A valoaga i te tiāti tenei e fakamatala mai ei a mea kolā ne ‵tupu tasi i te taimi e tasi. E fakamaoni mai ne mea katoa konā me ko ola tatou i “te taimi o te gataga.”—Tani. 12:4.

• Tusi fai‵tau Faka. 11:7; 12:13, 17; 13:1-8, 12

  Valoaga “Te manu fekai” e fanofano i te lalolagi i senitenali e uke. I te taimi o te gataga, ne pakia tena fitu o ulu. Fakamuli ifo, ne mafu te ulu tenā kae ko “te lalolagi kātoa” ne tau‵tali i te manu fekai. E fakaaoga ne Satani a te manu fekai tenā ke “taua ki tama a te fafine kolā e ‵toe mai.”

  Fakataunuga Mai tua o te Lolo, a malo o tāgata kolā ne ‵teke ki a Ieova ne pule atu ki tino. I se fia senitenali ki tua ifo, i te taimi o te Taua Muamua, ne vāivāi ‵ki te Malo o Peletania. Ne toe malosi mai i te taimi ne ‵kau tasi ei mo te Iunaite Sitete. E fakaaoga ne Satani ana malo fakapolitiki katoa ke fakasaua atu ki tino o te Atua, maise loa i te taimi o te gataga.

• Tusi fai‵tau Tani. 11:25-45

  Valoaga Te tupu ki mātū ka fai fili mo te tupu ki saute i te taimi o te gataga.

  Fakataunuga Ne taua atu a te malo o Siamani ki te malo o Peletania mo Amelika. I te 1945 ne fai te Soviet Union mo fenua e ‵lago atu ki ei, mo fai te tupu ki mātū. I te 1991, ne maofa te Soviet Union, kae fakamuli ifo, ne fai a Lusia mo fenua e ‵lago ki ei, mo fai te tupu ki mātū.

• Tusi fai‵tau Isa. 61:1; Mala. 3:1; Luka 4:18

  Valoaga Ne uga ne Ieova tena “avefekau” ke “fakaavanoa ne ia se auala” koi tuai o fakatu aka a te Malo faka-Mesia. Ne olo te potukau tenei o “folafola atu te tala ‵lei ki tino agamalu.”

  Fakataunuga Kamata mai i te 1870 o fano, ne suke‵suke mo te loto finafinau a C. T. Russell mo ana taugasoa ke iloa ne latou o fakamatala atu a muna‵tonu mai i te Tusi Tapu. I te 1880 o fano, ne faka‵mafa atu ne latou a te tāua ke fai ne tavini a te Atua a te galuega talai. Ne ‵lomi ne latou a vaegā mataupu penei “E Manakogina a Tino Talai e Toko 1,000” mo te “Ne Fakaekegina ke Talai Atu.”

• Tusi fai‵tau Mata. 13:24-30, 36-43

  Valoaga Ne ‵toki ne se fili a mouku ma‵sei i se fatoaga saito kae ne tuku ke ola tasi aka kae ne seki mafai o lavea atu a saito ke oko ki te taimi e ‵kati ei a saito; tenā ne ‵vae kea‵tea ei a mouku ma‵sei mai saito.

  Fakataunuga Kamata mai te 1870 o fano, ne kamata o lavea atu a te ‵kese o Kelisiano ‵tonu mai Kelisiano ‵loi. I te taimi o te gataga, ne fakamaopoopo fakatasi a Kelisiano ‵tonu kae ‵vae kea‵tea mai Kelisiano ‵loi.

• Tusi fai‵tau Tani. 2:31-33, 41-43

  Valoaga A vae fiti kolā e palutasi mo te kele ko vae o se tupua telā ne faite ki vaegā fiti kese‵kese.

  Fakataunuga A te kele e fakasino atu ki tino mai lalo i te Pulega a Peletania mo Amelika kolā e ‵teke ki malo konā. Ko tino konei e fakavāivāi ne latou te pulega a malo konei ke pule atu pelā me se fiti.

• Tusi fai‵tau Mata. 13:30; 24:14, 45; 28:19, 20

  Valoaga “A saito” ne ‵luku ki loto i te “fale saito” kae ne ‵tofi aka “te tavini fakamaoni kae poto” ke tausi atu ki “nisi tavini.” Ne kamata o salalau atu a te talaiga o te ‘tala ‵lei o te Malo’ ki “te lalolagi nofoaki kātoa.”

  Fakataunuga I te 1919 ne ‵tofi aka te tavini fakamaoni ke tausi atu ki tino o te Atua. Mai te taimi tenā o fano ki mua, ne ‵saga malosi a Tino A‵koga ki te Tusi Tapu o fai te galuega talai. I aso nei, e talai atu a Molimau a Ieova i fenua e silia atu i te 200 kae ‵lomi a tusi faka-te-Tusi Tapu i ‵gana e silia atu i te 1,000.

• Tusi fai‵tau Tani. 12:11; Faka. 13:11, 14, 15

  Valoaga E takitaki ne se manu fekai telā e lua ana suki a tino ke faite ne latou se “fakatusa o te manu fekai” kae ne tuku atu a “te mānava ki te fakatusa o te manu fekai.”

  Fakataunuga Ko te Malo o Peletania mo Amelika ne fakatu ne ia a Malo ‵Kaufakatasi. Ne ‵lago atu a nisi atufenua ki te fakapotopotoga tenei. Fakamuli ifo, ne aofia foki te tupu ki mātū i te fakapotopotoga tenei—mai te 1926 ke oko fua ki te 1933. Ne tali‵tonu a tino me ko Malo ‵Kaufakatasi ka aumai ne ia te filemu ki te lalolagi, ko te mea telā e mafai fua o fai ne te Malo o te Atua. Ne tali‵tonu foki latou me ka fai foki ne Malo ‵Soko (UN) telā ne fakatu mai tua ifo, a te mea tenā.

• Tusi fai‵tau Tani. 8:23, 24

  Valoaga Ka isi se tupu mata kaitaua ka “fakamasei ne ia a mea i se auala fakaofoofogia.”

  Fakataunuga Te Malo o Peletania mo Amelika ne fakamasei ne ia a mea e uke ‵ki. E pelā mo te Taua i te II, a fakamaseiga ne fai ne te Iunaite Sitete ko siliga loa i te uke faka‵pau ki taimi mua, i te taimi ne pōmu ei ne ia se fenua telā e fai fili ki a lāua mo Peletania.

• Tusi fai‵tau Tani. 11:31; Faka. 17:3, 7-11

  Valoaga Ne sae mai te “manu fekai lanu kula” telā e sefulu ana suki mai te lua ‵poko kae ko ia te valu o tupu. Ne fakasino atu te tusi ko Tanielu ki te tupu tenei pelā me ko “te mea fakatakalialia telā e māfua i ei te fakamaseiga.”

  Fakataunuga I te Taua i te II ne galo ifo te fakapotopotoga o Malo ‵Kaufakatasi. Mai tua o te taua, ne tuku atu a Malo ‵Soko ki tena “koga tonu.” E pelā mo Malo ‵Kaufakatasi ne fai mai a Malo ‵Soko me ka aumai ne ia te filemu ki te lalolagi, ko te mea telā e mafai fua o fai ne te Malo o te Atua. Ka taua atu a Malo ‵Soko ki lotu.

• Tusi fai‵tau 1 Tesa. 5:3; Faka. 17:16

  Valoaga Ka folafola mai a atufenua me ko “filemu kae tokagamalie” a mea, kae ka taua atu a “suki e sefulu” mo “te manu fekai” ki “te fafine talitāgata” kae fakaseai atu tou fafine. Oti ei, ko te mea loa ko fakaseai atu a atufenua.

  Fakataunuga E fai mai a atufenua me ko maua ne latou te filemu mo te tokagamalie. Tenā te taimi ka ‵saga atu ei a atufenua kolā e ‵kau ki Malo ‵Soko o fakaseai a lotu ‵se. E fakamailoga ne te mea tenei a te kamataga o te fakalavelave lasi. Ka fakaoti te fakalavelave tenā ki te fakaseaiga o te olaga masei kātoa tenei i Amaketo.

• Tusi fai‵tau Eseki. 38:11, 14-17; Mata. 24:31

  Valoaga Ka ulu mālō atu a Koka ki te fenua e ‵nofo ei a tino o te Atua. Kae ko agelu ka fakamaopoopo ne latou a “tino filifilia.”

  Fakataunuga A te tupu ki mātū, fakatasi mo nisi malo, ka taua atu ki tino o te Atua. Mai tua malie o te kamataga o te taua tenei, kae ka fakamaopoopo a te ‵toega o te kau fakaekegina ki te lagi.

• Tusi fai‵tau Eseki. 38:18-23; Tani. 2:34, 35, 44, 45; Faka. 6:2; 16:14, 16; 17:14; 19:20

  Valoaga A “te tino e sopo” i luga i te “solofanua ‵kena” ka fakaoti “tena manumalo” mai te fakaseaiga o Koka mo tena kautau. “Te manu fekai” ko ‵pei ki te “lase ‵ka ulaula,” kae tuki palapala a te tupua lasi ‵ki.

  Fakataunuga A Iesu, te Tupu telā e pule i te Malo o te Atua, ka faka‵sao ne ia a tino o te Atua. Ka ‵mai a ia fakatasi mo pule lagolago e toko 144,000 mo te kautau o agelu, ka fakaseai ne ia a atufenua ‵kaufakatasi, ko te fakapotopotoga fakapolitiki kātoa a Satani.