1. Se a te mea e ma‵nako a tavini katoa a te Atua o fai, kae kaia? (Ke onoono ki te ata i te ‵kava.)

NE FAKATONU ne Keliso Iesu ana soko ke “olo, . . . ki fenua katoa o fai a tino i ei mo fai a soko.” (Mata. 28:19) E ma‵nako a tavini fakamaoni katoa a te Atua o tauloto ki te auala ke mafai o “fakataunu katoatoa” a te galuega tenei ne fakatonu atu ke fai ne latou. (2 Timo. 4:5) E tonu, a te galuega tenei e sili atu i te tāua, aoga, kae ko manakogina ke na fai fakavave i lō so se isi galuega i te olaga. Kae e mafai o faigata ke fakauke ‵tou taimi i te galuega talai ki te mea telā e ma‵nako tatou ki ei.

2. Ne a fakalavelave e fe‵paki mo tatou i te fakataunuga o te ‵tou galuega talai?

² E isi aka ne nisi galuega tāua kolā e manakogina i ei ‵tou taimi mo malosi. Kāti e ‵tau o ga‵lue tatou i ‵tou galuega ‵togi mō se fia itula ke maua a tupe e lava mō tausi tatou mo ‵tou kāiga. Kāti e fakafesagai atu foki tatou ki nisi tiute i te kāiga, ko masaki, te loto mafatia, io me ko logo‵maega ona ko te tulaga matua. E mafai pefea o fakataunu katoatoa ne tatou a te ‵tou galuega talai i te taimi e fakafesagai atu foki tatou ki fakanofonofoga faiga‵ta penei?

3. Se a te mea e mafai o fakaiku aka ne tatou mai i pati a Iesu i te Mataio 13:23?

³ Kafai ko fakatapula ne ‵tou fakanofonofoga a te aofaki o taimi e mafai o fakamāumāu ne tatou i te galuega a Ieova, e se ‵tau o loto vāi‵vai tatou. Ne iloa ‵lei ne Iesu me e kese‵kese a fuataga o te Malo e mafai o ‵fua mai ne tino kese‵kese. (Faitau te Mataio 13:23.) E fakatāua malosi ne Ieova a mea katoa e fai ne tatou i tena taviniga, e tāua ki a ia māfai e fai ne tatou te ‵toe mea e mafai o fai. (Epe. 6:10-12) I te suā feitu, e mafai o mafau‵fau tatou me ka fai ne ‵tou fakanofonofoga ke fai ne tatou a mea e uke atu. I te mataupu tenei, ka sau‵tala tatou ki te auala e mafai  o fakamuamua ne tatou a te ‵tou galuega talai i te olaga, tumau i te fakafaigofie ‵tou olaga, kae ke momea aka te ‵lei o te ‵tou galuega talai mo te ata‵mai i te akoako atu. Kae muamua la, se a te uiga ke fakataunu katoatoa a te ‵tou galuega talai?

4. Se a te mea e fakauiga ki ei a te fakataunu katoatoa te ‵tou galuega talai?

⁴ A te ‵tonuga loa, ke fakataunu katoatoa a te ‵tou galuega talai, e ‵tau mo tatou o talai kae akoako atu ki te ‵toe mea e mafai ne tatou o fai. Kae e uke atu a mea e aofia i ei i lō fua te taimi. E tāua ‵ki eiloa ki a Ieova a te pogai e talai ei tatou. Ona ko tatou e a‵lofa ki a Ieova mo ‵tou tuakoi, e ga‵lue eiloa tatou mo te loto kātoa i te ‵tou galuega faka-Kelisiano. * (Male. 12:30, 31; Kolose 3:23) A te tavini atu ki te Atua mo te loto kātoa e aofia i ei a te tuku atu o tatou eiloa, fakaaoga ‵tou malosi ki te mea telā e mafai ne tatou o fai i tena galuega. Kafai e malamalama tatou me se tauliaga ke talai atu, ko taumafai ei tatou o fakasalalau atu a te tala ‵lei ki tino e tokouke.

5-6. Fakamatala mai a te auala e mafai ei ne se tino o fakamuamua a te galuega talai faitalia te uke o nisi mea e ‵tau o fai ne ia.

⁵ Mafaufau aka la ki se tamataene telā e fiafia o tātā kitala. E fiafia a ia o tātā i so se avanoaga e maua ne ia. Fakamuli loa, e maua ne ia se galuega ke tātā i te kitala i se fale‵kai i fakaotiga o vaiaso. Kae e se lava ana mea i tena peofuga. Tela la, e galue foki a ia pelā me se tino fakatau i se sitoa mai te Aso Gafua ki te Aso Lima. E tiga eiloa e uke atu ana taimi e fakamāumāu ke galue i te sitoa, a ko ia e fiafia malosi ki pese tā‵tā i te kitala. E manako a ia ke momea aka tena atamai kae ke fai pelā me se tino fai pese. Tela la, e ‵sala ne ia so se avanoaga io me se taimi toetoe fua ke tātā.

⁶ I se auala tai ‵pau, kāti e se uke a taimi e fakamāumāu ne koe i te galuega talai. Kae tenā eiloa te mea e fiafia malosi koe o fai. E taumafai koe o momea aka te ‵lei o tou atamai ke fakaoko atu te tala ‵lei ki loto o tino. Kae ona ko te uke o nisi galuega aka e ‵tau o fai ne koe, kāti ka mafaufau koe ki te auala e mafai o fakamuamua eiloa ne koe a te galuega talai i tou olaga.

7-8. E mafai pefea o fakaakoako tatou ki te kilokiloga a Iesu e uiga ki te galuega talai?

⁷ Ne tuku mai ne Iesu se fakaakoakoga tu ‵kese i tena kilokiloga ki te galuega talai. A te ‵toe mea tāua i tena olaga ko te faipati atu e uiga ki te Malo o te Atua. (Ioa. 4:34, 35) Ne sasale atu a ia i se fia o maila ke mafai o talai atu ki tino e tokouke. Ne ‵sala faeloa a ia ki so se avanoaga ke faipati atu ki tino i so se koga io me i olotou fale. Ne tuku katoatoa atu ne Iesu a tena olaga kātoa ke fai te galuega talai.

⁸ E mafai ne tatou o fakaakoako ki a Keliso mai te ‵sala atu ki avanoaga e uke ke fai‵pati e uiga ki te tala ‵lei i so se taimi mo so se koga. E loto fia‵fia tatou o tiakina so se mea ke fai ne tatou te galuega a te tino talai. (Male. 6:31-34; 1 Pe. 2:21) Nisi tino i te fakapotopotoga e mafai o tavini atu e pelā me ne paenia fakapito, paenia tumau io me ne paenia lagolago. Nisi ko oti ne tauloto ki se ‵gana fakaa‵tea io me ne ga‵sue atu ki se koga telā e manakogina malosi i ei a tino talai. Kae ko te lasiga o te galuega talai e fai ne tino talai o te Malo kolā e fai ne latou te ‵toe mea e mafai o fai. Faitalia me pefea te foliki io me ko te lasi o ‵tou tusaga e fai, e se fakamoemoe a Ieova ke fai ne tatou a mea kolā e se mafai ne tatou o fai. E manako a ia ke fia‵fia katoa tatou i te ‵tou taviniga tapu i te taimi e folafola atu ei ne tatou a “te ‵malu o te tala ‵lei e uiga ki te Atua fiafia.”—1 Timo. 1:11; Teu. 30:11.

9. (a) Ne fakamuamua pefea ne Paulo a te galuega talai faitalia foki loa me ne ‵tau o isi sena galuega ‵togi? (e) Se a te mea e fakaasi mai i te Galuega 28:16, 30, 31 e uiga ki te kilokiloga a Paulo ki tena galuega talai?

⁹ Ne tuku mai ne te apositolo ko Paulo se fakaakoakoga ‵lei i te fakamuamua ne ia a te galuega talai i tena olaga. I tena nofoga i Kolinito i tena malaga fakamisionale i te lua, ne seki uke ana tupe, kae ne ‵tau o galue a ia i te faitega o faleie. E tiga te feitu tenā, ne seki fakatāua ne Paulo a tena galuega ki te faitega o faleie. Ne galue a ia ko te mea ke ‵lago atu ki a ia i tena galuega talai ko te mea ke mafai o folafola atu ne ia a te tala ‵lei ki te kau Kolinito “e aunoa mo se ‵togi.” (2 Koli. 11:7) E tiga eiloa ne ‵tau o galue a Paulo, ne tumau eiloa i te fakamuamua ne ia a te galuega talai, kae ne talai atu a ia i Sapati katoa. I te taimi ne maua ne ia a tupe e lava ke tausi ei a ia, ne mafai ei o tuku katoatoa atu tena mafaufau ki tena galuega talai. Ne “saga malosi atu a Paulo o folafola a te muna, kae molimau atu foki ki tino Iutaia o fakatalitonu atu i a Iesu ko te Keliso.” (Galu. 18:3-5; 2 Koli. 11:9) Fakamuli ifo, i te taimi ne falepuipui ei a ia i tena fale i Loma mō se lua tausaga, ne talai atu a Paulo ki tino kolā ne asi atu ki a ia kae tusi ana tusi. (Faitau te Galuega 28:16, 30, 31.) Ne fakaiku aka ne Paulo ke mo a ma talia ne ia so se mea ke fakalavelave atu ki tena galuega. Ne tusi mai a ia: “Ona ko te mea ko maua ne matou a te galuega tenei . . . , e se mafai o ‵fiu matou.” (2 Koli. 4:1) E pelā mo Paulo, kafai foki loa e uke ‵tou taimi e fakamāumāu i ‵tou galuega ‵togi, e mafai foki loa o fakamuamua ne tatou a te galuega o te Malo i ‵tou olaga.

10-11. E mafai pefea o fakataunu katoatoa ne tatou a te ‵tou galuega talai māfai e fakamasaki‵saki tatou?

¹⁰ Kafai ko sē mafai o talai atu tatou mai fale ki fale ona ko te tulaga matua io me ko masaki, e mafai foki o aofia tatou i nisi vaega o te galuega talai. Ne talai atu a tino talai i te senitenali muamua ki so se tino i so se koga ne ‵nofo i ei latou. Ne fakaaoga faka‵lei ne latou so se avanoaga ke fai‵pati e uiga ki te munatonu—mai fale ki fale, i so se koga, penā foki mo taimi seki fuafuagina—ki so se tino “e fetaui mo [latou].” (Galu. 17:17; 20:20) Kafai e se mafai ne tatou o sa‵sale, e mafai o saga‵saga tatou i se koga e tokouke i ei a tino kae talai atu ki so se tino telā e sasale mai i ‵tou tafa. Io me e mafai o talai atu tatou i taimi seki fuafuagina, tusi a tusi, io me talai i telefoni. E tokouke a tino talai kolā ko sē mafai o olo mai fale  ki fale ko maua nei ne latou a te fiafia mo te lotomalie mai nisi vaega konei o te galuega talai.

¹¹ Faitalia a te tulaga fakamasakisaki, e mafai eiloa o fakataunu katoatoa ne koe a tau galuega talai. Toe mafaufau aka ki te fakaakoakoga a te apositolo ko Paulo. Ne fai mai a ia: “Me e maua ne au a te malosi i mea katoa e auala i a ia telā ne tuku mai ne ia te ‵mana ki a au.” (Fili. 4:13) Ne manakogina ne Paulo a te malosi tenā i te taimi ne masaki ei a ia i sena malaga fakamisionale e tasi. Ne fakamatala atu ne ia ki te kau Kalatia: “Me e auala i se masaki o te foitino ne maua ei ne au a te avanoaga muamua ke folafola atu ne au te tala ‵lei ki a koutou.” (Kala. 4:13) I se auala tai ‵pau, faitalia te fakamasakisaki, e mafai eiloa o fakaaoga ne koe so se avanoaga ke folafola atu te tala ‵lei ki nisi tino, e pelā mo tokita, nēsi, mo tino tausi o te ola ‵lei. A te tokoukega o tino konei e ga‵lue i te taimi e olo atu ei tatou o talai ki olotou fale.

12. Se a te uiga ke “faigofie” ‵tou ‵kilo?

¹² Ne fai mai a Iesu: “A te moli o te foitino ko mata. Tela la, kafai e ‵saga tonu atu ou mata [io me “faigofie,” fml], ka maina tou foitino kātoa.” (Mata. 6:22) Se a te mea ne fakauiga a ia ki ei? Ne fakauiga a ia me e ‵tau o fakafaigofie ‵tou olaga io me ‵saga tonu atu ki se fakamoemoega e tasi, io me se fuafuaga, ke mo a ma fakalavelave. Ne tuku mai ne Iesu se fakaakoakoga mai te saga tonu atu ki tena galuega talai, kae ne akoako ne ia ana soko ke tumau i te ‵saga tonu atu o tavini ki a Ieova mo Tena Malo. E fakaakoako tatou ki a Iesu mai te ola i se olaga telā e fakamuamua i ei ne tatou te galuega talai i ‵tou olaga, mai te “‵sala muamua faeloa . . . te Malo  [o te Atua]  mo tena amiotonu.”—Mata. 6:33.

13. Se a te mea e mafai o fesoasoani mai ke ‵saga tonu tatou ki te ‵tou galuega talai?

¹³ A te auala e tasi ke ‵saga tonu tatou ki te ‵tou galuega talai, ko te fakafaigofie ‵tou olaga ko te mea ke fakaaoga te ukega o ‵tou taimi ke fesoasoani atu ki nisi tino ke iloa ne latou a Ieova kae a‵lofa ki a ia. * E pelā me se fakaakoakoga, e mata, e mafai o fakamafuli‵fuli ‵tou itula ga‵lue i galuega ‵togi ko te mea ke mafai o uke ‵tou taimi e fakamāumāu i te galuega talai i te vaiaso? E mata, e mafai o fakamu‵tana ne tatou a fakafiafiaga kolā e uke a taimi e fakamāumāu ki ei?

14. Ne a fakama‵fuliga ne fai ne se tauavaga ko te mea ke uke atu a lā taimi i te galuega talai?

¹⁴ Tenei te mea ne fai ne te toeaina ko Elias mo tena avaga. E fakamatala mai a ia: “Ne seki mafai o paenia māua i te taimi tenā, kae e isi ne mea ne mafai ne māua o fai ke uke mā taimi i te galuega talai. Tela la, ne fakatoka ne māua a tamā auala kolā e mafai ei o momea aka te uke o mā taimi i te galuega talai. E pelā mo te ‵kati ifo ki lalo te aofaki o mea kolā e fakamāumāu ki ei mā tupe, penā foki a fakafiafiaga, kae fakamolemole atu ki mā pule ke fakama‵fuli mā taimi ga‵lue ko te mea ke uke atu mā taimi i te galuega talai. Ona ko fakama‵fuliga konā, ne mafai ei ne māua o ‵kau atu ki te galuega talai i afiafi, fai a akoga faka-te-Tusi Tapu e uke, kae ‵kau atu foki fakalua taimi i te masina ki te galuega talai i loto i te vaiaso. Ko oko eiloa i te fia‵fia o māua ki ei!”

15-16. E ‵tusa mo pati i te 1 Timoteo 4:13, 15, e mafai pefea o momea aka faeloa ‵tou ata‵mai e pelā me ne tino talai? (Ke onoono foki ki te pokisi “ Fakamoemoega e Fesoasoani Mai ke Fakataunu Katoatoa ne Au a Taku Galuega Talai.”)

¹⁵ A te suā auala ke fakataunu katoatoa a te ‵tou galuega talai ko te momea aka ‵tou ata‵mai  i te galuega talai. Ke fai pelā me se tino apo i se galuega, e ‵tau o maua ne koe a akoakoga ko te mea ke momea aka ei tou iloa mo tou atamai. E penā foki a tino talai o te Malo. E ‵tau mo tatou o tumau i te tauloto ki te auala ke ata‵mai kae apo malosi i te faiga o te galuega talai.—Faata. 1:5; faitau te 1 Timoteo 4:13, 15.

¹⁶ Kae e mafai pefea o tumau tatou i te ga‵solo ki mua i te ‵tou galuega talai? Mai te ‵saga tonu ki pati fakatonutonu e maua ne tatou mai te fakatasiga ko te ‵Tou Olaga Kelisiano mo te Galuega Talai. E maua ne tatou i te fakatasiga tenei a akoakoga tāua ke fesoasoani mai ke momea aka ‵tou ata‵mai i te galuega talai. E pelā me se fakaakoakoga, kafai ko tuku mai ne te takitaki fono a pati fakatonutonu ki a latou kolā ne fai olotou tōfiga, e mafai o maua ne tatou a manatu fesoasoani ke mafai o momea aka te ‵lei o te ‵tou galuega talai. E mafai o fakaaoga ne tatou a manatu fesoasoani i te suā taimi e talai atu ne tatou te tala ‵lei ki se tino. E mafai o fakamolemole atu tatou ki te ‵tou ovasia o te galuega talai mō se fesoasoani io me ga‵lue fakatasi mo ia io me se tino talai apo, se paenia, io me ko te ovasia o te fenua. Kafai ko apo malosi tatou i te fakaaogaga o mea faigaluega takitasi i te ‵tou Pusa o Mea Faigaluega mo Fai Akoakoga, ka fia‵fia eiloa tatou o talai kae akoako atu a tino e tokouke.

17. Ne a ikuga ‵gali ka maua ne koe māfai e fakataunu katoatoa ne koe a tau galuega talai?

¹⁷ Se tauliaga eiloa ke talia ne Ieova tatou ke fai mo ana “tino ga‵lue”! (1 Koli. 3:9) Kafai e ‘fakamautinoa aka ne koe a mea kolā e sili atu i te tāua’ kae saga tonu atu ki te galuega talai, ka “tavini atu [koe] ki a Ieova mo te fiafia.” (Fili. 1:10; Sala. 100:2) E pelā me se tokotasi o tino talai a te Atua, e mafai o loto talitonu koe me ka tuku mai ne ia te malosi e manakogina ke fakataunu katoatoa ne koe tau galuega talai faitalia a mea faiga‵ta io me ko tapulā o koe. (2 Koli. 4:1, 7; 6:4) Faitalia te foliki io me ko te lasi o tou tusaga e fai i te galuega talai e ‵tusa mo ou fakanofonofoga, e mafai eiloa “o isi se pogai ke fiafia” koe māfai e fai ne koe mo tou loto kātoa. (Kala. 6:4) Kafai ko fakataunu katoatoa ne koe tau galuega talai, ko fakaasi atu ne koe tou alofa ki a Ieova mo tino katoa. “Kafai e fai ne koe a mea konei ka fakasao ne koe a koe eiloa mo latou kolā e faka‵logo ki a koe.”—1 Timo. 4:16.