1. E pokotia pefea a te ‵tou loto maulalo i te agaga kaimanako o te lalolagi?

KAIA e faigata ei ke fakagalue aka a mea e tauloto ne tatou mai te Muna a te Atua? A te pogai e tasi me e manakogina te loto maulalo ke fai te mea tonu, kae e tofotofogina a te ‵tou ata‵mai ke tumau i te loto maulalo. I “aso fakaoti” konei, e sikomia eiloa tatou ne tino kolā e “a‵lofa fua ki a latou eiloa, fia ‵fai tupe, fai‵pati fakamata‵mata, fakamaua‵luga” kae “seai se loto pulea.” (2 Timo. 3:1-3) E pelā me ne tavini a te Atua, e iloa ne tatou me i vaegā uiga penā e ma‵sei, kae i nisi taimi e foliga mai me i tino kolā e uiga penā e manuia kae fia‵fia i olotou olaga. (Sala. 37:1; 73:3) E mafai foki o mafaufau se tino penei: ‘E mata, e isi se pogai e fakamuamua ei ne au a mea e fia‵fia ki ei a nisi tino i lō au? Kafai e fai au mō fai “se tino sē taulia,” e mata, ka se āva mai a tino ki a au?’ (Luka 9:48) A te talia ke fakamalosi aka tatou ne te agaga kaimanako o te lalolagi e mafai eiloa o fakamasei mai ki ‵tou fesokotakiga alofa telā ko maua nei ne tatou i loto i te fakapotopotoga mo ‵tou iloga e pelā me ne Kelisiano. Kae ka maua eiloa ne tatou a ikuga ‵lei māfai e suke‵suke ki fakaakoakoga ‵lei i te Tusi Tapu kae fakaakoako ki a latou.

2. Ne a mea aoga e mafai o maua ne tatou mai tavini fakamaoni a te Atua?

² Kafai e ma‵nako tatou o fakaakoako atu ki tino fakamaoni konā, e ‵tau o suke‵suke tatou ki olotou mea ne fai kolā ne maua  mai i ei a ikuga fakafiafia. Ne maua pefea ne latou se va fakataugasoa mo te Atua, maua tena taliaga, kae maua te malosi ke fakataunu tena loto? Tenei eiloa te vaega tāua ki ‵tou feitu faka-te-agaga.

3, 4. (a) E maua pefea ne tatou a fakatonuga faka-te-agaga? (e) Kaia e mafai o fai atu ei tatou me i mea‵kai faka-te-agaga e aofia i ei a mea e uke atu i lō te mauaga fua o te iloaga?

³ E maua ne tatou a pati fakatonutonu ‵lei mo akoakoga mai te Tusi Tapu, i ‵tou tusi faka-Kelisiano, ‵tou fakatuatusi, leo fakasalalau o te JW, e penā foki mo ‵tou fakatasiga mo fono. Kae e ‵tusa mo pati a Iesu i te Ioane 4:34, a mea‵kai faka-te-agaga e aofia i ei a mea e uke atu i lō te mauaga fua o te iloaga. Ne a nisi mea e aofia i ei? Ne fai mai a Iesu: “A taku meakai ko te faiga o te loto o ia telā ne uga mai ne ia au kae ke fakaoti foki tena galuega.”

⁴ Ki a Iesu, ne fai a te loto o te Atua e pelā me ne mea‵kai ki a ia. I te auala fea ne fai ei te mea tenei e pelā me ne mea‵kai? E pelā eiloa mo te fiafia mo te ma‵losi o ‵tou foitino māfai ne ‵gali ‵tou mea‵kai ne kai, ka ma‵losi foki ‵tou loto mo ‵tou fakatuanaki ki te ola se-gata-mai māfai e fai ne tatou a te loto o te Atua. E pefea te uke o taimi e fano ei koe ki te fakatasiga mō te galuega talai mo te fi‵ta—kae foki atu ki te fale mo te fiafia kae malosi?

5. Se a te taui o te gasuesue mo te poto?

⁵ A te tautali ki fakatonuga a te Atua se faifaiga poto eiloa. (Sala. 107:43) Kae e aoga eiloa a mea e iku mai i te poto. “E seai se mea e manako koe ki ei e mafai o faka‵pau ki te poto . . . A te mea tenā se lakau o te ola ki a latou kolā e puke ‵mau ki ei, kae ko latou kolā e taofi ‵mau ki ei ka taku me e fia‵fia.” (Faata. 3:13-18) Ne fai mai a Iesu: “Kafai e iloa ne koutou a mea konei, ka fia‵fia eiloa koutou māfai e fai ne koutou.” (Ioa. 13:17) Ka tumau eiloa te fia‵fia o soko māfai e tumau latou i te fai o te mea telā ne fakatonu atu ne Iesu ki a latou. Ne seki puke ‵mau fua latou ki ana akoakoga mo fakaakoakoga i te taimi eiloa tenā. Kae ne fai eiloa penā latou i olotou olaga katoa.

6. Kaia e ‵tau o kufaki tatou i te fakaasiga o te poto?

⁶ I aso nei, e tāua ke taumafai tatou mo te kufaki o fakagalue a mea kolā e iloa ne tatou me e ‵tonu. Ke fai se fakaakoakoga, a te tino faite motoka e isi ne ana mea faigaluega, mo te iloa o faite a mea. Kae ka se aoga eiloa ki a ia a mea konā vaganā e fakaaoga ne ia. Kafai ne masani o faite ne ia a mea i aso mua kae ne uke ana poto ‵fou ne tauloto i taimi konā, e ‵tau o tumau a ia i te galue ke mafai o momea aka tena apo i te faite mea. E penā foki tatou, e mafai o fia‵fia tatou i te taimi muamua ona me fakagalue ne tatou a mea e fai‵tau ne tatou i te Tusi Tapu. Kae ka maua ne tatou a te fiafia tumau mai te faka‵logo o tatou mo te loto maulalo ki fakatonuga a Ieova i aso takitasi.

7. Ke momea aka ‵tou ‵poto, ne a ‵tou mea e ‵tau o fai ki fakaakoakoga i te Tusi Tapu?

⁷ Ke na mafau‵fau nei tatou ki nisi tulaga kese‵kese kolā e mafai o tofotofo aka i ei ‵tou loto maulalo kae onoono ki te auala ne fakafesagai atu a tavini fakamaoni i aso mua ki vaegā tulaga faiga‵ta penā. A te malosi faka-te-agaga e se maua fua mai i te mafaufau ‵loto ki fakamatalaga. Tela la, mafaufau ki te auala e mafai o fakagalue ne koe a manatu takitasi konei, kae ke mo a e fakatalave i te fakagalue aka.

8, 9. Se a te mea e fakaata mai i te tala i te Galuega 14:8-15 e uiga ki te loto maulalo o te apositolo ko Paulo? (Ke onoono ki te ata i te kamataga.)

⁸ E manako a te Atua ke “faka‵sao a vaegā tino katoa kae ke iloa tonu ne latou a te munatonu.” (1 Timo. 2:4) Se a tau kilokiloga  ki vaegā tino katoa kolā e seki tauloto ki te munatonu? E tiga eiloa a te apositolo ko Paulo ne ‵sala atu i loto i sunako ki tino kolā ko isi ne lotou mea e iloa e uiga ki te Atua, ne ‵sala foki a ia ki tino kolā e se ne tino Iutaia. A te ‵saga atu o tino kolā e tapuaki atu ki nisi atua ne mafai o tofotofo aka i ei a te lasi o tena loto maulalo.

⁹ I te malaga fakamisionale muamua a Paulo, ne mafau‵fau a tino Lukaonia me i a lāua mo Panapa ne atua—e pelā me ko sui o olotou atua ‵se ko Seu mo Heleme. E mata, ne talia ne Paulo mo Panapa ke tofotofogina lāua ke fia takutakua? E mata, ne mafau‵fau lāua me ko maua se avanoaga ke se toe fakasauagina lāua e pelā mo te mea ne fai ne fakai e lua mai mua atu? E mata, ne mafau‵fau lāua me kafai e takutakua lāua, ka tokouke ka faka‵logo ki te tala ‵lei? Ikai loa! Ne ‵teke fakavave atu lāua mai te saesae o lā gatu ‵loa kae ‵tele atu ki te vaitino, kae ka‵laga atu: “Oku tāgata, kaia e fai ei ne koutou a mea konei? A māua foki ne tino kolā e isi ne mā vāivāiga e pelā eiloa mo koutou.”—Galu. 14:8-15.

10. I te auala fea ne faka‵pau ei ne Paulo mo Panapa a lāua ki tino Lukaonia?

¹⁰ Mai te fai atu i a lāua foki e se ‵lei katoatoa, ne seki fakauiga a Paulo mo Panapa me ‵pau lā talitonuga mo latou kolā e tapuaki ki atua fapaupau. E a, a lāua e se ne misionale kolā ne tuku atu ki ei se galuega fakapito? (Galu. 13:2) E a, e seki fakaekegina lāua ki te agaga tapu kae maua se fakamoemoega gali mō aso mai mua? Ao, kae ne malama‵lama eiloa a Paulo mo Panapa me i tino Lukaonia e mafai o maua foki ne latou a tauliaga konā māfai e talia ne latou a te tala ‵lei.

11. Kafai ko talai atu, e mafai pefea o fakaakoako atu tatou ki te loto maulalo o Paulo?

¹¹ E mafai pefea o fakaakoako tatou ki te loto maulalo o Paulo? Muamua la, e ‵tau o ‵teke atu tatou ki so se tavaega e maua ne tatou ona ko mea ‵gali e maua ne tatou mai te malosi o Ieova. E ‵tau mo tatou taki tokotasi o fesili ifo ki a tatou eiloa: ‘Se a taku kilokiloga e uiga ki tino kolā e talai au ki ei? E mata, ne fapito au i aku mea e fai ki nisi potukau o tino?’ Se tala fakafiafia me i Molimau a Ieova i te lalolagi kātoa e iloilo faeloa olotou koga talai, māfai ko isi ne tino mai fenua fakaa‵tea ko ‵nofo i ei. E ma‵nako eiloa latou o fai te ‵toe mea e mafai ke fesoasoani atu ki tino katoa ke iloa a te tala ‵lei. I nisi taimi, e mafai o manakogina ke tauloto ki se ‵gana fou io me ko tuu kolā e masani ki ei a tino o te fakai. E seai se fakalotolotolua me i Molimau kolā e olo atu ki koga penā e se fia ma‵luga atu i tino i konā. I lō te fai penā, e taumafai latou ke malama‵lama i tino taki tokotasi ko te mea ke fakaoko atu ne latou ki tena loto a te fekau o te Malo.

12. Ne fakaasi mai pefea ne Epafala a te atafai tonu ki nisi tino?

¹² A te suā auala e fakaasi atu ei i a tatou e loto mau‵lalo, ko te ‵talo atu mō latou kolā ko “maua ne latou te fakatuanaki telā e ‵pau tena tāua mo te mea telā ko maua ne tatou.” (2 Pe. 1:1) Tenā eiloa te mea ne fai ne Epafala. Ne taku mai a ia fakatolu taimi i te Tusi Tapu—e maua katoa i tusi fakaosofia a Paulo. Kae koi ‵loka a ia i tena fale i Loma, ne tusi atu a Paulo ki Kelisiano kolā ne ‵nofo i Kolose me i a Epafala “e ‵talo malosi faeloa . . . mō latou.” (Kolose 4:12) Ne iloa ‵lei ne Epafala ana taina, ne alofa malosi a ia ki a latou. Faitalia me ne “‵pei fakatasi” a ia mo Paulo i te falepuipui, ne fakamuamua eiloa ne ia a manakoga faka-te-agaga o nisi tino. (File. 23) Ne taumafai eiloa a ia o fai se mea ke fesoasoani atu ki a latou. E mata, e se tenā te fakailoga o te atafai tonu? A te ‵talo atu mō ‵tou taina tali‵tonu ki a Ieova e isi eiloa sena malosi, maise eiloa māfai e masaua ne tatou a latou  taki tokotasi, i olotou igoa totino.—2 Koli. 1:11; Iako. 5:16.

13. Ka fakaakoako pefea koe ki a Epafala i te faiga o au ‵talo?

¹³ Mafaufau ki a latou kolā e mafai koe o ‵talo mō latou mai te taku atu o lotou igoa. E pelā mo Epafala, e tokouke a ‵tou taina mo tuagane e ‵talo mō tino i loto i te lotou fakapotopotoga, kāiga kolā e fakafesagai atu ki tulaga faiga‵ta io me ko latou kolā e fakafesagai atu ki te faiga o fakaikuga faiga‵ta io me ko tofotofoga. E tokouke e ‵talo mō latou kolā e taku mai olotou igoa i tala i te jw.org “Jehovah’s Witnesses Imprisoned for Their Faith.” (Look under NEWSROOM > LEGAL DEVELOPMENTS.) Kae e se gata i ei, e gali foki ma masaua ne tatou a latou kolā e isi ne lotou tino pele ko ‵galo atu i te mate, latou kolā ne ‵sao mai i fakalavelave o te natula io me ko taua, mo latou kolā e fe‵paki mo fakalavelave i mea tau tupe. E manino ‵lei, me tokouke a taina mo tuagane e ma‵nako ki ‵tou ‵talo kae e uke a mea aoga e maua ne latou mai i ei. Kafai ko ‵talo tatou mō tino penā, ko fakaasi atu ei ne tatou me se onoono fua tatou ki mea e ‵lei ei tatou kae e penā foki a manakoga o nisi tino. (Fili. 2:4) E lagona eiloa ne Ieova a vaegā ‵talo penā.

14. Ne fai pefea a Ieova mo fai te ‵toe fakaakoakoga ‵lei o te fakalogologo?

¹⁴ A te suā auala telā e mafai o fakaasi mai te lasi o ‵tou loto maulalo ko ‵tou loto fia‵fia o fakalogo‵logo ki manatu o tino. E fai mai te Iakopo 1:19 ko tatou ke “vave o fakalogo‵logo.” Ko Ieova eiloa te ‵toe fakaakoakoga ‵lei o te fakalogologo. (Kene. 18:32; Iosu. 10:14) Mafaufau ki mea e mafai o tauloto ne tatou i te sau‵talaga ne fai i te Esoto 32:11-14. (Faitau.) E tiga eiloa ne seki manakogina ne Ieova a manatu o Mose, ne tuku atu eiloa ne ia se avanoaga ke fakaasi atu ne Mose ana lagonaga. E mata, e isi se tino ola e fia fakalogologo kae tautali i fakamatalaga ‵loa a se tino telā e fai mea ‵se? Faitalia te feitu tenā, ne fakalogologo eiloa a Ieova mo te kufaki ki tino kolā e ka‵laga atu ki a ia i te fakatuanaki.

15. E mafai pefea o fakaakoako tatou ki a Ieova mai te fakaasiga o te āva ki nisi tino?

¹⁵ Se mea gali ko tatou taki tokotasi ke fesili ifo: ‘Kafai ne mafai ne Ieova o fakamalalo ifo ke faipati ki tino kae fakalogologo ki a latou e pelā mo Apelaamo, Lasela, Mose, Iosua, Manoa, Elia, mo Hesekia, e mata, e se ‵tau foki au o fakaasi atu te āva, fakatāua oku taina katoa, fakalogologo ki olotou manatu, kae fakagalue olotou manatu ‵lei? E mata, e isi se tino i taku fakapotopotoga io me i loto i toku kāiga e manako ki toku fesoasoani i te vaitaimi nei? Ne a aku mea e ‵tau o fai ki ei? Ne a aku mea ka fai ki ei?’—Kene. 30:6; Fama. 13:9; 1 Tupu. 17:22; 2 Nofo. 30:20.

16. Ne saga atu pefea a te Tupu ko Tavita i te taimi ne fakamasei ei a ia ne Simei?

¹⁶ A te loto maulalo e fesoasoani mai foki ke fakaasi atu ne tatou a te loto pulea māfai ko fakamasei tatou ne se tino. (Efe. 4:2) A te fakaakoakoga gali e uiga ki ei e maua i te 2 Samuelu 16:5-13. (Faitau.) Ne kufaki ne Tavita mo ana tavini a fakamaseiga mo fakasauaga mai i a Simei, telā se kāiga o te Tupu ko Saulo. Ne fai eiloa penā a Tavita faitalia me isi sena malosi o fakagata a mea konā. Ne maua pefea ne Tavita te malosi ke kufaki? Ka mafai o momea aka te ‵tou malamalama māfai ko iloilo ne tatou a te tolu o Salamo.

17. Se a te mea ne fesoasoani atu ke loto pulea a Tavita, kae e mafai pefea o fakaakoako tatou ki a ia?

¹⁷ A te Salamo e 3 ne tusi ne Tavita i te taimi “ne tele kea‵tea ei a ia mai tena tama  tagata ko Apisaloma.” A te fuaiupu 1 mo te 2 e fetaui ‵tonu eiloa mo te mea ne tupu i te mataupu e 16 o te Lua Samuelu. I te Salamo e 3:4 e fakaasi mai ei te loto talitonu o Tavita: “Ka kalaga atu au ki a Ieova i se leo maluga, kae ka tali mai a ia ki a au mai tena mauga tapu.” E mafai foki o ‵talo tatou māfai ko pokotia tatou i fakalavelave. Kae ka tali mai a Ieova e auala i tena agaga tapu, telā e mafai o fesoasoani mai ki a tatou ke kufaki. E mata, e mafai o mafaufau koe ki se tulaga telā e manakogina ke loto pulea koe io me fakamagalo ne koe a tino kolā e ‵se mai ki a koe? E a, e talitonu koe me atafai atu a Ieova me lavea ne ia ou logo‵maega kae ka fesoasoani kae fakamanuia ne ia koe?

18. Ka mafai pefea o maua ne tatou a mea aoga māfai e tumau i te fakagalue ne tatou a fakatonuga mai te Atua?

¹⁸ A te fai ne tatou o te mea tonu e iku atu ki fakamanuiaga e uke. E se tioa eiloa o fai mai te Faataoto 4:7 me i “te poto ko te ‵toe mea tāua”! E tiga eiloa te poto e maua mai i te iloa, e faka‵na eiloa ki ‵tou fakaikuga kolā e fai i lō a fakamatalaga e maua ne tatou. E fakaasi mai foki ne te manu ko te lō a te poto. E fakatoka eiloa ne latou a olotou mea‵kai i te taimi o te ‵tau ‵vela. (Faata. 30:24, 25) A Keliso, telā ko “te poto o te Atua,” e fai faeloa ne ia a mea kolā e fakafiafia atu ki te Tamana. (1 Koli. 1:24; Ioa. 8:29) E iloa ne te Atua a te ‵kese o te faiga o te fakaikuga tonu mo te galue e ‵tusa mo te fakaikuga. Kae e taui eiloa ne ia a latou kolā e fakaasi mai ne latou a te loto maulalo mo te kufaki kae ola e ‵tusa mo mea e iloa ne latou me ko te mea tonu. (Faitau te Mataio 7:21-23.) Tela la, ke galue o fakatumau a te loto maulalo tonu i loto i te fakapotopotoga. E manakogina a taimi mo te kufaki ke fakagalue aka ne tatou a mea kolā ko iloa ne tatou me ne mea ‵tonu, kae ko te loto maulalo e iku atu ei ki te fiafia i te taimi nei e penā foki ki te se-gata-mai.