Kai faitau faka‵lei eiloa koe ki lōmiga ‵fou o Te Faleleoleo Maluga? Onoono aka, me e mafai o tali mai ne koe a fesili konei:

Se a te fakamaoniga i te Tusi Tapu me i te Atua e loto alofa mai ki a tatou?

I te taimi ne ‵nofo pologa ei a te kau Isalaelu mua i Aikupito, ne lavea ‵lei ne te Atua a te lotou puapuaga mo te lotou logo‵mae. (Eso. 3:7; Isa. 63:9) A tatou ne faite ki te fakatusa o te Atua, kae e mafai o maua ne tatou te uiga ko te loto alofa. E fakaasi mai eiloa ne ia tena loto alofa faitalia eiloa me e mafau‵fau tatou me e se ‵tau o maua ne tatou a tena alofa. —wp18.3, itu. 8-9.

Ne fesoasoani atu pefea a akoakoga a Iesu ke manumalo a tino i te fakailoga tino?

E tokouke a tino Iutaia i aso o Iesu ne fakailoga tino. Ne faka‵mafa mai ne Keliso a te tāua ke maua te loto maulalo kae ne taku fakamasei ne ia a te loto fenua. Ne fakamalosi atu a ia ki ana soko ke kilo atu te suā tino ki te suā tino e pelā me ne taina.— w18.06, itu. 9-10.

Ne a mea e tauloto ne tatou mai te pogai ne seki talia ei ne te Atua ke ulu atu a Mose ki loto i te Fenua o te Folafolaga?

Ne maua ne Mose se fesokotakiga ‵pili mo Ieova. (Teu. 34:10) I te taimi ko pili o oti atu te 40 tausaga i te koga lavaki, ne mui‵mui a tino i te lua o taimi e uiga ki te sē lava o vai. Ne fai atu te Atua ki a Mose ke faipati atu ki te kaupapa. I lō te fai penā, ne ‵kini ne Mose te kaupapa. Ne mafai eiloa o kaitaua malosi a Ieova me ne seki fakalogo a Mose ki Ana fakatonuga io me ne seki faka‵malu ne Mose te Atua ona ko te vavega tenā. (Nume. 20:6-12) E tuku mai ne te mea tenei ne tupu se akoakoga mō tatou ke faka‵logo ki a Ieova kae faka‵malu a ia.— w18.07, itu. 13-14.

E mafai pefea o ‵se tatou māfai e fakamasino ne tatou a tino e auala i olotou foliga i tua?

E tolu a feitu kolā e mafai o fakamasino ne te tokoukega a tino i olotou foliga i tua: fenua io me ko telega, tulaga i mea tau tupe, mo tausaga. Se mea tāua ke taumafai ke maua ne tatou te kilokiloga sē fakailoga tino a te Atua māfai e ‵kilo atu tatou ki nisi tino! (Galu. 10:34, 35)—w18.08, itu. 8-12.

Ne a nisi auala e mafai o fesoasoani atu ei a Kelisiano ma‵tua ki nisi tino?

A te Kelisiano matua telā ko oti ne fakamafuli tena tōfiga koi tumau eiloa i te fakatāua ne te Atua kae koi uke eiloa a mea e mafai ne ia o fai ke fesoasoani atu ki nisi tino. E mafai o fesoasoani atu a ia ki avaga sē tali‵tonu, fesoasoani atu ki tino kolā ko vāi‵vai, fai a akoga faka-te-Tusi Tapu, kae fakalauefa atu tena galuega talai.—w18.09, itu. 8-11.

Ne a mea faigaluega e maua ne Kelisiano i olotou Pusa o Mea Faigaluega mo Fai Akoakoga?

E mafai o maua i ei a pepa ki te fakatuatusi mo ‵kamiga. Ko tamā pepa kolā ne fakatoka faka‵lei e penā foki mo te mekesini ko te Faleleoleo Maluga mo te Ala Mai! E aofia foki i te pusa o mea faigaluega a nāi polosiua, tusi e lua kolā e fai ki ei a akoga, mo vitio tāua e fa, e aofia i ei te vitio ko te Kaia e ‵Tau ei o Sukesuke ki te Tusi Tapu?—w18.10, itu. 16.

E mafai pefea ne se Kelisiano o “‵togi te munatonu,” e pelā mo te mea ne fakamalosi mai te Faataoto 23:23?

E se ‵togi ne tatou te munatonu ki tupe. Kae e manakogina ne tatou a taimi mo taumafaiga e uke ko te mea ke maua ne tatou te munatonu.— w18.11, itu. 4.

Se a te mea e mafai o tauloto ne tatou mai i te auala ne fakafesagai atu ei a Hosea ki tena avaga ko Komeli?

Ne mulilua fakafia a Komeli, kae ne fakamagalo eiloa ne Hosea tou fafine kae tumau i te avaga ki a ia. Kafai e aofia te avaga a se Kelisiano i faifaiga fakatauavaga sē ‵tau, a te avaga telā e fakamaoni e mafai o fakamagalo ne ia. Kafai e toe fakatasi lāua mo tena avaga telā ne agasala, ka fakaseai ei a te fakatokaga faka-te-Tusi Tapu e uiga ki te ‵talaga o te avaga.—w18.12, itu. 13.