“I te taimi ne kaitaua mai toku fakataina ki a au, ne puke au ki tena ua kae ‵kumi ne au. Ne manako au o ta a ia ke mate.”—Paul.

“I te fale au ko au loa ko kaitaua vave. E ofa ne au a meāfale, mea ta‵fao, mo so se mea e ‵lave oku lima ki ei.”—Marco.

Kāti e se mafai o oko tatou ki tulaga penei. Kae i nisi taimi e faigata ke taofi aka ne tatou katoa a te ‵tou kaitāua. E fai eiloa tatou penā ona ko te tulaga agasala ne maua mai ne tatou mai te tagata muamua, ko Atamu. (Loma 5:12) Kae ko nisi tino e ‵pau loa mo Paul mo Marco, e se mafai o taofi ne latou te lotou kaitāua. Nisi tino e faigata ki a latou ke pule atu ki olotou mafaufauga. E mafau‵fau faeloa ki mea e ma‵taku latou i ei kae manavase ona ko kilokiloga sē ‵lei o latou. Kae ko nisi tino e faigata ke ‵teke atu ki te manakoga ke fai amioga fakatauavaga sē ‵tau, ke fakaaoga ‵se a meainu ma‵losi, io me ko vailakau tapu.

A tino kolā e se mafai o pule atu ki olotou mafaufauga, manakoga, mo faifaiga e mafai o se ‵lei olotou olaga. Kae e mafai o ‵kalo kea‵tea tatou mai te mea tenā. E pefea la? Mai te atiakaga o te loto pulea. Ke fai te mea tenā, ke sau‵tala tatou ki fesili e tolu: (1) Se a te loto pulea? (2) Kaia e tāua ei? (3) E ati aka pefea ne tatou te uiga tenei, telā se vaega e tasi o “fuataga o te agaga”? (Kala. 5:22, 23) Oti ko sau‵tala ei ki mea e mafai o fai ne tatou māfai ko seai se loto pulea i a tatou i nisi taimi.

A te tino loto pulea e se sōna fai fakavave ana mea. E se faipati io me fai fakavave ne ia a mea i se auala telā e fakafanoanoa atu ei ki te Atua.

Ne fakaasi mai ne Iesu a mea e aofia i te loto pulea. E fai mai te Tusi Tapu: “I taimi ne pati masei atu ei ki a ia, ne seki taui atu ne ia ki pati ma‵sei. I taimi ne logo‵mae ei a ia, ne seki fakamatakutaku atu a ia, kae ne tuku atu ne ia a ia eiloa ki te Atua telā e fai ne ia a te fakamasinoga amiotonu.” (1 Pe. 2:23) Ne loto pulea eiloa a Iesu i te taimi ne fakatauemu atu ei a tino ‵teke ki a ia kae koi tautau a ia i luga i te pou fakasaua. (Mata. 27:39-44) Mai mua atu i ei, ne lavea atu te lasi o tena kufaki i te taimi ne taumafai ei a takitaki lotu kaitāua ke malei ne latou a ia i ana pati. (Mata. 22:15-22) Kae gali ‵ki te fakaakoakoga ne fakaasi mai ne ia i te taimi ne peipei a ia ne tino Iutaia kaitāua ki fatu! I lō te toe taui atu ki a latou, “ne ‵muni a Iesu fano ei ki tua mo te faletapu.”—Ioa. 8:57-59.

E a, e mafai o fakaakoako tatou ki a Iesu? E mafai o fai tatou penā. Ne tusi mai te apositolo ko Petelu: “Ne puapuaga a Keliso mō koutou, kae tuku mai ne ia se fakaakoakoga mō koutou ke tau‵tali fakapili‵pili atu i ana kalafaga.” (1 Pe. 2:21) Faitalia ‵tou tulaga sē ‵lei katoatoa, e mafai o tau‵tali fakapili‵pili atu tatou ki te loto pulea o Iesu. Kaia e tāua ei ke fai tatou penā?

E ‵tau o isi se loto pulea i a tatou ko te mea ke maua ne tatou te taliaga a Ieova. Faitalia me ko leva ne tavini fakamaoni tatou ki a Ieova, e mafai o galo te va fakataugasoa o tatou mo ia māfai e se mafai o pule atu tatou ki ‵tou mea e fai mo ‵tou pati.

Mafaufau ki a Mose, telā “ko te ‵toe tagata agamalu eiloa i tāgata katoa i te lalolagi” i te taimi tenā. (Nume. 12:3) Mai tua o se fia sefulu tausaga ne kufaki ei ne ia a fameo a tino Isalaelu, kae i te aso e tasi ne seki mafai o pule atu a ia ki a ia eiloa. Ne kaitaua tou tagata i te taimi ne toe fameo ei latou i te sē lava o vai. Ne faipati sē ‵lei a ia ki tino, penei: “Faka‵logo mai, koutou e tino ‵teke! E a, e ‵tau mo māua o aumai ne vai mō koutou mai te kaupapa tenei?”—Nume. 20:2-11.

Ne seki mafai ne Mose o pule atu ki a ia eiloa. E seki tavae ne ia a Ieova e pelā me ko te Tino ne tuku fakavavega mai ne ia a vai. (Sala. 106:32, 33) Ona ko te mea tenā, ne seki talia ne Ieova ke ulu atu a ia ki te Fenua o te Folafolaga. (Nume. 20:12) Kāti ne salamō eiloa a Mose ke oko ki te taimi ne mate ei a ia, me ne seki mafai o pule atu a ia ki tena kaitaua.—Teu. 3:23-27.

Se a te akoakoga mō tatou? Faitalia me ko leva ‵ki tatou i loto i te munatonu, e se ‵tau eiloa o fai‵pati sē āva tatou ki tino kolā ne fai ne latou ke kaitāua tatou io me ko tino kolā e ‵tau o fakatonutonu aka. (Efe. 4:32; Kolose 3:12) E tonu, i te taimi e gasolo ei tatou o ma‵tua, ka mafai o faigata ke kufaki tatou i nisi taimi. Kae masaua a Mose. E se ma‵nako eiloa tatou o fakaseaoga te taimi leva ne tavini fakamaoni ei tatou ona fua ko te seai se loto pulea. Ne a ‵tou mea e mafai o fai ke ati aka te uiga tāua tenei?

‵Talo ke maua te agaga tapu. Kaia? Me i te loto pulea se vaega o fuataga o te agaga o te Atua, kae e tuku atu ne Ieova a tena agaga ki tino kolā e fakamolemole atu ki a ia. (Luka 11:13) E auala i tena agaga, e mafai o tuku mai ne Ieova te malosi telā e manakogina ne tatou. (Fili. 4:13) E mafai foki o fesoasoani mai a ia ke ati aka a nisi vaega o fuataga o te agaga e pelā mo te alofa, telā ka fesoasoani mai ke fakamalosi i ei te uiga ko te loto pulea i a tatou.—1 Koli. 13:5.

‵Kalo kea‵tea mai so se mea e mafai o fakavāivāi ei tou loto pulea. Pelā me se fakaakoakoga, faka‵mao mai fakatuatusi i te Itaneti mo fakafiafiaga kolā e fakamalosi i ei a amioga ma‵sei. (Efe. 5:3, 4) E tonu, e ‵tau o ‵kalo kea‵tea tatou mai so se mea telā e tofotofo i ei tatou ke fai se mea masei. (Faata. 22:3; 1 Koli. 6:12) A tino  kolā e tofotofogofie ke fai a amioga fakatauavaga sē ‵ma, e se ‵tau eiloa o fai‵tau ki tala famau io me onoono ki ata famau.

Kāti ka faigata ki a tatou ke faka‵logo ki pati fakatonutonu konei. Kae kafai e taumafai malosi tatou, ka tuku mai ne Ieova te malosi e manakogina ke pule atu tatou ki a tatou eiloa. (2 Pe. 1:5-8) Ka fesoasoani mai a ia ke pule atu tatou ki ‵tou mafaufauga, ‵tou pati, mo ‵tou faifaiga. E lavea atu te ‵tonu o te mea tenā i a Paul mo Marco, kolā ne ‵sae muamua mai, me ne mafai ne lāua o pule atu ki te lā kaitāua. Ke mafaufau foki ki se taina telā ko ia loa ko kaitaua vave māfai e fakateletele, kae kinau sāle mo nisi tino. Ne a ana mea ne fai? “Ne ‵talo malosi au i aso takitasi. Ne sukesuke au ki mataupu e uiga ki te loto pulea kae tauloto a tusi fai‵tau aoga mai te Tusi Tapu. Faitalia me ko fia tausaga ne galue ei au ki te mea tenei, koi aoga eiloa ki a au ke kamata a aso takitasi ki te fakamasauaga me ‵tau o tumau au i te uiga filemu. Kae taumafai au ke oko vave ki so se koga e fano au ki ei ko te mea ke mo a e fai tulituli aku mea.”

I nisi taimi e fakata‵mala tatou o fakaasi atu te loto pulea. Kafai ko fai tatou penā, ko mafai o ‵ma tatou o ‵talo atu ki a Ieova. Kae tenei te taimi e ‵tau o ‵talo malosi tatou. Tela la, ke ‵talo fakavave ki a Ieova. Akai atu ki a ia mō se fakamagaloga, ‵sala ki tena fesoasoani, kae fakaiku aka ke mo a ma toe fai ne koe te mea ‵se tenā. (Sala. 51:9-11) Ke mo a ma mafaufau me ka se fakalogologo mai a Ieova ki au ‵talo e fai mo te loto fakamaoni ke maua se fakamagaloga. (Sala. 102:17) Ne fakamasaua mai te apositolo ko Ioane ki a tatou me i te toto o te Tama a te Atua e “faka‵ma ne ia tatou mai i agasala katoa.” (1 Ioa. 1:7; 2:1; Sala. 86:5) Ke masaua me ne fai atu a Ieova ki ana tavini ke tumau i te fakatau fakamagalo. Tela la, e loto tali‵tonu tatou me ka fai foki ne ia te mea tenā ki a tatou.—Mata. 18:21, 22; Kolose 3:13.

Ne fanoanoa a Ieova i te taimi e tasi ne seki mafai ei o pule atu a Mose ki a ia eiloa i te koga lavaki. Kae ui i ei, ne fakamagalo ne Ieova a tou tagata. Kae ne faipati te Muna a te Atua me i a Mose se fakaakoakoga tu ‵kese o te fakatuanaki. (Teu. 34:10; Epe. 11:24-28) Ne seki talia ne Ieova ke ulu atu a Mose ki te Fenua o te Folafolaga, kae ka talia mo te fiafia ne Ia a Mose ki loto i te lalolagi Palataiso mo te fakamoemoega ke ola a ia ki te se-gata-mai. E mafai foki o maua ne tatou te fakamoemoega tenā māfai e tumau tatou i te ati aka a te uiga tāua ko te loto pulea.—1 Koli. 9:25.