MAFAUFAU i a koe e sasale i te auala kae ko leva te po. Kae lagona ne koe se tino e tautali atu i a koe. Kafai e tu koe kae tu foki te tino. Ka fakamakini koe kae fakamakini foki. Koe loa ko tele; fakavave loa ki te fale o tou taugasoa. I taimi ne ‵tala mai ei ne ia te mataloa kae ‵kami atu koe ki loto, ne pelā aka eiloa koe.

Kāti e seki fepaki koe me se vaega tulaga penā, kae e isi aka ne nisi tulaga kolā ne mafai o fai ke manavase malosi koe. E pelā me se fakaakoakoga, e mata, e isi sou vāivāiga telā e taua malosi koe ki ei ke fakagata kae sē maua ne koe? Kai nofo aka loa kae seai sau galuega mō se taimi leva faitalia loa au taumafaiga e uke ke maua sau galuega? E mata, e manavase koe i a koe ma matua kae uke a masaki ka ‵fepaki mo koe i aso mai mua? Io me isi aka suā mea telā e mafatia ei koe?

Faitalia me se a te fakalavelave, e mata, e se loto fakafetai koe ki se tino telā e nofo mai kae mafai ne koe o fakaasi atu ki ei a mea e manavase koe ki ei, kae mafai foki ne ia o fesoasoani atu i taimi ne manako koe ki ei? E a, e isi sou taugasoa pili penā? Ao e isi! A Ieova se vaega taugasoa penā, telā e mafai o fesoasoani atu, e pelā loa mo tena mea ne fai ki a Apelaamo, telā e fakaasi mai i te Isaia 41:8-13, NW. I te fuaiupu e 10 mo te 13, ne fai atu a Ieova ki ana tavini: “Sa mataku, me i a au e fakatasi atu ki a koe. Sa manavase, me i a au ko tou Atua. Ka fakamalosi ne au a koe, ao, ka fesoasoani au ki a koe, ka puke ‵mau au ki a koe i toku lima fakaatamai o te amiotonu. Me i a au, Ieova tou Atua, e puke ki tou lima fakaatamai, Ko te Tino telā e fai atu ki a koe, ‘Sa mataku. Au ka fesoasoani atu ki a koe’”

E mata, e se fakamalosi atu a pati konei ki a koe? Fakaataata i tou mafaufau i a Ieova e faipati atu ki a koe. E se fakaasi mai i konei me sasale fakatasi koulua mo Ieova kae pikilima, kae fakaasi mai konei se manatu gali ke mafai o mafaufau ki ei. Kafai e sa‵sale koulua kae pikilima, a tena lima fakaatamai e puke ‵mau ne ia tou lima fakamaui. Kae i lō te fai penā, e ‵fola mai ne Ieova a tena “lima fakaatamai o te amiotonu” kae puke ‵mau ne ia “tou lima fakaatamai,” e pelā loa me ‵futi aka ne ia koe mai se fakalavelave faigata o te olaga. I taimi e fai ei a ia penā, e fakamalosi ne ia koe mai te fakatalitonu atu: “Sa mataku. Au ka fesoasoani atu au ki a koe.”

E mata, e kilo atu koe ki a Ieova e pelā me se Tamana mo se Taugasoa alofa telā e fesoasoani ki a koe i taimi o tou fakalavelave? A ia e fiafia ki a koe, e manavase ki tou olaga, kae manako ke fesoasoani atu ki a koe. Kafai ko fepaki koe mo mea faiga‵ta, e manako a Ieova ke maua ne koe te tokagamalie me i a ia e ‵piki ‵mau ki a koe. A ia ko te tinā “fesoasoani telā e toka faeloa i taimi o fakalavelave.”—Sala. 46:1.

Nisi tino e fakalogo‵mae faeloa ne mea ‵se a latou ne fai i aso mua, kae ko mafau‵fau latou me mata ne fakamagalo latou ne te Atua io me ikai. Kafai e penā foki koe, mafaufau ki te tagata fakamaoni ko Iopu, telā ne fakaasi tonu mai ne ia a ‘mea ne fai ne ia i aso koi talavou ei ia.’ (Iopu 13:26) Ne maua foki ne te faisalamo ko Tavita se lagonaga tai ‵pau penā kae ne fakamolemole atu ei a ia ki a Ieova : “Fakamagalo mai aku agasala mo aku mea ‵se ne fai i aso koi tamataene ei au.” (Sala. 25:7) E pelā me ne tino sē ‵lei katoatoa “ko oti ne agasala a tino katoa kae ko ‵mao mai te ‵malu o te Atua.”—Loma 3:23.

A te fekau i loto i te Isaia mataupu e 41 ne tusi loa ki tino o te Atua i aso mua. Ne agasala latou kae ne fakasala latou ne Ieova mai te ave fakapagota ki Papelonia. (Isa. 39:6, 7) Kae ne mafaufau faeloa a Ieova ki te taimi mai mua telā ka fakasao ei ne ia a latou kolā e sala‵mo kae foki atu ki a ia! (Isa. 41:8, 9; 49:8) E fakaasi mai foki ne Ieova se alofa lasi ‵ki penā i aso nei ki a latou kolā e ma‵nako o fakafiafia a ia.—Sala. 51:1.

Mafaufau ki te tala o Takuya, * telā ne taumafai ke tiaki ne ia tena amioga ki te onooono ki ata ma‵sei mo te fai tokotasi. Fakamuli ifo ne gasolo aka eiloa a ia o masei ‵ki. Ne fai pefea ana lagonaga? “Ne maua ne au se lagonaga i au ko se aoga, kae kafai e ‵talo atu au ki a Ieova ke fakamagalo mai au, e puke aka ne ia au ki luga mai i te tulaga masei telā ne nofo ei au.” E fai pefea ne Ieova te mea tenā? Ne ‵kami atu ne toeaina i te fakapotopotoga a Takuya, ke fanatu a ia ki a latou mafai ko manakogina ne ia se fesoasoani. Ne fakaasi tonu mai ne ia: “E seai se mea faigofie ke fanatu au ki a latou, kae i so se taimi e fanatu au, ne maua ne au te malosi.” Tenā ne fakatoka ei ne toeaina ko te ovasia o fenua ke asi atu ki a Takuya. Ne fai atu te ovasia o fenua: “Toku vau ki konei e seai se mea fakapoi. Au ne vau ki konei ona ko toeaina e ma‵nako ke vau au ki konei. Ne filifili ne latou a koe ke maua ne koe te asiga.” Ne fai mai a Takuya: “Ko au te tino ne agasala, kae ko Ieova e auala i toeaina, ne fakaloa mai tena lima o fesoasoani mai ki a au.” Ne gasolo o malosi a Takuya ke oko loa ki te fai o ia e pelā me se paenia tumau kae nei la ko galue atu a ia i se ofisa lagolago. E pelā loa mo te taina tenei, e puke aka a koe ne te Atua mai te tulaga masei e nofo koe i ei.

A te seai o se galuega ko te pogai e manava‵se ei a te tokoukega. Nisi tino ko seai ne olotou galuega kae ko oko eiloa te faigata ke maua se alaga sene ma latou. Mafaufau la i a koe e se talia faeloa ne tino kesekese ke fakagalue koe. I se vaegā tulaga penei, e mafau‵fau a nisi tino i a latou ko sē aoga. E mafai pefea o fesoasoani atu a Ieova ki a koe? E se tuku fakavave atu ne ia te galuega telā e manako koe ki ei, kae e mafai o fesoasoani atu ki a koe mai i te fakamasaua atu o te mea telā ne iloa ne te Tupu ko Tavita: “Au nei ko toeaina, ko leva eiloa toku olaga, kae seki iloa eiloa ne au se tino amio lei ke tiakina ne te Aliki, io me ko ana tamaliki foki ke akai meakai.” (Sala. 37:25.) Ao, e tāua ‵ki a koe ki a Ieova, kae ko tena “lima fakaatamai o te amiotonu,” e mafai ne ia o fesoasoani atu  ke maua ne koe a mea e manako koe ki ei ko te mea ke tumau eiloa koe i te tavini ki a ia.

Sara, telā e nofo i Colombia, ne fakamaoni ne ia te alofa faka‵sao tino o Ieova. Ne galue a ia i se  kamupane lauiloa telā e lei ‵ki tena peofuga i ei, kae e manakogina foki ke fakamaumau ana taimi e uke i ei . Kae ko ia ne manako foki ke uke atu ana mea e fai mō Ieova, telā ne tiaki ei ne ia tena galuega kae kamata o paenia. Kae ne seki faigofie te galuega sē tumau telā ne manako a ia ki ei. Ne fakatu ne ia se tamā pisinisi ice-cream kae ne fanofano malie eiloa o seai ne sene i ei telā ne ‵pono i ei. “Kae fakafetai au ki a Ieova me ne mafai ne au o kufaki i loto i se tolu tausaga,” ko muna a Sara. Ne tauloto a ia ki te ‵kese o kope ‵togi mafa mo mea tāua kolā e ‵tau o maua ne ia i te olaga kae ke se manavase ki mea o te sua aso. (Mata. 6:33, 34) Fakamuli ifo, ne telefoni mai tena pule muamua ke toe foki atu a ia o galue i tena galuega mua. Ne tali atu a ia me talia ne ia mafai fua e talia ke galue a ia sē tumau kae ke mafai foki o malolo a ia mafai ko isi ne polokalame faka-te-agaga. E ui ei ko se maua ne Sala a sene uke pelā mo te taimi muamua, kae ko mafai eiloa ne ia o fakatumau tena paenia. Mai mea katoa konā ne oko ki a ia, ne fai mai penei a ia, “ne lagona tonu ne au te lima alofa o Ieova.”

Te suā fakalavelave lasi ko te olaga matua. A te tokoukega o tino kolā ka litaea e manava‵se me mata koi mafai ne latou o ola i se olaga ‵lei me ikai. E manavase foki latou ki tulaga masaki o te fotino kolā ka oko latou ki ei mafai ko ma‵tua katou. Kae penā foki loa Tavita telā ne fakamolemole atu penei ki a Ieova: “ke se tiakina au ne koe i a au ko toeaina; sa tiakigina au manafai au ko vāivāi.”—Sala. 71:9, 18.

E mafai la pefea ne tavini a Ieova o ola kae tokaga malie olotou mafaufau mafai ko ma‵tua latou? E manakogina ke tumau latou i te ati aka o te olotou fakatuanaki ki a Ieova, kae tali‵tonu me ka tuku atu eiloa ne ia a mea tāua e ma‵nako latou ki ei. E tonu, kafai ko oti ne tami latou ki te olaga maumea i se fia tausaga, kaati ko manakogina nei ne latou ke fakafaigofie olotou olaga kae ke lotoma‵lie fua ki mea kolā e maua. E mafai latou o ‵kai ki “laulakau” kae aogā mo te fotino i lō “meafasi gali”! (Faata. 15:17) Kafai e saga tonu faeloa ki mea kolā e fiafia ki ei a Ieova, ka tuku mai eiloa ne ia a mea tāua kolā e manako koe ki ei ke oko foki loa ki te taimi e matua ei koe.

E pelā mo José mo Rose, kolā ne tavini atu i te galuega tumau ki a Ieova i se 65 tupu tausaga. I tausaga fakamuli ifo ne tausi ne laua te tamana o Rose telā e manakogina ke nofo faeloa se tino i ei i te aso kātoa. Kae ko José foki e kufaki faeloa i tipitipiga mo vailakau malosi kolā e fakaaoga ki tena kenisa. E mata ne fakaloa atu te lima o Ieova ki te tauavaga fakamaoni konei? Ao, kae i te auala fea? E auala i a Tony mo Wendy, se tauavaga i te fakapotopotoga kolā ne tuku atu ne laua se potu mo ‵nofo laua. Ne ma‵nako a Tony mo Wendy ke tuku atu a te potu tenei ki paenia tumau e aunoa mo se ‵togi. I tausaga mai mua atu, ne kilokilo mai sāle a Tony mai se famalama i tena akoga ki a José mo Rose e olo faeloa i te galuega talai. Ne fiafia a ia ki te loto fianfinau telā ne lavea ne ia i a laua konei, kae ne lasi ‵ki te fakamalosiga o te mea tenā ki a ia. Ona ko te mea ne lavea ‵lei ne laua i te tauavaga ma‵tua konei ne fakaaoga te lā olaga kātoa mō Ieova , ne fakaosofia ei a Tony mo Wendy ke tausi ne lāua te tauavaga ma‵tua konei. Ko 15 tausaga ko teka talu mai i te taimi fesoasoani atu a laua ki a José mo Rose, kolā ko taki 80 tupu nei la tausaga . Ne fai loa ne te tauavaga ma‵tua konei a te tauavaga talavou konei e pelā me se meaalofa mai i a Ieova.

E tuku mai foki ne te Atua a tena “lima fakaatamai o te amiotonu” ki a koe. E mata ka talia ne koe a ia mai te tuku atu o tou lima ki a Ia telā ne tautō atu ki a koe: “Sa mataku. Au ka fesoasoani atu ki a koe”?