‵Sala Atu ki se Mea e Sili Atu i te ‵Lei i lō Aulo
Kai maua aka loa ne koe se aulo? Ne nāi tino fua ne maua ne latou. Kae e lau i miliona ko oti ne maua ne latou se mea e sili atu i te ‵lei i lō aulo. Ko te poto mai i te Atua telā “e se mafai o ‵togi ki . . . aulo.”—Iopu 28:12, 15.
A TINO a‵koga ki te Tusi Tapu kolā e loto finafinau e fai pelā mo tino kolā e ‵sala malosi ki aulo. A tino a‵koga penā, e manakogina ke ga‵lue malosi kae ke tumau faeloa i te ‵sala atu ki te Tusi Tapu ke maua te poto telā e se mafai o ‵togi. E pelā me ne tino a‵koga ki te Tusi Tapu, se a te mea e mafai o tauloto ne tatou mai i te mafau‵fau ki auala e tolu kolā e mafai o maua ei a aulo?
KO MAUA NE KOE SE FATU TĀUA!
Mafaufau i a koe e sasale i kaugutu o se vaitafe kae lavea ne koe se mea pelā me se fatu foliki e matilo i te mainaga o te la. Ko oko eiloa i tou fiafia i tau punou ifoga ki lalo kae maua atu ne koe me se aulo. E foliki ifo i se ulu o te kaumatāfi kae tāua atu i te taemani tāua. E mautinoa eiloa me ka toe ‵sala atu koe ki nisi fatu tāua.
I se auala tai ‵pau, i nāi taimi ko ‵teka atu e isi se aso telā e se mafai o puli i a koe, e isi se tavini a Ieova ne fanatu ki tou mataloa ke sau‵tala koulua ki te fekau e uiga ki te fakamoemoega telā e maua i loto i te Tusi Tapu. Kāti ne masaua ‵lei ne koe te taimi ne maua ei ne koe a tau aulo faka-te-agaga muamua loa. Ne mafai o tupu te mea tenā i te laveaga muamua eiloa ne koe te igoa o te Atua ko Ieova i te Tusi Tapu. (Sala. 83:18) Io me kāti ne tauloto foki ne koe me e mafai o fai koe pelā me se taugasoa o Ieova. (Iako. 2:23) Ne iloa fakavave ei ne koe me ko oti ne maua ne koe se mea telā e sili atu te ‵lei i lō aulo! Kae kāti ne manako malosi foki koe ke toe ‵sala atu ki ne fatu tāua faka-te-agaga e tai uke atu.
KO MAUA NE KOE A MEA E UKE ATU!
I nisi taimi a tamā matifi‵tifiga o aulo e mafai o fakatupu aka i vaitafe. I ne nāi masina, e mafai ne se tino telā e sukesuke ki mea tāua i te laukele o maua mai vaegā ma‵tifiga penā se aulo telā e ‵togi ki se fia sefulu afe talā.
I te taimi ne kamata ei koe o sukesuke ki te Tusi Tapu mo Molimau a Ieova, kāti ne ‵pau eiloa ou lagonaga mo te tino sukesuke ki mea tāua i te laukele telā ne faka‵ma faka‵lei ne ia a ma‵tifigā aulo. A te mafaufau ‵loto ki fuaiupu takitasi i te Tusi Tapu ka fakaopoopo atu ei ki tou iloaga, se mea telā e fakamaumea ne ia koe i te feitu faka-te-agaga. I te taimi ne mafaufau ‵loto ei koe ki muna‵tonu tāua konā mai i te Tusi Tapu, ne tauloto eiloa koe ki te auala ke fakapilipili atu koe ki a Ieova kae ke tumau i tena alofa fakatasi mo te kilo faeloa ki mua ki te fakamoemoega ko te ola se-gata-mai.—Iako. 4:8; Iuta 20, 2 .
E pelā me se tino sukesuke ki mea tāua i te laukele telā e fakaoti ana mafi ke maua te aulo, e mata, e galue malosi foki koe penā ke tauloto ki muna‵tonu tāua mai i te Tusi Tapu?
E pelā loa me se tino sukesuke ki mea tāua i te laukele telā e ‵sala malosi ki ma‵tifiga o aulo tāua mai i te laukele, e mafai foki koe o poto penā i te ‵salaga o koloa Mata. 28:19, 20.
faka-te-agaga tāua. Mai tua o te taulotoga ki muna‵tonu fakavae mai i te Tusi Tapu, kāti ne fiafia eiloa koe o fakagalue a auala kolā ne ‵taki atu ei koe ki tau tukuatuga kae papatiso.—KE TUMAU I TE ‵SALA!
E mafai o maua ne te tino sukesuke ki mea tāua i te laukele a tamā aulo i loto i fatu kalā. E isi ne koga i luga i fatu kalā konā, e ‵piki i ei a aulo tāua kolā ko ‵tau ei o keli ki loto ke tapale mai ei te aulo. I te taimi muamua, e mafai o sē lavea te aulo i loto i kaupapa. Kaia? Me i te kaupapa telā e ‵piki ki ei a te aulo e mafai fua o maua i ei se aulo telā e nofo tena ‵mafa ki se 0.3 aunese (10g) i se kaupapa lasi ‵ki. Kae tiga te foliki kae faigata, ki te tino sukesuke mea tāua i te laukele, e aoga eiloa a te keli malosi ki loto.
E manakogina foki a taumafaiga e uke mai tua o te gasolo atu o se tino ki mua mo “akoakoga faigo‵fie e uiga ki a Keliso.” (Epe. 6:1, 2) E ‵tau mo koe o galue malosi ke maua ne koe a manatu ‵fou mo akoakoga tāua mai i au sukesukega ki te Tusi Tapu. Tela la, se a te mea e mafai o fai ne koe ke fakamautinoa aka i ei me i au sukesukega totino ki te Tusi Tapu koi ‵fua mai eiloa i ei a mea aoga, faitalia te uke o tausaga ne tauloto ei koe ki te Tusi Tapu?
Tumau i te loto finafinau ke tauloto. Saga tonu ki fakamatalaga māea. Ke tumau i te taumafai malosi, kae ka maua ne koe a fatu tāua mai i te Tusi Tapu kolā e maua mai ei te poto mo te puipuiga mai i te Atua. (Loma. 11:33) Ke momea aka tou iloaga i te Tusi Tapu, fakaaoga faka‵lei a mea faigaluega kolā e maua i tau ‵gana. Ke ‵sala mo te kufaki ki te fakatakitakiga e manakogina ne koe e penā foki mo tali ki au fesili faka-te-Tusi Tapu. Ke fesili atu ki nisi tino me ne a tusi fai‵tau i te Tusi Tapu mo mataupu kolā ne fesoasoani kae fakamalosi atu ki a latou. Ke fakaasi atu ki nisi tino a manatu ‵gali kolā ne maua ne koe i tau sukesukega ki te Muna a te Atua.
E tonu, a tou fakamoemoega e se ko te momea aka fua o te iloaga tonu. Ne fakamasaua mai te apositolo ko Paulo me i “te iloa tenā e tupu mai ei te fakamatamata.” (1 Koli. 8:1) Tela la, galue malosi ke fakatumau te loto maulalo kae ke malosi te fakatuanaki. A te fai faeloa o tapuakiga a kāiga mo sukesukega totino ki te Tusi Tapu ka fesoasoani atu ki a koe ke ola e ‵tusa mo tulaga o Ieova, kae ka fakamalosi ei koe ke fesoasoani atu foki ki nisi tino. Kae sili i mea katoa, ka fiafia eiloa koe me ne maua ne koe se mea e sili atu i lō aulo.—Faata. 3:13, 14.