I te 2 Kolinito 12:2, 3, e fakasino atu loa a Paulo ki se tagata telā ne “avaka ki te lagi tuatolu.” Ko oi tenā? I tena tusi ki te fakapotopotoga i Kolinito, ne faka‵mafa atu ne Paulo me ne fakaaoga ne te Atua a ia e pelā me se apositolo. (2 Koli. 11:5, 23) Kae ne fakamatala mai ne ia a “mea fakaofoofogia e lavea mo fakaasiga a te Aliki.” Ne seki taku atu ne Paulo i te fakamatalaga tenā a nisi taina. Tela la, ne fakasino atu loa a tou tagata ki a ia eiloa e pelā me ko te tagata telā ne maua ne ia a mea fakaofoofogia mo fakaasiga.—2 Koli. 12:1, 5.

Tela la, a Paulo ko te tino telā ne “avaka ki te lagi tuatolu” kae “ne avaka ki loto i te palataiso.” (2 Koli. 12:2-4) Ne fakaaoga ne ia te pati “fakaasiga,” telā e fakamatala mai i ei se fakaasiga o mea ka ‵tupu i aso mai mua.

Se a te mea ne lavea ne Paulo e pelā me ko te “lagi tuatolu”?

I te Tusi Tapu, a te “lagi” e mafai o fakasino atu ki mea i luga i te lagi. (Kene. 11:4; 27:28; Mata 6:26) Kae ne fakaaoga foki a te pati “lagi” i nisi auala. I nisi taimi, e fakasino atu ki pulega a tino. (Tani. 4:20-22) Io me e mafai o fakasino atu ki te pulega a te Atua, e pelā mo te pulega e auala i te Malo o te Atua.—Faka. 21:1.

Ne matea ne Paulo a te “lagi tuatolu.” Se a te mea ne fakauiga a ia ki ei? I nisi taimi e fakasae fakatolu taimi mai i te Tusi Tapu se mea ke faka‵mafa mai ei te tāua o te mea tenā. (Isa. 6:3; Eseki. 21:27; Faka. 4:8) E foliga mai me i tena faipatiga e uiga ki te “lagi tuatolu,” ne faka‵mafa mai i ei ne Paulo se vaegā pulega telā e tu ‵kese kae maluga—ko te Malo faka-Mesia e auala i a Iesu Keliso mo ana pule lagolago e toko 144,000. (Ke onoono ki te Insight on the Scriptures, Tusi 1, itu. 1059, 1062.) E pelā mo te mea ne tusi mai ne te apositolo ko Petelu, e fakatali‵tali tatou ki te “lagi fou” e ‵tusa mo te folafolaga a te Atua.—2 Pe. 3:13.

Kae e a te “palataiso” tela ne taku mai ne Paulo?

A te pati “palataiso” e mafai foki o fakauiga ki nisi mea: (1) E pelā me ko te koga ne fakatoka ke ‵nofo i ei a tino, a te “palataiso” e mafai o fakasino atu ki te lalolagi Palataiso telā ko pili o oko mai. (2) E mafai o fakasino ki te tulaga faka-te-agaga telā ka maua ne tino o te Atua i te lalolagi fou. (3) E se gata i ei, e mafai foki o fakasino atu ki fakamanuiaga i “te palataiso o te Atua” i luga i te lagi telā ne taku mai i te Fakaasiga 2:7.—Ke onoono ki Te Faleleoleo Maluga, Iulai 15, 2015, itu. 8. pala. 8.

E mautinoa eiloa me ne fakasino atu a Paulo ki vaega katoa e tolu i te 2 Kolinito 12:4 i te taimi ne fakamatala mai ei ne ia tena tala.

Ke fakatoetoe aka:

A te “lagi tuatolu” telā ne taku mai i te 2 Kolinito 12:2 e fakauiga eiloa ki te Malo faka-Mesia i lima o Iesu Keliso mo te toko 144,000, telā ko te “lagi fou.”—2 Pe. 3:13.

A te mea tenei ko “te lagi tuatolu” me i te Malo se pulega telā e tu ‵kese kae maluga.

A te “palataiso” telā ne “avaka ki ei” a Paulo i se fakaasiga e fakasino atu eiloa ki (1) te Palataiso faka-te-foitino i te lalolagi nei telā ka oko mai, (2) te palataiso faka-te-agaga telā ka oko mai, kae ka lasi fakafia atu i te palataiso faka-te-agaga i te taimi nei, kae ko te (3) “te palataiso o te Atua” i te lagi telā ka sae mai foki i te lalolagi fou i te taimi tenā.

E ‵tusa mo te mea tenā, a te lalolagi fou ka aofia i ei a te lagi fou mo te lalolagi fou. Ka fai pelā me se fakatokaga fou, e aofia i ei a te Malo pule faka-te-lagi mo tino kolā ka tavini atu ki a Ieova i te lalolagi palataiso.