MATAUPU MŌ SUKESUKEGA 17
“Ko Taku ne Au Koutou ne Taugasoa”
“Ko taku ne au koutou ne taugasoa, me ko oti ne fakaasi atu ne au ki a koutou a mea katoa kolā ne lagona ne au mai toku Tamana.”—IOA. 15:15.
PESE 13 Keliso te ‵Tou Fakaakoakoga ‵Lei
FAKATOE‵TOEGA O MANATU TĀUA *
1. E ati aka pefea ne koe se vā fakataugasoa pili mo se tino?
E PELĀ mo te masani, a te auala muamua ke ati aka se vā fakataugasoa pili mo se tino e fetaui mo koe, ko te fakamāumāu o ou taimi fakatasi mo ia. Kafai e sau‵tala koulua e uiga ki mea e mafau‵fau koulua ki ei, penā foki lua lagonaga, ka taugasoa eiloa koulua. Kae i nisi taimi, e se faigofie ke fai mo taugasoa pili o Iesu. Kaia?
2. Se a te mea faigata muamua e fakafesagai mo tatou?
2 A te mea faigata muamua ko tatou seki fetaui loa mo Iesu. E tokouke a Kelisiano i te senitenali muamua ne fakafesagai mo te tulaga faigata foki tenei. E ui i ei, ne fai mai te apositolo ko Petelu: “E tiga eiloa ne seki lavea ne koutou a ia, e a‵lofa eiloa koutou ki a ia. E tiga eiloa e se lavea ne koutou a ia i te taimi nei, kae e fakaasi atu faeloa ne koutou te fakatuanaki ki a ia.” (1 Pe. 1:8) Tela la, e mafai eiloa o ati aka ne tatou se fesokotakiga ‵pili mo Iesu faitalia me seki fetaui eiloa tatou mo ia.
3. Se a te lua o mea faigata e fakafesagai mo tatou?
3 A te lua o mea faigata, ko tatou e se mafai o fai‵pati ki a Iesu. Kafai tatou e ‵talo, e fakaasi ‵tonu atu ne tatou a ‵tou mafaufauga ki a Ieova. E tonu, e ‵talo atu tatou i te igoa o Iesu, kae e se fai‵pati ‵tonu atu tatou ki a ia. E se manako a Iesu ke ‵talo atu tatou ki a ia. Kaia? Me i te ‵talo se vaega o te tapuakiga, kae ko Ieova fua e ‵tau o tapuaki tatou ki ei. Mata. 4:10) Kae koi mafai eiloa o fakaasi atu ‵tou a‵lofa ki a Iesu.
(4. Se a te tolu o mea faigata e fakafesagai mo tatou, kae ne a mea ka sau‵tala tatou ki ei i te mataupu tenei?
4 A te tolu o mea faigata, ko Iesu e nofo loa i te lagi, tela la, e se mafai o ‵nofo fakatasi tatou mo ia. Kae e mafai loa o uke a mea e tauloto ne tatou e uiga ki a Iesu e aunoa mo te ‵nofo fakatasi mo ia. Ka sau‵tala tatou ki mea e mafai ne tatou o fai, telā ka fakamalosi aka ei ‵tou vā fakataugasoa mo ia. Kae muamua la, ke na suke‵suke tatou ki te pogai e tāua ei ke ati aka ne tatou se vā fakataugasoa pili mo Keliso.
KAIA E ‵TAU EI MO TATOU O FAI TAUGASOA MO IESU?
5. Kaia e ‵tau ei mo tatou o fai taugasoa mo Iesu? (Ke onoono foki ki pokisi “ A te Fai Taugasoa mo Iesu e Iku Atu ki te Fai Taugasoa mo Ieova” mo te “ Se Kilokiloga Paleni e Uiga ki te Tulaga o Iesu.”)
5 E ‵tau mo tatou o fai taugasoa mo Iesu māfai e ma‵nako tatou ke maua se fesokotakiga ‵lei mo Ieova. Kaia e tonu ei te mea tenā? Ke onoono ki pogai e lua. Muamua, ne fai atu a Iesu ki ana soko: “Me e alofa eiloa te Tamana ki a koutou, ona ko koutou ne a‵lofa mai ki a au.” (Ioa. 16:27) Ne fai mai foki a ia: “E seai se tino e fanatu ki te Tamana māfai e se auala mai i a au.” (Ioa. 14:6) A te taumafai o fai taugasoa mo Ieova e aunoa mo te atiakaga o se fesokotakiga pili mo Iesu, e ‵pau loa mo te taumafai ke ulu ki loto i se fale kae sē fakaaoga a te mataloa. Ne fakaaoga ne Iesu se tala fakatusa tai ‵pau i te taimi ne fakamatala mai ne ia a ia eiloa e pelā me ko “te mataloa o mamoe.” (Ioa. 10:7) A te lua o pogai, ne fakaata mai ne Iesu i se auala ‵lei katoatoa a uiga o tena Tamana. Ne fai atu a ia ki ana soko: “So se tino e kilo mai ki a au ko kilo foki ki te Tamana.” (Ioa. 14:9) Tela la, a te auala tāua ke iloa ‵lei ne tatou a Ieova, ko te sukesuke ki te olaga o Iesu. I te taimi e tauloto ei tatou e uiga ki a Iesu, ka gasolo aka o lasi a te ‵tou a‵lofa ki a ia. Kae i te taimi e gasolo aka o malosi a ‵tou vā fakataugasoa mo Iesu, ka ‵poko foki a te ‵tou a‵lofa ki tena Tamana.
6. Se a te suā pogai e ‵tau ei o maua ne tatou se fesokotakiga mo Iesu? Fakamatala mai.
6 E ‵tau o maua ne tatou se fesokotakiga mo Iesu ko te mea ke mafai o tali aka a ‵tou ‵talo. E manakogina i ei a mea e uke i lō fua te taku faka‵mafa atu o te fuaiupu “i te igoa o Iesu” i te fakaotiga o ‵tou ‵talo. E ‵tau o malamalama tatou i te auala e fakaaoga ei ne Ieova a Iesu ke tali mai a ‵tou ‵talo. Ne fai atu a Iesu ki ana apositolo: “So se mea e fakatagi mai ei koutou i toku igoa, ka fai eiloa ne au.” (Ioa. 14:13) E tiga eiloa ko Ieova te tino e lagona kae tali mai ne ia a ‵tou ‵talo, ne tuku atu ne ia te pule ki a Iesu ke fai ne ia a Ana fakaikuga. (Mata. 28:18) Tela la, koi tuai o tali ne te Atua a ‵tou ‵talo, e onoono a ia me e mata, e fakagalue ne tatou a pati fakatonutonu ne tuku mai ne Iesu io me ikai. E pelā me se fakaakoakoga, ne fai mai a Iesu: “Kafai e fakamagalo ne koutou a agasala a tino, ka fakamagalo foki koutou ne te otou Tamana telā i te lagi; kae kafai e se fakamagalo ne koutou a agasala a tino ka se fakamagalo foki otou agasala ne te otou Tamana.” (Mata. 6:14, 15) Ko oko loa i te tāua ke fai faka‵lei tatou ki nisi tino e pelā mo te auala e fai faka‵lei ei tatou ne Ieova mo Iesu!
7. Ko oi a tino e maua ne latou a mea aoga mai te taulaga togiola a Iesu?
7 Ko latou fua kolā e maua ne latou se vā fakataugasoa ‵pili mo Iesu, ka maua ne latou a mea aoga mai tena taulaga togiola. E iloa pefea ne tatou? Ne fai mai a Iesu me ka “tuku atu [tena ola] mō ana taugasoa.” (Ioa. 15:13) A tino fakamaoni kolā ne ola mai mua o vau a Iesu ki te lalolagi nei, ka tauloto e uiga ki a ia kae a‵lofa ki a ia. A vaegā tāgata mo fāfine pelā mo Apelaamo, Sala, Mose, mo Lahapa, ka toe faka‵tu aka, kae ka manakogina foki ke ati aka ne tavini amio‵tonu konei a Ieova se vā fakataugasoa mo Iesu ko te mea ke maua ne latou a te ola se-gata-mai.—Ioa. 17:3; Galu. 24:15; Epe. 11:8-12, 24-26, 31.
8-9. E pelā mo te mea e fakamatala mai i te Ioane 15:4, 5, ne a mea e mafai ne tatou o fai māfai e fia fai taugasoa tatou mo Iesu, kae kaia e tāua i ei te mea tenā?
8 E fia‵fia eiloa tatou o ga‵lue fakatasi mo Iesu i te talai mo te akoako atu o te tala ‵lei o te Malo. I tena nofoga i te lalolagi nei, ne fai a Iesu pelā me se faiakoga. Kae i tena toe fokiga ki te lagi, ne tumau eiloa a Iesu, te ulu o te fakapotopotoga, i te takitakiga o te galuega talai mo te galuega ki te akoakoga o tino. E lavea kae fakatāua ne ia ‵tou taumafaiga ke fesoasoani atu ki tino e tokouke ke iloa ne latou a ia mo tena Tamana. E tonu, e tasi fua te auala e mafai ei o fakataunu a te galuega tenei, māfai e fesoasoani mai a Ieova mo Iesu.—Faitau te Ioane 15:4, 5.
9 E akoako tonu mai i te Muna a te Atua me e ‵tau mo tatou o a‵lofa kae fakatumau foki te ‵tou a‵lofa ki a Iesu, ko te mea ke fakafiafia atu ki a Ieova. Tela la, ke na sau‵tala nei tatou ki mea e mafai ne tatou o fai ke fai mo taugasoa o Iesu.
TE AUALA KE ATI AKA SE VĀ FAKATAUGASOA MO IESU
10. Se a te auala muamua ke ati aka ei se vā fakataugasoa o tatou mo Iesu?
10 (1) Fai ke iloa ne koe a Iesu. E mafai o fai tatou penā mai te fai‵tau ki tusi o te Tusi Tapu ko Mataio, Maleko, Luka mo Ioane. I te taimi e mafaufau ‵loto ei tatou ki tala mai te Tusi Tapu ki te olaga o Iesu, ka kamata tatou o a‵lofa kae āva ki a Iesu, ona ko ana Ioa. 15:15) Ne logo‵mae foki a Iesu kae ‵tagi fakatasi mo latou. (Ioa. 11:32-36) Kae ne lavea foki ne fili o Iesu i a ia e fai taugasoa mo latou kolā ne talia ne latou a tena fekau. (Mata. 11:19) Kafai e fakaakoako tatou ki a Iesu i te auala ne fai faka‵lei ei ne ia ana soko, ka momea aka te ‵lei o ‵tou fesokotakiga mo nisi tino, ka lotoma‵lie kae fia‵fia tatou, kae ka gasolo aka ki luga a te ‵tou loto fakafetai ki te Keliso.
faifaiga atafai ki tino. E pelā me se fakaakoakoga, e tiga a ia ko te lotou Matai, ne seki fai ne ia ana soko e pelā me ne pologa. Kae ne fakaasi atu ne ia ana mafaufauga mo lagonaga ki a latou. (11. Se a te lua o auala ke ati aka se vā fakataugasoa mo Iesu, kae kaia e tāua i ei te mea tenā?
11 (2) Fakaakoako ki mafaufauga mo faifaiga a Iesu. Kafai e iloa ‵lei kae tau‵tali tatou i mafaufauga o Iesu, ko te ‵pili foki o ‵tou fesokotakiga mo ia. (1 Koli. 2:16) E mafai pefea o fakaakoako tatou ki a Iesu? Mafaufau ki te fakaakoakoga tenei. Ne mafaufau a Iesu ki mea e uke ke fesoasoani atu ki nisi tino i lō te fakafiafia fua o ia eiloa. (Mata. 20:28; Loma 15:1-3) Ona ko te mea ne mafaufau a ia penā, ne alofa fakapito kae loto fakamagalo a ia. Ne faigata o kaitaua vave a ia ki pati a tino ne fai e uiga ki a ia. (Ioa. 1:46, 47) Kae ne seki talia ne ia se mea ‵se a se tino ke fai ei ke sē ‵lei tena kilokiloga e uiga ki a latou. (1 Timo. 1:12-14) Ne fai mai a Iesu: “Ka iloa ei ne tino katoa i a koutou ko oku soko—māfai e fakatau a‵lofa koutou.” (Ioa. 13:35) Kaia e se ‵sili ifo ki a koe eiloa, “E mata, e tautali au ki te fakaakoakoga a Iesu mai te faiga o mea katoa i toku malosi eiloa, ke fakatumau te filemu i te va o oku taina mo tuagane?”
12. Se a te tolu o auala ke ati aka se vā fakataugasoa mo Iesu, kae e fai pefea ne tatou te mea tenā?
12 (3) ‵Lago atu ki taina o Keliso. E kilo mai a Iesu ki mea e fai ne tatou mō ana taina fakaekegina, e pelā eiloa me e fai atu ki a ia. (Mata. 25:34-40) A te auala tāua ke ‵lago tatou ki te kau fakaekegina, ko te ‵kau atu ki te talaiga o te Malo mo te faiga o soko telā ne fakatonu atu a Iesu ke fai ne ana soko. (Mata. 28:19, 20; Galu. 10:42) Mai te fesoasoani o “nisi mamoe” ko mafai ei o fakataunu ne taina o Keliso a te galuega talai telā e fai nei i te lalolagi kātoa. (Ioa. 10:16) Kafai koe e aofia i nisi mamoe, i taimi takitasi e aofia koe i te galuega tenei, fakaasi atu tou alofa ki taina o Keliso penā foki ki a Iesu.
13. E mafai pefea o fakagalue aka ne tatou a te polopolokiga a Iesu i te Luka 16:9?
13 E fai taugasoa foki tatou mo Ieova mo Iesu, mai te fakaaogaga o ‵tou tupe ke ‵lago atu ki te galuega telā e takitaki ne lāua. (Faitau te Luka 16:9.) E pelā me se fakaakoakoga, e mafai o ‵lago atu tatou ki te galuega i te lalolagi kātoa i mea tau tupe, ke fesoasoani atu ei ki te talaiatuga o te tala ‵lei ki fenua ‵mao, faitega mo te faka‵leiga o koga tapuaki, mo te fesoasoani atu ki tino kolā ne pokotia i fakalavelave ‵tupu o te natula. E mafai foki o ‵lago atu tatou ki ‵tou fakapotopotoga i mea tau tupe mo latou foki kolā e iloa ne tatou me e manakogina ne latou a ‵tou fesoasoani. (Faata. 19:17) Konei a auala e mafai o ‵lago atu ei tatou ki taina o Keliso.
14. E ‵tusa mo te Efeso 4:15, 16, se a te fa o auala ke ati aka se vā fakataugasoa mo Iesu?
14 (4) ‵Lago atu ki fakatokaga a te fakapotopotoga Kelisiano. E mafai o fai tatou pelā me ne taugasoa ‵lei o Iesu, telā ko te ulu o te fakapotopotoga, māfai e faka‵logo tatou ki a latou kolā ne filifili aka ke tausi mai ki a tatou. (Faitau te Efeso 4:15, 16.) E pelā me se fakaakoakoga, e taumafai eiloa tatou o fakaaoga faka‵lei a ‵tou Fale Tapuaki. Tenā te pogai ko oti ne tuku fakatasi a nisi fakapotopotoga kae fakama‵fuli foki a olotou koga talai. Ne iku atu te fakatokaga tenei ki te ‵teuga o tupe e uke kolā ko oti ne tuku fakameaalofa atu ki te fakapotopotoga a Ieova. Kae ona ko te mea tenei, ne manakogina ke fai ne nisi tino talai a fakama‵fuliga. Kāti ne tavini atu a nisi tino talai fakamaoni konā i se fakapotopotoga mō se fia o tausaga, kae e mafai loa o ‵pili ‵ki olotou vā mo olotou taina mo tuagane i konā. Kae nei, ko oti ne fakamolemole ki a latou ke tavini atu i se suā fakapotopotoga. Ko oko eiloa i te fiafia o Iesu ke lavea atu a soko fakamaoni konei e loto fia‵fia o talia a te fakatokaga tenei!
KE FAI TAUGASOA MO IESU KI TE SE-GATA-MAI
15. Ka momea aka pefea a te ‵lei o te ‵tou vā fakataugasoa mo Iesu i aso mai mua?
15 A latou kolā ne fakaekegina ki te agaga tapu, e maua ne latou te fakamoemoega ke ‵nofo fakatasi mo Iesu ki te se-gata-mai, o tavini atu pelā me ne tupu lagolago i te Malo o te Atua. Ka ‵kau fakatasi latou mo Keliso—ko tena uiga, ka lavea, fai‵pati kae ‵nofo tasi mo ia. (Ioa. 14:2, 3) A latou kolā e maua ne latou te fakamoemoega ke ola i te lalolagi nei, ka alofa kae saga atu foki a Iesu ki a latou. E tiga eiloa ka sē lavea ne latou a Iesu, ka gasolo aka eiloa o malosi te lotou fesokotakiga mo Iesu, māfai ko maua ne latou a te ola telā ka tuku atu ne Ieova mo Iesu ki a latou.—Isa. 9:6, 7.
16. Ne a fakamanuiaga e maua ne tatou mai te fai taugasoa mo Iesu?
16 Kafai e talia ne tatou a te ‵kamiga a Iesu ke fai mo ana taugasoa, ka maua ne tatou a fakamanuiaga e uke. E pelā me se fakaakoakoga, e maua ne tatou a mea aoga mai tena alofa mo tena fesoasoani i te taimi nei. E maua ne tatou te avanoaga ke ola ki te se-gata-mai. Kae sili atu i te tāua, a te fai taugasoa mo Iesu, ka iku atu ki te mauaga ne tatou o te ‵toe vā fakataugasoa ‵lei kae pili mo te Tamana o Iesu, ko Ieova. Se tauliaga sili eiloa ke taku tatou e pelā me ne taugasoa o Iesu!
PESE 17 “Au e Manako ki ei”
^ pala. 5 Ne fakamāumāu ne te kau apositolo a nāi tausaga ke sau‵tala kae ga‵lue fakatasi mo Iesu, kae ne fai latou pelā me ne taugasoa ‵lei. E manako foki a Iesu ke fai tatou mo ana taugasoa, kae e fakafesagai tatou mo mea faiga‵ta kolā ne seki fakafesagai mo te kau apositolo. Ka sau‵tala tatou i te mataupu tenei ki nisi mea faiga‵ta konā, mo manatu fesoasoani ki te auala e mafai ei ne tatou o ati aka kae fakatumau se vā fakataugasoa ‵pili mo Iesu.
^ pala. 55 FAKAMATALAGA O ATA: (1) I se tapuakiga a kāiga, e mafai o suke‵suke tatou ki te olaga o Iesu mo tena galuega talai. (2) I te fakapotopotoga, e mafai o kausaki atu tatou ke maua se vā filemu mo ‵tou taina. (3) Mai te faiga o te ‵toe mea e mafai i te galuega talai, ko mafai ei o ‵lago atu tatou ki taina o Keliso. (4) Kafai ko tuku fakatasi a fakapotopotoga, e mafai eiloa o faka‵logo tatou ki fakaikuga a toeaina e fai.