E MATA, a koe se tino loto fakafetai? A te mea tenā se fesili e ‵tau o mafau‵fau faka‵lei tatou ki ei. Ne ‵valo mai i te Tusi Tapu me i te vaitaimi tenei, e tokouke a tino “e se loto fakafetai.” (2 Timo. 3:2) Kāti ne fetaui koe mo tino kolā e mafau‵fau me e ‵tau o fai ne nisi tino a mea mō latou io me ke maua ne latou a mea mai nisi tino. Kāti e mafau‵fau latou me e se manakogina ke fakaasi atu te loto fakafetai mō mea ko maua ne latou. E mata, ka fiafia koe o ‵nofo fakatasi mo vaegā tino penā?

E ‵kese mai ei, ne fai mai a Ieova ki ana tavini, penei: “Ke fakaasi atu te otou loto fakafetai.” E ‵tau mo tatou o “fakafetai atu mō mea katoa.” (Kolose 3:15; 1 Tesa. 5:18) E tonu, se mea gali ke fakaasi atu ne tatou te loto fakafetai. E isi ne pogai e ‵tau ei mo tatou o fai penā.

A te pogai tāua e tasi e ‵tau o ati aka ne tatou te loto fakafetai, me fesoasoani mai ke maua ne tatou se kilokiloga ‵lei e uiga ki a tatou eiloa. Kafai e fakafetai atu se tino ki a koe, ka fiafia eiloa a ia, kae penā foki koe. Kaia e fia‵fia ei tatou pelā foki mo nisi tino māfai e fakaasi atu ne tatou te loto fakafetai? Ia, mafaufau ki te fakaakoakoga tenei: Kafai e lavea ne koe a te loto fia‵fia o tino ke fai ne latou se mea mō koe, e mata, e se fakaasi mai i ei me e fakatāua ne latou a koe? E atafai latou ki a koe. Kafai ko lavea ne koe te atafai o latou ki a koe, ka fiafia eiloa koe. Fakaataata aka la ne tatou a te mea ne tupu ki a Luta. Ne fakaasi atu ne Poasa a te uiga kaimalie ki a Luta. E mautinoa eiloa me ne fai ne te mea tenā ke fiafia a Luta me e isi eiloa se tino e atafai atu ki a ia.—Luta 2:10-13.

Kae e sili atu i te tāua ke loto fakafetai tatou ki te Atua. E mautinoa eiloa me i nisi taimi, e mafaufau koe ki te uke o meaalofa faka-te-agaga mo meaalofa faka-te-foitino ne tuku mai ne Ieova mō tatou. (Teu. 8:17, 18; Galu. 14:17) Kae i lō te mafaufau fua ki te aga‵lei o te Atua i se taimi toetoe, kaia e se fakaavanoa ei ne koe ne taimi ke mafaufau ‵loto ki fakamanuiaga e uke kolā ne aumai ne te Atua ki a koe mo ou tino pele. A te mafaufau ‵loto ki te uiga kaimalie o te ‵tou Mafuaga, ka fakamalosi ne ia koe ke fakaasi atu te loto fakafetai ki a ia kae mafaufau ‵loto ki te lasi o tena alofa mo te fakatāua ne ia o koe.—1 Ioa. 4:9.

Kae e isi foki ne mea e ‵tau o fai ne tatou i lō fua te mafau‵fau ki tena kaimalie mo ana fakamanuiaga; ke fakafetai atu ki a Ieova mō tena aga‵lei. (Sala. 100:4, 5) E masani o fai sāle mai me i “te fakafetai atu ki tino e fai ne ia koe ke fiafia.”

A te suā pogai e tāua ei a te loto fakafetai, me e fakamalosi ne ia a vā fakataugasoa o tino. E ma‵nako tatou ke fakaasi mai ne tino a te loto fakafetai. Kafai e fakafetai atu koe mo tou loto kātoa ki se faifaiga atafai ne fai atu ne se tino ki a koe, ka ‵pili eiloa te va fakataugasoa o koulua. (Loma 16:3, 4) E se gata i ei, e mautinoa eiloa me i tino loto fakafetai e fesoasoani atu ki nisi tino. E lavea ne latou a faifaiga atafai e fakaasi atu ne tino ki a latou, kae e fakamalosi ei latou ke taui atu te uiga atafai tenā. Ao, a te fesoasoani atu ki nisi tino e iku atu ki te fiafia. E pelā loa mo muna a Iesu: “E sili atu te fiafia o te tino telā e tuku atu ana mea i lō te maua ne ia.”—Galu. 20:35.

A Robert Emmons, te tokolua pule i te Iunivesiti o California telā ne fai ne ia se sukesukega e uiga ki te loto fakafetai, ne fakasae mai ne ia te manatu tenei: “Ke loto fakafetai, e ‵tau o malamalama tatou me e fakalagolago te mea tenā ki a tatou eiloa. E tuku atu ne tatou i nisi taimi  a ‵tou mea, kae i nisi taimi ko maua ne tatou ne mea mai tino.” Te pogai me e mafai fua tatou o tumau i te ola ona ko te ‵lago mai o nisi tino i auala e uke. E pelā me se fakaakoakoga, e mafai o tuku mai ne latou a mea‵kai io me ko fesoasoani i togafiti fakatokita. (1 Koli. 12:21) E manino ‵lei me i te tino telā e loto fakafetai, e fakatāua ne ia a mea e fai ne nisi tino mō ia. Tela la, e mata, e masani o fakaasi atu ne koe te loto fakafetai ki mea e fai ne nisi tino mō koe?

A te suā auala ke ati aka te loto fakafetai, me e fesoasoani mai ke ‵saga tonu atu tatou ki uiga ‵lei kae se ko vāivāiga o se tino. E pelā me se fakaakoakoga, a tou mafaufau e fai pelā me se mea faka‵ma. E fesoasoani atu ke saga tonu fua koe ki mea ‵lei kae e se ki mea ma‵sei. E manako fua koe o saga atu ki feitu ‵lei kae e se ki fakalavelave. Kafai e fakaasi atu faeloa ne koe te loto fakafetai, ka maua eiloa ne koe a ikuga ‵lei kae ka sili atu foki tou fiafia. A te mauaga o se kilokiloga loto fakafetai e uiga ki te olaga, ka fesoasoani atu ke fai ne koe a te mea telā ne fakamalosi mai ne te apositolo ko Paulo: “Ke fia‵fia faeloa koutou i te Aliki.”—Fili. 4:4.

Ka fesoasoani atu te loto fakafetai ke maua ne koe se kilokiloga ‵lei. E mata, e faigofie ke fakaasi atu te loto fakafetai, te loto masei, te fanoanoa mo te kaitaua i te taimi eiloa tenā? A tino loto fakafetai e se fia mau‵mea. E loto fakafetai latou ki mea ko maua ne latou kae e se kausaki atu faeloa latou ke maua a koloa e uke.—Fili. 4:12.

E pelā me se Kelisiano, e iloa ne koe me e manako a Satani o fakafanoanoa kae fai ke loto vāivāi koe ona ko fakalavelave e fepaki mo koe i aso fakaoti konei. Ka fiafia a ia māfai e maua ne koe se kilokiloga sē ‵lei kae fameo. Kafai e maua ne koe te uiga tenā, ka se fai koe pelā me se tino telā e talai atu ne ia te tala ‵lei. A te ‵tonuga loa, e isi se sokoga o te loto fakafetai ki fuataga o te agaga o te Atua, e aofia i ei a te fiafia ki mea ‵lei ne tuku mai ne Atua mo te fakatuanaki ki ana folafolaga katoa.—Kala. 5:22, 23.

E pelā me se Molimau a Ieova, ka ‵lago eiloa koe ki fakamatalaga i te mataupu tenei e uiga ki te loto fakafetai. Kae, e iloa ne koe me e se faigofie ke fakaasi atu te loto fakafetai. Kae ke mo a ma loto vāivāi. E mafai o ati aka kae fakatumau ne koe se kilokiloga loto fakafetai. Pefea la? Fakaavanoa se taimi i aso takitasi ke mafaufau ki nisi feitu o te olaga kolā e mafai o fakaasi atu ne koe te loto fakafetai. Ko te lasi o tou loto fakafetai, ko te lasi foki o te manakoga ke fakaasi atu. Ka fai ei ke fiafia malosi koe i lō te saga malosi atu fua ki fakalavelave o te olaga. Mafaufau ki mea ‵gali e fai ne te Atua mo nisi tino ke fakamalosi ei koe, ka maua eiloa ne koe mai i ei te fiafia. Kāti e mafai o tusi ne koe ki lalo. I te tusi tenā, e mafai o fakamau ne koe a mea e lua io me tolu kolā e loto fakafetai koe ki ei i aso takitasi.

Nisi tino kolā ne sukesuke ne latou a te uiga tenei ne fai mai me “i te fakaasi atu faeloa o te loto fakafetai e mafai o ‵fuli ne ia te auala e galue ei ‵tou mafaufau, ko te mea ke faigofie ki a tatou ke fia‵fia i te olaga.” A te tino loto fakafetai se tino fiafia. Tela la, mafaufau ki ou fakamanuiaga, ke fiafia ki mea ‵gali i tou olaga, kae fakaasi atu faeloa te loto fakafetai! I lō te manatu māmā ki mea ‵lei, “fakafetai atu ki a Ieova, me i a ia e ‵lei.” Ao, “fakafetai atu mō mea katoa.”—1 Nofo. 16:34; 1 Tesa. 5:18.