1. Se a te mataupu tāua ne sau‵tala fakatasi ki ei a Iesu mo ana soko i tena toe po mo latou?

I TENA toe po fakatasi mo ana soko, ne fakasae aka ne Iesu a te pati alofa i taimi kāti toeitiiti ko kātoa te 30. Ne faka‵mafa fakapitoa atu ne ia ki ana soko me e ‵tau mo latou o “fakatau a‵lofa.” (Ioa. 15:12, 17) A te fakatau a‵lofa o te suā tino ki te suā tino e ‵tau o tu ‵kese ke mafai o lavea faka‵lei atu ei i a latou ko ana soko ‵tonu. (Ioa. 13:34, 35) A te alofa tenei e se ko te alofa valea. Ne fakasino atu loa a Iesu ki te ‵toe uiga tāua—ko te alofa sē fakapito. Ne fai mai a ia: “E seai se tino e sili atu tena alofa i lō te mea tenei, ko te tuku atu ne se tino a tena ola mō ana taugasoa. A koutou ko oku taugasoa māfai e fai ne koutou a mea kolā e fakatonu atu ne au ki a koutou.”—Ioa. 15:13, 14.

2. (a) Se a te uiga e iloga i ei a tino o te Atua? (e) Ne a fesili ka tali aka ne tatou i te mataupu tenei?

² A te alofa sē fakapito mo te fealofani o tavini a Ieova i aso nei se fakailoga i a latou ko tino o te Atua. (1 Ioa. 3:10, 11) Ko oko eiloa ‵tou loto fakafetai me i te alofa tenei o Keliso e maua katoa ne tavini a Ieova faitalia te kese‵kese o olotou fenua, matakāiga, ‵gana io me ko tulaga i te olaga! Kae e mafai o mafau‵fau tatou penei: ‘Kaia ko tāua ‵ki eiloa a te alofa i ‵tou aso nei? E fakamalosi aka pefea ne Ieova mo Iesu a tatou i te alofa? E mafai pefea ne tatou taki tokotasi  o fakaasi atu te alofa o Keliso telā e “ati aka ei te tino”?’—1 Koli. 8:1.

3. E pokotia pefea a tino i “taimi faiga‵ta” konei?

³ Ona ko te olaga ko ‵fonu i “fakalavelave mo te fanoanoa,” e tokouke a tino i “taimi faiga‵ta konei” e logo‵mae i vaega kese‵kese o te loto mafatia i mea tau lagonaga. (Sala. 90:10; 2 Timo. 3:1-5) E tokouke a tino ko mafau‵fau me ko se ‵kafi ne latou o kufaki. E tuku taumate pelā me silia atu mo te toko 800,000 tino e ‵mate i tausaga katoa mai te faka‵mate—e nofo ki se tokotasi o tino mate i se 40 sekone i aso katoa. Se mea fakafanoanoa, me ko pokotia foki a nisi Kelisiano i vaegā fakamalosiga penā kae ko oti foki ne faka‵mate atu latou.

4. Ko oi a tino i te Tusi Tapu kolā ne ma‵nako ke ‵mate latou?

⁴ I taimi o te Tusi Tapu, e isi ne tavini fakamaoni a te Atua ne manava‵se malosi foki ona ko olotou fakanofonofoga kae ne fia ‵mate foki latou. E pelā me se fakaakoakoga, ne fai mai a Iopu telā ne logo‵mae malosi, penei: “Au e takalialia ki toku ola; e se manako au ke tumau i te ola.” (Iopu 7:16; 14:13) A Iona ne fanoanoa ‵ki eiloa telā ne fai mai a ia, penei: “Nei la, e Ieova, fakamolemole ave kea‵tea toku ola, me e ‵lei atu ke na mate au i lō te tumau i te ola.” (Iona 4:3) E se gata i ei, i se taimi e tasi ne pokotia malosi a te pelofeta ko Elia i ana fakanofonofoga telā ne fakamolemole atu ei ke mate a ia. Ne fai mai a ia: “Ko lava! I te taimi nei e Ieova, na ave kea‵tea toku ola.” (1 Tupu 19:4) E ui i ei, ne fakatāua ne Ieova a tavini loto finafinau konei kae ne manako a ia ke ola latou. I lō te fakamasei ne ia olotou lagonaga, ne fesoasoani atu a ia ki a latou ke manumalo i olotou manakoga ke ‵mate kae fakamalosi ne ia latou i te alofa ko te mea ke mafai o tumau latou i te tavini atu ki a ia mo te fakamaoni.

5. Kaia e manakogina i ei ne taina mo tuagane a te ‵tou a‵lofa maise eiloa te taimi nei?

⁵ I aso nei, e tokouke a ‵tou taina mo tuagane e fakafesagai atu ki tulaga fakafi‵ta i te olaga, kae e manakogina ne latou te ‵tou a‵lofa. Nisi e kufaki i fakasauaga mo fakatauemuga. A nisi e fai fakamasei io me fatufatu ne tino e ga‵lue tasi latou. Io me ko fi‵ta latou ona ko te ga‵lue ovataimi io me ko tō uke olotou galuega. Kae ko nisi e fakafesagai atu loa ki fakalavelave i te kāiga, kāti ko pati fakatauemu mai tena avaga telā se tino sē talitonu. Ona ko ikuga o fakalavelave konei pelā foki mo nisi fakamalosiga, e tokouke a tino i te fakapotopotoga ko kamata o fi‵ta i te feitu faka-te-foitino mo te feitu i mea tau lagonaga. Ko oi e mafai o fesoasoani atu ki tino loto vāi‵vai konā ke tumau i te ga‵solo ki mua?

6. E fakamalosi pefea ne Ieova ana tavini i te alofa?

⁶ E fakamalosi ne Ieova ana tino tapuaki mai te fakatalitonu atu ki a latou e uiga ki tena alofa tumau. Ko oko eiloa i te fakamalosi loto o te mea tenā mō tino Isalaelu fakamaoni ke lagona ne latou a pati a Ieova, penei: “A koe ne fai pelā me se mea tāua i taku kilokiloga, a koe ne fakaaloalogina, kae ne alofa au ki a koe. . . . Sa mataku me i a au e fakatasi au ki a koe”! (Isa. 43:4, 5) E pelā me se tokotasi o tavini a Ieova, e mafai o mautinoa i a koe me i a Ieova e alofa malosi atu ki a koe. * E tauto mai penei te Muna a te Atua e uiga ki tino kolā e ‵sala atu ki te tapuakiga ‵ma, penei: “E pelā me se Atua malosi, ka fakasao ne ia koe. Ka fiafia a ia ona ko koe i te fiafia lasi.”—Sefa. 3:16, 17.

7. I te auala fea e ‵pau ei te alofa o Ieova mo te alofa o se mātua telā e tausi atu ki tena tama? (Ke onoono ki te ata i te kamataga.)

⁷ Faitalia me ne a fakalavelave e mafai o fe‵paki mo ana tino, e tauto mai eiloa a Ieova  me ka fakatumau kae fakamafanafana ne ia latou. “Ka tausi faka‵lei koe kae tauave i ana taugasulu, kae ka lūlū koe i luga i ana tulivae. E pelā me se mātua e fakamafanafana ne ia tena tama tagata, ka tumau eiloa au i te fakamafanafana atu ki a koe.” (Isa. 66:12, 13) Mafaufau la ki te fakamalosi loto o te mea tenei—se mātua alofa e tauave ne ia tena pepe i ana taugasulu, io me lūlū ne ia i luga i ana tulivae! E fakaasi mai eiloa ne Ieova i te auala tenei a te lasi o tena atafai mo tena alofa mō ana tino tapuaki ‵tonu. Ke mo a koe e fakalotolotolua me e tāua kae pele ‵ki eiloa koe ki a Ieova.—Iele. 31:3.

8, 9. E mafai pefea ne te alofa o Iesu o fakamalosi tatou?

⁸ Tenei te suā pogai e iloa i ei ne tatou me e alofa mai te Atua ki a tatou: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino telā e fakaasi atu faeloa te fakatuanaki ki a ia kae ke maua ne ia te ola se-gata-mai.” (Ioa. 3:16) Ko tafaga la te alofa tenei ne fakaasi mai foki ne Iesu i te tukumaiga o tena ola mō tatou! Kae ko oko eiloa i te fakamalosi loto o te alofa tenā mō tatou! E folafola mai te Muna a te Atua me e se mafai foki ne “puapuaga io me ko te loto mafatia” o “‵vae kea‵tea ne ia tatou mai te alofa o Keliso.”—Loma 8:35, 38, 39.

⁹ Kafai e fakafesagai atu tatou ki fakalavelave faiga‵ta i te feitu faka-te-foitino, mea tau lagonaga, io me ko vāi‵vai i te feitu faka-te-agaga, a te malosi o te alofa o Keliso e aumai ne ia te malosi ke kufaki tatou. (Faitau te 2 Kolinito 5:14, 15.) E isi se malosi o te alofa o Iesu ke fakatumau i ei tatou kae fakamalosi ke mo a e ‵fiu vave tatou, māfai foki e fakafesagai atu tatou ki vaegā fakalavelave o te natula, fakasauaga, mea fakafanoa‵noa, mo te manavase.

10, 11. Ko oi e maua ne latou te tiute ke fakamalosi aka a taina loto vāi‵vai? Fakamatala mai.

¹⁰ A te auala e tasi e fakamalosi aka ei ne Ieova tatou i te alofa ko te fakapotopotoga Kelisiano. E pelā me ne tino taki tokotasi, e mafai o taui atu ne tatou tena alofa kae fakamalosi aka ‵tou taina mo tuagane e se fua i te feitu faka-te-agaga kae penā foki mo mea tau lagonaga. (1 Ioa. 4:19-21) Ne fakamalosi atu te apositolo ko Paulo ki Kelisiano: “Fakamalosi atu te suā tino ki te suā tino, e pelā eiloa mo te mea e fai nei ne koutou.” (1 Tesa. 5:11) Ao, a tino katoa i te fakapotopotoga—e se ko toeaina fua—e mafai o fakaakoako atu ki a Ieova mo Iesu i te fakamafanafanaga mo te fakamalosiga o  taina mo tuagane.—Faitau te Loma 15:1, 2.

¹¹ A nisi tino i te fakapotopotoga kolā e logo‵mae ona ko te loto mafatia e mafai o manakogina ne latou se fesoasoani mo vailakau fakatokita. (Luka 5:31) A toeaina mo nisi tino i te fakapotopotoga e iloa ne latou i a latou e se ne tokita kolā ko oti ne fakamasani faka‵lei ki olotou galuega. Kae e ui i ei, e isi se tiute tāua o latou mo nisi tino i te fakapotopotoga—ke “fakamafanafana atu ki tino loto mafatia, ‵lago atu ki tino vāi‵vai, kae kufaki i tino katoa.” (1 Tesa. 5:14) E ‵tau mo Kelisiano katoa o fakaasi atu te loto alofa mo te kufaki, mai te fakamafanafana atu ko te mea ke fakamalosi aka ei a tino loto vāi‵vai. E mata, a koe se tino fakamafanafana kae fakamalosi tino? A te iloa atu a te auala ke tuku atu te vaegā fesoasoani penā e mafai o aoga ‵ki eiloa.

12. Taku mai se fakaakoakoga o se tino telā ne fakamalosi aka ona ko te a‵lofa o tino o te fakapotopotoga.

¹² E mafai pefea ne te ‵tou a‵lofa o fakamalosi aka a latou kolā e fe‵paki mo lagonaga fakalogo‵mae? “I nisi taimi, e mafaufau au ke fano o fakamate,” ko pati a se tuagane Kelisiano i Eulopa. “Kae e isi eiloa se fakapotopotoga telā e ‵lago mai. A te fakapotopotoga telā e kau au ki ei ne fakasao ne ia toku ola. A taina mo tuagane e fakamalosi loto kae a‵lofa. E tiga eiloa ne nāi tino fua e iloa ne latou me i a au ne logo‵mae ona ko te loto mafatia, kae e ‵lago mai faeloa a te fakapotopotoga ki a au. E isi se tauavaga i konā ne fai mo fai oku mātua faka-te-agaga. Ne tausi faka‵lei ne lāua au, kae e ‵nofo mai faeloa lāua i oku tafa i te 24 itula i te aso.” E tonu, e se ko tino katoa e mafai o fesoasoani mai i auala konei. Kae ko te ‵lago tonu atu o tatou e mafai o fai pelā me se mea tu ‵kese ki a latou kolā e logo‵mae i mea tau lagonaga. *

13. Se a te mea e ‵tau o fai ne tatou māfai e ma‵nako tatou o fakamalosi atu a nisi tino?

¹³ Ke fai pelā me se tino fakalogologo. (Iako. 1:19) A te fakalogologo mo te loto alofa se vaega o te alofa. E mafai o ‵sili ne koe a fesili i se auala atamai kae atafai mo te fakamoemoega ke malamalama i lagonaga o te tino telā e logo‵mae. I te faiga tenā, ka mafai ei ne koe o fakaasi atu a te loto alofa kae fakamalosi aka tou taina. Ke fakaasi atu i ou foliga i a koe e alofa kae manavase tonu ki a latou. Kafai e iloa ne nisi Kelisiano a te tāua ke fakamatala atu a mea i se auala tai ‵lei atu, ke kufaki kae ‵teke atu so se fakamalosiga ke fakalavelave atu ki a latou. Mai te fakalogologo mo te kufaki, ka mafai eiloa o malamalama ‵lei koe i olotou lagonaga. E mafai o fesoasoani atu a te mea tenā ki ou taina mo tuagane kolā e logo‵mae ke loto tali‵tonu ki a koe kae ke loto fia‵fia o fakalogologo atu ki a koe i te taimi e taumafai ei koe o fakamalosi. Kafai e fakaasi atu ne koe a te atafai tonu, ka fakamafanafana atu eiloa koe ki a latou.

14. Kaia e ma‵nako ei tatou o ‵kalo kea‵tea mai te uiga fameo?

¹⁴ ‵Kalo kea‵tea mai te uiga fameo. A te fameo ki se tino loto mafatia e mafai o fakaopoopo ki te kaitaua o te tino tenā kae mafai o manatu māmā ki olotou taumafaiga e uke ke fakamalosi aka latou i te alofa. “A pati e fai mo te sē mafaufau e ‵pau mo te ‵suki o se pelu, kae ko te gutu o te tino poto se faka‵leiga.” (Faata. 12:18) E pelā mo te masani, e se ‘suki’ ne tatou a tino loto mafatia ki pati fakalogo‵mae. Kae kafai foki loa ne ‘‵suki’ se tino i se auala fakafuasei, e mafai eiloa o logo‵mae ‵ki a te ikuga. Ke ati aka a nisi tino i te alofa mai te fakamalosi atu latou, e manakogina i ei a te loto alofa, mai te taumafai malosi ke malamalama faka‵lei tatou i olotou fakanofonofoga.—Mata. 7:12.

15. Se a te mea faigaluega tāua e mafai o fakaaoga ne tatou ke fakamalosi aka ei a nisi tino i te alofa?

 ¹⁵ Fakamafanafana atu a nisi tino ki te Muna a te Atua. (Faitau te Loma 15:4, 5.) A te Tusi Tapu se meaalofa tāua o fakamafanafanaga. Ne aumai mai ne “te Atua telā e tuku mai ne ia te kufaki mo fakamafanafanaga.” I tafa o tusi siki fakamafanafana, e maua ne tatou a mea faigaluega i te Tusi Tapu mō fai a sukesukega. E mafai ne tatou o fakaaoga a te Watch Tower Publications Index mo te Research Guide for Jehovah’s Witnesses. E mafai o fesoasoani mai a mea konei ke maua ne tatou a tusi siki mo tusi kolā e mafai o fakaaoga ne tatou ke fakamafanafana kae fakamalosi aka a taina mo tuagane i se auala magoi.

16. Ne a uiga kolā e manakogina ne tatou māfai e fakamalosi atu ne tatou se Kelisiano loto mafatia?

¹⁶ Ke atafai kae loto a‵lofa. A mea konei ne vaega tāua o te alofa kaimalie telā e fakaasi ne tatou māfai e fakamalosi kae ati aka ne tatou se tino. A Ieova ko te “Tamana o te alofa fakamagalo mo te Atua o fakamafanafanaga katoa,” kae ko ia e “alofa atafai” ki ana tavini. (Faitau te 2 Kolinito 1:3-6; Luka 1:78; Loma 15:13) Ne tuku mai ne Paulo se fakaakoakoga ‵lei i te feitu tenei, i tena tusi: “E fai matou mo fai ne tino uiga atafai māfai e ‵nofo tatou, e pelā eiloa mo te atafai o se mātua ki ana pepe. Ona ko te motou a‵lofa atafai ki a koutou, ne fia‵fia malosi matou o tuku atu ki a koutou, e se gata fua i te tala ‵lei a te Atua, kae e pelā foki mo omotou ola, me e fakapelepele ne matou a koutou.” (1 Tesa. 2:7, 8) Kafai e fakaasi atu ne tatou a te atafai pelā mo te Atua, e mafai eiloa o fai tatou e pelā me se tali ki ‵talo a se tino loto mafatia.

17. Se a te kilokiloga paleni e uiga ki ‵tou taina telā ka fesoasoani mai ke fakamalosi aka ei latou i te alofa?

¹⁷ Ke mo a e fakamoemoe ke ‵lei katoatoa ‵tou taina. Ke fakatumau se kilokiloga paleni e uiga ki ‵tou taina mo tuagane faka-te-agaga. A te fakamoemoe ke ‵lei katoatoa a ‵tou taina se mea telā e aumai ne ia a te fanoanoa. (Fai. 7:21, 22) Masaua me e iloa ne Ieova a mea kolā e manako a ia ke fai ne ana tavini. Kafai e tau‵tali tatou i tena fakaakoakoga, ke toka eiloa tatou o kufaki i tulaga sē ‵lei katoatoa o nisi tino. (Efe. 4:2, 32) I lō te mafau‵fau me e se uke a mea e fai ne ‵tou taina, taumafai ke fakamālō atu ki a latou mō mea e fai ne latou. E mafai o fakamalosi atu te mea tenā ki a latou. A te fakamālō tonu atu e mafai o fakamalosi aka ne ia a nisi tino i te alofa kae fesoasoani atu ki a latou ke ‵sala atu ki se “pogai ke fiafia” i te olotou taviniga tapu. Ko oko eiloa i te ‵lei fakafia atu māfai e fai tatou penā i lō te fakatusa‵tusa ‵tou mea e fai ki nisi tino.—Kala. 6:4.

18. Se a te fakamalosiga e maua ne tatou ke ati aka a nisi tino i te alofa?

¹⁸ A mamoe katoa a Ieova e tāua ‵ki eiloa ki a ia mo Iesu, telā ne tuku mai ne ia te taulaga togiola. (Kala. 2:20) E a‵lofa tatou ki ‵tou taina mo tuagane pele faka-te-agaga. Kae e ma‵nako tatou o tausi atu ki a latou i se auala atafai kae alofa. Ko te mea ke fai pelā me se tino fakamalosi, “ke na kausaki atu tatou ki mea kolā e maua ei a te filemu mo mea kolā e fakatau fakamalosi aka ei te suā tino ki te suā tino.” (Loma 14:19) Ko oko eiloa te olioli o tatou ki te taimi i te Palataiso, telā ka seai lele eiloa se pogai e loto vāi‵vai ei tatou! Ka se toe ai ne masaki, taua, te mate telā ne fa‵nau mai mo tatou, fakasauaga, kinauga mo mea fakafanoa‵noa. Kafai ko oti atu a te Meleniuma, ka mafai eiloa o maua ne tino katoa a te tulaga ‵lei katoatoa. A latou kolā e ‵sao atu i te ‵toe tofotofoga ka fai pelā me ne tama puke a Ieova te Atua i te lalolagi nei kae maua ne latou a te “saolotoga ‵malu o tama a te Atua.” (Loma 8:21) Ke na tumau eiloa tatou katoa i te fakaasi atu o te alofa telā e fakamalosi kae fesoasoani atu ki tino taki tokotasi ke maua te fakamoemoega fakafiafia kae gali tenā.