E aofia i te Tulafono a Mose se aofaki o fakatonuga ki te faifaiga masani o te faka‵māga kolā e aofia i ei a mataupu e uiga ki sua e ‵sali mai i koga tapu o tagata, te lepela, mo faifaiga ki foitino ‵mate o manu mo tino. E tuku mai foki i ei a fakatonuga e uiga ki te auala e mafai o faka‵ma ei a lailaiga konā. E mafai o fai a te mea tenei e auala i se taulaga, ‵fulu faka‵ma, io me apiapi.—Levi., mata. 11-15; Nume., mata. 19.

Ne fakalasi‵lasi ne Faiakoga o te lotu Iutaia a fakamatalaga e uiga ki tulafono konei. E fai mai se fakamatalaga e tasi me i so se mataupu e uiga ki te sē ‵ma, “e fakafesili ne latou a te auala e mafai ei o maua ne se tino a te masaki, telā e mafai eiloa o ‵pisi atu ki nisi tino, mea faigaluega kolā e mafai o se ‵ma, mo faifaiga faka-te-tapuakiga kolā e manakogina i ei a te ‵ma pakipaki.”

Ne fesili atu a fili o Iesu ki a ia: “Kaia e se tau‵tali ei ou soko ki tuu a tino i aso mua, kae e ‵kai latou mo olotou lima e lai‵lai?” (Male. 7:5) Ne seki fakasino atu a takitaki lotu konei ki te ‵tu ‵mā. E pelā me se faifaiga fakalotu, ne fakatonu atu a faiakoga konei me e ‵tau o ‵ligi atu a vai ki luga i olotou lima a koi tuai latou o ‵kai. Ne toe fakaopoopo mai te fakamatalaga telā mai luga penei: “Ne kinau foki latou e uiga ki mea faigaluega kolā e fakaaoga ke ‵fulu ei a lima, te vaegā vai telā e ‵tau o fakaaoga, te tino telā e ‵tau o ‵ligi ne ia, mo kogā koga o lima e ‵tau o ‵fulu ki te vai.”

Ne faigofie fua te tali ne fai atu ne Iesu ki tulafono katoa kolā ne fai ne tagata. Ne fai atu a ia ki takitaki lotu Iutaia i te senitenali muamua, penei: “Ne fakasino tonu eiloa ki a koutou, tino ‵loi, a te valoaga a Isaia, e pelā eiloa mo ana muna ne tusi: ‘A tino konei e āva mai fua ki a au i olotou gutu, a ko olotou loto e ‵mao ‵ki mai i a au. E seai se aoga e tapuaki mai ei latou ki a au, me e akoako atu ne latou a akoakoga a tāgata.’ Ne tiakina ne koutou a tulafono a te Atua, kae puke ‵mau koutou ki tuu a tāgata.”—Male. 7:6-8.