E TALI‵TONU tatou katoa me ko Ieova e fakatonutonu kae tausi ne ia ana tino i te feitu faka-te-agaga i te vaitaimi o “aso fakaoti” konei. (2 Timo. 3:1) E manino ‵lei me e ‵tau mo tatou taki tokotasi o faka‵logo. E mafai o faka‵pau ne tatou te ‵tou tulaga mo tino Isalaelu i te koga lavaki. E ‵tau o ga‵sue latou māfai ko lagona ne latou te pu e tagi.

Ne fai atu a Ieova ki a Mose ke faite ne pu e lua ki siliva kolā ne tuki ke “fakamaopoopo mai te fakapotopotoga mo te taimi ka faima‵laga ei latou.” (Nume. 10:2) E faka‵tagi ne faitaulaga a pu i ‵tagi kese‵kese ke iloa ne tino a te mea telā e ‵tau o fai ne latou. (Nume. 10:3-8) I aso nei, e maua ne tino o te Atua a fakatonutonuga i auala kese‵kese. Ke mafaufau ki auala e tolu e maua i ei ne tatou a fakatonutonuga e pelā mo pu kolā e faka‵tagi sāle i aso mua. E ‵kami a tino o te Atua i aso nei ki maopoopoga ‵lasi, e akoakogina a ovasia, kae e faka‵fou faeloa a fakatokaga a te fakapotopotoga.

I te taimi ne manako ei a Ieova ke maopoopo te “fakapotopotoga kātoa” i te feitu ki saegala o te mataloa o te faleie o maopoopoga, ne ili ne faitaulaga a te avā pu. (Nume. 10:3) Ne lagona ne matakāiga katoa kolā ne ‵nofo i tafa o te faleie tapu i vaega e fa a te ‵tagi o te pu. A tino kolā ne ‵nofo pili atu ki te mataloa ne olo fakavave atu. A nisi tino e tai ‵mao a koga e ‵nofo i ei tela la, e manakogina a taimi mo taumafaiga e uke ke oko atu ki ei. Faitalia me ‵mao io me pili, e manako a Ieova ko tino katoa ke maopoopo fakatasi kae ke maua ne latou a mea aoga.

I aso nei, e se maopoopo tatou ki te faleie tapu, kae e ‵kami tatou ki maopoopoga a tino o te Atua. E aofia i ei ko fono ‵lasi mo nisi maopoopoga fakapito, kolā e maua ne tatou i ei a fakamatalaga tāua mo fakatonutonuga. E ‵pau eiloa a te polokalame e maua ne tino o Ieova i te lalolagi kātoa. Tela la, a tino kolā e talia ne latou te ‵kamiga ki maopoopoga konei ko aofia i se potukau o tino fia‵fia. E ‵tau mo nisi tino o faima‵laga i se koga ‵mao i lō nisi tino. Kae e lotoma‵lie eiloa a tino kolā ne talia ne latou te ‵kamiga me ne aoga eiloa olotou taumafaiga ne fai ke ‵kau atu ki ei.

Kae pefea la a latou kolā i tamā potukau kolā e ‵mao ‵ki mo koga e fai ei a maopoopoga penei? Fafetai ki poto ‵fou, ko mafai o maua ne vaegā tino penei a mea aoga mai te polokalame e tasi kae iloa ne latou me aofia latou i te maopoopoga tenā. E pelā mo te taimi ne āsi atu ei se sui mai te laumua, ne fakatoka ne te ofisa lagolago i Benin ke mafai o fakalogo‵logo a tino ki te polokalame mai Arlit, Niger, se fakai foliki i te Sahara Desert. E toko luasefulu tasi a taina mo tuagane mo tino fia‵fia ne maopoopo  fakatasi. E tiga loa e ‵nofo latou i se koga ‵mao, kae pelā loa me ko ‵kau fakatasi latou mo te toko 44,131 kolā ne ‵kau ki te fono. Ne tusi mai se taina: “E fakafetai atu matou mo omotou loto kātoa mo te fakaokomaiga o te polokalame tenei. E fakamaoni mai ei ki a matou a te lasi o te otou a‵lofa mō matou.”

Kafai ko ili ne se faitaulaga Isalaelu se pu fua e tasi, “ko takitaki fua o kaukāiga, kolā ko ulu o taki tokoafe,” e ‵tau o olo atu ki te faleie o maopoopoga. (Nume. 10:4) Ko maua ei ne latou mai i konā a fakamatalaga tāua kae akoako foki latou ne Mose. Ka aoga te mea tenā ki te faiga o olotou tiute i olotou matakāiga. Moi fai a koe se tokotasi o takitaki konā, e a ka taumafai malosi koe ke kau atu ki te maopoopoga tenā ke maua ne koe a mea aoga mai i ei?

I aso nei, e se fai a toeaina o te fakapotopotoga pelā me ne “takitaki”; kae e se pule atu foki latou pelā me ne aliki ki te lafu mamoe a te Atua telā e tausi ne latou. (1 Pe. 5:1-3) Kae e fai ne latou te ‵toe mea e mafai ke tausi atu ki te lafu mamoe. Tela la, e fia‵fia eiloa latou māfai ko ‵kami latou ke ‵kau ki akoga pelā mo te Akoga mō Toeaina mo Tavini Fesoasoani. I akoga konei e tauloto a toeaina ki auala ma‵goi ke tausi atu latou ki te fakapotopotoga. Ka iku atu i ei ki te ma‵losi faka-te-agaga o tino i te fakapotopotoga. Faitalia me seki kau koe ki se akoga i akoga konei, e maua eiloa ne koe a mea aoga mai tino kolā ne ‵kau ki ei.

I nisi taimi e ili ne faitaulaga Isalaelu a te pu i ana ‵tagi kese‵kese. E fakailoa mai i ei me ko manako a Ieova ke ga‵sue a tino Isalaelu katoa ki te suā koga. (Nume. 10:5, 6) Kafai ko ga‵sue a tino e lavea atu i ei te fakatoka faka‵lei o latou, kae e manakogina eiloa a galuega e uke. Kāti i nisi taimi e isi ne tino ko se ma‵nako ke ga‵sue latou. Kaia?

Kāti e mafau‵fau a nisi tino me ko tō uke a taimi ne faka‵pula mai ke ga‵sue latou kae fakapoi foki. “I nisi taimi a te kaumana e tu fua i te afiafi ke oko ki te tafataeao.” Kae i nisi taimi “e lua aso, se masina io me leva atu” ko ga‵sue ei. (Nume. 9:21, 22) Kae e fia taimi ne ga‵sue faeloa ei te kau Isalaelu? Numela mataupu 33 e fakaasi mai i ei a koga e 40 kolā ne ga‵sue ki ei a te kau Isalaelu.

Nisi taimi ko maua ne latou se koga malumalu ke ‵nofo i ei. E mafai o gali te koga tenā ma mafaufau koe ki te “koga lavaki lasi kae fakamataku” tenā. (Teu. 1:19) E se gata i ei, e mafai o tofotofogina latou ke mafau‵fau me i te koga ka ga‵sue latou ki ei ka sili atu i te masei.

Kafai ko kamata o ga‵sue a matakāiga, e mafai o fi‵ta a nisi matakāiga i te faka‵taliga ke oko ki te lotou taimi ke ga‵sue ei. Ne lagona ne tino katoa te pu i ana tagi kese‵kese, kae e se mafai ne tino katoa o olo i te taimi e tasi. E fakaasi mai i tagi kese‵kese o te pu me ko matakāiga i te feitu ki saegala kolā ko te matakāiga o Iuta, Isakala, mo Sepulona e ‵tau o olo muamua. (Nume. 2:3-7; 10:5, 6) Kafai ko oti ne olo latou ko toe fakatagi mai ei ne faitaulaga i te lua o taimi a te pu i ana tagi kese‵kese ke fakailoa atu ki matakāiga e tolu i te feitu ki saute me ko ‵tau latou o ga‵sue o olo. E fai ne faitaulaga te mea tenei ke oko ki te taimi ko palele katoa a tino ne olo.

Kāti ne faigata ki a koe i nisi taimi ke talia a fakama‵fuliga i te fakapotopotoga. Kāti ne mafaufau koe me ko tō uke a fakama‵fuliga ‵fou ne fai. Io me kāti ne ‵gali ki a koe nisi fakatokaga kae ne seki manako loa koe ke fakama‵fuli a mea konei. Faitalia me se a te pogai, kāti ne iloa aka ne koe me ne tofotofogina tou kufaki i te taimi ne taumafai koe ke fakamasani ki fakama‵fuliga konā. Kae ui i ei, kafai e talia ne tatou a fakama‵fuliga konā, ka lavea eiloa ne tatou te fakamanuiaga a te Atua ki luga i a tatou.

I aso o Mose, ne takitaki ne Ieova te fia miliona o tāgata, fāfine, mo tama‵liki i loto i te koga lavaki. E aunoa mo tena tausiga mo tena fakatonutonuga, e se mafai latou o ‵sao. I aso nei, e ma‵losi tatou i te feitu faka-te-agaga ona ko te takitakiga a Ieova. E tonu, ko ola tatou! Tela la, ke na fakaiku aka ke faka‵logo eiloa tatou pelā mo tino Isalaelu fakamaoni kolā ne ‵saga tonu atu ki pu kolā ne faka‵tagi mai!