MATAUPU MŌ SUKESUKEGA 14
Se Osomaiga Mai te Feitu ki Mātū!
“Ne oko mai se atufenua ki toku fenua.”—IOELU 1:6.
PESE 95 Ko Gasolo o Maina Atu te Mainaga
FAKATOE‵TOEGA O MANATU TĀUA *
1. Se a te auala ne fai ei a sukesukega a te Taina ko Russell mo ana taugasoa, kae kaia ne aoga ei?
I SE fia senitenali ko ‵teka, ne kamata o maopoopo fakatasi te Taina ko C. T. Russell mo ana taugasoa, se potukau o tino suke‵suke ki te Muna a te Atua. Ne ma‵nako latou o suke‵suke me ne a mea e akoako ‵tonu mai i te Tusi Tapu e uiga ki a Ieova te Atua, Iesu Keliso, te tulaga o tino ‵mate, mo te togiola. Ne faigofie fua te auala ne fai ei olotou sukesukega. E fakasae aka ne se tino se fesili, ko iloilo ei ne te potukau a tusi fai‵tau katoa kolā e isi ne olotou sokoga ki te mataupu tenā. Ka oti ko fakamau ei ki lalo olotou mea ne tauloto mai sukesukega konā. E auala i te fakamanuiaga a Ieova, ne maua ne tāgata Kelisiano fakamaoni konā a muna‵tonu fakavae e uke mai te Tusi Tapu kolā e fakatāua ne tatou i aso nei.
2. Kaia e mafai ei o sē tonu te malamalama o tatou ki se valoaga i te Tusi Tapu telā e taumafai tatou ke malamalama i ei?
2 Ne iloa aka ne tino a‵koga ki te Tusi Tapu konā me i te tauloto ki se akoakoga fakavae mai te Tusi Tapu e tai faigofie atu i lō te taumafai ke malamalama faka‵lei i te uiga o se valoaga mai te Tusi Tapu. Kaia? Te pogai e tasi, me e faigofie atu ke malamalama i valoaga i te Tusi Tapu i te taimi telā ko fakataunu i ei io me māfai ko oti ne fakataunu. Kae e isi foki se suā pogai. Ke malamalama faka‵lei i se valoaga, se mea ‵tau ke iloilo ne tatou te valoaga kātoa. Kafai e ‵saga fua tatou ki se vaega e tasi o te valoaga kae tiaki a nisi, e mafai o sē tonu te malamalama o tatou ki ei. E foliga mai me tenā te mea ne tupu ki te valoaga i te tusi ko Ioelu. Ke onoono tatou ki te valoaga tenā ko sau‵tala ei me kaia ko ‵tau ei o fakamafuli te ‵tou mainaga e uiga ki ei.
3-4. Ke oko mai ki te taimi nei, se a te mea ne fakasino atu ne tatou ki ei a te valoaga i te Ioelu 2:7-9?
3 Faitau te Ioelu 2:7-9. Ne ‵valo mai a Ioelu me ka fakamasei a te fenua o Isalaelu ne se mumuga seakelise. Ka kai ne tamā manu fia‵kai konei a mea katoa i olotou mua ki olotou nifo mo kauvae kolā e fai pelā mo nifo mo kauvae o leona! (Ioe. 1:4, 6) I tausaga e uke, ne fakasino atu tatou ki te valoaga tenei, i se auala fakatusa, ki te auala e fai ei ne tino o Ieova te lotou galuega talai, e ‵pau eiloa mo se mumuga seakelise kolā e se mafai o taofi aka. Ne malamalama tatou me isi ne pokotiaga sē ‵lei ne iku mai i te galuega tenei i “fenua” io me ko tino kolā e ‵nofo mai lalo i te pulega a takitaki lotu. *
4 Kafai e gata fua te ‵tou faitauga i te Ioelu 2:7-9, e mafai eiloa o foliga tonu te fakamatalaga tenā. Kae kafai e toe onoono tatou ki te valoaga kātoa, ka lavea ne tatou me ‵tau eiloa o ‵fuli te ‵tou malamalama e uiga ki ei. Ke onoono nei tatou ki pogai e fa e ‵tau ei o fai penā.
POGAI E FA E ‵TAU EI O FAI SE FAKAMAFULIGA
5-6. Se a te fesili ne sae aka ona ko pati i te (a) Ioelu 2:20? (e) Ioelu 2:25?
5 Muamua la, onoono ki te folafolaga a Ieova e uiga ki te mumuga seakelise: “Ka afuli ne au te tino e nofo i te feitu ki mātū [ko seakelise] ke ‵mao ‵ki mai i a koutou.” (Ioe. 2:20) Kafai a seakelise ko Molimau a Ieova kolā e faka‵logo ki te fakatonuga a Iesu ke olo o talai kae fai a soko, kaia la ne folafola mai ei a Ieova me ka afuli ne ia latou kea‵tea? (Eseki. 33:7-9; Mata. 28:19, 20) E manino ‵lei, me ka afuli kea‵tea ne Ieova se mea io me se tino telā e fakasaua atu ki ana tino, kae e se ko ana tavini fakamaoni.
6 Te lua o pogai, mafaufau ki pati ne tusi mai i te Ioelu 2:25. E fai mai a Ieova i konā: “Ka fai ne au ke ‵togi atu a mea konei ki a koutou ona ko tausaga ne kai ei otou mea ne te mumuga seakelise, seakelise e seai ne kapakau, seakelise fe‵kai mo seakelise fakamasei mea, ko taku kautau lasi telā ne uga atu ne au ki a koutou.” Onoono la me e folafola mai a Ieova me ka fai ne ia “ke ‵togi atu” a mea katoa kolā ne fakamasei ne seakelise. Kafai e fakaata mai ne seakelise a tino talai o te Malo, ko tena uiga a te fekau telā e folafola atu ne latou se fekau fakamasei mea. A te tonuga loa, a te fekau fakaola tino tenā e mafai o fakamalosi atu ei a nisi tino amio ma‵sei ke sala‵mo. (Eseki. 33:8, 19) Se fakamanuiaga eiloa tenā ki a latou!
7. I te Ioelu 2:28, 29, se a te aoga o pati konei “fakamuli ifo”?
7 Faitau te Ioelu 2:28, 29. Mafaufau ki te tolu o pogai—ko te fakasologa o mea ‵tupu kolā e fakaasi mai i te valoaga. E lavea ne koe me ne fai mai a Ieova: “Fakamuli ifo, ka ‵ligi atu ne au toku agaga”; ki luga i seakelise māfai ko oti te lotou galuega e ‵tau o fai? Kafai a seakelise ko tino talai o te Malo o te Atua, kaia la ka ‵ligi fakamuli ifo ei ne Ieova a tena agaga ki luga i a latou māfai ko oti te lotou galuega talai? A te tonuga loa, e aunoa mo te fesoasoani o te agaga tapu o te Atua, e se mafai o tumau latou i te faiga o te galuega talai i tausaga e uke faitalia a ‵tekemaiga mo fakataputapuga ki te lotou galuega.
8. Ko oi e fakasino atu ki ei a seakelise kolā e faipati ki ei te Fakaasiga 9:1-11? (Onoono ki te ata i te ‵kava.)
8 Faitau te Fakaasiga 9:1-11. Ke onoono nei tatou ki te fa o pogai. I aso mua, ne fai atu tatou me i te mumuga seakelise telā ne faipati a Ioelu ki ei e fakasino ki te ‵tou galuega talai, me isi se valoaga i te tusi ko Fakaasiga e tai ‵pau mo te valoaga tenā. E faipati te valoaga tenei ki se mumuga seakelise kolā e fai olotou mata e pelā me ne mata o tino, kae i olotou ulu “ne mea e foliga pelā me ne foualiki aulo.” (Faka. 9:7) E fakasaua atu latou ki “tino fua [ko fili o te Atua] kolā e se maua ne latou te fakamailoga a te Atua i olotou lae” i loto i se lima masina, telā ko te leva e masani o ola i ei se seakelise. (Faka. 9:4, 5) E foliga mai me fakasino atu te fakamatalaga tenei ki tavini fakaekegina a Ieova. E folafola atu ne latou mo te loto ‵toa a fakamasinoga a te Atua ki luga i te olaga masei tenei, kae fai ei ke sē ‵lei a lagonaga o tino kolā e ‵lago atu ki ei.
9. Ne a mea tāua kolā e ‵kese i ei a seakelise ne lavea ne Ioelu mo seakelise ne fakamatala mai ne Ioane?
9 E tonu, e isi ne mea e tai ‵pau i ei te valoaga i te Fakaasiga mo te valoaga i te Ioelu. Kae e isi loa ne mea tāua kolā e ‵kese i ei. Mafaufau la: I te valoaga a Ioelu, ne fakamasei ne seakelise a lakau. (Ioe. 1:4, 6, 7) I te fakaasiga ki a Ioane, ne fai atu ki seakelise “ke se fakama‵sei a lakau kaina o te lalolagi.” (Faka. 9:4) A seakelise ne lavea ne Ioelu ne ‵mai mai te feitu ki mātū. (Ioe. 2:20) A seakelise ne lavea ne Ioane ne ‵mai ki tua mo te lua ‵poko. (Faka. 9:2, 3) A seakelise ne faipati a Ioelu ki ei ne afuli kea‵tea. I te Fakaasiga, ne talia a seakelise ke fakaoti te lotou galuega kae e seki afuli kea‵tea. E seai se mea e fakaasi mai me i a Ieova e se fiafia ki a latou.—Onoono ki te pokisi “Valoaga e Uiga ki Seakelise—E Tai ‵Pau Kae e ‵Kese Loa.”
10. Taku mai se fakaakoakoga i te Tusi Tapu e fakaasi mai i ei me i seakelise ne faipati ki ei a Ioelu mo seakelise ne faipati ki ei a Ioane, e fakasino eiloa ki mea kese‵kese.
10 A mea tāua kolā e ‵kese i ei a valoaga e lua konei e fakamaoni mai i ei me e seai eiloa Fakaasiga 5:5, ne taku a Iesu ko “te Leona mai te matakāiga o Iuta,” kae i te 1 Petelu 5:8, e fakamatala mai i ei i te Tiapolo “se leona fekai.” E ‵tusa mo fesili kolā ne ‵sae aka ki te malamalama o tatou i te taimi nei ki te valoaga a Ioelu, ko tena uiga e ‵tau o ‵sala tatou ki se isi fakamatalaga ki te valoaga tenā. Se a la te fakamatalaga tenā?
se sokoga o te avā valoaga konei. E mata, e fakauiga i ei me i seakelise ne fakamatala mai ne Ioelu e ‵kese eiloa mo seakelise i te tusi ko Fakaasiga? Ao. I nisi taimi i te Tusi Tapu, e mafai o ‵kese te mea e fakauiga ki ei se mea māfai ko faipati ki ei i se fakanofonofoga fakaa‵tea. E pelā mo teSE A TE MEA E FAKAUIGA KI EI?
11. E fesoasoani mai pefea te Ioelu 1:6 mo te 2:1, 8, 11 ke malamalama tatou me ko oi e fakasino ki ei a seakelise?
11 Kafai e onoono faka‵lei tatou ki te valoaga kātoa a Ioelu ka maina tatou me e faipati te pelofeta ki se osomaiga mai se kautau o taua mai. (Ioe. 1:6; 2:1, 8, 11) E fai mai a Ieova me ka fakaaoga ne ia tena “kautau lasi” (ko sotia Papelonia) ke fakasala a tino Isalaelu sē faka‵logo. (Ioe. 2:25) A te kautau telā ka taua mai e taku ko “te tino e nofo i te feitu ki mātū” me ka taua mai a tino Papelonia ki Isalaelu mai te feitu ki mātū. (Ioe. 2:20) A te kautau tenā e ‵pau eiloa mo se mumuga seakelise kolā e fakatoka faka‵lei. E fai mai a Ioelu e uiga ki a latou: “A [sotia] taki tokotasi e olo atu eiloa i olotou auala. . . . E ‵tele fakavave atu latou ki loto i te fakai, e ‵tele latou i luga i te ‵pui. E ‵kake latou ki loto i fale, e ulu atu latou i famalama e pelā me se tino kaisoa.” (Ioe. 2:8, 9) E mafai o fakaataata ne koe te mea tenā i tou mafaufau? E isi ne sotia i koga katoa. Ko seai se koga mo ‵muni. E seai se tino e mafai o sao mai te pelu a tino Papelonia!
12. I te auala fea ne fakataunu ei te valoaga a Ioelu e uiga ki seakelise?
12 Ne ulu atu eiloa a te kau Papelonia (io me ko tino Kaletaia) e pelā me ne seakelise ki loto i te fakai o Ielusalema i te 607 T.L.M. E fai mai te Tusi Tapu: “A te tupu o tino Kaletaia . . . [telā] ne tamate ne ia olotou tamataene ki te pelu . . . . e seai se alofa atafai o ia ki se tamataene io me se tamafine, se tino matua io me se tino masaki. Ne tuku atu ne te Atua a mea katoa ki ana lima. Ne ‵sunu ne ia ki lalo te fale o te Atua tonu, ofa ki lalo a ‵pui o Ielusalema, ‵sunu ana taoa ma‵losi katoa ki te afi, kae fakama‵sei a mea tāua katoa.” (2 Nofo. 36:17, 19) I te otiga ne fakamasei ne tino Papelonia a te fenua, ne fai mai a nisi tino penei: “A te fenua tenei se laukele sē aoga e seai ne tino mo manu i ei, kae ko oti ne tuku atu ki tino Kaletaia.”—Iele. 32:43.
13. Fakamatala mai te uiga o te Ielemia 16:16, 18.
13 I se 200 tausaga mai tua o te valoaga a Ioelu, ne fakaaoga ne Ieova a Ielemia ke ‵valo mai ne ia se isi mea e uiga ki te osomaiga tenei. Ne fai mai a ia me ka fai se salasalaga ki tino Isalaelu kolā ne aofia i amioga ma‵sei—kae ka puke latou i te salasalaga tenā. “‘Tenei ko uga atu taku fekau ki tāgata faiika e tokouke,’ ko te folafolaga a Ieova, ‘kae ka faiika latou ke maua a mea konā. Mai tua i konā, ko uga atu ei taku fekau ki tino tuli manu e tokouke, kae ka ‵sala ne latou a mea konā i luga i mauga mo tamā mauga katoa mo mafāfāga o kaupapa. . . . Ka toe ‵togi atu ne au a te aofaki kātoa e ‵tau o ‵togi atu mō olotou mea ‵se mo olotou agasala.’” Ke oko ki te moana mo togavao ka se mafai ne latou o faka‵muni a tino Isalaelu sē sala‵mo mai tino Papelonia.—Iele. 16:16, 18.
TE FAKAFOUGA
14. Ko te taimi fea ne fakataunu i ei te Ioelu 2:28, 29?
14 I te suā feitu, e isi se tala fakafiafia a Ioelu. Ka toe ‵fua mai a lakau i te fenua. (Ioe. 2:23-26) Kae i se taimi e tasi i aso mai mua, ka mafai o maua a meakai faka-te-agaga e lava kae ‵toe. “Ka ‵ligi atu ne au toku agaga ki luga i vaegā tino valevale,” ko pati a Ieova, “kae ko otou tama tāgata mo tama fāfine ka ‵valo fakapelofeta . . . Ka ‵ligi atu ne au ki luga i aku pologa tāgata mo pologa fāfine a toku agaga.” (Ioe. 2:28, 29) A te ‵ligiifoga o te agaga o te Atua tenā ne seki tupu i te taimi eiloa ne ‵foki ei a tino Isalaelu ki te lotou fenua mai Papelonia. Kae ne tupu i se fia senitenali ki tua ifo, i te Penitekoso 33 T.A. E iloa pefea ne tatou?
15. E ‵tusa mo te Galuega 2:16, 17, ne a fakama‵fuliga ki pati i te Ioelu 2:28 ne fai ne Petelu, kae se a te mea e fakauiga ki ei?
15 Ne fakaosofia te apositolo ko Petelu ke fakasino ne ia te Ioelu 2:28, 29 ki se mea fakaofoofogia telā ne tupu i te aso o te Penitekoso. Kāti ko te itula e iva i te tafataeao, ne ‵ligi ifo ei i se auala fakavavega a te agaga tapu telā ne fakamalosi ne ia a tino kolā ne maua ne latou, ke kamata o fai‵pati “e uiga ki galuega fakaofoofogia a te Atua.” (Galu. 2:11) Ne fakaosofia a Petelu ke fakaaoga ne ia a tugapati tai ‵kese i te taimi ne siki mai ne ia te valoaga a Ioelu. E lavea ne koe a fakama‵fuliga ne fai ne ia? (Faitau te Galuega 2:16, 17.) I lō te fakaaoga ne ia a te tugapati “fakamuli ifo” i te kamataga o te tusi faitau, ne fai mai a Petelu: “Kae i aso fakaoti”—i konei, ne fakasino atu eiloa a aso fakaoti ki aso fakaoti o te olaga o tino Iutaia—me ka ‵ligi ifo ei ne te Atua a tena agaga “ki luga i vaegā tino valevale.” Ko tena uiga a te valoaga a Ioelu ka fakataunu mai tua o se vaitaimi tai mata leva.
16. Ne aoga pefea te agaga o te Atua ki te galuega talai i te senitenali muamua, kae pefea i ‵tou aso nei?
16 Ko te otiga fua ne ‵ligi ifo a te agaga o te Atua i te senitenali muamua ne kamata ei o gasolo ki mua te faiga o te galuega talai i se auala lasi ‵ki. I te taimi ne tusi ei ne te apositolo ko Paulo a tena tusi ki te kau i Kolose, kāti i te 61 T.A., ne mafai ei o fakamatala mai ne ia me ko oti ne folafola atu a te tala ‵lei “ki tino katoa mai lalo o te lagi.” Kolose 1:23) I aso o Paulo, e fakasino atu a “tino katoa” ki tino i koga o te lalolagi kolā ne mafai o faimalaga ki ei a Paulo mo nisi tino. Mai te fesoasoani o te agaga tapu o Ieova, ko oko atu nei a te galuega talai ki koga e uke atu i ‵tou aso nei—“ki koga ‵mao o te lalolagi”!—Galu. 13:47; onoono ki te pokisi “Ka ‵Ligi Atu ne Au Toku Agaga.”
(SE A TE MEA NE ‵FULI?
17. Se a te ‵fuliga i te ‵tou malamalama ki te valoaga a Ioelu e uiga ki seakelise?
17 Se a te mea ne ‵fuli? Nei la, ko tonu te ‵tou malamalama e uiga ki te valoaga i te Ioelu 2:7-9. Ko manino ‵lei, me e se fakasino atu a fuaiupu konei ki te ‵tou galuega talai telā e fai mo te loto finafinau, kae ki gasuesuega a te kautau Papelonia kolā ne fakamasei ne latou a Ielusalema i te 607 T.L.M.
18. Se a te mea e seki ‵fuli e uiga ki tino o Ieova?
18 Se a te mea e seki ‵fuli? E tumau eiloa a tino o Ieova i te talai atu te tala ‵lei ki koga katoa, mai te fakaaogaga o so se auala ke talai atu i ei. (Mata. 24:14) E seai ne fakataputapuga mai te malo e mafai o taofi ne ia tatou mai te fakataunuga o te ‵tou tiute ke talai. Kae mai te fesoasoani o Ieova, ko sili atu nei te ma‵losi o tatou i te taimi nei o folafola atu te tala ‵lei o te Malo mo te loto malosi! E tumau tatou i te ‵kilo atu ki a Ieova mo te loto maulalo ke fesoasoani mai ke malamalama tatou i valoaga i te Tusi Tapu, mo te loto talitonu me kafai ko oko ki te taimi tonu, ka takitaki ne ia tatou “ki mea ‵tonu katoa”!—Ioa. 16:13.
PESE 97 E Faka‵na ‵Tou Ola ki te Muna a Ieova
^ pala. 5 Ko leva ne tali‵tonu tatou i tausaga e uke me i te valoaga telā ne tusi ki lalo i te Ioelu mataupu 1 mo te 2 e ‵valo mai i ei a te galuega talai e fai ne tatou i aso nei. Kae e fa a pogai tāua e manakogina ei ke fai se fakamafuliga ki ‵tou malamalama ki te vaega tenei o te valoaga a Ioelu. Ne a pogai konā?
^ pala. 3 Pelā me se fakaakoakoga, onoono ki te mataupu ko te “E Lavea te Poto o Ieova i Mea ne Faite” i Te Faleleoleo Maluga i a Apelila 1, 2009, pala. 14-16.