E fakaasi manino mai i te Tusi Tapu me e mafai o ‵valo mai ne Ieova a mea ka ‵tupu i aso mai mua. (Isa. 45:21) Kae e se fakaasi mai i ei a fakamatalaga katoa e uiga ki te auala io me ko te taimi e fai ei a ia penā io me ko te uke o mea e iloa ne ia. Tela la, e se mafai o iloa ne tatou a mea katoa e uiga ki te atamai o Ieova ke ‵valo mai ne ia a mea ka ‵tupu i aso mai mua. Kae e isi ne nāi mea e iloa ne tatou e uiga ki ei.

E seai se tapulā ki mea e mafai ne Ieova o fai vaganā ko mea kolā e filifili ke se fai ne ia. Ona ko tena poto telā e seai sena tapulā, e mafai fua o ‵valo mai ne ia so se mea e manako a ia ki ei. (Loma 11:33) Kae ona ko te ‵lei katoatoa o tena loto pulea, e mafai foki o filifili a ia ke se iloa ne ia a mea kolā ka ‵tupu.—Fakatusa ki te Isaia 42:14.

E fai ne Ieova so se mea ke fakataunu tena loto. E fesoasoani mai pefea te manatu tenā ke malama‵lama tatou i tena atamai ke ‵valo a mea ka ‵tupu i aso mai mua? E fai mai te Isaia 46:10: “Ne ‵valo ne au te mea ka tupu  mai te kamataga, mo mea kolā e seki fai ne au mai i aso mua eiloa. Aku muna, ‘A taku fakaikuga ka tumau eiloa, kae ka fai ne au so se mea e manako au ki ei.’”

A te pogai e tasi e mafai ei ne Ieova o ‵valo mai a mea ka ‵tupu i aso mai mua, me isi sena malosi o fai ke ‵tupu a mea. E se manakogina ke fia iloa fakavave ne ia a mea ka ‵tupu i aso mai mua e pelā eiloa māfai ko onoono tatou ki se ata vitio kae fia iloa fakavave a mea ka ‵tupu i te fakaotiga o te ata. I lō te fai penā, e mafai o fakaiku aka ne Ieova a te taimi tonu ka tupu i ei se mea, ko fai ei ne ia ke taunu te mea tenā māfai ko oko mai te taimi tenā.—Eso. 9:​5, 6; Mata. 24:36; Galu. 17:31.

Ona ko te pogai tenei, e fakaaoga i te Tusi Tapu a vaegā pati pelā mo te “fakatoka,” “fai,” mo te “fuafua” ke fakamatala mai a mea e fai ne Ieova e uiga ki nisi mea ka ‵tupu i aso mai mua. (2 Tupu 19:25; fml.; Isa. 46:11) A pati konei ne ‵fuli mai se pati Epelu telā e isi sena sokoga ki te pati “tino faite mea ki kele.” (Iele. 18:4) E pelā mo te poto o te tino faite mea ki kele ke fakafoliga ne ia a kele ki se tū teu gali, e mafai ne Ieova o fakamafulifuli io me fakagaligali a mea ke fakataunu i ei a tena loto.—Efe. 1:11.

E talia ne Ieova ke fai ne tino olotou filifiliga totino. E se fakaiku aka ne Ieova a mea ka ‵tupu ki olaga o tino taki tokotasi i aso mai mua; io me fai ne ia a tino loto ‵lei ke fai ne latou se mea telā ka iku atu ki te lotou fakaseaiga. Ne talia ne ia ke fai ne tino katoa a olotou filifiliga ki te auala e ola ei latou, kae e akoako ne ia latou ki te auala tonu e ‵tau o ola i ei.

Mafaufau ki fakaakoakoga e lua. Muamua la ko tino Nineva. Ne ‵valo mai a Ieova me ka fakaseai atu a te fakai tenā ona ko olotou amioga ma‵sei. Kae i te taimi ne sala‵mo ei, ne “toe mafaufau a ia [Ieova] ki te fakalavelave telā ne fai a ia ke fakaoko atu ki luga i a latou, kae ne seki fakaoko atu ne ia.” (Iona 3:​1-10) Ne ‵fuli te mafaufau o Ieova e uiga ki te mea telā ne ‵valo muamua ne ia, ona ko te filifiliga a te kau Nineva ke ‵saga atu mo te sala‵mo ki te faka‵pulaga a Ieova ki a latou.

A te lua o fakaakoakoga ko te valoaga e uiga ki te toa ko Kulesa, telā ka fakasaoloto ne ia a tino Iutaia mai te ‵nofo fakapagota kae fakatonu atu ke toe faite a te faletapu o Ieova. (Isa. 44:26–45:4) Ne fakataunu ne te tupu o Pelesia ko Kulesa a te valoaga tenā. (Esela 1:​1-4) Kae ko Kulesa ne seki tapuaki ki te Atua tonu. Ne fakaaoga ne Ieova a Kulesa ke fakataunu se valoaga kae ne talia loa ne ia ke fai ne Kulesa tena filifiliga totino e uiga ki te tino e tapuaki a ia ki ei.—Faata. 21:1.

E tonu, a mea nei ne nāi mea fua e mafaufau a Ieova ki ei māfai ko ‵valo mai ne ia a mea ka ‵tupu i aso mai mua. A te ‵tonuga loa, e seai se tino e mafai o malamalama katoatoa i auala o Ieova. (Isa. 55:​8, 9) Kae ko mea ne fai ne Ieova e fakamalosi i ei ‵tou fakatuanaki me e fai faeloa ne ia te ‵toe mea ‵lei —e aofia i ei a mea kolā e ‵valo mai ne ia me ka ‵tupu i aso mai mua.