1, 2. Ne a manatu kese‵kese o tino e uiga ki te palataiso?

SE TAIMI fakafanoanoa ‵ki eiloa. I te taimi ne tiakina ei ne tino kolā ne ‵kau ki te fono i Seoul, i Kolea, ne ‵fonu eiloa te koga tenā i Molimau. A te tokoukega o latou ne tā‵talo kae paka‵laga atu, “Fetaui tatou i te Palataiso!” Se a tau faka‵tau, se a te palataiso e fakauiga ki ei latou?

² E kese‵kese a manatu o tino e uiga ki te palataiso. E fai mai a nisi tino me i te palataiso se moemiti fua. Nisi tino e fai mai me i te palataiso se koga telā e maua i ei ne koe te fiafia mo te lotomalie. Kāti e mafaufau se tagata ka mate loa i te fiakai telā e sagasaga atu i se ‵kaiga e fai me i a ia ko nofo atu i te palataiso. Mai te kilo atu ki se koga maugā telā e ‵fonu i pulalakau, ka fai atu eiloa se fafine telā ne ola i se fia tausaga ko ‵teka, “Tapa, mafaga o palataiso!” Se a te uiga o te Palataiso ki a koe? E mata, e fakamoemoe koe ki ei?

3. Se a te tusi o te Tusi Tapu e fakaasi mai ei a mea e uiga ki te palataiso?

³ E faipati eiloa te Tusi Tapu ki te palataiso i aso mua mo te palataiso telā e fakatali‵tali ki ei i aso mai mua. E fakaasi mai eiloa i te tusi muamua o te Tusi Tapu a te Palataiso. E fai mai te Kenese 2:8: “E se  gata i ei, ne ‵toki ne Ieova te Atua se fatoaga i Etena [io me se palataiso o te fiafia, te lōmiga ko te Catholic Douay Version] i te feitu ki te saegala; kae ne tuku atu ne ia a te tagata telā ne faite ne ia.” E faipati eiloa a tusitusiga faka-Epelu ki ‘te fatoaga i Etena.’ A Etena e fakauiga loa ki te “Fiafia,” kae e tonu eiloa me i te fatoaga tenā ko oko loa i te gali. E uke a mea‵kai, se koga e gali ke ‵kilo atu ki ei, kae ko tino mo manu e fealofani.—Kene. 1:29-31.

4. Kaia e mafai ei o fakasino atu tatou ki te fatoaga o Etena e pelā me se palataiso?

⁴ A te pati pa·raʹdei·sos i te ‵gana Eleni ne ‵fuli ki te pati “fatoaga” i te ‵gana Epelu. Ne fakamatala mai ne M’Clintock mo Strong i te Cyclopaedia a mea e uiga ki te pa·raʹdei·sos: “Se malae lauefa kae lasi telā ko oti ne puipui faka‵lei mai so se mea telā e fakamasei atu ki ei, fakatasi mo lakau olaola ‵lei kae ‵fua malosi mai, mo vaitafe mo koga moukua i tafatafa kolā e kai‵kai i ei a anitilope mo mamoe—tenei eiloa te ata e fakaataata i te mafaufau o se tino Eleni faimalaga.”—Fakatusa ki te Kenese 2:15, 16.

5, 6. Ne galo atu pefea a te Palataiso, kae ne a fesili e mafai o ‵sae aka?

⁵ Ne tuku ne te Atua a Atamu mo Eva ki se vaegā palataiso penā, kae ne seki tumau lāua i ei. Kaia? Ne seki faka‵logo lāua ki te Atua. Tela la, ne galo atu i a lāua mo lā tama‵liki a te Palataiso. (Kene. 3:23, 24) E tiga eiloa ko seai ne tino e ‵nofo i te fatoaga, e mautinoa eiloa me ne tumau eiloa te fatoaga tenā ke oko atu eiloa ki te Lolo i aso o Noa.

⁶ E mafai o mafau‵fau a nisi tino penei, ‘E mata, ka toe mafai o ola so se tagata, fafine io me se tamaliki i se Palataiso i te lalolagi?’ Se a te mea e fakaasi mai i fakamatalaga konā? Kafai e fakamoemoe koe ke ola fakatasi mo ou tino pele i te Palataiso, e mata, e isi se fakavae tonu mō tou fakamoemoega tenā? E mata, e mafai o fakamatala mai ne koe me ka isi eiloa se Palataiso i aso mai mua?

7, 8. (a) Se a te tautoga ne fai ne te Atua ki a Apelaamo? (e) Se a te folafolaga a te Atua ne mafai o mafaufau ki ei a Apelaamo?

⁷ A te koga mautinoa ke maua i ei a tali, ko te tusi telā ne aumai ne te Tino telā ne māfua mai i a ia te Palataiso. Mafaufau la ki pati a te Atua ki tena taugasoa ko Apelaamo. Ne fai atu te Atua me ka fakatokouke ne ia te fanau a Apelaamo e pelā “mo one i te tafatai.” Kae ne fai ne Ieova a te folafolaga tāua tenei: “E auala i tau tama ka maua ne atufenua katoa o te lalolagi se fakamanuiaga ona ko koe ne fakalogo ki toku leo.” (Kene. 22:17, 18) Ne fakafokifoki atu ne te Atua a te tautoga tenā ki te tama mo te mokopuna o Apelaamo.—Faitau te Kenese 26:4; 28:14.

⁸ E seai se fakaasiga i te Tusi Tapu me ne mafaufau a Apelaamo me ka maua ne tino se taui i se palataiso i te lagi. Tela la, i te taimi ne faipati ei te Atua e uiga ki “atufenua katoa o te lalolagi” kolā ne fakamanuiagina, e mautinoa eiloa me ne mafaufau a Apelaamo ki fakamanuiaga i te lalolagi. A te tautoga tenā ne mai i te Atua, telā e fakamatala mai i ei se olaga ‵lei atu mō “atufenua katoa o te lalolagi.” Kae e mata, e isi aka foki ne nisi fakamaoniga e fakaasi mai i ei me ka isi se palataiso i te lalolagi nei?

9, 10. Ne a folafolaga fakamuli ifo kolā e fakatalitonu mai me ka isi eiloa se palataiso i aso mai mua?

⁹ Ne fakasino atu a Tavita, se tokotasi o fanau a Apelaamo ki se taimi i aso mai mua māfai ko ‵galo atu a “tino amio ma‵sei” mo “tino fai mea ‵se.” Te ikuga? “Ka ‵galo atu a tino amio ma‵sei.” (Sala. 37:1, 2, 10) Kae ko “tino agamalu ka fai mō latou te lalolagi, kae ka maua ne latou te fiafiaga sili ona ko te lasi o te filemu.” Ne fakaosofia foki a Tavita ke ‵valo mai penei: “A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.” (Sala. 37:11, 29; 2 Samu. 23:2) Se a te aoga o fakamaoniga konā ki tino kolā ne ma‵nako o fai te loto o te Atua? Ka fakamoe‵moe eiloa latou me kafai fua e ola a tino amio‵tonu i te  lalolagi, ko tena uiga i se taimi fakamuli, ka toe fakafoki mai te palataiso e pelā mo te fatoaga o Etena.

¹⁰ Fakamuli ifo, ne fulitua atu a tino Isalaelu kolā ne fai mai i a latou e tavini ki a Ieova mai te tapuakiga tonu. Tela la, ne fai ne te Atua ke fakatakavale ne tino Papelonia a ana tino, kae puke fakapagota a te tokoukega o latou. (2 Nofo. 36:15-21; Iele. 4:22-27) Kae ne ‵valo mai ne pelofeta a te Atua me i se 70 tausaga mai tua, ka toe ‵foki atu ana tino ki te lotou fenua tonu. Ne fakataunu eiloa a valoaga konā. Kae e aoga foki ki a tatou. I te taimi e sau‵tala ei tatou ki nisi valoaga, mafaufau ki te mea telā e ‵tau o ‵saga tonu tatou ki ei—te palataiso i te lalolagi telā ko pili o oko mai.

11. Se a te valoaga i te Isaia 11:6-9 telā ka fakataunu, kae se a te fesili ka sae aka?

¹¹ Faitau te Isaia 11:6-9. Ne ‵valo mai a Ieova e auala i a Isaia me kafai ko oti ne faka‵foki atu Ana tino ki te lotou fenua, ka se toe fakafesagai atu latou ki mea faiga‵ta kae fakama‵taku; ka se toe ma‵taku latou i manu io me ko tino fakama‵taku. Ka tokagamalie eiloa a tino ma‵tua mo tama‵liki. E mata, e se tenā eiloa te tulaga i te fatoaga o Etena telā ne fakatoka ne te Atua? (Isa. 51:3) E fai mai foki te valoaga tenā e auala i a Isaia me i te lalolagi kātoa—e se ko te fenua fua o Isalaelu ka “‵fonu eiloa i te iloaga o Ieova e pelā mo vai e ‵fonu i ei te tai.” Ka tupu māfea a te mea tenā?

12. (a) Ne a fakamanuiaga ne maua ne latou kolā ne ‵foki atu mai te ‵nofoga fakapagota i Papelonia? (e) Se a te mea e fakaasi mai me e isi se suā fakataunuga o te Isaia 35:5-10?

¹² Faitau te Isaia 35:5-10. Ne toe faka‵mafa mai ne Isaia me i tino kolā ka toe ‵foki atu ki ei ka sē ma‵taku i manu io me ko tino fakama‵taku. Ka ‵fonu te lotou laukele i fuagalakau, kae ka mafai o lava a mea‵kai mo vai, e pelā eiloa mo te fatoaga o Etena telā ne uke a vaitafe i ei. (Kene. 2:10-14; Iele. 31:12) E mata, tenā fua te mea ka tupu? E seai se fakamaoniga me i a latou kolā ne ‵foki mai te ‵nofoga fakapagota ne faka‵lei olotou ma‵saki i se auala fakavavega. E pelā me se fakaakoakoga, ne seki mafai o toe ‵kite a mata o tino ‵kivi. Tela la, ne fakaasi atu ne te Atua me i te faka‵leiga tenā ka fai i aso mai mua.

13, 14. Ne lavea pefea ne te kau Isalaelu kolā ne ‵nofo fakapagota a te fakataunuga o te valoaga i te Isaia 65:21-23, kae se a te suā vaega o te valoaga telā ko pili o fakataunu? (Ke onoono ki te ata i te kamataga.)

¹³ Faitau te Isaia 65:21-23. Ne seki toe ‵foki atu a tino Iutaia ki olotou fale ‵gali; ne seki toe maua foki ne latou a togavine mo fatoaga ola ‵lei. Kae fakamuli loa, ne ‵fuli te tulaga tenā me ne fakamanuia ne te Atua latou. Se mea fakafiafia eiloa ke faite olotou fale kae ‵nofo i ei! Ne mafai o ‵toki olotou fatoaga kae ‵kai fia‵fia mai fua o olotou fatoaga.

¹⁴ Onoono aka la ki se fakamatalaga tāua e uiga ki te valoaga tenā. E mata, ka oko mai te taimi ka ‵pau ei ‵tou aso mo “aso o se lakau”? A nisi lakau ne ola mai eiloa i se fia afe o tausaga. E ‵tau o ma‵losi ‵lei a tino ko te mea ke ola leva latou. Kafai e mafai ne latou o ola i fakanofonofoga kolā ne ‵valo mai ne Isaia, ka fai eiloa te mea tenā e pelā me se moemiti telā ko taunu, se palataiso! Kae ka fakataunu eiloa a te valoaga tenā!

15. Ne a nisi fakamanuiaga ne ‵valo mai i te tusi o Isaia?

¹⁵ Mafaufau la ki te auala e fakasino atu ei a folafolaga kolā ne sau‵tala ki ei ki te palataiso i aso mai mua: A tino i te lalolagi kātoa ka fakamanuia ne te Atua. Ka se toe ai se tino ka fakafesagai atu ki manu fe‵kai mo tino fakama‵taku. Ka faka‵lei katoa a tino ‵kivi, tino ‵tuli, mo tino vae ma‵sei. Ka mafai eiloa ne tino o faite olotou fale totino kae ‵toki olotou fatoaga ‵gali kolā e maua mai i ei olotou mea‵kai. Ka ola leva latou e pelā mo lakau. E tonu, e maua ne tatou a fakamaoniga i te Tusi Tapu me ko pili mai a te olaga tenā. Kae koi mafau‵fau eiloa a nisi tino me e se fakasino atu a valoaga konei ki te palataiso i te lalolagi nei. Ka tali atu koe pefea? Se a te pogai tāua e olioli ei koe ki te palataiso tonu i te lalolagi nei?  Ne tuku mai eiloa ne te ‵toe tagata sili telā ne ola a te tali mautinoa e uiga ki ei.

16, 17. I te taimi fea ne faipati atu ei a Iesu e uiga ki te Palataiso?

¹⁶ E tiga eiloa e seai se mea ‵se ne fai ne Iesu, ne taku fakamasei a a ia kae ne fakatautau atu i luga i se pou ke mate, fakatasi mo pagota Iutaia i ana feitu. A koi tuai o mate, ne fai atu se tokotasi me i a Iesu se tupu kae ne fakamolemole atu ki a ia: “Iesu masaua mai au māfai e oko koe ki tou Malo.” (Luka 23:39-42) E aofia eiloa tou olaga i aso mai mua i te tali a Iesu telā e maua i te Luka 23:43. Ne ‵fuli ne nisi tino ‵fuli tusi i aso nei a pati konā, penei: “Au e fai ‵tonu atu ki a koe, ko te aso nei ka fetaui ei tāua i te Palataiso.” Onoono aka la ki te pati “aso nei.” Se a te mea ne fakaasi mai ne Iesu? E uke a kilokiloga kese‵kese ki ei.

¹⁷ I te ukega o tusitusiga i aso nei, ne fakaaoga eiloa a te fakamailoga ko te koma ke fakamaina ei te uiga o se fuaiupu. Kae i tusitusiga Eleni i aso mua, ne seki fakaaoga faeloa a fakamailoga konā. Tela la, ko sae aka i ei te fesili: E mata, ne fai atu a Iesu penei, “Au e fai atu ki a koe, ko te aso nei e fakatasi ei tāua i te Palataiso”? Io me ne fai atu a ia penei, “Au e fai ‵tonu atu ki a koe i te aso nei, ka ‵nofo fakatasi eiloa tāua i te Palataiso”? E mafai o faulu ne tino ‵fuli tusi a te koma e ‵tusa mo te mea e mafau‵fau latou ki ei e uiga ki pati a Iesu, kae e mafai o maua ne koe a te ‵fuliga tenā i lōmiga e uke o te Tusi Tapu i aso nei.

18, 19. Se a te mea e fesoasoani mai ke malamalama tatou i te mea ne fakauiga ki ei a Iesu?

¹⁸ Kae toe mafaufau aka la ki pati ne fai muamua atu ne Iesu ki ana soko: “Te Tama a te tagata, ka nofo i lalo i te laukele i ao e tolu mo po e tolu.” Ne fai atu foki a ia: “A te Tama a te tagata ka tuku atu ki lima o tāgata fai togafiti, kae ka tamate ne latou a ia, kae i te tolu o aso ka toe fakatu aka ei a ia.” (Mata. 12:40; 16:21; 17:22, 23; Male. 10:34) Ne lipoti mai ne te apositolo ko Petelu me ne tupu eiloa te mea tenei. (Galu. 10:39, 40) Tela la, ne seki fanatu eiloa a Iesu ki so se Palataiso i te aso eiloa telā ne ‵mate ei a ia fakatasi mo te pagota tenā. Ne nofo atu eiloa a Iesu “i te Tanuga [io me “Heitisi”]” mō ne aso, ke oko eiloa ki te taimi ne toe fakatu aka a ia ne te Atua.—Galu. 2:31, 32; fml. *

¹⁹ Tela la, e mafai o lavea ne tatou me i te tautoga telā ne fai ne Iesu ki te pagota ne kamata loa ki pati konei: “Au e fai ‵tonu atu ki a koe i te aso nei.” A te auala telā ne fai atu i ei a pati konei ne lauiloa foki i aso o Mose. Ne fai atu a ia: “A pati konei ne fakatonu atu ne au i te aso nei e ‵tau o ‵teu ne koutou i otou loto.”—Teu. 6:6; 7:11; 8:1, 19; 30:15.

20. Se a te fakamatalaga e ‵lago mai ki te ‵tou mainaga e uiga ki pati a Iesu?

²⁰ Ne fai mai se tino ‵fuli o te Tusi Tapu mai fenua saegala ki te kogāloto: “A te pati telā e faka‵mafa mai i te fuaiupu tenei ko te ‘aso nei’ kae e ‵tau o faitau penei, ‘Au e fai ‵tonu atu ki a koe i te aso nei, ka fakatasi tāua i te Palataiso.’ Ne fai eiloa a te tautoga i te aso eiloa tenā kae e ‵tau o fakataunu fakamuli. Ne fai mai foki te tino fuli ‵tusi tenā me tenei te auala e fai‵pati ei a tino mai fenua konā kae fakauiga ne latou me i te tautoga tenā ne fai i se aso kae ne tausi ki ei.” Tenā te pogai e ‵fuli i ei a te fuaiupu tenā i te ‵gana Sulia, penei: “Amene, Au e fai atu i te aso nei ka fakatasi tāua i te Fatoaga o Etena.” E ‵tau eiloa o fakamalosigina tatou ne te tautoga tenā.

21. Se a te mea ne seki iloa ne te pagota, kae kaia?

²¹ Ne seki iloa ne te pagota tenā ko mate me ne fai ne Iesu se feagaiga mo ana apositolo fakamaoni ke fakatasi mo ia i te Malo faka-te-lagi. (Luka 22:29) E se gata i ei, a te pagota tenā e seki papatiso.  (Ioa. 3:3-6, 12) Tela la, e mafai o tali‵tonu tatou me i te mea telā ne tauto a Iesu ki ei ko te palataiso i te lalolagi. I tausaga fakamuli ifo, ne fakamatala mai ne te apositolo ko Paulo se fakaasiga e uiga ki se tagata telā ne “avaka ki loto i te palataiso.” (2 Koli. 12:1-4) E se pelā mo te pagota telā ne mate, ne filifiligina a Paulo fakatasi mo nisi apositolo ke olo ki te lagi ke ‵kau fakatasi mo Iesu i te Malo. Kae ne fakasino atu a Paulo ki se mea telā ka oko mai i aso mai mua—te “palataiso.” * E mata, ka fai eiloa i te lalolagi? Kae e mata, e mafai o nofo atu koe i konā?

22, 23. Se a te mea e fakamoemoe koe ki ei?

²² Ke masaua me ne ‵valo mai ne Tavita a te taimi telā ka “fai mō [tino amio‵tonu] te lalolagi.” (Sala. 37:29; 2 Pe. 3:13) Ne fakasino atu a Tavita ki te taimi telā ko ola i ei a tino i te lalolagi e ‵tusa mo auala amio‵tonu o te Atua. E fai mai te valoaga i te Isaia 65:22: “Me i aso o oku tino ka pelā mo aso o se lakau.” E fakauiga te mea tenei me ka ola eiloa a tino mō se fia afe tausaga. E mata, e fakamoemoe koe ke tupu te mea tenā? Ao, me e ‵tusa mo pati i te Fakaasiga 21:1-4, ka saga mai eiloa te Atua ki tino katoa, kae tasi o fakamanuiaga ka fakataunu, “ka se toe ai se mate” mō tino kolā e tavini ki te Atua i tena lalolagi fou kae amiotonu.

²³ Tela la, ko manino ‵lei mai a te ata. Ne galo atu i a Atamu mo Eva a te Palataiso i Etena, kae ne seki galo atu ki te se-gata-mai. E pelā mo te tautoga a te Atua, ko pili o maua ne tino i te lalolagi a fakamanuiaga. Ne fakaosofia eiloa a Tavita ke fai mai me i tino agamalu mo tino amio‵tonu ka ‵nofo i te lalolagi ki te se-gata-mai. Ka fakamalosi aka eiloa ne valoaga i te tusi o Isaia ke olioli tatou ki te taimi ka maua ei ne tatou se olaga ‵lei atu i te palataiso. Māfea? Māfai ko fakataunu a te tautoga a Iesu ki te pagota Iutaia. Ka ‵nofo fakatasi tāua i te Palataiso. I te taimi tenā, ka fakataunu i ei a te folafolaga telā ne fai ne tino kolā ne ‵kau atu ki te fono i Kolea: “Fetaui tatou i te Palataiso!”