E mata, e mafai o tali mai ne koe a fesili konei ne fakavae ki Te Faleleoleo Maluga i te 2019?

Se a te uiga o te tautoga tenei a te Atua: “E seai se meatau ne faite ke ‵teke atu ki a koe e manuia”? (Isa. 54:17)

E mafai o tali‵tonu tatou me ka puipui ne te Atua a tatou mai meatau ma‵losi e pelā mo te “kaitaua o tino pule fakasaua.” (Isa. 25:4, 5) Ka sē mafai lele loa o manuia ‵tou fili i te taumafaiga o fakapa‵kia tatou.—w19.01, itu. 6-7.

Ne fai pefea ne te Atua a te fakamasinoga tonu i ana faifaiga ki tino Kanana mo tino Isalaelu kaima‵nako?

Ne fakaoko atu ne te Atua a tena fakamasinoga ki a latou kolā ne aofia i faifaiga fakatauavaga sē ‵tau fai kae ne latou a faifaiga sē ‵lei ki fafine mo tama‵liki. Ne fakamanuia ne ia a tino kolā ne faka‵logo ki a ia kae fai ne latou a fakamasinoga ‵tonu ki tino.—w19.02, itu. 22-23.

Ne a mea e ‵tau o fai ne tatou māfai e ‵nofo atu tatou i te taimi e ‵talo ei se tino sē talitonu?

E mafai fua o fakaasi atu ne tatou a te āva mai te sē logoa kae se fai atu “amene” io me ‵pikilima tatou fakatasi mo nisi tino i te taimi e fai ei a te ‵talo. E mafai eiloa o fai ‵tou ‵talo totino i se leo malalo.—w19.03, itu. 31.

E pefea te matagā o te amioga ki te maneaneaga o tama‵liki?

A te maneaneaga o se tamaliki se agasala ki te tino telā e pokotia i ei, te fakapotopotoga, tino pule ma‵luga, mo te Atua. I koga kolā e fakagalue ei a tulafono konā, e taumafai eiloa a toeaina o faka‵logo ki tulafono ke lipoti atu so se fakalavelave penā.—w19.05, itu. 9-10.

E mafai pefea ne tatou o ‵fuli io me momea aka a te ‵lei o ‵tou mafaufau?

Konei la a kī tāua ki ei: Faipati atu ki a Ieova e auala i se ‵talo. Mafaufau ‵loto fakatasi mo te fakamoemoega ke iloilo ne koe a koe eiloa. Filifili faka‵lei ou taugasoa i se auala poto.— w19.06, itu. 11.

Ne a mea e mafai ne tatou o fai i te taimi nei ke fakatoka ei tatou mō fakasauaga?

E ‵tau o fakamalosi aka a ‵tou fesokotakiga mo Ieova. Ke loto tali‵tonu me ka se tuku tiaki ne ia tatou. Faitau te Tusi Tapu i aso katoa, kae ‵talo faeloa. Ke loto talitonu me ka fakataunu eiloa a fakamanuiaga o te Malo o te Atua. Ke tauloto a tusi fai‵tau kolā e ‵gali ki a koe mo pese kolā e tavae ei a Ieova.— w19.07, itu. 2-4.

Ne a mea e mafai ne tatou o fai ke fesoasoani atu ki ‵tou kāiga ke ‵sao?

Se mea tāua ke fakaasi atu ne tatou a te loto malamalama, fai pelā me ne fakaakoakoga ‵lei i ‵tou faifaiga, kae ke kufaki kae ke ‵poto.— w19.08, itu. 15-17.

I te auala fea e maua ei ne tatou a te malosi fou, e pelā mo te tautoga a Iesu i te Mataio 11:28?

E maua ne tatou a ovasia Kelisiano kolā e a‵lofa, toe taugasoa ‵lei, mo te ‵toe galuega ‵lei.—w19.09, itu. 23.

I te auala fea e mafai ei ne te Atua o tuku mai ki a tatou a te ‵mana ke ga‵lue? (Fili. 2:13)

I te taimi e fai‵tau ei tatou ki te Muna a te Atua kae mafaufau ‵loto ki ei, e mafai eiloa o fakamalosi tatou ne te Atua, kae tuku mai ne ia a te manakoga ke fai ne tatou tena loto mo te ‵mana ke ga‵lue. E mafai o fakamalosi tatou ne tena agaga tapu ke momea aka te ‵lei o ‵tou mea e mafai o fai.— w19.10, itu. 21.

Ne a auala ‵poto e ‵tau o fakagalue ne tatou a koi tuai o fai ne tatou se fakaikuga tāua?

E lima auala e manakogina ke fakagalue: Fai a sukesukega maea. ‵Talo atu mō te poto. Iloilo aka a ‵tou manakoga ‵tonu. Ke isi ne fakamoemoega mautinoa. Ke loto malamalama.— w19.11, itu. 27-29.

E mata, e isi se manatu e uiga ki te tumau o te agaga o se tino i te ola mai tua o te mate ne fakasae atu ne Satani ki a Eva i te fatoaga i Etena?

E mautinoa eiloa me seai. Ne fai atu a Satani ki a Eva me ka sē mate eiloa tou fafine, kae ne seki fai atu me ka tumau eiloa a tena agaga i te ola māfai e mate a tou fafine. Ne fakaseai atu katoa a manatu ‵se fakalotu i te taimi o te Lolo. A te talitonuga me ka tumau te agaga o se tino i te ola mai tua o te mate kāti ne sae aka mai mua o fakasalalau atu ne te Atua a tino kolā ne faite ne latou a te taoa o Papelu.—w19.12, itu. 15.