tausaga mai mua, ne fakaiku aka ne Ieova te taimi ka poko i ei a te Lolo. I se fia sefulu tausaga mai tua ifo, ne fakatonu atu a Ieova ki a Noa ke faite te vaka. Kāti i se 40 io me se 50 tausaga mai mua o poko te Lolo, ne galue malosi faeloa a Noa. E tiga loa ne seki fia ‵saga atu a tino ki a ia, ne tumau faeloa a ia i te talai atu a te fekau o te fakamasinoga ke oko loa ki te taimi tonu ne fakatonu atu ei a Ieova ke faulu a manu ki loto i te vaka. I tena taimi tonu, ne “‵pono eiloa ne Ieova a te mataloa.”—Kene. 6:3; 7:1, 2, 16.

19. Ne a mea e mafai o olioli tatou ki ei māfai e se mā‵nava ‵tou lima?

¹⁹ Ko pili o fakagata ne Ieova a te galuega talai o te Malo; ka “‵pono ei ne Ieova a te mataloa” o te olaga masei tenei a Satani kae aumai ne ia a te lalolagi fou kae amiotonu. Ke oko atu ki te taimi tenā, ke na fakaakoako tatou ki a Noa, Sapakuka, mo nisi tino aka kolā ne seki mā‵nava olotou lima. Ke na fakamuamua te faiga o te galuega talai, ke kufaki, kae ke fakatumau te ma‵losi o ‵tou fakatuanaki ki a Ieova mo ana folafolaga.