E seki fai loa penā. Ne seki fai atu te Tiapolo ki a Eva me kafai e kai tou fafine ki te fuagalakau telā ne fakatapu ne te Atua, ka fakafoliga atu fua i a ia e mate kae e isi se vaega sē matea o ia (te mea telā e mafau‵fau a nisi tino i aso nei e pelā me ko te agaga o te tino mate) telā ka tumau i te ola i se isi koga aka. Mai te faipati atu e auala i se gata, ne fai atu a Satani me kafai a Eva e kai ki te fuaga o te lakau tenā, ‘ka se mate eiloa’ tou fafine. Ne fai atu tou tagata me ka tumau a tou fafine i te ola, maua ne ia se olaga gali i te lalolagi nei, se olaga telā e tu tokotasi mai i te Atua.—Kene. 2:17; 3:3-5.

Kafai a te akoakoga ‵se tenei e uiga ki te tumau o te agaga i te ola mai tua o te mate telā e akoako ne tino i aso nei ne seki māfua mai i Etena, kae ko te taimi fea la ne sae aka i ei a te manatu tenei? E se mautinoa tonu i a tatou. E iloa fua ne tatou me i tapuakiga ‵se katoa ne fakaseai atu i te Lolo i aso o Noa. Seai se akoakoga ‵se fakalotu ne ‵toe mai i te taimi o te Lolo, me ko Noa fua mo tena kāiga—tino tapuaki ‵tonu ne ‵sao mai i ei.

Tela la, e mautinoa eiloa me i te akoakoga e uiga ki te tumau o te agaga i te ola mai tua o te mate telā ko salalau i aso nei, kāti ne sae mai, mai tua o te Lolo. I te taimi ne faka‵numi ei ne te Atua a ‵gana i Papelu kae ne salalau atu a tino “i te lalolagi kātoa,” e mautinoa eiloa me ne tauave ne latou a te akoakoga tenā me isi se agaga o te tino telā e tumau i te ola māfai ko mate. (Kene. 11:8, 9) Faitalia eiloa te taimi ne kamata o sae mai i ei a te akoakoga ‵se tenā, e mautinoa eiloa i a tatou me i a Satani te Tiapolo, “te tamana o te loi,” ko te māfuaga o mea ma‵sei katoa, kae ko oko loa i ana fiafia ke salalau atu a te akoakoga ‵se tenā ki te lalolagi kātoa.—Ioa. 8:44.