A te tala i te Teutelonome 22:25-27 e se fakamatala likiliki mai i ei a fakamaoniga e uiga ki te agasala a te tagata tenei, me i a ia ko oti loa ne agasala. Kae e faka‵mafa mai i te tulafono tenei a te fakamaoni o te fafine tenei. Onoono aka la ki te fakamatalaga tenei.

E faipati loa a fuaiupu mai mua e uiga ki se tagata telā ne ‵moe mo se fafine telā ko oti ne ‵sai feagaiga “i te fakai.” I te faiga penā, ko agasala eiloa tou tagata, me ne ‵kilo atu a tino ki te fafine telā ne ‵sai feagaiga e pelā me se tino ko oti ne avaga. Kae pefea la te fafine tenā? “Ne seki pakalaga a ia i loto i te fakai.” Moi ne pakalaga tou fafine, e mautinoa eiloa me ka lagona ne nisi tino a ia kae ka mafai o ‵pulu ne latou a ia. Kae ne seki pakalaga tou fafine. Tela la, ko aofia a ia i te mulilua, kae ko fakamasino a lāua katoa me e agasala.—Teu. 22:23, 24.

Kae ne toe faka‵mafa mai foki i te Tulafono se isi tulaga aka: “Kae kafai ne fetaui te tagata mo te fafine ko oti ne ‵sai feagaiga mo te suā tagata i te fatoaga kae puke ne te tagata a tou fafine ke ‵moe tasi lāua, e ‵tau fua o tamate a te tagata telā ne ‵moe tasi mo tou fafine, kae e se ‵tau mo koe o fai se mea ki te tamaliki fafine. E seai se agasala ne fai ne te tamaliki fafine e ‵tau ei o tamate a ia. E ‵pau eiloa a te mea tenei mo se tagata telā e taua mo tena tuakoi kae tamate ne ia. Me ne fetaui tou tagata mo te fafine i te fatoaga kae ne pakalaga te tamaliki fafine telā ne ‵sai feagaiga, kae e seai se tino i konā ke fakasao ne ia tou fafine.”—Teu. 22:25-27.

I te tala tenā, ne tali‵tonu a famasino ki te fafine. I te feitu fea? Ne mafau‵fau a famasino me “ne pakalaga tou fafine, kae e seai se tino i konā ke fakasao ne ia tou fafine.” Tela la, a ia e se mulilua. Kae ko te tagata e agasala i te pukemalo mo te mulilua, me ne “puke ne te tagata a tou fafine” telā ko oti ne ‵sai feagaiga “ke ‵moe tasi lāua.”

Tela la, e tiga eiloa ne fakasino tonu atu a te tulafono tenei ki te fakamaoni o te fafine, ne fakamatala mai i te tala me ne agasala eiloa te tagata ona ko te pukemalo mo te mulilua. E mafai o tali‵tonu tatou me ka “iloilo faka‵lei” ne famasino a te mea ne tupu kae fai ne latou se fakaikuga telā e fetaui ‵lei mo tulaga o te Atua kolā ne fakamatala manino mai i taimi e uke.—Teu. 13:14; 17:4; Eso. 20:14.