“Au se tino mata mā,” muna Sara, * “kae e se lasi toku loto talitonu ki a au loa. Tela la, au e manavase sāle māfai e ‵nofo tasi mo tino kolā e uiga kaitāua. Kae ko au e se manavase māfai e ‵nofo tasi mo se tino telā e agamalu kae loto maulalo. E mafai o fakaasi atu ne au ki se vaegā tino penā oku lagonaga mo oku fakalavelave. Oku taugasoa e uiga agamalu kae loto maulalo.”

E fakaasi mai i te fakamatalaga a Sara me kafai tatou e uiga agamalu, ka ma‵nako eiloa a nisi tino o fai taugasoa mo tatou. A te agamalu e fakafiafia atu foki ki a Ieova. E fakamalosi mai tena Muna ki a tatou, penei: “Fakapei ki luga i a koutou a te . . . agamalu.” (Kolose 3:12) Se a te agamalu? Ne fakaasi mai pefea ne Iesu te agamalu? Kae e mafai pefea ne te uiga tenei o fai ‵tou olaga ke fia‵fia?

A te agamalu se uiga filemu telā e maua ne se tino. A te tino agamalu e fai faka‵lei ne ia a tino i se auala atafai kae ‵lei, kae e mafai o fakafesagai atu mo te loto pulea ki mea kolā e mafai o fakakaitaua atu ki a ia.

A te agamalu se fakailoga o se tino telā e malosi tena loto. A te pati Eleni ki te “agamalu” ne fakaaoga ke fakamatala mai i ei se solofanua vao telā ko oti ne akoako ke lata ki tino. E tumau loa te malosi o te solofanua, kae ko oti ne akoakogina a ia ke pule faka‵lei atu ki tena malosi. I se auala tai ‵pau, kafai e fakaasi atu ne tatou te agamalu, e pule faka‵lei atu tatou ki ‵tou tulaga sē ‵lei katoatoa kae fakatumau se vā filemu mo nisi tino.

E mafai o mafau‵fau tatou penei, ‘Au e sē se tino agamalu.’ E ola tatou i se lalolagi telā e salalau i ei te uiga kaitaua mo te ita vave, tela la, e mafai o faigata ki a tatou ke fakaasi atu te agamalu. (Loma 7:19) E manino ‵lei me e manakogina a taumafaiga e uke ke ati aka te agamalu, kae ko te agaga tapu o Ieova ka fesoasoani mai ke fakamalosi aka a ‵tou fakaikuga ke kausaki atu ki te ‵tou fakamoemoega ke uiga agamalu. (Kala. 5:22, 23) Kaia e ‵tau ei o taumafai malosi tatou o ati aka te uiga agamalu?

A te agamalu se uiga telā e fia‵fia ki ei a tino. E pelā mo Sara, telā ne taku mai muamua, e se manava‵se tatou māfai e ‵nofo tasi mo se tino uiga agamalu. A Iesu ko te ‵toe fakaakoakoga tu ‵kese o te uiga agamalu mo te atafai. (2 Koli. 10:1) Ke oko foki loa ki tama‵liki kolā ne seki iloa faka‵lei ne latou a ia, ne ma‵nako o fakapili‵pili atu ki a ia.—Male. 10:13-16.

A te agamalu e puipui ne ia tatou pelā foki mo tino i ‵tou tafa. Kafai tatou e agamalu, e faigata o ita vave io me kaitāua tatou. (Faata. 16:32) Ka se mafai o maua ne  tatou a lagonaga sala‵mo kolā e māfua mai māfai ko fakalogo‵mae ne tatou se tino, maise i ei māfai se tino e a‵lofa tatou ki ei. Kae e puipui ne te agamalu a latou kolā e ‵nofo i ‵tou tafa mai logo‵maega ona ko ‵tou uiga loto pulea.

Faitalia ana tiute ‵mafa mo tena fakalavelave i tena galuega, ne fakaasi atu ne Iesu te uiga agamalu ki tino katoa. E tokouke a tino i ana aso ne fi‵ta kae ‵mafa olotou amoga, kae ne manakogina ne latou te malosi fou. Se mea fakamafanafana eiloa ki a latou ke lagona atu a pati a Iesu penei: “O‵mai ki a au, . . . me i a au e agamalu kae loto maulalo”!—Mata. 11:28, 29.

E mafai pefea o ati aka ne tatou a te uiga agamalu telā ne fakaasi mai ne Iesu? E suke‵suke tatou ki te Muna a te Atua ke iloa ne tatou te auala ne saga atu ei a Iesu ki tino kae faka‵lei ne ia olotou fakalavelave faiga‵ta. Tela la, kafai ko tofotofo aka a te ‵tou agamalu, e taumafai tatou o fai pelā mo Iesu. (1 Pe. 2:21) Mafaufau ki mea e tolu kolā ne fesoasoani atu ki a Iesu ke uiga agamalu.

A Iesu ne loto maulalo. Ne fai mai a Iesu i a ia e “agamalu kae loto maulalo.” (Mata. 11:29) E fakasae aka ne te Tusi Tapu a uiga konei e lua i te taimi loa e tasi, me isi se sokoga o te agamalu ki te loto maulalo. (Efe. 4:1-3) Kaia?

A te loto maulalo e fesoasoani mai ke ‵kalo kea‵tea tatou mai te ita vave i pati e fai mai ne nisi tino e uiga ki a tatou. Ne saga atu pefea a Iesu ki a latou kolā ne taku fakamasei ne latou a ia e pelā me se “tino gafula” kae “inu uaina”? Ne fakamaoni mai ne ia me e se tonu te mea tenei mai te auala ne ola ei a ia. Ne faka‵mafa mai ne ia mo te agamalu me e “fakatalitonugina te poto o te tagata e auala i ana galuega amio‵tonu.”—Mata. 11:19.

Kafai e fakasae aka ne se tino se manatu valea e uiga ki tou fenua, tou kāiga io me ko koe se tagata io me se fafine, kaia e se taumafai ei koe o tali atu i se auala agamalu? Ne fai mai a Peter, se toeaina Kelisiano i Afelika ki Saute, penei: “Kafai au ko kaitaua ona ko pati a se tino, e ‵sili ifo au ki a au eiloa, ‘Ka saga atu pefea a Iesu ki ei?’” Ne toe fai mai a ia: “Ne tauloto au ke mo a ma tō fakatāua ne au a au eiloa.”

A Iesu ne malamalama i vāivāiga o tino. Ne ma‵nako a soko o Iesu o fai te mea tonu, kae ona ko te lotou tulaga sē ‵lei katoatoa, ne seki fai faeloa ne latou a te mea tonu. E pelā me se fakaakoakoga, i te po mai mua o mate a Iesu, ne seki mafai ne Petelu, Iakopo, mo Ioane o tuku atu a te fesoasoani i mea tau lagonaga telā ne fakamolemole atu ki ei a Iesu. Ne iloa ‵lei ne Iesu me “e manako ki ei te loto, kae ko vāivāi te foitino.” (Mata. 26:40, 41) Ona ko te mea ne malamalama a ia i a latou e se ‵lei katoatoa, ne seki kaitaua a Iesu ki ana apositolo.

A Mandy se tuagane telā ne masani o se fiafia ki nisi tino, kae nei ko taumafai malosi tou fafine o fakaakoako ki te uiga agamalu o Iesu. E fai mai a ia, “E taumafai au ke talia te manatu me i tino katoa e se ‵lei katoatoa, kae saga tonu atu fua ki uiga ‵lei o latou, e pelā mo te kilokiloga a Ieova.” E mata, e mafai o fesoasoani atu a te kilokiloga atafai a Iesu ki vāivāiga o tino ke fakaasi atu foki ne koe te agamalu i au faifaiga ki nisi tino?

Ne talitonu a Iesu ki te Atua. I te nofoga a Iesu i te lalolagi nei, ne kufaki ne ia a faifaiga sē fakamaoni. Ne taku fakamaseigina a ia, takalia‵lia ki ei a tino, kae ne fakasauagina. Kae ne tumau eiloa a ia i te agamalu, me ne “tuku atu ne ia a ia eiloa ki te Atua telā e fai ne ia a te fakamasinoga amiotonu.” (1 Pe. 2:23) Ne iloa ne Iesu me ka tausi a ia ne tena Tamana faka-te-lagi, kae ka fakasala ne ia a latou kolā ne fai fakamasei ne latou a ia i tena taimi tonu.

Kafai tatou e kaitāua ona ko faifaiga sē fakamaoni e fai mai ki a tatou, e faigofie fua o fakalasi ne tatou a te fakalavelave. Tenā te pogai e fakamasaua mai te Tusi Tapu ki a tatou: “E se mafai o aumai ne te ita o te tagata a te amiotonu o te Atua.” (Iako. 1:20) Kafai foki loa e isi se pogai tonu e kaitāua ei tatou, e mafai o takitaki atu tatou ne te tulaga sē ‵lei katoatoa ki te auala ‵se.

A Cathy, se tuagane Siamani, ne mafaufau sāle penei, ‘Kafai e se ‵pulu ne koe a koe eiloa, ka seai se tino ka ‵pulu ne ia koe.’ Kae i te taimi ne tauloto ei a ia ke talitonu ki a Ieova, ne ‵fuli tena kilokiloga. “Nei la, ko se manako au o ‵pulu a au eiloa,” ana muna. “Ko mafai o fakaasi atu ne au te agamalu, me ko iloa ne au me ka faka‵lei ne Ieova a mea sē ‵lei katoa i te lalolagi nei.” Kafai e fakafesagai koe mo faifaiga sē fakamaoni, a te tautali i te fakaakoakoga a Iesu ke talitonu ki te Atua,  ka fesoasoani atu foki ke fakatumau ne koe a te uiga agamalu.

Ne fakasae aka ne Iesu te manatu me isi se tusaga tāua o te agamalu ki te ‵tou fia‵fia. Ana muna: “E fia‵fia a latou kolā e loto maulalo” io me agamalu. (Mata. 5:5) Mafaufau ki te auala e fesoasoani atu te agamalu ki tulaga konei mai lalo.

A te agamalu e fesoasoani o fakafeoloolo a te manavase i se olaga avaga. “Ne fai atu ne au a pati faka‵mae loto e uke ki taku avaga e aunoa mo te mafaufau,” ko pati a Robert, se taina mai Ausetalia. “Kae ko pati kolā e fai atu mo te kaitāua e se mafai o toe faka‵foki. Ne ma‵sei oku lagonaga ona ko te lasi o te logo‵mae o taku avaga i aku pati ne fai atu ki a ia.”

“A tatou katoa e ‵siga i taimi e uke” i ‵tou pati e fai, mo pati kolā e fai mo te sē mafaufau kae e mafai o fakamasei ne ia te tulaga filemu i te olaga avaga. (Iako. 3:2) I vaegā taimi penā, e fesoasoani mai eiloa te agamalu ke uiga filemu tatou kae ke pule faka‵lei atu ki ‵tou gutu.—Faata. 17:27.

Ne galue malosi a Robert ke ati aka te uiga filemu mo te loto pulea. Se a te mea ne iku mai i ei? “Nei la, kafai ko sae aka se kinauga, e taumafai malosi loa au o fakalogologo faka‵lei, faipati atu mo te agamalu, kae taumafai ke mo a ma kaitaua,” ko ana muna. “Nei la, ko gasolo eiloa o ‵lei ‵ki a te fesokotakiga o māua mo taku avaga.”

A te agamalu e fesoasoani mai ke ‵lei ‵tou va mo nisi tino. A latou kolā e kaitāua vave e se tokouke sāle olotou taugasoa. Kae ko te agamalu e fesoasoani mai “ke fakatumau ne [tatou] . . . te tasi o te agaga telā ko te fusi o te filemu.” (Efe. 4:2, 3) Ne fai mai a Cathy, telā ne sae muamua mai penei, “Kafai au e agamalu, e mafai o fia‵fia tasi au mo nisi tino, faitalia me e faigata ke fakamasani faka‵lei atu ki nisi tino.”

A te agamalu e aumai ne ia te filemu o te loto. E soko ne te Tusi Tapu a “te poto mai te lagi” mo te agamalu mo te filemu. (Iako. 3:13, 17) A te tino agamalu e maua ne ia “te loto telā e filemu.” (Faata. 14:30) Ne fai mai a Martin, telā ne galue malosi o ati aka te uiga agamalu, penei, “Au nei ko uiga faigofie kae ko se kaitaua vave, kae ko maua nei ne au te filemu i te loto mo te fiafia.”

E tonu, e ‵tau o taumafai malosi tatou o ati aka te uiga agamalu. Ne fai mai se taina e tokotasi penei, “Au e fai ‵tonu atu, ke oko mai nei, koi isi loa se uiga kaitaua i loto i a au i nisi taimi.” Kae ko Ieova, telā e fakamalosi ne ia tatou ke kausaki atu ke uiga agamalu, ka fesoasoani mai ki a tatou. (Isa. 41:10; 1 Timo. 6:11) E mafai o ‘fakakatoatoa ne ia ‵tou akoakoga’; e mafai o ‘fakamalosi ne ia tatou.’ (1 Pe. 5:10) Fakamuli loa, ka mafai o fakaakoako tatou ki te “agamalu mo te atafai o te Keliso,” e pelā eiloa mo te mea ne fai ne te apositolo ko Paulo.—2 Koli. 10:1.