E fakasolo mai i fuaiupu konā a uiga faka-Kelisiano e iva: “A fuataga o te agaga ko te alofa, te fiafia, te filemu, te kufaki, te atafai, te aga‵lei, te fakatuanaki, te agamalu, te loto pulea.” E se ‵tau o ‵kilo tatou ki mea konā e pelā me ko uiga ‵lei fua kolā ka galue te agaga o te Atua ke ati aka i a tatou.

Mafaufau ki pati ne tusi mai ne te apositolo ko Paulo i fuaiupu mai mua atu: “A galuega o te foitino, kolā ko amioga fakatauavaga sē ‵tau, amioga lai‵lai, te amio matafatu mo te sē āva, ifo ki tupua, te faivailakau, te fai fili, te fai taua, te loto masei, te kaitaua, te fakatau kinau, ko mavae‵vaega, te fai potukau, te kaisanosano, te konā, fakafiafiaga fai valevale, mo nisi mea aka penā.” (Kala. 5: 19-21) Tela la, ne mafai fua o taku mai ne Paulo a nisi mea aka me ko “galuega o te foitino,” e pelā mo mea e faipati ki ei te Kolose 3:5. E penā foki loa i te otiga ne laulau mai ne ia a uiga ‵lei e iva, ana muna: “E seai se tulafono e ‵teke ki mea konei.” Tela la, ne seki laulau mai ne Paulo a uiga ‵lei katoa kolā e mafai o ati aka ne tatou e auala i te fesoasoani o te agaga tapu.

E mafai o maina tatou i te mea tenei māfai e faka‵pau ne tatou a te fakasologa tenei mo mea ne tusi ne Paulo ki te fakapotopotoga i Efeso: “E aofia i fuataga o te mainaga a vaega katoa o te aga‵lei mo te amiotonu mo te munatonu.” (Efe. 5: 8, 9) Ao, a te “aga‵lei,” fakatasi mo te amiotonu mo te munatonu, ne vaega o “fuataga o te mainaga,” kae ne vaega foki o “fuataga o te agaga.”

Ne fakamalosi atu foki a Paulo ki a Timoteo ke “‵sala ki te amiotonu, te tapuaki fakamaoni ki te Atua, te fakatuanaki, te alofa, te kufaki mo te agamalu”—ne uiga ‵gali e ono. (1 Timo. 6:11) E tolu fua a uiga mai uiga konā (ko te fakatuanaki, te alofa, mo te agamalu) e aofia i “fuataga o te agaga.” Kāti ne manako foki a Timoteo ki te fesoasoani o te agaga ke ati aka a nisi uiga kolā ne laulau mai: ko te amiotonu, te tapuaki fakamaoni ki te Atua, mo te kufaki.—Fakatusa ki te Kolose 3:12; 2 Petelu 1:5-7.

Tela la, a uiga faka-Kelisiano katoa e se aofia fua i ei a uiga kolā e laulau mai i te Kalatia 5:22, 23. E fesoasoani mai te agaga o te Atua ke ati aka ne tatou a uiga e iva kolā e taku me ko “fuataga o te agaga.” Kae e uke atu a nisi uiga e ‵tau o ati aka ne tatou i te taimi e gasolo ei tatou o ma‵tua i te feitu faka-te-agaga kae “pei ki uiga ‵fou kolā ne faite e ‵tusa mo te loto o te Atua i te tinā amiotonu mo te fakamaoni.”—Efe. 4:24.