I TE lalolagi kātoa, e fakatāua eiloa ne tino ma‵tua a te tauliaga ke tavini atu ki tino o te Atua. E fai eiloa latou e pelā me se fakamanuiaga ki a tatou katoa! Kae e seki na loa ko leva, kae ne fai se fakamafuliga. Ne fakamolemole atu ki toeaina ma‵tua ke tuku atu a nisi tiute ‵mafa ki toeaina fo‵liki. I te auala fea?

A te fakatokaga fou ko ovasia o fenua mo faiakoga o te galuega talai ke taofi olotou vaega o te taviniga māfai ko kātoa olotou 70 tausaga. E se gata i ei, a toeaina kolā ko taki 80 tausaga ka tuku atu olotou nisi tiute ki toeaina fo‵liki, e pelā mo te kouotineita o te Komiti o te Ofisa Lagolago io me ko te fai mo kouotineita o te potukau o toeaina i te fakapotopotoga. Ne ‵saga atu pefea a toeaina ma‵tua konei ki te fakamafuliga tenei? Ne fakaasi atu ne latou te fakamaoni ki a Ieova mo tena fakapotopotoga saukātoa!

“Ne ‵lago katoatoa eiloa au ki te fakaikuga tenei,” ko pati a Ken, telā ne tavini atu e pelā me se kouotineita o te Komiti o te Ofisa Lagolago mō se 49 tausaga. “A te ‵tonuga loa, i te taeao eiloa telā ne iloa ne au, ne ‵talo atu au ki a Ieova, o fakaasi atu te manakoga mō se taina foliki ke fai pelā me se kouotineita.” A te kilokiloga a Ken se akoakoga ‵lei ne fakaasi mai ne taina ma‵tua  fakamaoni i te lalolagi kātoa. E tonu, e tiga eiloa ne fia‵fia latou ke tavini atu ki olotou taina, kae ne tai fanoa‵noa malie latou.

“Ne tai fakafanoanoa malie mai ki a au,” muna Esperandio, telā ko Ieva ne fai mo fai te kouotineita o te potukau o toeaina i tena fakapotopotoga. Kae ne toe fai mai a ia penei: “Ne manakogina ne au a taimi e uke ke tausi atu ki toku masaki telā ko masei ‵ki loa.” E pelā mo te mea e lavea atu ne matou, koi tumau eiloa a Esperandio i te tavini fakamaoni atu ki a Ieova kae fai pelā me se fakamanuiaga ki tena fakapotopotoga.

Kae e pefea a ovasia faima‵laga leva kolā ne ‵fuli a vaega o te lotou taviniga? A Allan, telā ne tavini atu pelā me se ovasia faimalaga mō se 38 tausaga e fai ‵tonu mai, penei: “I te taimi ne iloa ei ne au, ne faka‵mū eiloa au.” Kae ne lavea ne ia te aoga ke fakamasani a taina talavou ki te galuega, kae koi tumau eiloa a ia i te tavini atu mo te fakamaoni.

A Russell, telā ne tavini atu e pelā me se ovasia faimalaga mo se faiakoga o te galuega talai mō tausaga e ‵tusa mo te 40, e fai mai me ne tai fanoa‵noa malie lāua mo tena avaga i te taimi muamua. “Ne fia‵fia ‵ki eiloa māua ki te mā tauliaga me ne maua ne māua te malosi faka-te-foitino ke tumau i ei.” Ko fakaaoga nei ne Russell mo tena avaga a mea kolā ne a‵koga lāua ki ei penā foki mo lā ata‵mai i te lā fakapotopotoga, kae fia‵fia eiloa a tino talai kolā e ga‵lue fakatasi mo lāua.

E tiga eiloa e seki maua eiloa ne koe a lagonaga pelā mo latou kolā ne taku atu muamua, e mafai o fesoasoani atu a te tala i te 2 Samuelu ke malamalama koe i a latou kolā ko oti ne tofotofo ne latou.

Mafaufau la ki te taimi ne ‵teke atu ei te tamaliki tagata a te tupu ko Tavita, ko Apisaloma. Ne sola eiloa a Tavita mai Ielusalema ki Manaima, i te feitu ki te saegala o te vaitafe o te Iolitana. I konā, ne manakogina malosi ne Tavita mo nisi tino kolā ne olo fakatasi mo ia a mea ke tausi atu ki olotou ola. E mata, e iloa ne koe me se a te mea ne tupu?

E tokotolu a tāgata i te koga tenā ne aumai ne latou a moega, nāi mea‵kai, mo mea mo ‵tunu olotou mea‵kai. A Pasilai se tokotasi o tāgata konā. (2 Samu. 17:27-29) I te taimi ne gata atu ei te ‵tekeatuga a Apisaloma, ne mafai o toe foki atu a Tavita ki Ielusalema, kae ne ‵taki atu ne Pasilai a tou tagata ki te Iolitana. Ne fakamalosi atu a Tavita ki tou tagata ke fanatu ki Ielusalema. Ne ofo atu ne te tupu me ka aumai ne ia a mea‵kai mā tou tagata, e tiga eiloa a Pasilai se “tagata maumea” kae e mafai eiloa o se manako ki mea‵kai kolā e ofo atu ne te tupu. (2 Samu. 19:31-33) Kae ne fiafia eiloa a Tavita ki uiga o Pasilai mo so se manatu fesoasoani telā e mafai o tuku atu ne ia. E mautinoa eiloa me se tauliaga gali tenā ke nofo kae galue i te palesi o te tupu!

Ona ko tena fakamaoni kae agamalu, ne fai atu a Pasilai i a ia ko 80 ana tausaga. Kae ne fakaopoopo atu a ia: “E mata, e mafai o iloa ne au te mea ‵lei mo te mea masei?” Se a te mea ne fakauiga a ia ki ei? Ne maua eiloa ne Pasilai a  te poto i se taimi leva i tena olaga. Kae koi mafai eiloa o tuku atu ne ia se manatu fesoasoani ‵lei, e pelā eiloa mo mea ne fai ne “tāgata ma‵tua” fakamuli ifo ki a te tupu ko Leopoamo. (1 Tupu 12:6, 7; Sala. 92:12-14; Faata. 16:31) Tela la, a te manatu o Pasilai e uiga ki te iloa o te mea ‵lei mo te mea masei e mafai o fakasino atu ki ikuga io me ko ana tapulā i te feitu faka-te-foitino ona ko tena tulaga matua. Ne fai ‵tonu atu a ia me ko kamata o pokotia a te auala e tami ne ia a mea penā foki mo tena fakalogo, ona ko tena tulaga matua. (Fai. 12:4, 5) Tela la, ne fakamolemole atu loa a Pasilai ki a Tavita me kāti e ‵lei atu ke puke atu ne ia ki Ielusalema a tena tamaliki tagata ko Kimeama.—2 Samu. 19:35-40.

E tai ‵pau eiloa a te aofaki o tausaga kolā ne taku mai i te kamataga mo te mea telā ne fakaasi mai ne Pasilai. E manino ‵lei, me i ‵tou aso nei, a te mea telā e ‵tau o mafau‵fau ki ei e se ko fakanofonofoga io me ko mea e mafai o fai ne se tino, e pelā loa mo te tala o Pasilai. E isi se manakoga ke mafau‵fau faka‵lei foki ki te ‵toe mea ‵lei e fai ne toeaina fakamaoni kolā e tavini atu i te lalolagi kātoa.

Ne mafai o lavea ‵lei ne tāgata Kelisiano fakamaoni konei me ka fakamalosigina a te fakapotopotoga a Ieova mō aso mai mua māfai e tuku atu ne latou a tiute kolā ko leva ne tausi ne latou ki taina talavou. I te ukega o koga, a taina ma‵tua ko latou kolā ne fakamasani ne latou a taina talavou, e pelā mo Pasilai telā ne fakaakoako ne ia a tena tama penā foki mo Paulo telā fakaakoako ne ia a Timoteo. (1 Koli. 4:17; Fili. 2:20-22) Ko oti eiloa ne fakamaoni aka ne taina talavou konei me ko fai nei latou pelā me ne “meaalofa,” ko mafai o fesoasoani atu ke “ati aka ei te foitino o Keliso.”—Efe. 4:8-12; fakatusa ki te Numela 11:16, 17, 29.

A te tokoukega o tino o te Atua i fakapotopotoga i te lalolagi kātoa kolā ko oti ne tuku atu olotou nisi tiute ki nisi tino ne mafai o fakaaoga faka‵lei ne latou a avanoaga e uke ke fakalauefa atu te galuega a Ieova.

“Ne fai ne oku fakanofonofoga ‵fou ke mafai o talai atu au ki avaga tāgata sē tali‵tonu a tuagane i te motou fakapotopotoga,” ko pati a Marco, telā ne fai pelā me se ovasia faimalaga mō se 19 tausaga.

“E aofia nei i mā fakamoemoega ‵fou a te fesoasoani atu ki tino vāi‵vai kae fai a akoga faka-te-Tusi Tapu e uke,” ko pati a Geraldo telā ne galue e pelā me se ovasia faimalaga mō tausaga e 28. E lipoti mai a ia me ko nofo nei ki se 15 akoga faka-te-Tusi Tapu e fai ne lāua mo tena avaga kae se aofaki ‵lei eiloa o tino vāi‵vai ko ‵kau atu ki fakatasiga.

E fai mai a Allan, telā ne taku atu muamua, penei: “Ko maua nei ne māua te avanoaga ke fakamāmāu a taimi e uke i te galuega talai. Ko oko eiloa i te mā fia‵fia ke talai atu i koga e tokouke i ei a tino, koga faipisinisi, kae talai atu foki ki mā tuakoi, e tokolua me ko oti ne au‵mai ki te Fale Tapuaki.”

Kafai koe se taina galue malosi kae fakamaoni kae ne maua ne koe se tofiga fou, e isi aka se isi auala e mafai o fesoasoani atu koe. E mafai o ‵lago atu koe ki te galuega a Ieova mai te fakamatala atu au tala ki taina talavou i tau fakapotopotoga. “E fakaakoako kae fakaaoga ne Ieova a taina talavou taleni,” ko pati a Russell, telā ne taku mai muamua. “E maua eiloa ne te kautaina a mea aoga mai akoakoga aoga mo asiga a tausi mamoe!”—Ke onoono ki te pokisi “ Fesoasoani Atu ki Taina Talavou ke Kausaki Atu.”

Kafai fatoā kau atu koe ki se vaega ‵kese o te taviniga, ke fakatumau se kilokiloga ‵lei. Ko oti ne tami koe ki te olaga o tino e tokouke ona ko au galuega kolā e fai mo te loto fiafia, kae e mafai o tumau koe i te fai penā. Ko oti ne alofagina koe kae e mautinoa eiloa me ka tumau eiloa o alofagina koe.

E sili atu i te tāua, ko oti ne fakafiafia ne koe a te loto o Ieova. Ka se “puli i a ia [au] galuega mo te alofa ne fakaasi ne [koe] mō tena igoa i te taviniga mo te tumau i te taviniga ki tino tapu.” (Epe. 6:10) E fakatalitonu mai te fuaiupu tenā ki  a tatou katoa me ka fakataunu eiloa ne ia tena tautoga. E tāua ‵ki eiloa koe ki a Ieova me e se mafai o puli i a ia au taumafaiga ne fai i taimi ko ‵teka mo te tumau i te fakafiafia atu ki a ia!

Kae e a māfai koe se tokotasi telā ne isi se fakamafuliga ki tou tofiga e pelā mo mea ne fakamatala mai i luga? Koi mafai eiloa o aoga a te mea tenei ki a koe. I te auala fea?

Kafai e sau‵tala nei koe mo se taina telā ne fakamafuli tena tōfiga, e mafai eiloa o maua ne koe a mea aoga mai tena atamai mo tena matua ‵lei. ‵Sala atu ki tena fesoasoani. Fakamolemole atu ke maua ne koe ne manatu fesoasoani. Kae onoono aka me e fakagalue aka pefea ne ia mo te fakamaoni a tena atamai tenā i tena tofiga fou.

Faitalia me ko koe se taina matua io me foliki telā e tavini atu i se auala fou, io me se taina io me se tuagane, ke masaua me e fakatāua malosi ne Ieova a te fakamaoni o latou kolā ko leva ne tavini atu ki a ia kae koi tumau eiloa i te fai penā.