1-2. E pelā mo te tala o Angelito, ne a mea e ‵tau o fai ne tatou taki tokotasi?

E MATA, a koe ne puti aka ne mātua kolā ne Molimau a Ieova? Kafai lāua ne Molimau, kae masaua me e se mafai o maua ne koe se fesokotakiga mo Ieova e auala mai i a lāua. Faitalia me ko ‵tou mātua e tavini atu ki te Atua io me ikai, i o tatou taki tokotasi te tiute ke ati aka se va fakataugasoa mo Ieova.

² Mafaufau ki te tala o se taina e igoa ki a Angelito. Ne puti aka a ia i se kāiga Molimau. Kae i tena folikiga, ne seki pili malosi a ia ki te Atua. E fai mai a ia, “Ne tavini au ki a Ieova me ne manako fua au o fai a mea kolā ne fai ne toku kāiga.” Kae ne fakaiku aka ne Angelito ke fakamāumāu ana taimi ke faitau te Muna a te Atua kae mafaufau ‵loto ki ei, kae ne kamata o ‵talo faeloa a ia ki a Ieova. Se a te ikuga? E fai mai Angelito, “Ne iloa ne au me i te auala fua ke fakapilipili atu ki ‵tou Tamana pele, ko Ieova, ko te iloa ‵lei ne au a ia.” E fai ne te tala o Angelito ke mafau‵fau tatou ki fesili tāua, penei: Se a te ‵kesega i te va o te iloa fua ne tatou a Ieova mo te iloa ‵lei ne tatou a ia? Kae e mafai pefea o iloa ‵lei ne tatou a Ieova?

3. Se a te ‵kesega i te va o te iloa ne tatou a Ieova mo te iloa ‵lei ne tatou a ia?

³ E mafai o mafau‵fau tatou me ko iloa ne tatou a Ieova māfai ko iloa ne ia te igoa o te Atua io me ko ana nisi muna io me ko ana mea ne fai. Kae e se fakauiga i ei me ko iloa ‵lei ne tatou a Ieova. E ‵tau o fakamāumāu ‵tou taimi ke tauloto e uiga ki a Ieova mo ana uiga ‵gali. Mai konā, ko kamata ei o malamalama  tatou i ana muna mo ana galuega. Ka fesoasoani mai foki ke iloa ne tatou me e mata, e fiafia a ia ki ‵tou manatu, fakaikuga, io me ko mea e fai ne tatou io me ikai. Kafai ko malamalama tatou i te loto o Ieova mō tatou, ko gasue‵sue ei tatou o fai a mea kolā ne tauloto ne tatou.

4. Ka fesoasoani mai pefea ki a tatou a te mafaufau ‵loto ki fakaakoakoga i loto i te Tusi Tapu?

⁴ E mafai o fakatauemu mai nisi tino ona ko ‵tou manakoga ke tavini atu ki a Ieova, kae e mafai o ‵teke malosi mai latou māfai ko kamata o ‵kau atu tatou ki tino o Ieova. Kae kafai e tali‵tonu tatou ki a Ieova, ka se tuku tiaki lele ne ia tatou. Ka ati aka ne tatou se va fakataugasoa tumau mo te Atua i ‵tou olaga kātoa. E mata, e mafai o iloa ‵lei ne tatou a Ieova? Ao, e mafai! E tuku mai i fakaakoakoga a tāgata sē ‵lei katoatoa, ko Mose mo te Tupu ko Tavita a te fakamaoniga me e mafai o fai penā. I te taimi e mafaufau ‵loto ei tatou ki mea ne fai ne lāua, ka tali aka ei ne tatou a fesili konei e lua: Ne mafai pefea o iloa ‵lei ne lāua a Ieova? Kae ne a akoakoga e mafai o tauloto ne tatou mai i lā fakaakoakoga?

5. Se a te fakaikuga ne fai ne Mose?

⁵ Ne fakagalue ne Mose a mea ne tauloto ne ia. I te taimi ko 40 ei ana tausaga, ne filifili ne Mose ke ‵kau fakatasi a ia mo tino o te Atua, te kau Epelu, i lō te fai pelā me ko te “tama tagata a te tama fafine a te Falao.” (Epe. 11:24) Ne seki fakatāua ne Mose se tulaga takutakua. Mai te ‵tu atu i te feitu o tino Epelu, kolā ne pologa i Aikupito, ne iloa ne ia me ka kaitaua malosi te Falao, se tino pule malosi telā ne ‵kilo ki ei a tino e pelā me se atua. Ko tafaga la te malosi o te fakatuanaki tenei! Ne talitonu a Mose ki a Ieova. A te vaegā loto talitonu tenā se fakavae tāua mō se fesokotakiga tumau.—Faata. 3:5.

6. Se a te mea e mafai o tauloto ne tatou mai te fakaakoakoga a Mose?

⁶ Se a te akoakoga mō tatou? E pelā mo Mose, e ‵tau o fai ne tatou katoa se fakaikuga: E mata, ka filifili tatou ke tavini atu ki te Atua kae ‵kau fakatasi mo ana tino? Kāti e manakogina ke talia ne tatou a mea faiga‵ta ke tavini atu ki te Atua, kae ka ‵teke mai loa a latou kolā e se iloa ne latou a Ieova. Kae kafai e tali‵tonu tatou ki te ‵tou Tamana faka-te-lagi, ka mautinoa eiloa me ka ‵lago mai a ia!

7-8. Ne a mea ne tumau o tauloto ne Mose?

⁷ Ne tumau eiloa a Mose i te tauloto ki uiga ‵gali o Ieova kae fai Tena loto. E pelā me se fakaakoakoga, i te taimi ne fakamolemole atu ki a Mose ke ‵taki ne ia te fenua o Isalaelu ki tua mo Aikupito, ne seki lava tena loto talitonu kae fai atu faeloa ki a Ieova me i a ia e se fetaui ‵lei mō te tōfiga tenā. Ne tali atu te Atua i se auala atafai, mai te tuku atu o fesoasoani ki a Mose. (Eso. 4:10-16) Ona ko te mea tenā, ne mafai ei ne Mose o fakaoko atu te fekau ‵mafa o fakamasinoga ki te Falao. I konā, ne lavea ei ne Mose me ne fakaaoga ne Ieova a Tena ‵mana ke faka‵sao a tino Isalaelu kae fakaseai ne ia a te Falao mo tena kautau i loto i te Tai Kula.—Eso. 14:26-31; Sala. 136:15.

⁸ Mai tua o te ‵takiga ne Mose a te kau Isalaelu ki tua mo Aikupito, ne mui‵mui faeloa latou konei. Kae ui i ei, ne lavea ne Mose te lasi o te kufaki o Ieova i ana faifaiga ki tino kolā ne fakasaoloto ne Ia mai te ‵nofo pologa. (Sala. 78:40-43) Ne lavea foki ne Mose a te lasi o te loto maulalo o Ieova i te taimi ne ‵fuli ei Tena mafaufau i te taimi ne fakamolemole atu ei a Mose ke sē fakaseai atu a tino Isalaelu.—Eso. 32:9-14.

9. E ‵tusa mo te Epelu 11:27, ne pefea te ‵pili o te fesokotakiga o Mose mo Ieova?

⁹ Mai tua o te tiakina ne te kau Isalaelu a Aikupito, ne ‵pili ‵ki a te fesokotakiga o Mose mo Ieova, e pelā eiloa me ne lavea ne ia ki  ana mata a tena Tamana faka-te-lagi. (Faitau te Epelu 11:27.) E uiga ki te ‵pili o te fesokotaki tenei, e fai mai te Tusi Tapu: “Ne faipati atu a Ieova ki a Mose mata ki mata, e pelā eiloa mo se tagata e faipati ki te suā tagata.”—Eso. 33:11.

10. Ke iloa ‵lei ne tatou a Ieova, ne a mea e ‵tau o fai ne tatou?

¹⁰ Se a te akoakoga mō tatou? Ke iloa ‵lei ne tatou a Ieova, e se ‵tau fua o tauloto tatou ki ana uiga ‵gali, kae e ‵tau foki o fai ne tatou tena loto. Ko te loto eiloa o Ieova i aso nei ke “faka‵sao a vaegā tino katoa kae ke iloa tonu ne latou a te munatonu.” (1 Timo. 2:3, 4) Tasi o auala ke fai te loto o te Atua, ko te akoako atu o nisi tino e uiga ki a Ieova.

11. Kafai e akoako ne tatou a nisi tino e uiga ki a Ieova, i te auala fea ka iloa ‵lei ei ne tatou a ia?

¹¹ E mafai o iloa ‵lei ne tatou a Ieova, māfai e akoako faeloa ne tatou a tino e uiga ki a ia. E pelā me se mea e tasi, e lavea ne tatou a fakamaoniga matea o te alofa atafai o Ieova, māfai e takitaki ne ia tatou ki tino loto ‵lei kolā e ma‵nako ke fai mo fai ana taugasoa. (Ioa. 6:44; Galu. 13:48) E lavea ne tatou a te ‵mana o te Muna a te Atua māfai ko ‵kilo atu ki tino kolā e suke‵suke mo tatou ko tiakina olotou uiga ma‵sei kae ‵pei ki uiga ‵fou. (Kolose 3:9, 10) Kae e lavea ne tatou a fakamaoniga o te kufaki o te Atua, mai te uga atu ne ia tatou fakafia taimi ke fesoasoani atu ki tino i ‵tou koga talai ke tauloto ki a ia kae ke ‵sao foki latou.—Loma 10:13-15.

12. E pelā mo te mea ne fakaasi mai i te Esoto 33:13, se a te mea ne fakamolemole atu ki ei a Mose, kae kaia?

¹² Ne seki manatu māmā a Mose ki tena fesokotakiga mo Ieova. E tiga loa ne fai ne ia a galuega fakaofoofogia i te igoa o te Atua, ne fakamolemole atu a Mose mo te āva ki a Ieova ke fesoasoani atu aka ke iloa faka‵lei ne tou tagata a Ia. (Faitau te Esoto 33:13.) Ko 80 tupu tausaga o Mose i te taimi ne fai atu ne ia te fakamolemole tenā, kae ne iloa ne ia me koi uke atu a mea ne ‵tau o tauloto ne ia e uiga ki tena Tamana alofa faka-te-lagi.

13. Se a te auala e mafai o fakamaoni atu me e fakatāua ne tatou a ‵tou va fakataugasoa mo te Atua?

¹³ Se a te akoakoga mō tatou? Faitalia me pefea te leva ne tavini atu tatou ki a Ieova, e se ‵tau o manatu mā‵ma tatou ki ‵tou fesokotakiga mo ia. Tasi o auala ke fakamaoni atu me e fakatāua ne tatou a ‵tou va fakataugasoa mo te Atua, ko te fai‵pati atu ki a ia e auala i ‵talo.

14. Kaia e fai ei te ‵talo pelā me se kī tāua ke iloa ne tatou a mea e uke e uiga ki te Atua?

¹⁴ A fesokotakiga ‵lei ko te kī tāua ki se fesokotakiga malosi. Tela la, fakapilipili malosi atu ki te Atua mai te ‵talo faeloa, sa mataku o fakaasi atu ki a ia ou lagonaga ‵loto. (Efe. 6:18) A Krista, telā e nofo i Turkey, ne fai mai: “Ne gasolo aka faeloa ki luga toku alofa mo toku talitonu ki a Ieova, i taimi takitasi e fakaasi atu ei ne au oku mafaufauga ki a ia i ‵talo kae lavea ne au tena fesoasoani. A te lavea atu o te auala e tali mai ne Ieova aku ‵talo, ne fesoasoani mai ke kilo atu au ki a Ieova e pelā me se Tamana mo se Taugasoa.”

15. Ne fakamatala mai pefea ne Ieova a te Tupu ko Tavita?

¹⁵ A te Tupu ko Tavita ne fanau i se fenua telā ne tukugina atu ki a Ieova te Atua. Kae e uke atu a mea ne fai ne Tavita i lō te tautali fua ki tuu fakalotu a tena kāiga. Ne ati aka eiloa ne ia se fesokotakiga ‵pili mo te Atua, kae ne alofa malosi a Ieova ki a ia. Ne fakamatala mai ne Ieova a Tavita e pelā me “se tagata e loto [a Ia] ki ei.” (Galu. 13:22) I te auala fea ne fakapilipili malosi atu a Tavita ki a Ieova?

16. Se a te mea ne tauloto ne Tavita e uiga ki a Ieova mai te kilo atu ki ana mea ne faite?

¹⁶ Ne tauloto a Tavita ki a Ieova mai i ana mea ne faite. I te taimi koi foliki ei a Tavita, ne fakamāumāu ne ia a itula e uke i te togavao, ke tausi atu ki te lafu mamoe a tena tamana. Kāti tenā loa te taimi ne kamata ei o  mafaufau ‵loto tou tagata ki mea ne faite ne Ieova. E pelā me se fakaakoakoga, i te kiloatuga a Tavita ki luga i te lagi i te po, ne lavea ne ia se fia afe kae ne kamata foki o mafaufau ‵loto ki uiga o te Tino telā ne faite ne ia a fetū konā. Ne otia te loto o Tavita kae ne tusi mai, penei: “E folafola atu eiloa ne te lagi a te ‵malu o te Atua; E fakailoa atu ne te lagi i luga a galuega o ana lima.” (Sala. 19:1, 2) I te taimi ne mafaufau ‵loto ei a Tavita ki te auala ne faite ei a tāgata, ne lavea ei ne ia te poto o Ieova i ana mea ne fai. (Sala. 139:14) I te taimi ne mafaufau ‵loto ei a Tavita ki galuega ne fai ne Ieova, ne fakaasi atu ne ia tena loto maulalo.—Sala. 139:6.

17. Ne a mea e mafai o tauloto ne tatou māfai e mafaufau ‵loto ki mea a te Atua ne faite?

¹⁷ Se a te akoakoga mō tatou? Ke fia‵fia o mafaufau ‵loto ki mea a te Atua ne faite. Ke uke atu au mea e fai i lō te onoono atu fua ki te lalolagi gali tenei ne faite ne te Atua; ka ofo eiloa koe i te gali! I au mea e fai i aso takitasi, a te mafaufau ‵loto ki mea a te Atua ne faite kolā e lavea ne koe i ou tafa—pelā mo lakau, manu, mo tino—e akoako ei koe e uiga ki a Ieova. Kae ka tauloto eiloa koe i aso takitasi ki mea e uke atu e uiga ki tou Tamana alofa. (Loma 1:20) Kae ka lavea ne koe i aso takitasi me ka gasolo aka faeloa ki luga a tou alofa mō ia.

18. E pelā mo te mea e fakaasi mai i te Salamo 18, ne a mea ne iloa ‵lei ne Tavita?

¹⁸ Ne iloa ne Tavita me i a Ieova ne fesoasoani atu ki a ia. E pelā mo te taimi ne puipui ei ne Tavita a mamoe a tena tamana mai se leona mo te pea, ne iloa ne ia me ko Ieova eiloa telā ne fesoasoani atu ke tamate ne ia a manu fe‵kai konei. I te taimi ne fakatakavale ne ia te ‵toa ko Koliata, ne lavea ‵lei foki ne Tavita a te fesoasoani o Ieova ki a ia. (1 Samu. 17:37) Kae i te taimi ne sao ei a ia mai te Tupu loto masei ko Saulo, ne iloa ‵lei ne Tavita me ko Ieova ne fakasao ne ia tou tagata. (Sala. 18, fakamatalaga) Kāti ne ‵tau o fakamatamata a ia ona ko mea konei ne mafai ne ia o fai. Kae ne loto maulalo a Tavita, telā ne mafai ei ne ia o lavea a te lima fesoasoani o Ieova i tena olaga kātoa.—Sala. 138:6.

19. Ne a mea e mafai o tauloto ne tatou mai te fakaakoakoga a Tavita?

¹⁹ Se a te akoakoga mō tatou? E ‵tau o fai ne tatou a mea e uke atu i lō te fakamolemole fua ki a Ieova mō se fesoasoani. E ‵tau foki o taumafai tatou ke iloa te taimi mo te auala e tuku mai ne ia te fesoasoani. Kafai e loto maulalo tatou kae iloa ne tatou a ‵tou tapula, ka lavea ‵lei ne tatou te fesoasoani o Ieova ki mea kolā e se mafai ne tatou o fai. Kae i taimi takitasi e lavea ei ne tatou te fesoasoani o Ieova, ka gasolo aka eiloa o malosi a ‵tou fesokotakiga mo ia. A Isaac, se taina i Fiti telā ne tavini atu ki a Ieova mō se fia tausaga, ne fakamaoni mai ne ia te ‵tonu o te mea tenei. Ne fai mai a ia: “Mai te mafaufau ki mea ne ‵tupu i toku olaga, e lavea ne au te auala ne fesoasoani mai a Ieova mai te taimi ne kamata o sukesuke au ki te Tusi Tapu ke oko mai loa ki aso nei. Ona ko te mea tenā, ko fakamaoni ne au i a Ieova se tino tonu ki a au.”

20. Ne a mea e mafai o tauloto ne tatou mai te fesokotakiga o Tavita mo te Atua?

²⁰ A Tavita ne fakaakoako ki uiga o Ieova. Ne faite ne Ieova tatou mo te manakoga ke fakaakoako ki ana uiga. (Kene. 1:26) Ko te lasi o te tauloto o tatou ki uiga o Ieova, ko te mafai foki ne tatou o fakaakoako atu ki a ia. Ne iloa ‵lei ne Tavita a tena Tamana faka-te-lagi, tela la ne mafai o fakaakoako atu tou tagata ki a Ia i ana faifaiga ki nisi tino. Mafaufau ki se fakaakoakoga e tasi. A Tavita ne agasala ki a Ieova i te taimi ne mulilua ei a ia mo Patisepa kae tamate ne ia te avaga a tou fafine. (2 Samu. 11:1-4, 15) Kae ne fakaasi atu ne Ieova te alofa fakamagalo ki a Tavita, te tagata telā ne fakaasi atu ne ia te loto fakamagalo ki nisi tino. Ona ko te mea ne maua  ne Tavita se fesokotakiga ‵lei mo Ieova, ne fai a ia pelā me se tupu ‵lei e tokotasi o Isalaelu kae ne fakaaoga ne Ieova a ia e pelā me se fakaakoakoga ki nisi tupu o Isalaelu.—1 Tupu 15:11; 2 Tupu 14:1-3.

21. E ‵tusa mo pati i te Efeso 4:24 mo te 5:1, ne a ikuga e maua ne tatou māfai e “fakaakoako [tatou] ki te Atua”?

²¹ Se a te akoakoga mō tatou? E ‵tau o “fakaakoako [tatou] ki te Atua.” Kafai e fai tatou penā, ka maua ne tatou a mea aoga kae ka fesoasoani mai foki ke iloa ‵lei foki ne tatou a ia. Kafai e tau‵tali tatou i tena fakaakoakoga ‵lei, ko fakamaoni atu ne tatou me i a tatou ko ana tama‵liki.—Faitau te Efeso 4:24; 5:1.

22-23. Se a te mea ka tupu māfai e fakagalue aka a mea e tauloto ne tatou e uiga ki a Ieova?

²² E pelā mo te mea ne lavea ne tatou, e fakaasi mai ne Ieova a ia eiloa ki a tatou e auala i ana mea ne faite, mo tena Muna ei ko te Tusi Tapu. A te tusi tu ‵kese tenā e ‵fonu i fakaakoakoga o tavini fakamaoni a te Atua kolā e mafai o fakaakoako tatou ki ei, e pelā mo Mose mo Tavita. Ko oti ne fai te tusaga o Ieova. Kae e ‵tau o fai ‵tou tusaga ke ‵tala ‵tou mata, taliga mo ‵tou loto ke tauloto ki mea e uke e uiga ki a ia.

²³ Ka se gata eiloa tatou i te tauloto e uiga ki a Ieova. (Fai. 3:11) A te mea tāua e se ko te lasi o te mea e iloa ne tatou e uiga ki a ia, kae ko mea kolā e fai ne tatou ona ko te iloa ‵lei ne tatou a ia. Kafai e fakagalue aka a mea e tauloto ne tatou kae taumafai o fakaakoako ki te ‵tou Tamana alofa, ka tumau eiloa a ia i te fakapilipili mai ki a tatou. (Iako. 4:8) E auala i tena Muna, e fakatalitonu mai a ia me ka se tuku tiaki ne ia a tino kolā e taumafai ke iloa faka‵lei ne latou a ia.