I TE Aso Tolu, Ianuali 18, 2023, ne sae mai se faka‵pulaga fakapito i te jw.org, me i Taina ko Gage Fleegle mo Jeffrey Winder ko oti ne ‵tofi aka e pelā me ne sui o te Potukau Pule o Molimau a Ieova. A taina e tokolua konei ne tavini atu ki a Ieova mo te fakamaoni mō se taimi leva.

Ne puti aka a te Taina ko Fleegle i te feitu ki saegala o Pennsylvania, U.S.A., i te munatonu ne ana mātua kolā e ma‵taku ki te Atua. I te taimi koi talavou ei a ia, ne olo atu tena kāiga o ‵nofo i se fakai foliki telā ne lasi te manakoga mō tino talai i ei. E seki leva, kae papatiso a ia i a Novema 20, 1988.

Ne fakamalosi faeloa a te Taina ko Fleegle ne ana mātua ke kau atu ki te taviniga tumau. Ne ‵kami faeloa ne lāua a ovasia o te seketi mo tino ga‵lue i te Peteli ki te lotou fale, kae ne lavea ne te Taina ko Fleegle a te fia‵fia o taina mo tuagane konei. I tena otiga ne papatiso, e se leva, kae kamata o paenia tumau a ia—i a Setema 1, 1989. I se lua tausaga fakamuli ifo, ne taunu tena fakamoemoega telā ne fakatoka ne ia a koi 12 ana tausaga—ke tavini atu i te Peteli. Ne kamata tena taviniga i te Peteli i Brooklyn i a Oketopa 1991.

I te Peteli, ne galue a te Taina ko Fleegle i te Bindery mō se valu tausaga, mai mua o ‵tofi a ia ke galue i te Matagaluega o te Galuega Talai. I te taimi tenā, ne tavini atu a ia i te fakapotopotoga i te ‵gana Lusia mō ne nāi tausaga. I te 2006, ne avaga a ia ki a Nadia, telā ne tavini tasi mo ia i te Peteli. Ne tavini fakatasi lāua i fakapotopotoga e fai‵pati ki te ‵gana Portuguese kae tavini atu mō se sefulu tupu tausaga i fakapotopotoga e fai‵pati ki te ‵gana Sepania. Mai tua o tausaga e uke i te Matagaluega o te Galuega Talai, ne ‵tofi aka a te Taina ko Fleegle ke galue i te Ofisa o te Komiti o Akoakoga kae fakamuli i te Ofisa o te Komiti o te Galuega Talai. I a Mati 2022, ne ‵tofi aka a ia e pelā me se tino fesoasoani ki te Komiti o te Galuega Talai a te Potukau Pule.

 A te Taina ko Winder ne tupu aka i Murrieta, California, U.S.A. Ne puti aka a ia i te munatonu ne ana mātua, kae ne papatiso i a Mati 29, 1986. I te masina mai tua, ne paenia lagolago tou tagata kae ne gali ‵ki ki a ia, telā ne manako loa a ia o faka‵soko tena paenia. Mai tua o nāi masina ne paenia lagolago ei a ia, ne kamata o paenia tumau a ia i a Oketopa 1, 1986.

E pelā me se talavou, ne asi atu a te Taina ko Winder ki ana taina ma‵tua e tokolua kolā e tavini i te Peteli i te taimi tenā. Ne fai ne te asiga tenā ke isi se manakoga i a ia o galue i te Peteli māfai a ia ko matua. Kae i a Me 1990, ne ‵kami a ia ke tavini atu i te Peteli i Wallkill.

I te Peteli, ne galue a te Taina ko Winder i matagaluega kese‵kese, e aofia i ei a te Matagaluega o te Tu ‵Ma, te Farm Department mo te Ofisa o te Peteli. Ne avaga a ia ki a Angela, i te 1997, kae ne tavini fakatasi atu lāua i te Peteli talu mai i te taimi tenā. I te 2014, ne ave lāua ki Warwick, telā ne fesoasoani atu te Taina ko Winder i te faitega o ofisa i te ‵tou laumua. I te 2016, ne olo atu lāua ki te Watchtower Educational Center i Patterson, telā ne galue te Taina ko Winder i te Matagaluega Puke Leo/Vitio. Fa tausaga mai tua, ne toe ‵foki lāua ki Warwick, kae ne ‵tofi aka a te Taina ko Winder ke galue i te Ofisa o te Komiti o Tino Ga‵lue i te Peteli. I a Mati 2022, ne ‵tofi aka a ia e pelā me se taina fesoasoani ki te Komiti o Tino Ga‵lue i te Peteli a te Potukau Pule.

E ‵talo tatou ke fakamanuia eiloa ne Ieova a “tāgata konei e pelā me ne meaalofa” i te taimi e tumau ei lāua i te ga‵lue malosi mō manakoga o te Malo.—Efe. 4:8.