KAFAI e manako koe ke iloa te taimi, ne a au mea ka fai? Kāti ka kilo atu koe ki te itula i tou lima io me se itula lasi. Kafai ko fesili atu tou taugasoa ki te taimi, ka tali atu koe pefea? E kese‵kese a auala e taku atu ei ne koe a te taimi. E pefea la?

Ia, kāti e fai atu tatou me ko tasi te itula mo te 30 minute mai tua o te fakatutonu. Kāti ka tali atu koe me ko 1:30. E faka‵na eiloa ki te koga e nofo koe i ei mo te mea e masani ki ei, e mafai o fai atu koe i te taimi ko 13:30. A te auala tenā ne maua mai i te fakaaogaga o te itula telā e 24 itula i ei. E isi foki ne fenua e fai mai i te taimi tenā ko “āfa te lua” ko tena uiga ko 30 minute mai mua o te lua.

E pelā me se tino faitau ki te Tusi Tapu, e mafai o mafaufau koe ki te auala e fai mai ne tino i aso o te Tusi Tapu a te taimi. E uke a auala kese‵kese. I Tusitusiga Epelu ne fakaaoga i ei te “tafataeao ‵malu,” “tutonu,” mo te “afiafi.” (Kene. 8:11; 19:27; 43:16; Teu. 28:29; 1 Tupu 18:26) Kae i nisi taimi, ko fakaasi faka‵lei mai i ei te taimi tonu.

I taimi o te Tusi Tapu, e masani o fakaaoga a leoleo. Ne manakogina malosi latou i te po. I te fia senitenali mai mua o fanau a Iesu, ne vaevae ne te kau Isalaelu a te po ki vaega e tolu, kolā e taku ki ‘taimi ‵tu o te po.’ (Sala. 63:6) E fakaasi mai i te Famasino 7:19 a te “‵tuga i te valuapo.” I taimi o Iesu, ne kamata ei o vaevae ne te kau Iutaia a te po ki vaega e fa, e pelā mo te mea e fai ne tino Eleni mo te kau Loma.

E uke a taimi ne faipati ki ei a tusi Evagelia ki ‵tuga e fa konei i te po. E pelā mo “te fa o ‵tuga o te po” ko te taimi ne sasale ei a Iesu i luga i te vai o fanatu ki te pōti telā e ‵sopo i ei ana soko. (Mata. 14:25) I se tala fakatusa, ne fai mai a Iesu: “Moi fai e iloa ne te pule o te fale a te taimi o te po e vau ei te tino kaisoa, penei ka alaala faeloa a ia ke mo a ma ulu atu se tino kaisoa ki loto i tena fale.”—Mata. 24:43.

Ne fakasino atu a Iesu ki itula e fa konei i te po i te taimi ne fai atu a ia ki ana soko: “Tela la, ke tumau i te matapula‵pula, me e se iloa ne koutou te aso e vau ei te matai o te fale, me ko te fakaafiafi, io me ko te valuapo io me mai mua o te vaveao io me ko te tafataeao ‵malu.” (Male. 13:35; fml.) A te ‵tuga muamua i ei, “te fakaafiafi,” e kamata mai te taimi e tō ei te la ke oko ki te iva i te po. A te lua o ‵tuga, telā ko te “valuapo” ko te iva i te po ki te valuapo. A te tolu o ‵tuga, telā ko te “mai mua o te vaveao”, io me ko “te taimi e tagi ei te moa,” ko te valuapo ki te tolu i te vaveao. Kāti tenei te taimi telā ne tagi ei te moa i te po telā ne puke i ei a Iesu. (Male. 14:72) A te fa o ‵tuga i te po, telā ko te “tafataeao ‵malu” ko te tolu i te vaveao ki te taimi e sae aka ei te la.

Tela la, e tiga eiloa e seai ne itula i taimi o te Tusi Tapu e penei mo ‵tou aso nei, e isi eiloa se auala e iloa ei ne latou te taimi.