I TE tausaga ko teka, e lau i afe o tāgata ne ‵tofigina ke fai pelā me ne toeaina mo tavini fesoasoani i tino Molimau a Ieova i te lalolagi kātoa. Kafai koe se tokotasi o tāgata konā, ko ‵tau eiloa o fiafia koe i tou tofiga fou tenā.

Kae se mea tonu me e mafai eiloa o tai manavase malie koe. Ne fakamatala mai a Jason, se toeaina foliki penei, “I te taimi muamua ne ‵tofi ei au, ne tai poi malie au ki toku tōfiga fou.” A Mose mo Ielemia ne mafau‵fau me e se mafai o maua ne lāua a tōfiga konā mai i a Ieova. (Eso. 4:10; Iele. 1:6) Kafai e penā foki ou lagonaga, e mafai pefea o manumalo koe i ou lagonaga konā kae tumau i te gasolo ki mua? Mafaufau ki te fakaakoakoga a te soko Kelisiano ko Timoteo.—Galu. 16:1-3.

Kāti a Timoteo ko 20 tupu ana tausaga i te taimi ne ‵kami ne te apositolo ko Paulo a ia ke fai pelā mo te soa o ia o olo tasi i te malaga ovasia asiasi. I te taimi muamua, koi talavou ei a ia, ne se lava te loto talitonu o Timoteo ki a ia eiloa mo te sē manako o ia i te taimi muamua ki te tōfiga fou tenā. (1 Timo. 4:11, 12; 2 Timo. 1:1, 2, 7) Kae mai te 10 tausaga mai tua ifo, ne mafai eiloa ne Paulo o fai atu ki te fakapotopotoga i Filipi: “Kae e fakamoemoe au ki te Aliki ko Iesu ke uga atu a Timoteo ki a koutou i se taimi pili mai mua nei . . . Me e seai aka foki se isi tino i konei e ‵pau ana faifaiga mo ia.”—Fili. 2:19, 20.

Ne a mea e fai i ei ke tu ‵kese a Timoteo e pelā me se toeaina? Mafaufau ki auala e ono e mafai o akoako ne koe a ia.

1. E saga faka‵lei atu a ia ki tino. Ne fai atu a Paulo ki taina i Filipi: “E saga faka‵lei atu [a Timoteo] ki mea e uiga ki a koutou.” (Fili. 2:20) Ao, a Timoteo e saga faka‵lei ki tino. E saga tonu atu a ia ki manakoga faka-te-agaga o latou, kae loto fiafia o fakamāumāu atu ana taimi mō latou.

‵Kalo kea‵tea mai te fai pelā me se tino fakateletele pasi telā e manavase fua ki te taimi tonu ke oko atu a ia ki te koga e tu ei a te pasi kae e se saga atu ki pasese kolā e fia ‵sopo i te pasi. Ne fakamalosi ne William, telā ne toeaina mō se 20 tupu tausaga kae ne āva a tino ki a ia, a tāgata kolā fatoa ‵tofigina: “A‵lofa ki taina. ‵Saga ki manakoga ‵tonu o taina i lō a mea fua kolā e fai i loto i te fakapotopotoga.”

2. Ne fakamuamua ne ia a mea faka-te-agaga. Ke fakatusa‵tusa a galuega a Timoteo mo nisi tino, ne fai mai a Paulo: “Me e ‵sala atu eiloa a nisi tino katoa ki mea e ma‵nako latou ki ei kae e se ki mea e manako ki ei a Iesu Keliso.” (Fili. 2:21) Ne tusi eiloa te tusi a Paulo mai Loma. Ne lavea ne ia me i taina i konā ne fakalave‵lave malosi i galuega totino a latou eiloa. Ne oko eiloa latou ki se tulaga vāi‵vai i te feitu faka-te-agaga. Kae e se ko Timoteo! I te taimi ne maua ei ne ia a avanoaga ke fakasalalau atu te tala ‵lei, ne maua eiloa ne ia te kilokiloga tai ‵pau mo Isaia, telā ne fai mai penei: “Tenei au! Uga atu au!”—Isa. 6:8.

E mafai pefea o fakapaleni au galuega totino mo au galuega faka-te-agaga? Ke fakamuamua a mea kola e ‵tau o fakamuamua. “Ke fakamautinoa aka ei . . . a mea kolā e sili atu i te tāua,” ko pati fakamalosi a Paulo. (Fili. 1:10) Ke fakamuamua a mea kolā e fakamuamua ne te Atua. Te lua, ke ola i se  olaga faigofie. Ke ‵kalo kea‵tea mai mea fakamāumāu taimi mo malosi. Ne fakamalosi atu a Paulo ki a Timoteo: “‵Tele kea‵tea mai manakoga masani o talavou, kae kausaki atu ki te amiotonu, te fakatuanaki, te alofa, te filemu.”—2 Timo. 2:22.

3. Ne galue malosi a ia i te taviniga tapu. Ne fakamasaua atu ne Paulo ki te kau Filipi: “Kae e iloa ne koutou a te fakamaoniga telā ne tuku mai ne [Timoteo], me ne ga‵lue fakapologa eiloa māua i te fakatelega ki mua o te tala ‵lei e pelā eiloa me se tama mo tena tamana.” (Fili. 2:22) Ne seki paie a Timoteo. Ne galue malosi a ia i tafa o Paulo, kae ne fakamalosi aka ne te mea tenā lā fesokotakiga.

E uke ‵ki a galuega i te fakapotopotoga a te Atua i ‵tou aso nei. A galuega konā e fakamalie loto kae fai ei ke ‵pili ‵tou fesokotakiga mo ‵tou taina mo tuagane. Tela la, fai ke “uke a ‵tou galuega e fai mō te Aliki.”—1 Koli. 15:58.

4. Ne fakagalue ne ia a mea kolā ne tauloto ne ia. Ne tusi atu a Paulo ki a Timoteo: “Kae ko koe ne tautali fakapilipili atu i aku akoakoga, i te auala e ola ei au, i toku fakamoemoega, i toku fakatuanaki, i toku kufaki, i toku alofa, i toku fa‵ki.” (2 Timo. 3:10) Ona me ne fakagalue ne Timoteo a mea ne tauloto ne ia, ne maua ne ia a nisi tiute e tai uke atu.—1 Koli. 4:17.

E mata, e isi sou taugasoa e matua i te feitu faka-te-agaga e mafai o fakaakoako koe ki ei? Kafai e seai, e mata e mafai o ‵sala ne koe se tino? Ne toe fakamasaua mai a Tom, se toeaina mō tausaga e uke: “Ne saga malosi mai ki a au se toeaina ko matua ‵ki kae akoako faka‵lei ne ia a au. Ne fakamolemole atu faeloa au ke maua ne pati fakatonutonu kae fakagalue aka foki ne au. Ne fakamalosi ne te mea tenā a toku loto talitonu.”

5. Ne fakamasani ne ia a ia eiloa. Ne fakamalosi ne Paulo a Timoteo: “Ke fakamasani koe ki mea e uiga ki te tapuaki fakamaoni ki te Atua.” (1 Timo. 4:7) A te tino tele e manakogina eiloa ne ia se faiakoga, kae e manakogina foki ke akoako foki ne ia a ia eiloa. Ne fakamalosi atu a Paulo ki a Timoteo: “Tumau i te faitau atu i mua o tino katoa, fakamalosi kae akoako atu latou. . . . Mafaufau ‵loto ki mea konei; ke ‵goto ifo ki loto i tou loto ko te mea ke lavea ‵lei ne tino katoa tou gasolo ki mua.”—1 Timo. 4:13-15.

E ‵tau o fakamata faeloa tou atamai. Taumafai ko tou iloaga io me ko tou malamalama faka-te-agaga ke olo tasi mo te mainaga o te fakapotopotoga a Ieova. ‵Kalo keatea mai te loto talitonu malosi ki a koe eiloa—mai te mafaufau me ko uke atu au mea e iloa telā ko se manakogina i ei ke fai ne koe au sukesukega māfai e manakogina ke fai penā. E pelā mo te fakaakoakoga a Timoteo, ke “saga faka‵lei faeloa ki a koe mo au akoakoga.”—1 Timo. 4:16.

6. Ne fakalagolago a ia ki te agaga o Ieova. E uiga ki te galuega talai a Timoteo, ne fakamasaua atu a Paulo ki a ia: “Ke puipui te mea tāua tenei e auala i te agaga tapu telā e nofo i loto i a tatou.” (2 Timo. 1:14) Ke puipui tena galuega talai, ne manakogina ko Timoteo ke fakalagolago ki te agaga o te Atua.

Ne fai mai a Donald, se toeaina mō se fia o tausaga: “E ‵tau o fakatāua ne tāgata kolā ne ‵tofigina a olotou fesokotakiga mo te Atua. A latou kolā e fai penā ka maua ‘ne latou te malosi.’ Kafai e ‵talo atu latou mō te agaga tapu o te Atua kae ati aka a fuataga o te agaga, ka fai eiloa latou e pelā me ne fakamanuiaga ki taina.”—Sala. 84:7; 1 Pe. 4:11.

Se mea fakamalosi loto ke lavea atu me e tokouke a taina ‵fou ne ‵tofigina, e pelā mo koe, ko ga‵solo ki mua. E fai mai a Jason, telā ne fakamatala mai i te kamataga: “I te taimi ne toeaina ei au, e uke a mea ne tauloto ne au kae ne malosi ‵ki toku loto talitonu. Kae nei, ko oko loa toku fiafia ki toku tauliaga kae kilo atu ki ei e pelā me se tauliaga gali ‵ki!”

E mata, ka tumau koe i te gasolo ki mua? Fai e pelā me se fakamoemoega ke tauloto mai i a Timoteo. Ka fai eiloa koe e pelā me se fakamanuiga ki tino o Ieova.