1, 2. Kaia e ‵tau ei o fakaakoako a nisi tino ke kausaki atu ki tauliaga i te fakapotopotoga?

A TE folafolaatuga o tala ‵lei o te Malo ko te galuega telā ne fakamuamua ne Iesu. Kae ne fakamāumāu ne ia a taimi e uke ke fakaakoako a nisi tino ke fai pelā me ne tausi mamoe mo faiakoga. (Mata. 10:5-7) E tiga eiloa ne fakalavelave a Filipo i tena galuega talai, ne fesoasoani atu a ia ki ana tamaliki fafine e tokofa ke atamai i te fakaasi atu o muna‵tonu mai te Tusi Tapu ki nisi tino. (Galu. 21:8, 9) E pefea te tāua o vaegā fakaakoakoga penā i aso nei?

² I te lalolagi kātoa, ko gasolo aka ki luga te aofaki o tino e talia ne latou te tala ‵lei. E ‵tau o iloa ne tino ‵fou kolā seki papatiso a te tāua ke fai a sukesukega totino ki te Tusi Tapu. E ‵tau foki o akoako latou ke iloa o talai atu te tala ‵lei ki nisi tino kae akoako atu te munatonu. I ‵tou fakapotopotoga, e manakogina ke fakamalosi aka a taina ke ga‵lue malosi ko te mea ke fetaui ‵lei ke fai pelā me ne tavini fesoasoani mo toeaina. E auala i “fakatonuga ‵lei,” e mafai o fesoasoani atu a Kelisiano ma‵tua ‵lei ki tino ‵fou ke ga‵solo ki mua i te feitu faka-te-agaga.—Faata. 4:2.

3, 4. (a) Ne fakafetaui aka pefea ne Paulo a te sukesuke ki te Tusi Tapu mo te faiga o te galuega talai i se auala magoi? (e) A koi tuai o fakamalosi ne tatou a ‵tou tino a‵koga ke sukesuke ki te Tusi Tapu i a latou eiloa, se a te mea e ‵tau foki o fai ne tatou?

³ E pefea te tāua ke fai a sukesukega totino ki te Tusi Tapu? E maua ne tatou a te tali i pati a te apositolo ko Paulo ki Kelisiano i Kolose. Ne tusi atu a ia: “Tenei foki eiloa te pogai e se gata ei te motou ‵talo mō koutou .  . . kae fakatagi atu ko te mea ke faka‵fonu koutou ki te iloa tonu e uiga ki tena loto i poto katoa mo te malamalama i mea faka-te-agaga, ko te mea ke sa‵sale koutou i se auala telā e talia ne Ieova kae ke fakafiafia katoatoa atu ki a ia e auala i fua o otou galuega ‵lei katoa kolā e fai faeloa ne koutou mo te gasolo ki mua o te otou iloa tonu e uiga ki te Atua.” (Ko. 1:9, 10) Ona ko te iloa tenā, ne mafai ei ne Kelisiano i Kolose o “sa‵sale .  . . i se auala telā e talia ne Ieova kae ke fakafiafia katoatoa atu ki a ia.” Ne fai ne te mea tenei ke mafai ne latou o tumau i te mauaga o fuataga o “galuega ‵lei” maise loa i te talaiatuga o te tala ‵lei. Ke magoi te faiga o te galuega, e ‵tau mo se tino tapuaki o Ieova o fai sena fakatokaga masani ke sukesuke ki te Tusi Tapu. E mafai o fesoasoani atu tatou ki a‵koga faka-te-Tusi Tapu ke fai penā.

⁴ A koi tuai o fesoasoani atu ki nisi tino ke maua ne latou a mea aoga mai te faiga o sukesukega totino ki te Tusi Tapu, e ‵tau o tali‵tonu tatou ki te tāua o te mea tenā. A te ‵tonuga loa, e ‵tau o fai ne tatou se fakatokaga ‵lei e uiga ki te faiga o sukesukega aoga ki te Tusi Tapu. Tela la, e mafai o ‵sili ifo a koe penei: ‘Kafai e faka‵sae aka ne tino i fale a manatu kolā e se fetaui mo akoakoga a te Tusi Tapu io me ‵sili mai ne latou a fesili faiga‵ta, e mata, e mafai o tuku atu ne au a tali kolā e fakavae ki te Tusi Tapu? Kafai e faitau ne au a tala o Iesu, Paulo mo nisi tino kolā ne kufaki i te galuega talai, e mata, e mafaufau ‵loto au ki te auala e aoga ei te lotou loto kufaki ki taku taviniga ki a Ieova?’ E ‵tau o maua ne tatou katoa a te iloaga mo pati fakatonutonu mai te Muna a te Atua. Kae kafai e fai atu ne tatou ki nisi tino a te uke o mea aoga ne maua ne tatou mai te faiga o sukesukega totino ki te Tusi Tapu, e mafai eiloa o fakamalosi atu latou ke maua a mea aoga konā mai te fai pelā me se tino akoga telā e sukesuke malosi ki te Tusi Tapu.

5. Taku mai se manatu e uiga ki te auala ke fesoasoani atu ki tino ‵fou ke fai olotou sukesukega totino ki te Tusi Tapu e pelā me se faifaiga masani.

⁵ E mafai o ‵sili ifo koe penei, ‘E mafai pefea o fakaakoako ne au taku tino akoga ke sukesuke ki te Tusi Tapu i aso katoa?’ A te faiga ‵lei ko te fakaasi atu ki a ia te auala e fakatoka ei koe mō sukesukega kolā e fai fakatasi ne koulua. E mafai o fai atu koe ke faitau ne ia a vaega o mataupu fakaopoopo o te tusi ko te Ne a Mea e Akoako ‵Tonu Mai i te Tusi Tapu? kae onoono ki tusi fai‵tau. Fesoasoani atu ki a ia ke fakatoka mō fakatasiga mo te fakamoemoega ke fai sena tali. Fakamalosi atu a ia ke faitau ki lōmiga katoa o Te Faleleoleo Maluga mo te Awake!  Kafai e isi sena ‵kopi o te Watchtower Library io me ko te FATATUSI I TE ITANETI i tena ‵gana eiloa, ko mafai ei o fakaasi ne koe a te auala e fakaaoga i ei ke tali aka a fesili faka-te-Tusi Tapu. Mai te vaegā fesoasoani tenā, ka gasolo aka eiloa o fiafia tau tino akoga faka-te-Tusi Tapu i ana sukesukega totino ki te Muna a te Atua.

6. (a) E mafai pefea o fesoasoani atu koe ki tau tino akoga ke ati aka i tena loto a te fiafia tonu ki te Tusi Tapu? (e) Ne a mea e mafai o fai ne te tino akoga māfai e ati aka ne ia te fiafia tonu ki te Tusi Tapu?

⁶ E tonu, e se ‵tau o faimālō ne tatou so se tino ke faitau kae sukesuke ki te Tusi Tapu. I lō te fai penā, ke na fakaaoga ne tatou a mea faigaluega ne tuku mai ne te fakapotopotoga a Ieova ke fesoasoani atu ki ‵tou tino akoga ke momea aka te lasi o tena fiafia tonu ki te Tusi Tapu. Fakamuli loa, ka maua ne te tino akoga loto finafinau tenā a lagonaga e pelā mo te faisalamo telā ne usu mai, penei: “Se mea tafasili i te gali te pili ki te Atua; e maua toku puipuiga i te Aliki Maluga.” (Sala. 73:28) Ko te agaga eiloa o Ieova ka fesoasoani atu ki se tino akoga faka-te-Tusi Tapu telā e sukesuke faka‵lei kae loto fakafetai ke fakapilipili atu ki te Atua.

7. Ne fakaakoako pefea ne Iesu a tino talai o te tala ‵lei? (Ke onoono ki te ata i te kamataga.)

⁷ I te Mataio mataupu e 10, e maua ne tatou a fakatonuga ne tuku atu ne Iesu ki ana apositolo e toko 12. I lō te faipati ki mea valevale, ne faipati a ia ki te auala e ‵tau ei o talai. ^[1] Ne fakalogo‵logo a apositolo i te taimi ne akoako ei ne Iesu latou ki te auala ke talai atu i se auala magoi. Mai konā, ne olo atu ei te potukau tenā o talai. Mai te tauloto ki auala ne faipati ki ei a Iesu, ne fai ei latou mo faiakoga apo o te munatonu mai te Tusi Tapu. (Mata. 11:1) E mafai o fakaakoako ne tatou a ‵tou tino a‵koga ki te Tusi Tapu ke fai pelā me ne tino talai ma‵goi o te tala ‵lei. Ke na sau‵tala nei tatou ki auala e lua ke fesoasoani atu ki a latou.

8, 9. (a) Ne faipati atu pefea a Iesu ki tino taki tokotasi i tena galuega talai? (e) E mafai pefea o fesoasoani atu tatou ki tino talai ‵fou ke iloa o sau‵tala mo tino e pelā mo te mea ne fai ne Iesu?

⁸ Sau‵tala mo tino. Ne faipati atu foki a Iesu ki tino taki tokotasi e uiga ki te Malo. E pelā me se fakaakoakoga, ne fai ne ia se sau‵talaga aoga kae maua mai i ei a ikuga ‵lei mo se fafine i te vaikeli o Iakopo telā e pili ki te fa‵kai o Sukala. (Ioa. 4:5-30) Ne faipati foki a ia ki a Mataio Levi, te tino ao lafoga. E se uke a fakamatalaga e uiga ki te sau‵talaga tenā ne fakamau i tusi Evagelia, kae ne talia ne Mataio a te ‵kamiga a Iesu ke fai mo ana soko. Ne fakalogo‵logo a Mataio mo nisi tino ki te faipatiga a Iesu i te taimi o te ‵kaiga i te fale o Mataio.—Mata. 9:9; Luka 5:27-39.

⁹ I te suā taimi, ne faipati a Iesu i se auala ‵lei ki a Natanielu, telā ne maua ne ia se kilokiloga sē ‵lei ki tino mai Nasaleta. Kae ne gasuesue a Natanielu o ‵fuli tena kilokiloga. Ne fakaiku aka ne ia ke tauloto ki mea e uke e uiga ki a Iesu, se tagata mai Nasaleta telā ne akoako atu. (Ioa. 1:46-51) Tela la, e isi se pogai ‵lei ke fakaakoako ne tatou a tino talai ‵fou ke fai‵pati mo tino i se auala ‵lei kae mata fiafia. ^[2] Ka fia‵fia a tino ‵fou kolā e fesoasoani tatou ki ei ke lavea ne latou a te auala e ‵saga mai ei a tino loto ‵lei māfai e fai‵pati atu tatou i se auala atafai.

10-12. (a) Ne fakamalosi aka pefea ne Iesu te fiafia ne fakaasi mai ne nisi tino ki te tala ‵lei? (e) E mafai pefea o fesoasoani atu ki tino talai ‵fou ke momea aka te lotou ata‵mai e pelā me ne faiakoga o te munatonu mai te Tusi Tapu?

¹⁰ Ati aka te loto fiafia. Ne mu‵tana fua a taimi o Iesu ke fai tena galuega talai. Kae ne fakaaoga ne ia a taimi ke ati aka te loto fiafia o tino ki te tala ‵lei. E pelā me se fakaakoakoga, ne fakaaoga ne Iesu a te pōti e pelā me se tulaga i te taimi ne akoako ei ne ia se vaitino. I te taimi tenā, ne fai fakavavega ne Iesu ke maua ne Petelu ne ika e uke ‵ki, kae fai atu ki a ia, penei: “Mai te taimi tenei o fano ki mua, ka faiika eiloa koe ki tino ola.” Se a te mea ne iku mai i pati mo faifaiga a Iesu? Ne aumai ne Petelu mo ana taugasoa “a pōti ki uta i  te fenua, tiaki ne latou olotou mea katoa kae tau‵tali atu i a [Iesu].”—Luka 5:1-11.

¹¹ A Nikotemo, se sui o te Sanetulini, ne fiafia ki akoakoga a Iesu. Ne manako a ia o tauloto ki mea e uke atu kae ne mataku i tino ma lavea ne latou a ia e fai‵pati mo Iesu kae fai olotou pati. Ne fakamuli‵fuli kae fakaaoga faka‵lei ne Iesu ana taimi; ne fetaui a ia mo Nikotemo i po—i se koga e se lavea ne tino. (Ioa. 3:1, 2) Se a te akoakoga e mafai o tauloto ne tatou mai tala konei? Ne fakaaoga ne Iesu ana taimi ke ati aka te fakatuanaki o tino taki tokotasi. E mata, e se ‵tau o ga‵lue ma‵losi tatou i te faiga o toe asiga mo akoga faka-te-Tusi Tapu a tino fia‵fia?

¹² E mafai ne tino talai ‵fou o momea aka te ‵lei o te lotou atamai e pelā me ne faiakoga o te munatonu mai te Tusi Tapu māfai e ga‵lue fakatasi mo tatou i te galuega talai. E mafai o fesoasoani atu tatou ke masaua ne latou a tino kolā e fakaasi mai ne latou se fiafia foliki. E mafai o ‵kami ne tatou a tino talai ‵fou ke olo tasi mo tatou ki ‵tou toe asiga mo akoga faka-te-Tusi Tapu. Mai vaegā akoakoga mo fakamalosiga penā, ka mafai ei o ati aka ne tino talai kolā seki apo malosi a te fia‵fia i tino kae fai olotou akoga faka-te-Tusi Tapu. Ka tauloto foki latou ke mo a e ‵fiu vave kae ke kufaki i te galuega talai.—Kala. 5:22; ke onoono ki te pokisi “E Tāua ‵ki te Kufaki.”

13, 14. (a) E pefea tau kilokiloga ki fakaakoakoga i te Tusi Tapu e uiga ki tino kolā ne loto fia‵fia o tavini atu ki nisi tino? (e) Ne a auala ma‵goi e mafai o fakaakoako ne tatou a tino talai ‵fou mo tama‵liki talavou ke fakaasi atu te alofa ki taina mo tuagane?

¹³ E fakaasi mai i tala i te Tusi Tapu a te tauliaga e maua ne tatou e uiga ki te fakaasi atu o te “alofa fakataina” kae tavini atu ki nisi tino. (Faitau te 1 Petelu 1:22; Luka 22:24-27.) Ne tuku mai ne te Tama a te Atua a mea katoa, e aofia ei a tena ola, mai te tavini atu ki nisi tino. (Mata. 20:28) Ne fai ne Tokasi “a galuega ‵lei e uke kae tufa atu foki a meaalofa.” (Galu. 9:36, 39) A Malia, se tuagane mai Loma, ne “galue malosi” mō latou kolā i loto i te fakapotopotoga. (Loma 16:6, TT) E mafai pefea o fesoasoani atu tatou ki tino talai ‵fou ke iloa ne latou te tāua ke fesoasoani atu ki olotou taina mo tuagane?

¹⁴ E mafai o ‵kami ne Molimau ma‵tua ‵lei a tino ‵fou ke olo fakatasi mo latou o asi atu ki tino ma‵saki mo tino ma‵tua. Kafai e mafai, e mafai o avatu ne mātua a olotou tama‵liki ki vaegā asiga penā. E mafai ne toeaina o ga‵lue fakatasi mo nisi tino ke fakamautinoa aka me maua ne ‵tou taina ma‵tua a mea‵kai kae mafai foki o faka‵lei aka a nisi mea ma‵sei i olotou fale. I auala konei, ko mafai ei o tauloto ne tama‵liki talavou mo tino ‵fou a faifaiga atafai kolā e mafai o fakaasi atu ki nisi tino. I te taimi o te galuega talai, ne asi atu se toeaina ki nisi taina e ‵nofo i te koga talai tenā ke iloa aka me pefea latou. Tela la, ne tauloto ne se taina talavou telā ne olo faeloa mo te toeaina tenā me e ‵tau o fakaasi atu ki tino katoa i te fakapotopotoga a te alofa.—Loma 12:10.

15. Kaia e tāua ei ke fesoasoani atu a toeaina ki te ga‵solo ki mua o taina i te fakapotopotoga?

¹⁵ Ona ko te mea e fakaaoga ne Ieova a tagata e pelā me ne faiakoga i te fakapotopotoga, se mea tāua ke ati aka ne taina a te atamai i te faipati. E pelā me se toeaina, e mata, e mafai o fakalogologo faka‵lei koe ki se tavini fesoasoani telā e fakaakoako tena lāuga? Mai tou fesoasoani, ko mafai ne ia o momea aka tena atamai e pelā me se faiakoga o te Muna a te Atua.—Nee. 8:8. ^[3]

16, 17. (a) I te auala fea ne saga atu ei a Paulo ki te gasolo ki mua o Timoteo? (e) E mafai pefea o fakaakoako ne toeaina i se auala magoi a tausi mamoe o te fakapotopotoga i aso mai mua?

¹⁶ E manakogina malosi a tausi mamoe i te fakapotopotoga Kelisino, kae e ‵tau o tumau i te fakaakoako o latou kolā e fai ne latou te galuega tenā i aso mai mua. Ne tuku mai ne Paulo te auala ke fai ei a fakaakoakoga konei i te taimi ne fai atu ei a ia ki a Timoteo: “E taku tama, fai ke maua faeloa ne koe te ‵mana e auala i te alofa tauanoa telā e maua mai te ‵kau  fakatasi mo Keliso Iesu, mo mea kolā ne lagona ne koe mai i a au kae ‵lago atu ki ei a molimau e tokouke, ko mea konei ke tuku atu ki tāgata fakamaoni kolā e toka ‵lei o akoako atu a mea konei ki nisi tino.” (2 Timo. 2:1, 2) Ne uke a mea ne tauloto ne Timoteo mai te ga‵lue fakatasi mo te apositolo ko Paulo, se toeaina. Kae fakamuli, ne fakagalue ne Timoteo a auala ne akoako atu ei a Paulo i tena galuega talai mo nisi vaega o te taviniga tapu.—2 Timo. 3:10-12.

¹⁷ Ne seki manatu māmā a Paulo i te fakaakoakoga o Timoteo. Ne olo fakatasi faeloa a ia mo Timoteo. (Galu. 16:1-5) E mafai ne toeaina o fakaakoako ki a Paulo mai te ga‵lue fakatasi mo tavini fesoasoani kolā e fetaui ‵lei i te faiga o asiga e pela me ne tausi mamoe māfai e manakogina. E tuku atu ne toeaina ki vaegā taina penā a te avanoaga ke tauloto ‵tonu ne latou a te auala e akoako atu, te fakatuanaki, kufaki, mo te alofa telā e ‵tau o fakaasi atu ne ovasia Kelisiano. E fesoasoani atu a te auala tenei ki te fakaakoakoga o tausi mamoe o te “lafu mamoe a te Atua” i aso mai mua.—1 Pe. 5:2.

18. Kaia e ‵tau o fai ei a te fakaakoakoga o nisi tino i te taviniga a Ieova e pelā me se mea tāua ki a tatou?

¹⁸ A te fakaakoako atu o nisi tino e tāua ‵ki, ona ko te fanakaga o te manakoga mo avanoaga ke tavini atu ki a Ieova. A te auala ne tuku atu ei ne Iesu mo Paulo a fakaakoakoga koi tumau eiloa i te aoga. E manako a Ieova ke fakaakoako faka‵lei ana tavini i aso nei mō tauliaga i te fakapotopotoga. E tuku mai ne te Atua ki a tatou a te tauliaga ke fesoasoani atu ki tino talai kolā e seki apo malosi ke ati aka te lotou atamai ke fai te galuega telā e manakogina i te fakapotopotoga. Ona ko te ma‵sei o tulaga o te lalolagi kae koi lasi ‵ki te manakoga ke talai, ko oko eiloa i te tāua o fakaakoakoga penā kae e ‵tau foki o fai fakavave.

19. Kaia e ‵tau ei o talitonu koe me i au taumafaiga malosi ke fakaakoako atu a nisi tino i te taviniga a Ieova ka manuia eiloa?

¹⁹ E tonu, e uke a taimi mo taumafaiga e manakogina ke fakaakoako a nisi tino. Kae ko Ieova mo tena Tama fagasele ka ‵lago mai kae tuku mai te poto ke mafai o fai a fakaakoakoga konā. Ka fia‵fia eiloa tatou māfai ko lavea ne tatou a latou kolā ne fesoasoani tatou ki ei e tumau i te ‘ga‵lue mo te fi‵ta kae fakapalele olotou mafi.’ (1 Timo. 4:10) Kae ke na tumau tatou i te ga‵solo ki mua i te feitu faka-te-agaga i te faiga o ‵tou taviniga tapu ki a Ieova.