1, 2. (a) E fakataunu pefea a te valoaga i te Isaia 60:22 i te taimi tenei o te gataga? (e) Ne a mea kolā ko manakogina i te fakapotopotoga saukātoa a Ieova i te lalolagi nei?

“A TE tino foliki ka fai pelā me se tokoafe kae ko te tino fatauva ka fai mo atufenua malosi.” (Isa. 60: 22, NW) A pati fakavaloaga konā ko fakataunu i aso fakaoti konei. Me i te tausaga faka-te-taviniga i te 2015, e nofo ki se 8,220,105 tino talai o te Malo loto finafinau i te lalolagi kātoa! A te vaega fakaoti o te valoaga tenā e aofia i ei a Kelisiano taki tokotasi katoa, me e fai mai te ‵tou Tamana faka-te-lagi, penei: “Au Ieova, ka fakava‵vave ne au te mea tenā i tena taimi tonu.” E pelā mo pasese kolā e ‵sopo i luga i se motoka telā e gasolo aka loa ki luga tena makini, ko lavea foki ne tatou a te gasolo vave ki luga o te galuega ko te faiga o soko. E pefea ‵tou kilokiloga taki tokotasi ki te gasoloakaga fakavave tenei? E mata, e fai ne tatou a mea katoa e mafai ne tatou o fai e pelā me ne tino talai loto finafinau o te Malo? E tokouke a taina mo tuagane ne faka‵fonu olotou pepa ke tavini atu e pelā me ne paenia tumau io me ne paenia lagolago. E mata, se mea fakafiafia ke lavea atu te tokouke o tino e talia ne latou te kalaga ke tavini atu i koga kolā e lasi te manakoga i ei io me aofia i nisi galuega o te Malo?

² E se gata i ei, e lavea ne tatou te fanakaga o te manakoga mō tino ga‵lue e tokouke. E nofo ki se 2,000 fakapotopotoga e faka‵tu aka i tausaga takitasi. Tela la, kafai e toko 5 toeaina e manakogina ke tavini  atu i fakapotopotoga ‵fou takitasi konā, e manakogina foki se toko 10,000 tavini fesoasoani ke mafai o fetaui ‵lei ke fai pelā me ne toeaina i tausaga takitasi. Ko tena uiga, e manakogina foki se fia afe o taina ke mafai o fetaui ‵lei ke fai pelā me ne tavini fesoasoani. E se gata i ei, faitalia me ko tatou ne taina io me ne tuagane, e mautinoa eiloa i a tatou me e manakogina ke “uke [‵tou] galuega e fai i te galuega a te Aliki.”—1 Koli. 15:58.

3, 4. Se a te uiga ke gasolo koe ki mua i te feitu faka-te-agaga?

³ Faitau te 1 Timoteo 3:1. A te pati Eleni telā ne ‵fuli ki te “fia maua” e fakauiga loa ke fakaloa tou lima o puke se mea, kāti se mea e se mafai o oko koe ki ei. I te fakaaogaga o te pati tenā, ne faka‵mafa mai ne te apositolo ko Paulo a taumafaiga e manakogina ke gasolo ki mua i te feitu faka-te-agaga. Ke fakaataata ne koe se taina e mafaufau ki tena taviniga i loto i te fakapotopotoga i aso mai mua. Kāti e se mafai o fai nei a ia e pelā me se tavini fesoasoani, kae e iloa ne ia te tāua ke ati aka ne ia a uiga faka-te-agaga. Muamua la, e taumafai a ia ke fetaui ‵lei ke fai pelā me se tavini fesoasoani. Fakamuli loa, e fakamoemoe a ia ke fetaui ‵lei a ia i te feitu faka-te-agaga ke fai pelā me se ovasia. Tela la, e galue malosi tou tagata ke fetaui ‵lei mo te manakoga ke tausi atu ki tiute fakaopoopo i te fakapotopotoga.

⁴ I se auala tai ‵pau, a taina mo tuagane kolā e ma‵nako o fai pelā me ne paenia, ga‵lue i te Peteli, io me aofia i volenitia o te matagaluega fakatu‵tu o Fale Tapuaki, e ma‵nako foki o kausaki atu ki fakamoemoega konā. Ke na sau‵tala nei tatou ki te auala e fakamalosi ne te Muna a te Atua a tatou katoa ke ga‵solo ki mua i te tapuakiga tonu.

5. E mafai pefea ne talavou o fakaaoga olotou ma‵losi i te galuega o te Malo?

⁵ E maua ne talavou a te malosi ‵lei ke fai a mea e uke i te galuega a Ieova. (Faitau te Faataoto 20:29.) E aofia a nisi taina talavou i te Peteli i te ‵lomiga mo te faitega o Tusi Tapu mo tusi faka-te-Tusi Tapu. E tokouke a taina mo tuagane talavou e aofia i te galuega ko te faitega mo te faka‵leiga o Fale Tapuaki. Kafai ko ‵tupu a fakalavelave o te natula, e ‵kau fakatasi a talavou mo Molimau a‵tamai i te faiga o galuega ki tino kolā ne pokotia. Kae e tokouke a paenia talavou e fesoasoani atu i te fakaokoatuga o te tala ‵lei ki tino ‵tonu o te fenua mo tino mai fenua fakaa‵tea.

6-8. (a) Ne ‵fuli pefea te kilokiloga a se talavou tagata ki te taviniga ki te Atua, kae se a te mea ne iku mai i ei? (e) E mafai pefea ne tatou o “‵tofo aka kae ka lavea atu a te ‵lei o Ieova”?

⁶ E mautinoa eiloa me e loto fakafetai koe ki te tāua o te tavini atu ki te Atua mo tou loto kātoa. Kae e a māfai e ‵pau ou lagonaga mo te taina ko Aaron? E tiga eiloa ne tupu aka a ia i loto i se kāiga Kelisiano, ne fai ‵tonu mai a ia, penei: “Ne fai a fakatasiga mo te galuega talai e pelā me se mea faka‵fita ki a au.” Ne manako a ia o tavini atu ki te Atua mo te fiafia kae ne mafaufau a ia ki te pogai ne seki maua ei ne ia te fiafia. Ne a la ana mea ne fai?

⁷ Ne kausaki atu a Aaron ke fai se fakatokaga faka-te-agaga e aofia i ei te faitau ki te Tusi Tapu, fakatoka ki fakatasiga, kae fai foki ana tali i ei. Ne kamata foki o ‵talo atu a ia i aso katoa. I te taimi ne gasolo aka ei ki luga a tena alofa ki a Ieova, ne kamata o lavea atu a tena gasolo malosi ki mua i te feitu faka-te-agaga. Mai konā, ne fiafia a Aaron o paenia, ga‵lue fakatasi mo nisi tino i te matagaluega mō fakalavelave ‵tupu o te natula, kae talai atu i se fenua fakaa‵tea. Ko tavini atu nei a Aaron i te Peteli kae se toeaina foki. E pefea tena kilokiloga ki te auala telā ne fakagalue ne ia? “Ne ‘‵tofo ne au kae ne lavea aka ei ne au te ‵lei o Ieova.’ Ona ko tena fakamanuiaga, ne nofo kaitalafu au i a ia kae ne fai ei ke uke atu aku mea e fai i tena taviniga, kae ne iku atu ki fakamanuiaga e uke.”

⁸ Ne usu mai te faisalamo, penei: “Kae ko latou kolā e ‵sala ki a Ieova ka seai ne mea ‵lei e ma‵tiva ei latou.” (Faitau te Salamo 34:8- 10, NW *) E tonu, e se mafai o fakafanoanoa ne Ieova a latou kolā e tavini atu ki a ia mo te loto finafinau. E pelā me ne tino taki tokotasi, ‘e ‵tofo kae lavea ne tatou a te ‵lei o Ieova’ māfai e fai ne tatou a mea katoa i tena taviniga. Kae kafai e tapuaki atu tatou ki te Atua mo te loto kātoa, ka maua ne tatou a te fiafia telā e se mafai o fakatusa ki se mea.

9, 10. Kaia e tāua ei ke maua ne koe a te uiga “fakatalitali”?

⁹ A koi kausaki atu koe ki ou fakamoemoega, ke fakaasi atu se uiga “fakatalitali.” (Mika 7:7) E ‵lago mai faeloa a Ieova ki ana tavini fakamaoni, faitalia me e mafai o talia ne ia latou ke fakatali‵tali ki tauliaga io me ko te taimi tonu. Ne tauto atu a ia ki a Apelaamo me ka isi sena tamaliki tagata, kae ne ‵tau o maua ne Apelaamo a te fakatuanaki mo te loto kufaki. (Epe. 6:12-15) E tiga eiloa ne faka‵tali a ia mō se fia tausaga ki te fanaumaiga o Isaako, ne seki loto vāivāi a Apelaamo, kae ne fiafia eiloa a Ieova ki a ia.—Kene. 15:3, 4; 21:5.

¹⁰ A te faka‵tali e sē se mea faigofie. (Faata. 13:12) Kafai e mafaufau ‵mafa tatou ki fakamoemoega kolā seki taunu, e mafai eiloa o loto vāi‵vai tatou. I lō te fai penā, se mea poto ke fakaaoga ‵tou taimi ke momea aka ‵tou tulaga faka-te-agaga. Ke na sau‵tala nei tatou ki auala e tolu ke fai penā.

11. Ne a uiga faka-te-agaga e mafai o ati aka ne tatou, kae kaia e tāua i ei?

¹¹ Ati aka a uiga faka-te-agaga. Mai te faitau ki te Tusi Tapu kae mafaufau ‵loto ki ei, ko mafai  eiloa o ati aka ne tatou a te poto, atamai, faka‵tauga ‵lei, te iloaga, te mafaufau ‵lei, mo te toka o te mafaufau. A vaegā uiga penā e tāua mō tino kolā e fai ne latou te takitakiga i te tapuakiga tonu. (Faata. 1:1-4, NW; Tito 1:7-9) Kae i te taimi e fai‵tau ei tatou ki ‵tou tusi faka-te-Tusi Tapu, e mafai o iloa ne tatou a mafaufauga o te Atua i mea e uke. I aso takitasi, e fakafesagai tatou ki mea kolā e aofia i ei a fakafiafiaga, gatu mo teuga, te auala e fakaaoga ei a tupe, mo te auala ke ati aka se vā ‵lei mo nisi tino. Mai te fakagalue aka o mea e tauloto ne tatou mai te Tusi Tapu, ko mafai ei ne tatou o fai a fakaikuga kolā e fakafiafia atu ki a Ieova.

12. E mafai pefea o fakaasi atu ne tino o te fakapotopotoga a te lotou fakamaoni?

¹² Fakaasi atu tou fakamaoni. Faitalia i a tatou ne taina io me ne tuagane, e ‵tau o fai ne tatou a te ‵toe mea e mafai o fai ke tausi atu ki so se tofiga e maua ne tatou. E pelā me se kovana, ne filifili ne Neemia mai tino o te Atua a tino ke pule‵pule atu ki galuega. Ko oi la ne filifili ne ia? Ne fakaaoga ne ia a latou kolā e ma‵taku ki te Atua, fakamaoni, kae fai mea mafai io me fakatuagagina. (Nee. 7:2; 13:12, 13) E pelā foki mo aso nei, “a te mea telā e manakogina i situati ko te lotou fakamaoni.” (1 Koli. 4:2) A galuega ‵lei e mateagofie fua.—Faitau te 1 Timoteo 5:25.

13. E mafai pefea o fakaakoako koe ki a Iosefa māfai e se ‵lei a faifaiga a nisi tino ki a koe?

¹³ Ke talia ke faka‵ma ne Ieova a koe. Se a te mea e mafai ne koe o fai māfai e se ‵lei a faifaiga a nisi tino ki a koe? Kāti e mafai o faka‵tonu fakavave aka ne koe a te fakalavelave tenā. Kae i nisi taimi, e mafai o fakalasi ne koe te fakalavelave mai te fakasakosako atu ke sao koe. Ne fai fakamasei a Iosefa ne ana taina, kae ne seki ita fakamoemoe a ia ki a latou. Fakamuli ifo, ne fai a ‵losiga ‵se e uiga ki a Iosefa kae ne ‵pei atu a ia ki te falepuipui. Kae ui i ei, ne tuku atu ne ia a mea faiga‵ta konā ki te takitakiga a Ieova. Se a te ikuga? “Ne faka‵magina eiloa a ia e auala i pati a Ieova.” (Sala. 105:19, NW) I te otiga o tofotofoga konā, ne maua ne Iosefa se tofiga fakapito. (Kene. 41:37-44; 45:4-8) Kafai e fepaki koe mo fakalavelave faiga‵ta, ‵talo atu mō te poto, gasuesue kae faipati atu mo te agamalu, kae ‵sala atu ki te Atua mō te malosi. Ka fesoasoani atu eiloa a Ieova ki a koe.—Faitau te 1 Petelu 5:10.

14, 15. (a) Kaia e ‵tau ei mo tatou o “‵saga faka‵lei” ki te auala e talai ei tatou? (e) E mafai pefea o fakamafulifuli te auala e talai atu ei koe? (Ke onoono ki te ata i te kamataga mo te pokisi “ E Mata, e Loto Fiafia Koe o Tofotofo Aka se Isi Auala Tai ‵Kese?”)

¹⁴ Ne fakamalosi atu a Paulo ki a Timoteo, penei: “Tumau i te faitau atu i mua o tino katoa. Fakamalosi kae akoako atu latou. Saga faka‵lei faeloa ki a koe mo au akoakoga.” (1 Timo. 4:13, 16) Ko oti ne fai a Timoteo mo fai se tino talai atamai o te Malo. Kae ne mafai fua o magoi tena galuega talai māfai e “saga faka‵lei faeloa” ki ana akoakoga. Ne seki manatu māmā a ia ki te fia‵fia o tino ki te auala masani e akoako atu ei a ia. Ke tumau i te oko atu ki olotou loto, ne ‵tau o fakamafulifuli a te auala e akoako atu ei a ia ke fetaui ‵lei mo olotou manakoga. E pelā me ne tino talai o te Malo, e ‵tau o fai foki tatou penā.

¹⁵ E masani sale o se tī maua ne tatou a tino i olotou fale i te taimi e talai atu ei tatou mai fale ki fale. I nisi koga, e se mafai ne tatou o ulu atu ki loto i nisi fale talimālō mo fale kolā e ‵pui. Kafai e penā tou koga talai, kaia e se ‵sala atu ki nisi auala ke talai atu te tala ‵lei?

16. I te auala fea e mafai ei o magoi a te galuega talai i koga e tokouke a tino i ei?

¹⁶ A te talai atu i koga e tokouke i ei a tino se auala gali ‵ki ke fakasalalau atu ei te tala ‵lei. Ki te tokoukega o Molimau, ne magoi te lotou galuega i te auala tenā kae ne maua foki ne latou a ikuga ‵gali mai i ei. E fakatoka ne latou a taimi ke talai atu ki tino i tuleini mo koga e ‵tu i ei a pasi, i maketi mo malae ta‵fao, mo nisi koga aka kolā e tokouke a tino i ei. Mai te fakaaogaga o faka‵tauga ‵lei, e mafai o kamata ne se Molimau se sau‵talaga mo se tino mai te  fakasae aka se tala i te letio, tavae ne ia tama‵liki a te tino tenā, io me ‵sili atu se fesili e uiga ki tena galuega. I te taimi e sau‵tala ei, e fakasae aka ne te tino talai se manatu faka-te-Tusi Tapu kae faka‵tali ki se tali. E mafai o iku atu a te tali a te tino tenā ki se sau‵talaga faka-te-Tusi Tapu.

17, 18. (a) E mafai pefea o loto malosi koe ke talai atu i koga e tokouke a tino i ei? (e) Kaia e tāua ei ki a koe a te ‵viki atu o Tavita ki a Ieova i te taimi e fai ei tau galuega talai?

¹⁷ Kafai e faigata a te talai atu i koga e tokouke a tino i ei, ke mo a e ‵fiu vave. A Eddie, se paenia i te fa‵kai lasi o Niu Ioki, ne faigata ke sau‵tala mo tino i koga kolā e tokouke a tino i ei. Kae ne mafai o maua ne ia te loto malosi fakamuli ifo. Se a te mea ne fesoasoani atu ki a ia? Ne fai mai a ia: “I taimi e fai ei te mā tapuakiga a kāiga, e fai faeloa ne māua mo taku avaga a sukesukega ke ‵sala atu ki tali o manatu ‵teke mo manatu kolā e fakaasi mai ne tino. E fakamolemole atu foki māua ki nisi Molimau mō ne manatu fesoasoani.” Nei la, e olioli faeloa a Eddie ke talai atu i koga e tokouke a tino i ei.

¹⁸ Kafai ko maua ne koe te atamai mo te loto malosi ke talai atu te tala ‵lei, e mautinoa eiloa me ka lavea mai ne tino a tou gasolo ki mua i te feitu faka-te-agaga. (Faitau te 1 Timoteo 4:15.) E se gata i ei, ka ‵viki atu koe ki te ‵tou Tamana faka-te-lagi e pelā mo te mea ne fai ne Tavita, telā ne usu mai penei: “Ka ‵viki atu au ki a Ieova i taimi katoa; Ana vikiga ka ‵mau eiloa i oku laugutu i taimi katoa. Ka faipati fakamatamata au ona ko Ieova; Ka ‵logo a tino agamalu kae fia‵fia.” (Sala. 34:1, 2, NW) Kae mai te faiga o tau galuega talai, ka fia‵fia a tino agamalu o ‵kau fakatasi mo koe i te tapuakiga tonu.

19. Kaia e ‵tau ei mo se tavini fakamaoni a Ieova o fiafia, faitalia me e fepaki a ia mo tulaga faiga‵ta?

¹⁹ Ne usu mai foki a Tavita, penei: “Au galuega katoa ka faka‵malu atu ki a koe, e Ieova, kae ko ou tino fakamaoni ka ‵viki atu ki a koe. Ka folafola atu ne latou te ‵malu o tau pulega fakatupu, kae fai‵pati e uiga ki tou malosi, ke fakailoa atu ki tino au faifaiga ‵mana mo te gali o tau pulega fakatupu.” (Sala. 145:10-12, NW) E mautinoa eiloa me e fakaasi mai i pati konā a lagonaga o Molimau a Ieova fakamaoni katoa. Kae e a māfai e taofi aka ne masaki mo te tulaga matua a tau galuega talai? Ke masaua faeloa me i te taimi e talai atu ne koe te tala ‵lei ki tino tausi ma‵saki mo nisi tino aka, a tau taviniga tapu e faka‵malu atu eiloa ki te ‵tou Atua. Kafai koe ‵pei ki te falepuipui ona ko tou fakatuanaki, e mafai o talai atu ne koe a te munatonu e ‵tusa mo ou fakanofonofoga, kae e fai i ei ke fiafia te loto o Ieova. (Faata. 27:11) E penā foki māfai e nofo atu koe i se kāiga telā e kese‵kese olotou talitonuga, ke fakatumau tau fakatokaga faka-te-agaga. (1 Pe. 3:1-4) Kafai foki e fepaki koe mo tulaga faiga‵ta, e mafai o ‵viki atu koe ki a Ieova kae gasolo atu ki mua i te feitu faka-te-agaga.

 20, 21. Kafai ne tuku atu ki a koe a galuega e uke i te fakapotopotoga a Ieova, e mafai pefea o fai koe mo fakamanuiaga ki nisi tino?

²⁰ Ka fakamanuia eiloa ne Ieova koe māfai e tumau i te gasolo ki mua i te feitu faka-te-agaga. Kāti kafai e ‵fuli au fakatokaga mo tou olaga, ka lasi atu tou tusaga i te fakasalalauatuga o te munatonu tāua a te Atua ki tino kolā e ma‵nako ki se fakamoemoega. E se gata i ei, ka iku atu tou gasolo ki mua i te feitu faka-te-agaga mo tou loto fiafia o tuku atu ki te mauaga ne ou taina tali‵tonu a mea aoga kolā e se mafai o ‵togi ki tupe. Kae ona ko au galuega loto maulalo i te fakapotopotoga, ka maua ne koe a te taui e auala i te maua ne koe te atafai, te loto fakafetai mo te ‵lago atu o tino kolā e a‵lofa ki a Ieova.

²¹ Faitalia me ne tavini atu tatou ki a Ieova i se fia o tausaga io me kāti ne nāi masina fua, e mafai eiloa ne tatou katoa o ga‵solo atu ki mua i tena tapuakiga. Kae e mafai pefea o fesoasoani atu a Kelisiano ma‵tua ‵lei ki tino ‵fou ke ga‵solo ki mua i te feitu faka-te-agaga? Ka sau‵tala eiloa tatou ki ei i te suā mataupu.