1. Ne a lagonaga o Ieova māfai ko oti ne fakasao aka sena mamoe e tasi?

E PELĀ mo mea ne sau‵tala tatou ki ei i te mataupu mai mua, ne faka‵pau ne Ieova a ia ki se tausi mamoe ‵lei telā e atafai faka‵lei ki ana mamoe takitasi. Kae e ‵sala a ia ki so se mamoe telā e galo. Muna a Ieova ki tino Isalaelu kolā ne tiaki ne latou a ia: “Toe ‵foki mai ki a au, kae ka foki atu au ki a koutou.” E iloa ne tatou me konā foki eiloa ana lagonaga i te taimi nei me ne fai mai a ia: “Au e se mafuli.” (Mala. 3:6, 7) Ne fai mai a Iesu me e fia‵fia malosi eiloa a Ieova mo te kau agelu māfai ko foki mai ki a Ia se tokotasi o Ana tavini telā ne takasēsē kea‵tea.—Luka 15:10, 32.

2. Ne a mea ka sau‵tala tatou ki ei i te mataupu tenei?

² Ka sau‵tala tatou ki tala fakatusa e tolu a Iesu kolā e faipati fakapitoa ki auala ke fesoasoani ki tino kolā ko takasēsē kea‵tea mai i a Ieova. Ka sau‵tala tatou ki nisi uiga tāua kolā e manakogina ne tatou ke mafai o fesoasoani atu ki se mamoe ne galo ke toe foki mai ki a ia. Kae ka lavea ne tatou te aoga o ‵tou taumafaiga e fai ke fesoasoani atu ki tino kolā ko vāi‵vai.

3-4. Kaia ne salasala faka‵lei ei te fafine, telā e faipati ki ei te Luka 15:8-10, ki tena tupe ne galo?

³ E ‵tau mo tatou o ga‵lue malosi o ‵sala a tino kolā e ma‵nako ke toe ‵foki mai ki a Ieova. I se tala fakatusa i te Evagelia a Luka, ne fakamatala mai ne Iesu te auala ne salasala ei se fafine ki se mea tāua a ia telā ne galo—se tupe siliva. Te mea tāua i te tala fakatusa tenei ko te auala ne salasala ei tou fafine ki tena tupe.—Faitau te Luka 15:8-10.

⁴ Ne fakamatala mai ne Iesu a lagonaga o se fafine telā ne maua tena tupe siliva telā ne galo. I aso o Iesu, se mea masani o tuku atu ne mātua Iutaia a tupe siliva e sefulu ki tena tama fafine i te aso e fai ei tena avaga. E se taumate a te tupe ne galo se tasi o tupe konā. Ne mafaufau te fafine me ne tō te tupe tenā ki te fola. Tenā ne faka‵ka ei tena moli kae ‵sala ki ei, kae seki maua ne ia. Kāti e se maina ‵lei a tena moli ke mafai o lavea ne ia te tupe. Fakamuli loa, ne ‵teu  faka‵lei ne ia te fale kātoa. I luga i ‵pefu kolā ne ‵teu mai ne ia e tuku mai ei te tupe telā e pele ki a ia, e matilo mai i te mainaga o tena moli. Pelā aka loa a ia! Ne ‵kami mai ne ia ana taugasoa mo tuakoi ke fakamatala ki a latou a te tala fakafiafia.

5. Kaia e faigata ei i nisi taimi ke ‵sala ki tino kolā ko oti ne tiaki ne latou te fakapotopotoga?

⁵ E pelā mo te tala fakatusa a Iesu, e lavea ne tatou me kafai e galo se mea, e ‵tau o galue malosi se tino o ‵sala te mea tenā ne galo. Kae penā foki loa mo tino kolā ko oti ne tiaki ne latou te fakapotopotoga, e ‵tau o ga‵lue malosi tatou o ‵sala ki a latou. Kāti ko fia tausaga ko ‵seke talu mai te tiakinaga ne latou a tatou. Kāti ko ‵nofo nei latou i se koga telā e se iloa ne taina i konā a latou. Kae tali‵tonu tatou me e isi ne tino mai i a latou ko ma‵nako ke toe ‵foki mai latou ki a Ieova. Ko ma‵nako latou ke tavini ki a Ieova fakatasi mo tena kaukāiga o tino tapuaki ‵tonu, kae e ma‵nako latou ki te ‵tou fesoasoani.

6. E mafai pefea o aofia a tino katoa i te fakapotopotoga i te salasalaga ki tino kolā ko ‵mate faka-te-agaga?

⁶ Ko oi e mafai o aofia i te salasalaga ki tino kolā ko ‵mate faka-te-agaga? A tatou katoa—toeaina, paenia, tino i ‵tou kāiga, mo tino talai i te fakapotopotoga—e mafai o fesoasoani o ‵sala ki a latou. E mata, e isi sou taugasoa io me se kāiga telā ko mate faka-te-agaga? E mata, e isi se tino telā ko mate faka-te-agaga ne fetaui mo koe i te galuega talai mai fale ki fale io me i te talai atu i koga e tokouke ei a tino? Kafai ne loto fiafia a te tino tenā o tuku atu tena fakatuatusi io me napa telefoni, e mafai o tuku atu ne koe a mea konā ki toeaina i tau fakapotopotoga.

7. Ne a au mea ne tauloto mai pati a se toeaina e fakaigoa ki a Thomas?

⁷ Ne a mea e mafai o fai ne toeaina ke ‵sala ki tino kolā ko ma‵nako ke ‵foki mai ki a Ieova? Mafaufau ki pati a se toeaina e fakaigoa ki a Thomas * telā e nofo i Sepania. Ko silia atu mo te toko 40 Molimau ne fesoasoani a ia ki ei ke ‵foki ki te fakapotopotoga. Muna a Thomas: “Muamua la, e fesili au ki taina mo tuagane kese‵kese māfai e iloa ne latou a koga e ‵nofo i ei a tino kolā ko ‵mate faka-te-agaga. Io me fesili au ki tino talai me ko oi a tino kolā ko leva ne seki toe ‵kau mai ki fakatasiga. E fia‵fia eiloa te tokoukega o tino i te fakapotopotoga o fesoasoani me iloa ne latou me ko aofia latou i te ‵salaga ki tino penā. Fakamuli ifo, kafai ko āsi atu au ki taina mo tuagane kolā ko ‵mate faka-te-agaga, e fesili atu au e uiga ki olotou tama‵liki mo nisi tino i te kāiga. Ne masani o puke mai ne tino kolā ko ‵mate faka-te-agaga olotou tama‵liki ki fakatasiga, kae kāti ne fai foki a tama‵liki konei pelā me ne tino talai i se taimi. E mafai foki o fesoasoani tatou ki a latou ke toe ‵foki ki a Ieova.”

8. I te tala fakatusa o te tamaliki tagata telā ne galo, telā e tusi i te Luka 15:17-24, e pefea a faifaiga a te tamana ki tena tama telā ko salamō?

⁸ Ne a uiga e ‵tau o maua ne tatou māfai e ma‵nako tatou o fesoasoani ki tino kolā ko ma‵nako o toe ‵foki mai ki a Ieova? Mafaufau ki nisi akoakoga e mafai o tauloto ne tatou mai te tala fakatusa a Iesu e uiga ki te tamaliki tagata sē fakalogo telā ne fano kea‵tea mai te lotou fale. (Faitau te Luka 15:17-24.) Ne fakamatala mai ne Iesu te auala ne iloa aka ei ne te tamaliki a tena mea ‵se ne fai kae fakaiku aka ke toe foki ki te fale. Ne tele atu te tamana o fakafetaui ki a ia kae ‵sai atu ki ei, ke fakamaoni atu ki tena tama a tena alofa mō ia. Ne masei ‵ki te loto lagona o tena tama kae mafaufau me ko se ‵tau o taku a ia me ko tena tama. Ne loto malamalama te tamana i tena tama telā ne fakaasi mai ne ia ana lagonaga katoa. Tenā ne fai ei ne te tamana ne fakatokaga ke fakamaoni atu ki tena tama tagata me e talia a ia mo te fiafia ke toe foki mai ki te fale e pelā me se tino pele o te kāiga, kae e se pelā me se tagata galue. Ke fakamaoni aka te mea tenā, ne fakatoka ne tena tamana se ‵kaiga lasi kae tuku atu  a gatu ‵lei ke pei ki ei tena tama telā ko salamō.

9. Ne a uiga e ‵tau o maua ne tatou ke mafai o fesoasoani ki tino kolā ko ‵mate faka-te-agaga ke ‵foki ki a Ieova? (Onoono ki te pokisi “ Auala ke Fesoasoani Atu ki Tino Kolā ko Ma‵nako ke Toe ‵Foki Mai.”)

⁹ E fai a Ieova e pelā mo te tamana i te tala fakatusa tenā. E alofa a ia ki taina mo tuagane kolā ko ‵mate faka-te-agaga kae manako ke ‵foki mai latou ki a ia. E mafai o fesoasoani tatou ke toe ‵foki mai latou, mai te fakaakoako ki a Ieova. Ke fai penā e manakogina ke maua ne tatou te kufaki, te loto malamalama, mo te alofa. Kaia e ‵tau ei o fakaasi atu ne tatou a uiga tāua konā, kae fakaasi atu pefea ne tatou?

10. E aoga pefea te kufaki ki te fesoasoani atu ki se tino ke toe malosi i te feitu faka-te-agaga?

¹⁰ E ‵tau o kufaki tatou me e manakogina a taimi e uke ke mafai o toe malosi ‵lei se tino i te feitu faka-te-agaga. E tokouke a tino kolā ne ‵mate faka-te-agaga ne fai ‵tonu mai me ne ‵foki mai latou mai tua o asiga e uke a toeaina mo nisi tino i te fakapotopotoga. Ne tusi mai se tuagane e fakaigoa ki a Nancy, mai Asia ki Saute-saegala: “Ne fesoasoani malosi mai ki a au se taugasoa pele i te fakapotopotoga. Ne fai a ia pelā mo soku taina matua me ne alofa malosi a ia ki a au. Ne sau‵tala māua ki mea ‵gali ne fai ne māua i aso mua. Kae ne fakalogologo faka‵lei a ia i taimi ne fakaasi atu ne au oku lagonaga ‵tonu, kae ne toka a ia o tuku mai a pati fakatonutonu. Ne fai tou fafine pelā me se taugasoa tonu telā e toka i so se taimi o fesoasoani mai.”

11. Kaia e ‵tau ei o loto malamalama tatou ke mafai o fakamafanafana atu ki se tino telā e maua ne ia a lagonaga logo‵mae?

¹¹ A te loto malamalama e fai pelā me se vailakau telā e faka‵lei aka ei a lagonaga logo‵mae. E isi ne tino kolā ko ‵mate faka-te-agaga ne ‵nofo mo olotou lagonaga kaitāua ki nisi tino i te fakapotopotoga mō se fia tausaga. Ne fai ne lagonaga penei ke se fia ‵foki mai latou ki a  Ieova. E mafau‵fau a nisi tino me e se ‵lei a faifaiga ne fai ki a latou. Kāti e ma‵nako latou ki se tino telā ka fakalogologo ki a latou kae malamalama i olotou lagonaga. (Iako. 1:19) Ne fai mai a María telā ne mate faka-te-agaga i se taimi, “Ne manako au ki se tino ke fakalogologo mai ki a au, ke fakamafanafana mai ki a au, kae ke tuku mai ne manatu fakatonutonu aoga.”

12. Fakamatala mai te auala e ‵futi mai ei ne Ieova a tino kolā ko ‵mate faka-te-agaga ke ‵foki mai ki ana tino.

¹² E fakamatala mai i te Tusi Tapu a te alofa o Ieova ki ana tino e pelā me se uka, io me se lōpu. I te auala fea e fai ei te alofa o te Atua e pelā me se lōpu? Mafaufau ki te tala fakatusa tenei: Fakaataata i tou mafaufau me ko kamata o malemu koe i te moana sou kae ko ‵pei atu ne se tino se mea fakalagalaga ki a koe. E tonu, ka loto fafetai eiloa koe ki te fesoasoani tenā me ko mafai koe o lagalaga i ei. Kae ka se mafai ne te mea fakalagalaga tenā o fakatumau ne ia tou ola. E ‵moko ‵ki te tai, kae ka se mafai koe o sao seiloga ke oko atu koe ki te pōti. Ka manako koe ke ‵pei atu ne se tino se lōpu kae ‵futi koe ki te pōti. Ne fai atu a Ieova ki tino Isalaelu kolā ne tapea‵pea kea‵tea: “Ne ‵futi mai faeloa ne au latou . . . ki uka o te alofa.” (Ho. 11:4) Konā foki loa a lagonaga o te Atua i aso nei ki tino kolā ko se tavini atu nei ki a ia kae ko ma‵lemu i olotou fakalavelave mo mea e manavase ki ei. E manako a ia ke iloa ne latou me e alofa a ia ki a latou, kae manako a ia o ‵futi mai latou ki a ia. Kae e mafai o fakaaoga koe ne Ieova ke fakaasi atu te alofa tenei ki a latou.

13. Fakamatala mai se tala telā e fakaasi mai ei te malosi o te alofa fakataina.

¹³ E tāua ‵ki ke fakatalitonu atu ki tino kolā ko ‵mate faka-te-agaga me e alofa a Ieova ki a latou kae e a‵lofa foki tatou ki a latou. A Pablo, telā ne sae mai i te mataupu mai mua, ne mate faka-te-agaga i tausaga e silia atu mo te 30.  Ana muna: “I te tafataeao e tasi, i toku auala mai te fale, ne fetaui au mo se tuagane matua kae gali telā ne faipati mai ki a au i se auala alofa. Ne kamata au o tagi pelā me se tamaliki. Ne fai au ki tou fafine me kāti ne uga mai ne Ieova a ia ke faipati mai ki a au. Ko te taimi eiloa tenā ne fakaiku ei ne au ke toe foki ki a Ieova.”

14. E ‵tusa mo te tala fakatusa i te Luka 15:4, 5, ne a mea ne fai ne te tausi mamoe i te taimi ne maua ne ia te mamoe ne galo?

¹⁴ E ma‵nako a tino kolā ko ‵mate faka-te-agaga ke tumau tatou i te fesoasoani atu ki a latou. E pelā mo te tamaliki tagata ne galo i te tala fakatusa a Iesu, kāti e isi ne lagonaga logo‵mae koi ‵nofo i loto i a latou. Kae kāti ko vāi‵vai latou i te feitu faka-te-agaga ona ko mea ne fe‵paki mo latou i te lalolagi a Satani. E ‵tau o fesoasoani tatou ki a latou ke toe ati aka te lotou fakatuanaki ki a Ieova. I te tala fakatusa o te mamoe ne galo, ne fakamatala mai ne Iesu te auala ne sau aka ne te tausi mamoe a te mamoe kae amo ne ia o fakafoki ki te lafu. Ne fakamāumāu ne te tausi mamoe ana taimi mo malosi e uke ke ‵sala te mamoe ne galo. Ne iloa ne ia me ‵tau o amo ne ia te mamoe o fakafoki ki te lafu me e se malosi ‵lei ke foki i a ia eiloa.—Faitau te Luka 15:4, 5.

15. E mafai pefea o fesoasoani tatou ki tino vāi‵vai kolā ko ma‵nako o toe ‵foki ki a Ieova? (Onoono ki te pokisi “ Se Mea Faigaluega Tāua ‵ki.”)

¹⁵ Kāti ka manakogina ke fakamāumāu a taimi e uke mo ‵tou malosi ke fesoasoani ki tino kolā ko ‵mate faka-te-agaga ke manumalo i olotou vāivāiga. E auala i te agaga o Ieova, tena Muna, mo tusi e maua mai e auala i te fakapotopotoga, e mafai o fesoasoani tatou ki a latou ke toe ma‵losi mai i te feitu faka-te-agaga. (Loma 15:1) E fai pefea ne tatou te mea tenei? Ne fai mai se toeaina atamai penei, “A te tokoukega o tino kolā ne ‵mate faka-te-agaga  e ‵tau eiloa o fai olotou akoga faka-te-Tusi Tapu māfai ko oti ne fakaiku aka ne latou ke toe ‵foki mai ki a Ieova.” * Tela la, kafai ko fakamolemole atu ki a koe ke fai se akoga mo se tino telā ne mate faka-te-agaga, se tauliaga gali eiloa tenā. Ne fai mai foki te toeaina tenā, “A te tino talai telā e fai ne ia te akoga e ‵tau se tino e masani ‵lei mo te tino tenā, se tino telā e mafai o fakaasi atu ne te tino telā ne mate faka-te-agaga ana fakalavelave ki ei.”

16. E iloa pefea ne tatou me e mafai o maua ne tatou te fesoasoani mai te lagi?

¹⁶ E fakaasi mai i tala e uke me e ga‵lue tasi a agelu mo tatou o ‵sala ki tino kolā ko ‵mate faka-te-agaga kae ma‵nako o toe ‵foki ki a Ieova. (Faka. 14:6) E pelā mo Silvio, mai Ecuador, ne ‵talo malosi a ia mō se fesoasoani ke mafai o toe foki ki te fakapotopotoga. I te taimi koi ‵talo ei a ia, ne tagi te peele o tena mataloa. Ne ‵tu atu a toeaina e tokolua ki tena fale. I te asiga tenā, ne fia‵fia lāua o fesoasoani atu ki tou tagata ki mea e manako a ia ki ei.

17. Se a te taui ka maua ne tatou mai te fesoasoani atu ki tino vāi‵vai faka-te-agaga?

¹⁷ Ka fia‵fia malosi eiloa tatou māfai ne fesoasoani tatou ki se tino telā ne vāivāi faka-te-agaga ke foki ki a Ieova. Mafaufau ki pati a Salvador, se paenia telā e saga tonu o ‵sala ki tino kolā ko ‵mate faka-te-agaga: “I nisi taimi, ko faigata ke taofi ne au a loimata o te fiafia. E fia‵fia ‵ki au ma mafaufau me ne fakasao ne Ieova se tokotasi o ana mamoe pele mai te lalolagi a Satani kae ne maua ne au te tauliaga ke ga‵lue fakatasi mo Ia i te galuega tenei.”—Galu. 20:35.

18. Kafai koe se tino telā ko mate faka-te-agaga, se a te mea e mafai o mautinoa i a koe?

¹⁸ Kafai ko se ‵kau fakatasi nei koe mo tino o Ieova, ke iloa ne koe me koi alofa eiloa a ia ki a koe. E manako a ia ke foki atu koe ki a ia. E isi ne mea e ‵tau o fai ne koe ke toe foki koe ki a ia. Kae pelā mo te tamana i te tala fakatusa a Iesu, e kilokilo mai faeloa a Ieova ki te taimi e foki mai ei koe, kae ka talia ne ia koe mo te fiafia lasi.