1. Kaia ne fakatonu atu a te apositolo ko Paulo ki Kelisiano Epelu i te kamataga ke fakamalosi “maise eiloa” te suā tino ki te suā tino?

KAIA e manakogina malosi ei ke fakauke aka a ‵tou taumafaiga ke fakamalosi atu? Ne fakaasi mai ne te apositolo ko Paulo a te pogai i tena tusi ki Kelisiano Epelu. Ne fai atu a ia ki a latou: “Kae ke na mafau‵fau tatou te suā tino ki te suā tino o fakama‵losi atu ke fakatau a‵lofa kae ke fai a mea ‵lei, ke mo a ma ‵galo sāle tatou i fakatasiga, e pelā mo te masani a nisi tino, kae ke fakamalosi atu te suā tino ki te suā tino, kae maise eiloa me ko iloa ne koutou i te aso tenā ko pili mai.” (Epe. 10:24, 25) I loto fua i se lima tausaga, ka mafai o lavea ne Kelisiano Iutaia kolā ne ‵nofo atu i Ielusalema a te “aso o Ieova” telā ka oko mai mo fakailoga kolā ne tuku mai ne Iesu ke ‵tele latou ko te mea ke ‵sao latou mai te fakai tenā. (Galu. 2:19, 20; Luka 21:20-22) A te aso o Ieova tenā ne oko mai i te 70 T.A. i te taimi ne fakaoko atu ei ne Loma a te fakamasinoga a Ieova ki Ielusalema.

2. Kaia e ‵tau i ei mo tatou i aso nei o ‵saga tonu atu o fakamalosi te suā tino ki te suā tino?

² I aso nei, e isi ne pogai e ‵tau ei mo tatou o tali‵tonu me i te “aso . . . sili kae fakamataku” o Ieova ko pili ‵ki eiloa. (Ioe. 2:11) Ne fai mai te  pelofeta ko Sefanaia: “A te aso lasi o Ieova ko pili mai! Ko pili mai kae ko oko eiloa i te vave mai!” (Sefa. 1:14) A te valoaga tenā ne faka‵pula mai e aoga foki mō tatou i aso nei. Ona me ko pili ‵ki mai a te aso o Ieova, ne fai mai a Paulo “ke fakamalosi atu ke fakatau a‵lofa kae fai mea ‵lei.” (Epe. 10:24, fml.) Tela la, e ‵tau eiloa mo tatou o ‵saga tonu atu ki ‵tou taina, ko te mea ke mafai ne tatou o fakamalosi atu ki a latou i so se avanoaga e maua ne tatou.

3. Ne a pati ne fai ne te apositolo ko Paulo e uiga ki fakamalosiga? (Ke onoono ki te ata i te kamataga.)

³ “A te manavase i te loto o se tagata e fai ei ke vāivāi a ia, kae ko pati ‵lei e fakamalosi i ei a te loto.” (Faata. 12:25) A te mea tenei se mea tonu ki a tatou katoa. E manakogina ne tatou katoa a fakamalosiga i so se taimi. Ne fai mai a Paulo me i te tino telā ne tuku atu ki a ia te tiute ke fakamalosi aka a nisi tino e manakogina foki eiloa ne ia ne fakamalosiga. Ki Kelisiano i Loma, ne tusi atu a ia: “Me ko oko eiloa i te fia lavea ne au a koutou, ko te mea ke tuku atu ne au ne meaalofa faka-te-agaga ki a koutou ke ‵mautakitaki ei koutou; io me ke fakatau fakama‵losi aka ei te ‵tou fakatuanaki, ko koutou ki au kae ko au ki a koutou.” (Loma 1:11, 12) E tonu, a Paulo se tokotasi telā ne lasi ‵ki a fakamalosiga ne tuku atu ne ia ki nisi tino, kae ne manako foki eiloa a ia ki ne fakamalosiga ko te mea ke malosi foki a ia.—Faitau te Loma 15:30-32.

4, 5. Ko oi e mafai o fakama‵losi ne tatou i aso nei, kae kaia?

⁴ E ‵tau o fakamālō atu tatou ki a latou kolā ne tuku katoatoa atu a olotou olaga ke tavini tumau latou. E aofia i tino konei ko paenia fakamaoni. E tokouke mai i a latou ne fai a fakama‵fuliga e uke ki olotou olaga ke mafai o paenia latou. E penā foki a latou kolā e fai pelā me ne misionale, mo latou kolā e ga‵lue i Peteli, ovasia o fenua mo olotou avaga, mo latou foki kolā e ga‵lue i ofisa ‵fulitusi. Ne fai ne latou katoa konei a fakama‵fuliga e uke ko te mea ke fakaaoga a olotou taimi e uke i te faiga o te olotou taviniga tapu. E manakogina foki ne latou konei ne fakamalosiga. Kae ko latou foki kolā ne ma‵nako ke fai pelā me ne tino tavini tumau kae e se mafai ne latou o fai penā ona ko olotou fakanofonofoga, e manakogina foki ne latou ne fakamalosiga.

⁵ A taina mo tuagane kolā koi ‵nofo taka, ona me ma‵nako loa latou o a‵vaga “fua i te Aliki” ko fai foki latou pelā me se potukau o tino kolā e manakogina foki ne latou a fakamalosiga. (1 Koli. 7:39) Kae e penā foki a fāfine a‵vaga kolā e ga‵lue malosi e manakogina foki ne latou a pati fakamalosi mai i olotou avaga. (Faata. 31:28, 31) Ke oko foki eiloa ki Kelisiano kolā e tumau i te fakamaoni i fakasauaga io me ko latou kolā ne ma‵saki mo se taimi leva e manakogina foki ne latou ne pati fakamalosi loto ke lagona ne latou. (2 Tesa. 1:3-5) E tumau eiloa o fakama‵losi ne Ieova mo Keliso a tavini fakamaoni katoa konei.—Faitau te 2 Tesalonia 2:16, 17.

6. Ne a galuega a toeaina kolā ne fakaasi mai i te Isaia 32:1, 2?

⁶ Faitau te Isaia 32:1, 2. E fakaaoga ne Iesu Keliso ana taina fakaekegina mo nisi “pelenise” mai i nisi mamoe, ke tuku mai a fakamalosiga mo takitakiga ki a latou kolā e fanoa‵noa kae loto vāivāi i te taimi tenei. Kae e ‵tau foki o fai penā a toeaina, me i toeaina konei e se “pule” ki luga i fakatuanaki o nisi tino, kae “ne tino e ga‵lue fakatasi” mō te ‵lei mo te fia‵fia o olotou taina. —2 Koli. 1:24.

7, 8. E se gata fua i olotou pati fakamalosi e fai, e mafai pefea ne toeaina o fakamalosi atu a nisi tino?

⁷ Ne tuku mai ne te apositolo ko Paulo se fakaakoakoga ke tau‵tali tatou ki ei. Ne tusi atu a ia ki Kelisiano kolā ne fakasauagina i Tesalonia: “Ona ko te motou a‵lofa atafai ki a koutou, ne fia‵fia malosi matou o tuku atu ki a koutou, e se gata fua i te tala ‵lei a te Atua, kae e pelā foki mo omotou ola, me e fakapelepele ne matou a koutou.”—1 Tesa. 2:8.

⁸ Mai te fakaasi atu me e se lava fua i te fai atu o  pati fakamalosi ma‵goi, ne fai atu a Paulo ki toeaina i Efeso, penei: “E ‵tau mo koutou o fesoasoani atu ki a latou kolā e vāi‵vai, kae e ‵tau o masaua ne koutou a pati a te Aliki ko Iesu, kolā ne fai mai: ‘E sili atu te fiafia o te tino telā e tuku atu ana mea i lō te maua ne ia.’” (Galu. 20:35) Ne seki fiafia fua a Paulo o fakamalosi atu ana taina kae ne manako malosi foki eiloa a ia o “fakaaoga” ana mea katoa mō latou. (2 Koli. 12:15) E penā foki eiloa a toeaina, e se ‵tau fua o fakamalosi kae fakamafanafana atu latou ki olotou taina i olotou pati e fai, kae ke fakaasi ‵tonu eiloa ne latou i olotou faiga a te manava‵se tonu o latou ki olotou taina.—1 Koli. 14:3.

9. E mafai pefea ne toeaina o tuku atu a polopolokiga i se auala fakamalosi loto?

⁹ A te fakamalosi atu ki te suā tino e mafai o aofia i ei a polopolokiga, kae i te feitu foki tenei, a toeaina e ‵tau o tau‵tali faka‵lei ki fakaakoakoga i te Tusi Tapu ki te auala e tuku atu ei ne latou a polopolokiga fakamalosi loto ki te tino. E isi se fakaakoakoga gali ‵ki i te feitu tenei ko te mea telā ne fai ne Iesu mai tua o tena mate mo tena toetuga mai te mate. E isi ne polopolokiga tai ‵mafa ne fai ne ia ki nāi fakapotopotoga i Asia Foliki, kae onoono ki te auala ne fai ei ne ia a polopolokiga ki fakapotopotoga konei. Mai mua o tuku atu ne ia a manatu polopoloki, ne fai atu muamua ne ia a pati fakamālō ‵gali ki fakapotopotoga i Efeso, Pelekamo, mo Tuatila. (Faka. 2:1-5, 12, 13, 18, 19) Ne fai atu a ia ki te fakapotopotoga i Laotikaia: “E polopoloki kae fakasala ne au a latou katoa kolā e alofa au ki ei. Tela la, ke loto finafinau kae sala‵mo.” (Faka. 3:19) E ‵tau foki mo toeaina o fakaakoako atu ki a Keliso i te auala e tuku atu ei ne latou polopolokiga.

10. E mafai pefea ne tatou katoa o fakamalosi atu te suā tino ki te suā tino?

¹⁰ A te tuku atu o fakamalosiga e se ko te tiute fua e fai ne toeaina. Ne fakatonu atu a Paulo ki Kelisiano katoa ke fai atu ne latou a “pati ‵lei fua kolā e ati aka ei a tino e ‵tusa mo te mea e manakogina” ne nisi tino. (Efe. 4:29) E ‵tau o matapula‵pula tatou katoa ki mea kolā e “manakogina” ne nisi tino. Ne polopoloki ne Paulo a Kelisiano Epelu: “Ke fakama‵losi aka a lima kolā ko gau‵gau  mo tulivae kolā ko vāi‵vai, kae ke faka‵tonu aka faeloa a auala mō otou vae, ko te mea ke se seke se sokoga ivi o se tino vae masei, kae ke mafai o toe faka‵lei aka.” (Epe. 12:12, 13) A tatou katoa e aofia i ei a tama‵liki, e mafai eiloa o fakamalosi aka te suā tino ne te suā tino ki pati fakama‵losi loto.

11. Se a te fesoasoani ne maua ne Marthe i te taimi ne pokotia ei a ia ne te loto mafatia mō se vaitaimi?

¹¹ A Marthe, * se tuagane telā ne pokotia i te loto mafatia mō se vaitaimi, kae ne tusi mai penei: “E isi se aso ne ‵talo atu au ke maua ne au se fakamalosiga, kae ne fetaui eiloa au mo se tuagane matua telā ne alofa kae atafai mai ki a au, ko te mea eiloa telā ne manakogina malosi ne au i te taimi tenā. Ne fakaasi mai foki ne ia se tala e uiga ki a ia mo se tofotofoga tai ‵pau e pelā eiloa mo te fakalavelave ne tupu ki au, telā ne iloa aka ei ne au me e sē ko au fua tokotasi e fe‵paki mo vaegā fakalavelave penā.” Kāti, a te tuagane matua tenei ne seki iloa ne ia a te aoga mo te ma‵goi o ana pati ne fai ki a Marthe.

12, 13. Ne a auala aoga e mafai ei ne tatou o fakagalue aka a manatu i te Filipi 2:1-4?

¹² Ne tuku atu ne Paulo a manatu fesoasoani konei ki tino katoa i te fakapotopotoga i Filipi: “Tela la, kafai e maua ne koutou se fakamalosiga i a Keliso, kafai e isi se fakamafanafanaga ona ko te alofa, kafai e amanaia a te suā tino ki te suā tino, kafai e isi se alofa mo te alofa atafai, e fakakatoatoa ei toku fiafia mai i te tasi o otou mafaufau mo te tasi o te otou a‵lofa, e fealofani katoatoa, kae e tasi koutou i otou manatu. Ke se fai ne koutou se mea i te loto fakatautau io me ko te fia takutakua, kae i te loto maulalo mo te manatu me e tāua atu a nisi tino i a koutou, ke se onoono fua koutou ki mea e ‵lei ei koutou, kae ki mea foki e ‵lei ei a nisi tino.”—Fili. 2:1-4.

¹³ E tonu, a tatou katoa loa e taumafai malosi o onoono ki manakoga o nisi tino, mai te mauaga o “fakamafanafanaga ona ko te alofa,” mo te “amanaia te suā tino ki te suā tino,” te “alofa mo te atafai” o fakama‵losi atu ki ‵tou taina mo tuagane.

14. Ne a mea e mafai o fai pelā me ne fakamalosiga?

¹⁴ A tala e uiga ki te fakamaoni o latou kolā ne fesoasoani tatou ki a latou i taimi ko ‵teka, e mafai o fai foki pelā me se fakamalosiga ki a tatou, e pelā loa mo lagonaga ne maua ne te apositolo ko Ioane, telā ne tusi mai penei: “E seai se mea e sili atu i toku fiafia ki ei i lō te mea tenei: ke lagona ne au i aku tama‵liki e tumau i te sa‵sale i te munatonu.” (3 Ioa. 4) E fakamaoni foki eiloa ne paenia e tokouke me ne maua ne latou a fakamalosiga i te iloa atu me isi ne tino ne fesoasoani atu latou ki ei ke maua a te munatonu koi fakamaoni eiloa i se fia o tausaga. Kae ko nisi o latou konei koi paenia eiloa. A te ‵toe fakamasaua atu ki te paenia telā ko loto vāivāi a tala ‵gali mua konei, e mafai o fai pelā me se fakamafanafanaga tonu ki a ia.

15. Se a te auala e tasi e mafai ei ne tatou o fakama‵losi atu a latou kolā e fai a te olotou taviniga mo te fakamaoni?

¹⁵ E tokouke a ovasia o fenua ne fai mai ki fakamalosiga ne maua foki ne latou mo olotou avaga mai i tusi fakafetai mo pati fakamālō mai i fakapotopotoga ne āsi latou ki ei. Kae e penā foki loa ki toeaina, misionale, paenia, mo tino i te Peteli kolā ne maua ne latou a pati fakama‵losi loto e uiga ki te taviniga a latou e fai mo te fakamaoni.

16. Ne a mea e manakogina ke mafai ne koe o fakamalosi atu ki te suā tino?

¹⁶ Kāti se mafaufauga ‵se māfai e mafau‵fau tatou me se mafai ne tatou o fakamalosi atu a nisi tino ona me se na ko apo tatou i te faiga o fesokotakiga. A te ‵tonuga loa e se manakogina a mea e uke ke tuku atu ei a fakamalosiga—kāti e mafai o fakamisikata atu fua io me fakatalofa atu koe ki te tino. Kafai e se fakamisikata mai a ia kāti se fakailoaga me isi se fakalavelave, kae ko te fakalogologo atu o tatou mo te amanaia tonu ki te tino tenā, e mafai eiloa o fai pelā me se fakamafanafanaga gali ki a ia.—Iako. 1:19.

17. Ne maua pefea ne te taina talavou tenei a fakamalosiga i te taimi o tena fakalavelave?

 ¹⁷ A Henri, se taina talavou, ne fanoanoa malosi ‵ki a ia i te taimi ne tiaki ei ne tena tamana mo ana kāiga ‵pili ‵ki a te munatonu, kae ko tena tamana se toeaina telā ne āva malosi ki ei a taina. Ne fakamalosi loa a Henri ne te ovasia o fenua telā ne ave ne ia a ia ki se fale ‵kai ke inu ne la ipu kōfe i ei. Kae ne fakaasi katoa ne Henri ki te ovasia o fenua a mea katoa i tena loto. Iloa aka ei ne Henri me i te auala fua e tasi e mafai ne ia o fesoasoani ki tena kāiga ke toe ‵foki mai ki te munatonu ko te taumafai malosi a ia o tumau i te fakamaoni. Ne maua foki ne ia a pati fakamafanafana e uke mai te faitau ki te Salamo 46; Sefanaia 3:17; mo te Maleko 10:29, 30.

18. (a) Ne a mea ne tusi mai ne te Tupu ko Solomona e uiga ki fakamalosiga? (e) Ne a manatu ne fakaasi mai ne te apositolo ko Paulo?

¹⁸ A fakaakoakoga a Marthe mo Henri e fakaasi mai i ei me mafai eiloa ne tatou o fakamalosi atu ki se taina io me se tuagane telā e manako malosi ki ne pati fakamafanafana. A te Tupu ko Solomona ne tusi mai: “Kae ko te pati e faipati atu i te taimi tonu—ko oko eiloa i te ‵lei! A mata fia‵fia e fai ei te loto ke fiafia; A te lipoti ‵lei e fakamalosi i ei a ivi.” (Faata. 15:23, 30, fml.) E se gata i ei, a te fai‵tau ki ‵tou Faleleoleo Maluga io me ko te website a tatou e mafai loa o fai pelā me se fakamalosiga ki se tino telā ko loto vāivāi. Ne fakaasi mai foki ne Paulo me i te usu fakatasi o pese o te Malo e mafai loa o fai pelā me se fakamalosiga. Ne tusi mai a ia: “Tumau i te akoako kae fakamalosi atu te suā tino ki te suā tino i te usuga o salamo, vikiga ki te Atua, ko pese faka-te-agaga kolā e usu atu mo te loto fakafetai, kae ke usu atu mo otou loto kātoa ki a Ieova.”—Kolose 3:16; Galu. 16:25.

19. Kaia ko gasolo aka o tāua malosi a fakamalosiga kolā e tuku atu i se auala alofa kae maise i aso mai mua, kae se a te mea e ‵tau o fai ne tatou?

¹⁹ A fakamalosiga kolā e tuku atu i se auala alofa ko gasolo aka eiloa tāua malosi atu me ko lavea ‵ki loa ne tatou a te “pili mai” o te aso o Ieova. (Epe. 10:25) E pelā mo pati a Paulo ne fai ki ana taina Kelisiano i ana aso, “tumau i te fakamalosi atu te suā tino ki te suā tino, e pelā mo te mea e fai nei ne koutou.”—1 Tesa. 5:11.