E lua a fakauigaga i te ‵fuliga tonu i te ‵gana Epelu. Tela la, e fakavae eiloa a pati kolā ne toe ‵fuli ki manatu fakavae ‵tonu konei mai lalo:

1. Ne ‵fuli te pati e ‵tusa mo te ‵gana mo te tulafono i mea tau ‵gana. A te sokoga o te Salamo 144:12-15 mo fuaiupu kolā mai mua atu e fakalagolago eiloa ki te ‵fuliga o te pati muamua telā ne fakaaoga i te fuaiupu e 12, telā a te pati Epelu ki ei ko te asher. E uke a auala e mafai o ‵fuli ki ei a te pati tenei Asher. E pelā me se fakaakoakoga, e mafai o ‵fuli e pelā me se suinauna, e pelā mo te “telā” io me ko te “kolā.” A te pati “telā” ko te pati ne fakaaoga i te ‵fuliga mua. Tela la, a mea kolā ne taku mai i te fuaiupu e 12 ki te 14 ne fakasino atu eiloa ki tino ma‵sei, kolā ne taku mai i fuaiupu mai mua atu. Kae ko te pati asher e mafai foki o fakauiga ki te ikuga telā e mafai o ‵fuli penei “telā,” “ko te mea ke,” io me “tenā.” A te pati “tenā” ne fakaaoga i te ‵fuliga o te Tusi Tapu telā ne fakafou i te 2013.

2. A te pati telā ne toe ‵fuli e fetaui ‵lei eiloa mo te ‵toega o fuaiupu o te salamo. A te fakaaogaga o te pati “tenā” i te fuaiupu e 12 e fakauiga i ei me i fakamanuiaga kolā e laulau mai i te fuaiupu e 12 ki te 14 e fakasino atu eiloa ki tino amio‵tonu—ko latou kolā e fakamolemole ke ‘faka‵sao kae fakaola latou’ mai tino amio ma‵sei (fuaiupu e 11). A te ‵fuliga tenei e lavea ‵lei atu foki i te fuaiupu e 15, telā a te pati “fia‵fia” e sae fakalua taimi mai i ei i se auala ‵lei io me ‵pau. Tela la, e fakasino atu a te fiafia tenā ki tino eiloa konā—ko latou kolā “e fai a Ieova mo olotou Atua!” Ke masaua foki, me i te ‵fuliga i te ‵gana Epelu e se fakaaoga a fakailoga, e pelā mo fakailoga o pati kolā e siki mai. Tela la, e ‵tau mo tino ‵fulitusi o fakaiku aka a te auala tonu e ‵fuli i ei te pati, kae mafau‵fau ki te ‵fuliga o tusitusiga faka-Epelu i te auala e tusi i ei a kupu, te fakamatalaga kātoa, mo fuaiupu o te Tusi Tapu kolā e ‵pau.

3. A te pati telā ne toe ‵fuli e fetaui ‵lei mo nisi fuaiupu i te Tusi Tapu telā ne folafola mai i ei a fakamanuiaga mō tino fakamaoni o te Atua. Ona ko te fakamafuliga telā ne fai ki te pati ko te asher, ne fakaasi mai i ei ne te faisalamo a te fakamoemoega o Tavita me mai tua o te faka‵saoga ne te Atua a tino Isalaelu mai olotou fili, ne fakamanuia eiloa ne ia e auala i te fiafia mo te manuia. (Levi. 26:9, 10; Teu. 7:13; Sala. 128:1-6) E pelā me se fakaakoakoga, e fai mai te Teutelonome 28:4: “Ka manuia au tama‵liki mo fuataga o tou laukele mo tama a au lafu manu, ko au tamā pulumakau mo tamā mamoe.” E tonu, i te taimi o te pulega a te tama tagata a Tavita ko Solomona, ne maua ne te fenua a te filemu mo te manuia telā ne seki maua muamua ne latou. E se gata i ei, a te vaega o te pulega a Solomona ne fakasino atu loa ki te taimi o te pulega a te Mesia.—1 Tupu 4:20, 21; Sala. 72:1-20.

Tela la, a pati kolā ne fakama‵fuli i te Salamo 144 e se ‵fuli ne ia a te ‵tou malamalama i akoakoga mai te Tusi Tapu. Kae e fakaata faka‵lei mai i ei a pati a te faisalamo kolā e fakasino atu ki te fakamoemoega fakafiafia mō tavini a Ieova—te fakasalaga o tino amio ma‵sei ne te Atua mo te filemu mo te manuia tumau telā ka maua ne tino amio‵tonu.—Sala. 37:10, 11.